توسەك تارتىپ 3 اي ەمدەلۋدەن شينجياڭنىڭ جارتىلاي مارافون جارىسىنىڭ رەكوردىن جاڭالاۋعا دەيىن

توعىزتاراۋلىق ازامات ”قۇلشىنعانعا قۇت ٴۇيىر“ دەگەندى ناقتى امالياتى ارقىلى دالەلدەدى

جاماعات شاربەك ۇلى، ليۋ چۇنشيڭ (ٴوز تىلشىلەرىمىز)

3 - ايدىڭ 30 - كۇنى 2024 - جىلعى ميشان دۇڭپو جارتىلاي مارافون جارىسى جانە ”سىچۋاندى ارالاپ شىعۋ“ جەلىلەس جارىسىندا (دۇڭپو بەكەتى) ىلە توعىزتاراۋ اۋدانىنىڭ ازاماتى باعدار ورازالى ۇلى 1 ساعات 6 مينۋت 8 سەكۋندتىق ناتيجەمەن اعا جۇلدەگەر بولدى.

3 - ايدىڭ 31 - كۇنى 2024 - جىلعى زىگۇڭ جارتىلاي مارافون جارىسى جانە ”سىچۋاندى ارالاپ شىعۋ“ زىگۇڭ بەكەتىندە ”وكشەلەي“ جۇگىرگەن باعدار 1 ساعات 10 مينۋت 17 سەكۋندتىق ناتيجەمەن  جۇلدەگەر بولدى.

4 - ايدىڭ 6 - كۇنى 2024 - جىلعى چۇڭچيڭ ۋانجوۋ كولىن اينالۋ مارافون جارىسىندا باعدار 1 ساعات 6 مينۋت 6 سەكۋندتىق ناتيجەمەن كىشى جۇلدەگەر بولدى.

...

بوكسكە قىزىعۋدان مارافون جارىسىنا دەيىن، شينجياڭ جەڭىل اتلەتيكا كومانداسىنا كىرۋدەن كوماندادان شەگىنگەنگە دەيىن، توسەك تارتىپ 3 اي ەمدەلۋدەن شينجياڭنىڭ جارتىلاي مارافون جارىسىنىڭ رەكوردىن جاڭالاۋعا دەيىن سۇرىنسە دە سۇلكىنىن تۇسىرمەي، ٴسۇرىنىپ ٴجۇرىپ جەر تانىدى، باعدار مارافون جارىسىندا باستان - اياق جىگەرلى بولدى. تاباندىلىقپەن تابىسقا تالپىنىپ، ”قۇلشىنعانعا قۇت ٴۇيىر“ دەگەندى ناقتى امالياتى ارقىلى دالەلدەدى.

     بوكستەن جەڭىل اتلەتيكاعا بەت بۇردى

ەڭ جاقسى كورەتىن بوكستەن ٴۋاز كەشىپ، جەڭىل اتلەتيكانىڭ ورتا، ۇزاق ارالىققا جۇگىرۋ تۇرىنە ”زورلانۋ“ بـاستـابىندا باعداردى قاتتى قينايدى.

بيىل 27 جاستاعى باعدار توعىزتاراۋ اۋدانى ٴدوڭمالى قالاشىعى كارسىنبۇلاق قىستاعىنىڭ تۋماسى. كىشكەنتاي كەزىندەگى ەڭ ۇلكەن ارمانى بوكسشى بولۋ ەدى. بوكس جاتتىعۋى وتە مىعىم دەنە قۋاتىن قاجەت ەتەتىندىكتەن باستاۋىش مەكتەپتىڭ 2 - جىلدىعىنان باستاپ ساباقتاستارى مەكتەپكە ۆەلوسيپەتپەن بارىپ - قايتسا، ول جاياۋ جۇگىرىپ بارىپ - كەلەتىن. ”ۇيدەن مەكتەپكە دەيىن 3 شاقىرىم جول، بىردەمدە جەتىپ باراتىنمىن“ دەيدى باعدار.

مۇنداي ەرەكشە جاتتىعۋ باعداردىڭ ۇزاققا جۇگىرۋ ناتيجەسىن جەدەل جوعارىلاتتى. دەسە دە باستاۋىش مەكتەپتىڭ 2 - جىلدىعىندا مەكتەپتە وتكىزىلگەن 1500 مەترلىك ۇزاققا جۇگىرۋ جارىسىندا باعدار نە بارى 12 - بولادى. سودان باستاپ جاتتىعۋدى ٴتىپتى دە كۇشەيتكەن ول 3 - جىلدىق وقىپ جاتقاندا مەكتەپ دەنە تاربيە جارىسىنداعى ورتا، ۇزاق ارالىققا جۇگىرۋدىڭ ”مايتالمانىنا“ اينالادى.

دەگەنمەن باعدار باياعىداي بوكستى جاقسى كورەتىن - دى. 2010 - جىلى ىلە وبلىستىق دەنە تاربيە مەكتەبى توعىزتاراۋ اۋدانىنان وقۋشى قابىلداعاندا باعدار بوكسكە تىزىمدەلگەن بولاتىن، ٴبىراق بۇعان شەشەسى قوسىلماعاندىقتان امالسىزدان ورتا، ۇزاق ارالىققا جۇگىرۋدى تاڭدايدى. 3 جىلدان كەيىن شينجياڭ بويىنشا جەڭىل اتلەتيكا جارىسىندا اعا جۇلدەگەر بولعان ول ىلگەرىلەي شينجياڭ جەڭىل اتلەتيكا كومانداسىنا تاڭدالىپ، جاپالى جاتتىعۋدان ٴساتتى ٴوتتى. الايدا ول كومانداداعى ەڭ ۇزدىك مۇشە ەمەس ەدى، شينجياڭ كومانداسىندا 5 جىل تۇرعاننان كەيىن 2018 - جىلى ول كوماندادان شەگىنۋگە بەكيدى.

سۇيىكتى جارىس الاڭىمەن قوشتاسىپ، اۋىلىنا قايتىپ كەلگەن باعدار ٴبىر مەزەت ٴارى - ٴسارى بولىپ جۇرەدى. كوپ وتپەي ول شينجياڭ جۇيرۇڭ ەنەرگيا توبى شەكتى سەرىكتەستىگىنىڭ باس جوراسى لين رۇڭشىڭنىڭ تەلەفونىن قابىلدايدى. لين رۇڭشىڭ باعدارعا بەيجيڭگە بارىپ جاپالى جاتتىعىپ، جالعاستى ارمان قۋۋىن قولدايتىندىعىن ايتادى. 2018 - جىلدان باستاپ باعدار ەل ىشىندەگى ٴتۇرلى مارافوندارعا قاتىناسا باستايدى ٴارى نەداۋىر جاقسى ناتيجەگە قول جەتكىزەدى.

ارمان اداستىرمايدى. قازىرگە دەيىن جۇڭگونىڭ كاسىپتىك مارافون جارىسى سپورتشىسىنا اينالىپ ۇلگىرگەن باعدار ٴالى دە سول بوكستى ۇمىتپاي، ەل ٴىشى - سىرتىنداعى بوكس جارىستارىنا نازار اۋدارىپ كەلەدى. ”ەگەر مارافون جارىسىنان شەگىنسەم، بوكسكە جاتتىعامىن“ دەيدى ول.

اۋىرىپ تۇردى، اۋناپ تۇردى

مارافون جارىسىنا قايتا جاتتىعىپ، ايتۋلى ناتيجە جاراتتى.

2018 ـ جىلى 8 ـ ايدىڭ 19 ـ كۇنى 2018 ـ جىلعى گۋانتيڭحۋ سازىنداعى جارتىلاي مارافون جارىسىندا باعدار ورازالى ۇلى 1 ساعات 11 مينۋت 16 سەكۋندتىق ناتيجەمەن ەرلەر گرۋپپاسىنىڭ اعا جۇلدەگەرى بولدى؛ 2018 ـ جىلى 11 ـ ايدىڭ 4 ـ كۇنى 2018 ـ جىلعى حىزى دۇڭميڭ حۋاڭحى ەكولوگياسى مارافون جارىسىندا ول 2 ساعات 30 مينۋت 12 سەكۋندتىق ناتيجەمەن ەرلەردىڭ تولىق مارافون جارىسىندا اعا جۇلدەگەر بولدى؛ 2019 - جىلى 6 - ايدىڭ 30 - كۇنى 2019 - جىلعى شينجياڭ جەمسارى تيانشان مارافون جارىسىندا ول 2 ساعات 32 مينۋت 43 سەكۋندتىق ناتيجەمەن ەرلەر گرۋپپاسى بويىنشا اعا جۇلدەگەر بولدى؛ 2019 - جىلى 10 - ايدىڭ 20 - كۇنى ”كۇمىس ايداعار“ ساۋىتى حىجيانشىجيڭ حالىقارالىق مارافون جارىسىندا ول 1 ساعات 11 مينۋت 16 سەكۋندتىق ناتيجەمەن جارتىلاي مارافون جارىسىنىڭ ەرلەر گرۋپپاسى بويىنشا اعا جۇلدەگەر بولدى؛ 2022 - جىلى 11 - ايدىڭ 20 - كۇنى 2022 - جىلعى حاڭجوۋ جالپى مارافون جارىسىنىڭ ەرلەر گرۋپپاسىندا ول 2 ساعات 17 مينۋت 26 سەكۋندتىق ناتيجەمەن جۇلدەگەر بولىپ، تىنباي تابىس تورىنەن كورىنىپ كەلدى.

باعدار ورازالى ۇلى قاجىماي - تالماي ابدەن جاتتىعىپ، كەلەسى جارىسقا قاتىناساتىن كەزدە ويلاماعان جەردەن تاعدىر وعان قىرىن قاباق تانىتتى. 2022 - جىلدىڭ سوڭىنا تاياۋ باعدار سالماقتى ناۋقاسقا شالدىعىپ، 3 ايدان استام ۋاقىت اۋرۋمەن الپارىستى. ”جاتتىعۋ بىلاي تۇرسىن توسەكتەن ٴتۇسۋىم مۇڭ بولىپ، قاتتى قينالدىم، جارىس مايدانىنا ەندىگارى قايتا ورالۋىم مۇمكىن ەمەس شىعار دەگەن ويعا كەلگەندە ٴۇمىت ٴۇزۋدىڭ نە ەكەنىن تۇڭعىش سەزىندىم“ دەدى باعدار.

بىلتىر 3 - ايدىڭ 19 - كۇنى ۋشي مارافون جارىسىندا باعداردىڭ ىلە وبلىستىق دەنە تاربيە مەكتەبى مەن شينجياڭ جەڭىل اتلەتيكا كومانداسىنداعى ارىپتەسى تىلەۋقابىل تولەۋقان ۇلى 2 ساعات 12 مينۋت 46 سەكۋندتىق ناتيجەمەن شينجياڭنىڭ مارافون جارىسىنىڭ جاڭا رەكوردىن جاراتىپ، شينجياڭنان مارافون جارىسىنا قاتىناسۋعا لايىق حالىقارالىق ساڭلاق دەڭگەيىندەگى تۇڭعىش ەر سپورتشىعا اينالدى. بۇل باعداردىڭ جىگەرىن قايتا جانىدى. ول: ”تاعدىر وزىنە باس يگەن ادامدى كوزگە ىلمەيدى“ دەدى.

5 - ايدىڭ 1 - كۇنىنەن باستاپ باعدار دەنساۋلىعىن قالپىنا كەلتىرۋ جاتتىعۋىن باستادى، جاعدايى دا كۇن سايىن جاقسارا ٴتۇستى. 5 - ايدىڭ 20 - كۇنى ول 1 ساعات 15 مينۋت 35 سەكۋندتىق ناتيجەمەن فۋجيان - ماناس سۇيىسپەنشىلىگى · 2 - كەزەكتى باجياحۋ سازدىعىن اينالىپ شىعۋ مارافون جارىسى ەرلەر گرۋپپاسىنىڭ جارتىلاي مارافون جارىسىندا اعا جۇلدەگەر بولدى. قايراتىنا قايتا مىنگەن ول 5 - ايدىڭ 21 - كۇنى جەمسارى مارافون جارىسىنا قاتىناستى. الايدا، 30 سەلتسي گرادۋستان اساتىن ىستىقتا ول 32 كيلومەتردەن سوڭ جارىستان ٴوز ەركىمەن شەگىندى. ويتكەنى سالماقتى ناۋقاستان ەندى عانا ساۋىققان ول ٴۇرتىس جوعارى كۇشەمەلىلىكتەگى جارىسقا ٴبىر مەزەت ۇيلەسە المادى.

باعدار ”سول كەزدە باسىم قاتتى ايلانعاندىقتان جارىستان شەگىنۋىمە تۋرا كەلدى. الدىڭعى قارقىنىم جاقسى ەدى، ەگەر تاباندىلىقپەن جالعاستىرسام، حالىقارالىق دارەجەدەگى ساڭلاق دەڭگەيىنە جەتۋىم ابدەن مۇمكىن عوي، قايتىپ بارىپ جاتتىعۋىمدى كۇشەيتپەيمىن بە دەگەن ويعا كەلدىم“ دەپ ٴۇنحات دوستار شەڭبەرىنە  ينفورماتسيا جولداعان ول وزىنە سەنىمدى تۇردە شابىت بەردى.

«ەر سۇرىنبەي ەل تانىماس، ات سۇرىنبەي جەر تانىماس» دەگەندەي، قيىنشىلىق كورگەندە عانا ۇدەرە العا تارتۋعا بولادى. ول كاسىبىن قىزۋ سۇيەتىندىكتەن بۇگىنگە دەيىن جالعاستىرىپ كەلەدى.

شينجياڭنىڭ جارتىلاي مارافون جارىسىنىڭ رەكوردىن جاڭالادى

اتا مەكەنىندەگى مارافون جارىسىندا دا باعدار ٴوز رولىن ساۋلەلەندىردى.

2023 - جىلى 10 - ايدىڭ 1 - كۇنى 2023 - جىلعى شينجياڭ كۇيتۇن جارتىلاي مارافون جارىسىندا ول 1 ساعات 7 مينۋت 17 سەكۋندتىق ناتيجەمەن كىشى جۇلدەگەر بولدى. 10  ـ ايدىڭ 29 ـ كۇنى ”قۇلجاعا ماحاببات“ اتىنداعى 2023 ـ جىلعى ىلە وزەنى مارافون جارىسىندا ول 2 ساعات 22 مينۋت 46 سەكۋندتىق ناتيجەمەن تولىق مارافون جارىسىنىڭ ەرلەر گرۋپپاسىندا جۇلدەگەر بولدى.

وسىدان كەيىن ٴوزىنىڭ ناتيجەسىن جوعارىلاتۋ ٴۇشىن باعدار باسقا دا كوپتەگەن شينجياڭ ساڭلاقتارى قاتارىندا يۇننان ۇستىرتىنە بارىپ جاتتىعۋ جاسادى. مەزگىل سايىن ٴبىر جارىسقا قاتىناسۋ، جارىستىڭ ٴوزىن جاتتىعۋ دەپ ٴبىلۋ ونىڭ قالىپتى داعدىسىنا اينالعان - دى.

قۋانىشتىڭ ۇلكەنى بيىل بولدى. 2 - ايدىڭ 25 - كۇنى 2024 - جىلعى مەملەكەتتىك جارتىلاي مارافون جـۇلدەلى جارىسىنـدا(1 - ايالداما) جانـە 7 - كەزەكتى شينلي ميشان رىنشوۋ جارتىلاي مارافون . سىچۋان (ميشان ايالداماسى) جارىسىندا باعدار 1 ساعات 3 مينۋت 49 سەكۋندتىق ناتيجەمەن شينجياڭ شەبەرلەرىنىڭ جارتىلاي مارافون جارىسىندا جاقسى ناتيجە جاراتتى. وسىنىڭ الدىندا شينجياڭ ساڭلاقتارىنىڭ جارتىلاي مارافون جارىسىندا قول جەتكىزگەن ناتيجەسى بولسا، ول ىلەدەن كەلگەن شالقار نۇرجۇما ۇلىنىڭ 2023 ـ جىلعى شىحىزى تۇڭعىش كەزەكتى جارتىلاي مارافون جارىسىنداعى 1 ساعات 5 مينۋت 6 سەكۋندتىق ناتيجەسى ەدى.

شينجياڭنىڭ جارتىلاي مارافون جارىسىندا ەل ىشىندەگى نە ٴبىر جەل اياقتار باس قوسقاندىقتان باسەكە ەرەكشە قيان - كەسكى بولدى، شيزاڭنان كەلگەن زاشيسىرىن 1 ساعات 1 مينۋت 57 سەكۋندتىق ناتيجەمەن اعا جۇلدەگەر بولدى ٴارى جۇڭگو ەرلەرىنىڭ جارتىلاي مارافون جارىسىنىڭ رەكوردىن جاڭالادى. وسىندايدا ول اۋەلگىسىندەگىدەي جايدارى بەينەدە: ”جارتىلاي مارافون جارىسىنىڭ ناتيجەسى زور دارەجەدە جوعارىلادى، شينجياڭنىڭ ەڭ جاقسى ناتيجەسىن جاراتتىق، الداعى جەردە ۇزدىكسىز قۇلشىنامىز“ دەدى.

3 - ايدىڭ 30 -، 31 - كۇندەرى جانە 4 - ايدىڭ 6 - كۇندەرى باعدار ەل ىشىندە 3 ٴتۇر بويىنشا جارتىلاي مارافون جارىسىنا قاتىناسىپ، جەكە - جەكە اعا جۇلدەگەر، جۇلدەگەر، كىشى جۇلدەگەر بولدى. مۇنىڭ ىشىندە ادامدى سۇيىندىرەتىنى دۇڭپو بەكەتىندەگى جارىستا باعدار سوڭعى ساتتە اينالما جولدا اۆتوكولىكتەن اسىپ، كەنيالىق جۇيرىكتەن وزىپ اعا جۇلدەگەر بولىپ، سانسىز توراپتاستاردىڭ القاۋىنا، شابىتتاندىرۋىنا يە بولىپ، تاياۋ مەزگىلدەگى جۇڭگونىڭ مارافون جارىسىنىڭ ەڭ جوعارى كلاسسيكالىق ۇلگىسىنە اينالدى.

ٴتىلشىنىڭ ”توقتاۋسىز جارىسقا ٴتۇسىپ كەلەسىڭ، شارشامايسىڭ با؟“ - دەگەن سۇراۋىنا ”ارينە شارشايمىن، الايدا ادەتتـەگى جاتتىعۋدىڭ ٴوزى دە وسىلاي، تاباندىلىقپەن جالىقپاي جاتتىققاندا عانا تابىسقا جەتۋگە بولادى“، - دەپ باعدار كوڭىلدى تۇردە جاۋاپ بەردى. ول تىلشىگە بىلاي دەدى: ”الداعى جەردە قاتىناسۋعا ٴتيىستى كوپتەگەن جارىستارىم بار، نەگىزىنەن، اپتا سايىن بولادى، وسى كەزدە قۇلشىنا جۇگىرمەسەك، ەندى قاي كەزدە جۇگىرەمىز؟“

قۇلشىنعانعا قۇت ٴۇيىر، تاباندىلىق تابىسقا جەتكىزەدى دەگەن عوي، نەشە جىلدان بەرى باعدار ەل ٴىشى مارافون جارىستارىنا 27 مارتە قاتىناسىپ، 10 رەت اعا جۇلدەگەرلىكتى ەنشىلەدى. ارينە تابىسى دا تاۋداي بولدى، ول تابىسىنىڭ كوبىن وتباسىنداعىلارعا بەرىپ، مارافون جارىسىنداعى قۋانىشىن وتباسىنداعىلارىمەن ٴبولىستى. اكەسى ورازالى: ”باعدار بالا كۇنىنەن سپورتقا قاتتى قىزىعاتىن، اۋىلداعى قۇربى - قۇرداستارىمەن جارىسىپ وزىپ كەتەتىن. دوپ ويناۋعا دا ەرەكشە ىنتالى بولدى، تاي، تايىنشاسىن ٴمىنىپ جارىساتىن، قىرات - قىرقالارعا شىعىپ بۇلدىرگەن تەرىپ كەتەتىن، ادەتتە وتە تىنىمسىز ەدى، ٴبىر جاقسىسى نە ىستەسە دە سول جۇمىستى تىندىرىمدى ىستەيتىنى ٴبىزدى سۇيىندىرەتىن“ دەدى. تىلشىلىك بارىسىندا ”ٴوزىڭىز دە بالا كەزىڭىزدە جۇگىرۋگە قىزىعۋشى ما ەدىڭىز؟“ - دەپ سۇراعانىمىزدا: ”مەن ۇزاققا جۇگىرۋگە قىزىعاتىنمىن، قىسقا ارالىققا جۇگىرە المايتىنمىن، ورتالاۋ مەكتەپتەگى كەزىمدە جەلتابان جۇيرىكتەرمەن ەكى رەت ۇزاققا جۇگىرۋ جارىسىنا قاتىناسىپ، ٴبىر رەت 8 -، تاعىٴبىر رەت 15 - بولىپ كەلگەنىم ٴالى ەسىمدە. اكەم سىلامجان جاياۋ جۇرۋگە كەلگەندە الدىنا جان سالمايتىنىن اۋىلداستاردىڭ ٴبارى بىلەدى، جاسى سەكسەننەن اسسا دا كۇنى بۇگىنگە دەيىن جاياۋ جۇرەدى. ’تالاپتىعا نۇر جاۋار‘ دەگەندەي، باعدار بالام جاپالى جاتتىعۋ ارقىلى بۇدان دا ۇلكەن تابىستارعا قول جەتكىزىپ، ٴالى تالاي بيىكتەردى باعىندىرادى دەگەن ۇمىتتەمىز“ دەپ جاۋاپ بەردى ول.

”ادام ٴومىرى دە ٴبىر مارافون جارىسى ىسپەتتى، سەنىڭ قانشالىق تەز جۇگىرگەنىڭە ەمەس، قايتا، جىعىلعان ورنىڭنان تۇرا الۋ - الماۋىڭا بايلانىستى. ٴاربىر سۇرىنگەن ساتتەرىڭ − ٴبىر جولعى قىمباتتى تاجىريبە، بۇل مەنى اناعۇرلىم قايسارلىلىققا جانە تولىسا تۇسۋگە جەتەلەيدى“ دەدى باعدار ٴسـوزىنىڭ سىرگە جيـارىندا وزىنە ٴوزى شابىت بەرىپ.

2023 - جىلى 10 - ايدىڭ 29 - كۇنى باعدار ”قۇلجاعا ماحاببات“ اتىنداعى 2023 - جىلعى ىلە وزەنى مارافون جارىسىندا كومبەگە جەتىپ، تولىق مارافون جارىسى ەرلەر گرۋپپاسىنىڭ جۇلدەگەرى بولدى.     ليۋ چۇنشيڭ  فوتوسى

3 - ايدىڭ 30 - كۇنى باعدار 2024 - جىلعى ميشان دۇڭپو جارتىلاي مارافون جارىسى جانە ”سىچۋاندى ارالاپ شىعۋ“ جەلىلەس جارىسىندا (دۇڭپو بەكەتى) اعا جۇلدەگەر بولدى. سۋرەتتى سۇحپاتتاسۋشى بەرگەن