اتتاردى العاشقى سىناق رەتىندە كومبەدەن قويا بەرۋ ٴساتتى بولدى!

حاينان ۇلتتىق ات ونەرى كومانداسى شينجياڭدا جاتتىعىپ، جارىسقا دايىندالدى

جۋىقتا شينجياڭ ۇيعۇر اۆتونوميالى رايونى سانجى حۇيزۋ اۆتونوميالى وبلىسى سانجى قالاسى سانگۇڭ ات بايگەسى الاڭىندا حاينان ۇلتتىق ات ونەرى اترەتى اتتاردى العاشقى سىناق رەتىندە كومبەدەن قويا بەردى، كومبەنىڭ اشىلۋىنا ىلەسە، بىرنەشە ات زىمىراپ العا ٴوتتى، بايگە جولىنان شاڭ كوتەرىلدى...

”حاينان ۇلتتىق ات ونەرى كومانداسى 2024 ـ جىلى 2 ـ ايدا قۇرىلعان، جيىنى 6 ات ونەرى سپورتشىسى، 13 ات بايگەگە قاتىناسادى“ دەدى حاينان ۇلتتىق ات ونەرى كومانداسىنىڭ جاۋاپتىسى فۋ ميڭجى.

از ۇلتتاردىڭ مەملەكەتتىك 12 - كەزەكتى ٴداستۇرلى سپورت جارىسىنىڭ ات ٴۇستى ويىندارى جارىسى 7 - ايدىڭ 8 - كۇنىنەن 13 - كۇنىنە دەيىن ىلە وبلىسىنىڭ موڭعۇلكۇرە اۋدانىندا وتكىزىلەدى، حاينان ۇلتتىق ات ونەرى كومانداسى وسى جارىسقا قاتىناسادى، مۇنىڭ ىشىندە 1000 مەتر، 2000 مەتر، 3000 مەتر، 5000 مەتر جانە 8000 مەتر سىندى 5 ات بايگەسى شاعىن ٴتۇرى بار، قازىر كوماندا بەلسەنە جاتتىعۋ جۇرگىزۋدە.

الاڭنىڭ جاۋاپتىسى جاۋ جىحىڭنىڭ تانىستىرۋىنشا، سىناق رەتىندە كومبەدەن قويا بەرۋ جارىستان بۇرىن، ٴسوزسىز، وتەتىن وتكەل ەكەن، باستىسى، جىلقىنىڭ كومبەگە كىرۋ جانە ودان شىعۋ بەيىمىن سىناۋ، مۇندا اتتار كومبەگە كىرۋ ٴارى بەلگىلەمە بويىنشا تۇتاس بارىستى باسىپ ٴوتۋى كەرەك، سونىمەن بىرگە، كومبەدەن شىعۋدى رەسمي سىناق ەتكەندە عانا جارىسقا قاتىناسۋ تولىمدىلىعى بولادى ەكەن.

”قازىر 12 ات كومبە سىناعىنان ٴساتتى ٴوتىپ، بەينەسى جاقسى بولدى، كومبە سىناعى جاسالماعان ٴبىر بايگە ات موڭعۇلكۇرە اۋدانىنا كەلىپ كومبەدەن شىعۋ سىناعىنا قاتىناسادى. قازىرگى اتتارىمىز بابىنا كەلىپ، بايگەگە تۇسۋگە ەلەڭدەپ تۇر“ دەدى جاۋ جىحىڭ.

حاينان ۇلتتىق ات ونەرى كومانداسىنىڭ باپكەرى حى شياڭشوۋ تىلشىگە بىلاي دەدى: كۇن ىستىق بولعاندىقتان، شاباندوزدار مەن اتتاردىڭ سۋسىزدانۋىنان ساقتانۋ ٴۇشىن، شاباندوزدار ٴار كۇنى تۇستەن بۇرىن ساعات 7 دەن باستاپ جاتتىعادى. بۇدان تىس، شاباندوزداردىڭ دەنە سالماعىن 52 - 56 كيلوگرام ارالىعىندا تىزگىندەۋ كەرەك.

ٴار كۇنگى جاتتىعۋ اياقتاعاننان كەيىن، شاباندوزدار اتتاردى كۇتىمدەيدى. ”ات ىستىقتى قالامايدى، جاتتىعۋ اياقتاعاننان كەيىن، شاباندوزدار ٴار كۇنى اتتاردى سالقىنداتادى“ دەدى حى شياڭشوۋ.

كومبەدەن سىناق رەتىندە شىعارۋ بارىسىندا 19 جاستاعى مۇحيت ەربولات ۇلى مىنگەن ات الدا كەلىپ، كورنەكتى بەينە بايقاتتى.

”ونى كىشى ەكەن دەپ قالماڭىز، جۇيەلى ات ونەرى جاتتىعۋىنا قاتىناسقانىنا 5 جىل بولدى، كوپ رەت اعا جۇلدەگەر بولعان. مۇحيت حاينان ۇلتتىق ات ونەرى كومانداسىنىڭ مايتالمانى“ دەدى جاۋ جىحىڭ.

مۇحيت تىلشىگە بىلاي دەدى: ”وسى رەتكى سپورت جارىسـىنىڭ ات ٴۇسـتى تۇرىنە قاتىناسۋ ٴۇشىن، 3 ـ ايدا سانجى قالاسىنا بارىپ جاتتىعۋ جۇرگىزدىم. وسى رەتكى كومبەدەن شىعۋ سىناعى كەزىندە ٴوزىمنىڭ جانە اتتىڭ جاعدايى وتە جاقسى بولدى، كەيىنگى جاتتىعۋ بارىسىندا ٴوز كۇيىمدى ۇزدىكسىز جاقسارتامىن، سپورت جارىسىنىڭ ات ٴۇستى ويىنىندا جاقسى ناتيجەگە قول جەتكىزۋگە تىرىسامىن“.

كەلۋ قاينارى: از ۇلتتاردىڭ 12 - كەزەكتى مەملەكەتتىك ٴداستۇرلى سپورت جارىسى توعىسپالى مەديا ورتالىعى