ما شيڭرۇي جارىستىڭ باستالۋ سالتىنا قاتىناستى

پان يۋە، ليۋ شياۋميڭ، ەركىن تۇنياز ارناۋ ٴسوز سويلەدى

7 - ايدىڭ 8 - كۇنى تۇستەن بۇرىن از ۇلتتاردىڭ مەملەكەتتىك 12 - كەزەكتى ٴداستۇرلى سپورت جارىسىنىڭ ات ٴۇستى ويىندارى جارىسى ىلە قازاق اۆتونوميالى وبلىسى موڭعۇلكۇرە اۋدانىنىڭ تۇلپار ساياحات - مادەنيەت باقشاسىندا باستالدى.  سۇن ي - نان فوتوسى 

شينجياڭ گازەتىنىڭ حابارى (ٴتىلشى ۋاڭ شيڭرۇي) 7 - ايدىڭ 8 - كۇنى تۇستەن بۇرىن از ۇلتتاردىڭ مەملەكەتتىك 12 - كەزەكتى ٴداستۇرلى سپورت جارىسىنىڭ ات ٴۇستى ويىندارى جارىسى ىلە قازاق اۆتونوميالى وبلىسى موڭعۇلكۇرە اۋدانىنىڭ تۇلپار ساياحات - مادەنيەت باقشاسىندا باستالدى. اۆتونوميالى رايوندىق پارتكومنىڭ شۋجيى ما شيڭرۇي جارىستىڭ باستالۋ سالتىنا قاتىناستى.

شىلدە ايىنداعى موڭعۇلكۇرەنىڭ كورىنىسى كوز سۇرىندىرەدى. اسپان شايداي اشىق، قارلى شىڭدار كوككە شانشىلىپ تۇر. قاراعانتى ساحاراسىندا تۇلپارلار جۇيتكىپ، قۇستار قالىقتاي ۇشادى.

ايبىندى «قىزىل تۋعا ماداق» مۋزيكاسىنا ىلەسە جۇڭحۋا حالىق رەسپۋبليكاسىنىڭ مەملەكەت تۋى سالتاناتپەن الاڭعا كىردى. ىلە - شالا سپورت جارىسىنىڭ جارىس تۋى، جارىس بەلگىسى تۋى الاڭعا كىردى.

ويناقى مۋزيكا اۋەنىمەن بىرگە بۇكىل ەلدەگى ٴارقايسى ولكە، رايونداردان جانە شينجياڭ ٴوندىرىس - قۇرىلىس بيڭتۋانىنان كەلگەن 12 ۋاكىلدەر ۇيىرمەسى رەتىمەن الاڭعا كىردى.

تۇتاس الاڭداعىلار ورىندارىنان تۇرىپ، مەملەكەت ٴانىن شىرقادى، مەملەكەت تۋى شىعارىلدى. جارىس تۋى، جارىس بەلگىسى تۋى شىعارىلدى.

اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز قارسى الۋ ٴسوزىن سويلەپ، اۆتونوميالى رايوندىق پارتكوم، ۇكىمەت جانە بۇكىل رايونداعى ٴار ۇلت بۇقاراسى اتىنان قيمىلعا قاتىناسۋعا كەلگەن سيلى قوناقتاردى، دوستاردى جانە بارلىق سپورتشىلاردى، جاتتىقتىرۋشىلاردى، تورەشىلەردى قىزۋ قارسى الدى. ول بىلاي دەدى: از ۇلتتاردىڭ مەملەكەتتىك ٴداستۇرلى سپورت جارىسىن وتكىزۋ − باس شۋجي شي جينپيڭنىڭ جۇڭحۋا ۇلتى ورتاق تۇلعا تانىمىن بەكەمدەۋ جونىندەگى ماڭىزدى بايىمداۋىن دايەكتىلەندىرىپ، ۇلتتاردىڭ ٴداستۇرلى سپورتىن ۇلت قىزمەتىمەن ٴونىمدى ۇشتاستىرۋدىڭ ناقتى امالياتى، جۇڭحۋا ۇلتى ۇلى ىنتىماعىنىڭ جاندى بەينەسى. شينجياڭنىڭ ات ٴۇستى ويىندارى تۇرىندەگى جارىستى وتكىزۋ باسىمدىعى كورنەكتى، ٴبىز بۇل جولعى جارىستى ۇلتتار ىنتىماعىن جەبەيتىن، ۇلت كەلبەتىن ايگىلەيتىن، ۇلت رۋحىن اسقاقتاتاتىن دەنە تاربيە سالتاناتى ەتىپ وتكىزىپ، از ۇلتتاردىڭ مەملەكەتتىك 12 - كەزەكتى ٴداستۇرلى سپورت جارىسىنىڭ باستاماسىن جاقسى باستايمىز، ۇلەسىمىزدى قوسامىز. تۋىسقان ولكە، اۆتونوميالى رايون، توتە قاراستى قالالارمەن دەنە تاربيەنى دانەكەر ەتە وتىرىپ اۋىس - كۇيىستى، سەلبەستىكتى كۇشەيتىپ، ۇلتتاردىڭ ىنتىماقتاسا كۇرەس جۇرگىزۋىنىڭ، گۇلدەنىپ - دامۋىنىڭ ٴداۋىر تاقىرىبىن بىرگە ۇعىندىرۋدى ٴۇمىت ەتەمىز.

ورتالىق كوميتەت بىرلىكساپ ٴبولىمىنىڭ ورىنباسار باستىعى، مەملەكەتتىك ۇلت ىستەرى كوميتەتىنىڭ مەڭگەرۋشىسى، پارتيا باسشىلىق گرۋپپاسىنىڭ شۋجيى پان يۋە باستالۋ ٴسوزىن سويلەدى. ول بىلاي دەدى: ات ٴۇستى ويىندارى جارىسىنىڭ دايىندىق قىزمەتتەرىندە جۇڭحۋا ۇلتى ورتاق تۇلعا تانىمىن بەكەمدەۋ نەگىزگى جەلىسىمەن تىعىز بايلانىستىرىپ، سپورت جارىسىن تۇعىر ەتە وتىرىپ شينجياڭنىڭ اشىق، سەنىمدى جاڭا بەت - بەينەسىن، جاڭا كەلبەتىن ايگىلەپ، جاڭا داۋىردەگى شينجياڭ حيكاياسىن ويداعىداي بايانداۋ؛ جۇڭحۋا ۇلتى ورتاق تۇلعاسىن قۇرۋدى كوزدەپ، سپورت جارىسىن دانەكەر ەتىپ، جۇڭحۋا دەنە تاربيە رۋحىن اسقاقتاتىپ، ۇلتتاردىڭ ارالاسۋىن، ىشتەسۋىن، توعىسۋىن جەبەۋ؛ جۇڭحۋا ۇلتىنىڭ ورتاق رۋحاني مەكەنىن قۇرۋدى ارقاۋ ەتىپ، سپورت جارىسىن جەتەكشى، ۇلگى ەتىپ، ٴار ۇلت بۇقاراسى بەلسەنە ات سالىساتىن مادەنيەت - دەنە تاربيە قيمىلدارىن ورىستەتىپ، جۇڭحۋا مادەنيەتىن شىنايى مويىنداۋدى كۇشەيتۋ كەرەك. ات جۇڭحۋا مادەنيەتىندە ماڭىزدى ورىنعا يە، جۇڭحۋاداعى ٴار ۇلت كۇنى بۇگىنگە دەيىن جالعاسقان ات ويىنى مادەنيەتىن بىرگە بايىتىپ، دامىتتى. ٴار جاقتىڭ ەرەكشە تارتىمدى ۇلتتار ىنتىماعى سالتاناتتى جينالىسىن، بۇقارالىق سپورت سالتاناتتى جينالىسىن بىرگە تۇلعالاپ، جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن ۇزدىك ناتيجەلەرمەن قارسى الۋىن شىن جۇرەكتەن ٴۇمىت ەتەمىن.

حاينان ولكەلىك پارتكومنىڭ ورىنباسار شۋجيى، ولكە باستىعى ليۋ شياۋميڭ ارناۋ ٴسوز سويلەدى. ول بىلاي دەدى: از ۇلتتاردىڭ مەملەكەتتىك 12 - كەزەكتى ٴداستۇرلى سپورت جارىسى پارتيانىڭ 20 - قۇرىلتايىنان كەيىن تۇڭعىش رەت وتكىزىلگەن جالپىلىق سيپاتتى ۇلتتار سپورت جارىسى. سپورت جارىسىنىڭ باستى وتكىزىلەتىن جەرى حايناندا، شينجياڭنىڭ موڭعۇلكۇرە اۋدانىندا ات ٴۇستى ويىندارى بولىمشە جارىس الاڭى ورنالاستىرىلعان، بىرنەشە جىلدان بەرى حاينان مەن شينجياڭ قول ۇستاسىپ، وتكىزۋگە دەن قويا دايىندالدى. بۇل جولعى ات ٴۇستى ويىندارى جارىسىنىڭ ٴساتتى باستالۋى سپورت جارىسىنىڭ شىمىلدىعىن اشىپ، ۇلتتار ىنتىماعى سيمفونياسىنىڭ بەتاشارىن ورىندادى. قالىڭ سپورتشىلاردىڭ، جاتتىقتىرۋشىلاردىڭ، تورەشىلەردىڭ ۇلتتار ىنتىماعى رۋحىن، جۇڭحۋا دەنە تاربيە رۋحىن بار كۇشپەن اسقاقتاتىپ، تاماشا ناتيجەلەر جاراتۋعا قۇلشىنىپ، جارىس ارقىلى سۇيىسپەنشىلىكتى جەتكىزىپ، اۋىس - كۇيىس جاساسىپ، ٴبىر - بىرىنەن ۇلگى الىپ، بۇكىل ەلدەگى ٴار ۇلت حالقىنا ۇلتتار مادەنيەتى مەن ۇلتتار سپورتى توعىسقان سالتاناتتى مەرەكە سيلاپ، ٴار ۇلت  سپورت ساڭلاقتارىنىڭ ىنتىماقتاسا ەكپىندەي ىلگەرىلەپ، تۇلپارداي جۇيتكىگەن ٴداۋىر كەلبەتىن ايگىلەۋىن ٴۇمىت ەتەمىن. سيلى قوناقتار مەن دوستاردى حايناننىڭ سانياسىندا باس قوسىپ، حاينانداعى ٴار ۇلت حالقىمەن بىرگە ۇلتتار ىنتىماعى سالتاناتتى جينالىسىنا، بۇقارالىق دەنە تاربيە جينالىسىنا كوپ بولىپ دەم بەرۋگە شىنايى ۇسىنىس ەتەمىن.

مەملەكەتتىك دەنە تاربيە باس مەكەمەسىنىڭ ورىنباسار باستىعى ليۋ گويۇڭ ارناۋ ٴسوز سويلەدى. ول بىلاي دەدى: از ۇلتتاردىڭ مەملەكەتتىك ٴداستۇرلى سپورت جارىسى − جۇڭحۋا ۇلتى ورتاق تۇلعا تانىمىن بەكەمدەۋدىڭ ماڭىزدى تۇعىرى، ۇلتتاردىڭ ارالاسۋىن، ىشتەسۋىن، توعىسۋىن جەبەۋ، ۇلتتار ىنتىماعى، العاباسارلىعى ىستەرىنىڭ دامۋىن ىلگەرىلەتۋ جونىنەن توتەنشە ماڭىزدى ٴمان الادى. از ۇلتتاردىڭ ٴداستۇرلى سپورت جارىسى − دەنە تاربيە ىستەرىنىڭ ماڭىزدى قۇرامداس بولىگى. مەملەكەتتىك دەنە تاربيە باس مەكەمەسى مەملەكەتتىك ۇلت ىستەرى كوميتەتىمەن جانە قاتىستى تاراۋلارمەن بىرگە ۇلتتار وڭىرلەرىنىڭ دەنە تاربيە الاڭ - قۇرىلعىلارى قۇرىلىسىن كۇشەيتىپ، ۇلتتار وڭىرلەرىندە ٴتۇرلى دەنە تاربيە جارىس قيمىلدارىن ورىستەتۋدى ىلگەرىلەتىپ، ۇلتتار وڭىرلەرىنىڭ جاستار - ورەندەر دەنە تاربيە قىزمەتىن كۇشەيتىپ، ۇلتتار وڭىرلەرىنىڭ دەنە تاربيە كاسىپ سالاسىنىڭ دامۋىنا قولداۋ كورسەتىپ، ۇلتتار وڭىرلەرىندە دەنە تاربيە دارىندىلارىن باۋلۋدى كۇشەيتىپ، جاڭا داۋىردەگى ۇلتتار دەنە تاربيە قىزمەتىن ويداعىداي ىستەۋگە قۇلشىنىپ، ۇلتتار ٴداستۇرلى سپورتىنىڭ دەڭگەيىن ۇزدىكسىز جوعارىلاتادى.

ارناۋ ٴسوز اياقتاعاننان كەيىن سپورتشىلار مەن تورەشىلەر ۋاكىلدەرى سەرت بەردى.

جارىس باستالۋ سالتىندا تارتىمدى ادەبيەت - كوركەمونەر كونسەرتى قويىلدى، كونسەرت باقىت ٴانى، جىبەك جولى ٴانى، ارمان قۋۋ ٴانى سىندى 3 ٴبولىم ارقىلى جۇڭگوداعى ۇلتتاردىڭ ارالاسۋىنىڭ، ىشتەسۋىنىڭ، توعىسۋىنىڭ تاريحي اسەم سۋرەتىن قايتا كەسكىندەپ، ۇلتتاردىڭ ىنتىماقتاسا ەكپىندەي ىلگەرىلەپ، كورىكتى مەكەندى بىرگە قۇرعان ٴداۋىر كەلبەتىن ايگىلەدى.

جارىستىڭ باستالۋ سالتى «وتاندى جىرلايمىز» اسقاق انىمەن اياقتادى.

مۇقيات جارمۇقامەت باسقاردى.

مەملەكەتتىك ۇلت ىستەرى كوميتەتىنىڭ ورىنباسار مەڭگەرۋشىسى گو ۋيپيڭ جانە مەملەكەتتىك ۇلت ىستەرى كوميتەتىندەگى قاتىستى جولداستار، مەملەكەتتىك دەنە تاربيە باس مەكەمەسىندەگى، حاينان ولكەسىندەگى قاتىستى جولداستار قاتىناستى.

ەلزات احمەتجان، شۋەبين، ياڭ شيۋلي، اۆتونوميالى رايوننىڭ جانە بيڭتۋاننىڭ قاتىستى تاراۋلارىنداعى، ورىندارىنداعى جاۋاپتى جولداستار، ىلە قازاق اۆتونوميالى وبلىسىنداعى قاتىستى جولداستار قاتىناستى.

از ۇلتتاردىڭ مەملەكەتتىك 12 - كەزەكتى ٴداستۇرلى سپورت جارىسى 11 - ايدا حايناننىڭ سانياسىندا وتكىزىلەدى، مۇنىڭ ىشىندە ات ٴۇستى ويىندارى جارىسى شينجياڭنىڭ موڭعۇلكۇرەسىندە وتكىزىلىپ، 7 - ايدىڭ 13 - كۇنى اياقتايدى. جارىس باسەكەلىك جارىس ٴتۇرى جانە ويىن كورسەتۋ ٴتۇرى سىندى 2 ۇلكەن تۇرگە، باسەكەلىك جارىس ۇلتتىق بايگە، ات ۇستىندە ساداق تارتۋ، قادا ٴىلۋ، جەكەلەردىڭ 2 جارىس تۇرىنەن جان - جاقتى قابىلەتىن سىناۋ سياقتى 4 تۇرگە، ويىن كورسەتۋ ٴتۇرى ونەر باسەكەسى، شەبەرلىك باسەكەسى، جالپىلىق ٴتۇر سىندى 3 تۇرگە بولىنەدى.

باستالۋ سالتىنان كوزايىم ساتتەر

اشىلۋ سالتىنداعى قويىلىم − «ٴورىس اشۋ»           سۇن ي - نان فوتوسى 

اشىلۋ سالتىنداعى وتشاشۋ               لي يافىڭ فوتوسى 

2 مىڭ مەترلىك ۇلتتىق ات بايگەسى              سۇن ي - نان فوتوسى