جۇڭگو كومانداسى پاريج وليمپيادا سپورت جارىسى ايەلدەر ساداق اتۋ توپتىق جارىسىنىڭ جۇلدەگەرى بولدى

ان چيشۋان شينجياڭنىڭ ساداق اتۋ تاريحىن جاڭالادى

شينجياڭ گازەتىنىڭ حابارى (ٴتىلشى حۋاڭ شيڭ). 7 - ايدىڭ 28 - كۇنى پاريج وليمپيادا سپورت جارىسىنىڭ ايەلدەر ساداق اتۋ توپتىق جارىسىندا شينجياڭدىق بويجەتكەن ان چيشۋان جانە لي جيامان، ياڭ شياۋلەيدەن قۇرالعان جۇڭگو كومانداسى كۇمىس مەدال الدى. بۇل جۇڭگو كومانداسىنىڭ وليمپيادا سپورت جارىسى ساداق اتۋ ايەلدەر توپتىق جارىسىنىڭ ەڭ جاقسى ناتيجەسى، ان چيشۋان شينجياڭنىڭ ساداق اتۋ تاريحىن جاڭالاۋمەن بىرگە، ۋاڭ جيەدەن كەيىن وليمپيادا سپورت جارىسىنىڭ كۇمىس مەدالىن العان ەكىنشى شينجياڭدىق شەبەر بولدى.

جارىستا جۇڭگو كومانداسى يندونەزيا كومانداسى مەن مەكسيكا كومانداسىن جەڭىپ، شەشۋشى جارىسقا كىردى. شەشۋشى جارىستا 4: 0 ۇپايمەن كورەيا كومانداسىنان ارتتا قالعان ٴتيىمسىز جاعدايدا، ان چيشۋان مەن سەرىكتەرى ايانباي ايقاسىپ، قارسى جاقپەن ۇپايدى تەڭەستىردى. وكىنەرلىگى، قوسالقى جارىستا جۇڭگو كومانداسى 2 ساقينالىق پارىقپەن كورەيا كومانداسىنان جەڭىلدى. 

2008 - جىلعى بەيجيڭ وليمپيادا سپورت جارىسىندا ىلە قازاق اۆتونوميالى وبلىسىنان كەلگەن ۋاڭ جيە جۇڭگو ايەلدەر جاعاجاي ۆولەيبول كومانداسى اتىنان كۇمىس مەدال الدى، سونداي - اق ىلەدەن كەلگەن شۋە حايفىڭ جۇڭگو ەرلەر ساداق اتۋ كومانداسى اتىنان توپتىق جارىستىڭ قولا مەدالىن الدى. 

شينجياڭ ساداق اتۋ كومانداسىنىڭ جاتتىقتىرۋشىسى جاۋ ۋيحۋا شاكىرتىنە ەرەكشە ٴسۇيىنىپ بىلاي دەدى: ”ان چيشۋان مەملەكەتتىك كوماندانىڭ سوڭىنان مايدانعا شىققان سپورتشىسى رەتىندە، وسىنداي جارىستا قىسىمعا شىداپ، ەرەكشە كەرەمەت بەينە كورسەتتى، ونىڭ ٴوز ونەرىن ورنىقتى ساۋلەلەندىرۋى ناقتى كۇشتىڭ بەينەسى ٴارى جۇڭگو كومانداسىنىڭ جۇلدەگەر بولۋىنداعى شەشۋشى ادام“.

7 - ايدىڭ 31 - كۇنى تاڭعى ساعات نـولدەن 24 مينـۋت وتـكەندە ان چيشۋان تاعى ايەلدەردىڭ ساداق اتۋ جەكە جارىسىندا باق سىناسادى. 

سۋرەتتە: 7 - ايدىڭ 28 - كۇنى جۇڭگو شەبەرى ان چيشان (ورتادا) جارىستا. شينحۋا اگەنتتىگىنىڭ ٴتىلشىسى حى شانليڭ فوتوسى.