قاعىلىقتان شىققان ”قىستاق باسكەتبول بىرىككەن جارىسىنىڭ“ حالىق اراسىنداعى باسكەتبول كارولى

□ انار بۇلت \ شينجياڭ گازەتىنىڭ ٴتىلشىسى حۋاڭ شيڭ

3 ۇپايلىق دوپتى تورعا 47 رەت ٴتۇسىردى! شەشۋشى جارىستا 7 رەت، جارتىلاي شەشۋشى جارىستا 6 رەت، 4 رەتكى شاعىن گرۋپپا جارىسىندا 34 رەت ٴتۇسىردى، مۇنىڭ ىشىندە شاعىن گرۋپپالار جارىسىنىڭ ەڭ سوڭعى جارىسىندا ٴدال ٴتۇسىرۋ سالىستىرماسى %100 بولىپ، 3 ۇپايلىق دوپتى تورعا 14 رەت ٴتۇسىردى.

جاقىندا شينجياڭ قاعىلىق كومانداسىنىڭ باستىعى ٴانقار ەركىن باستاعان باسكەتبول كومانداسى ەرەن وجەت بەينەسىمەن از ۇلتتاردىڭ 12 ـ كەزەكتى مەملەكەتتىك ٴداستۇرلى دەنە تاربيە جارىسى ”ٴبىر نيەتتە ٴلاززاتقا بولەنۋ“ جەلىلەس قيمىلى __ ۇلتتار ىنتىماعى ”قىستاق باسكەتبول بىرىككەن جارىسى“ باسكەتبول ۇسىنىس جارىسى شەشۋشى جارىسىنىڭ اعا جۇلدەگەرلىگىن الدى. ول ۇپاي الۋ كارولى، 3 ۇپايلىق دوپ كارولى جانە كومەكشى اتوي كارولى سىندى 3 جەكە سيلىق ساۋىتىن قانجىعاسىنا بايلاپ، اتى زاتىنا ساي ”حالىق ىشىنەن شىققان باسكەتبول كارولى“ اتاندى.

بيىل 34 جاستاعى ٴانقاردىڭ سپورت جەيدەسى 37 ـ ٴنومىر، ”3“ اكەسىنىڭ تۋعان كۇنى، ”7“ ايەلى مەن قىزىنىڭ تۋعان كۇنى، ٴار رەتكى جارىستا ول وتباسى ماحابباتىمەن الاڭعا شىعادى.

20 جىلدىڭ الدىنداعى جازدىق كانيكۋلدا باسكەتبولدى قىزۋ سۇيەتىن بولە اعاسى ٴانقاردىڭ ۇيىنە كەلەدى. ول كەزدە ٴانقاردىڭ فۋتبول تەپكەنىنە 2 جىلداي بولعان ەدى، بولە اعاسىنىڭ ىقپالىمەن، ول ٴارى ـ ٴسارى بولماي ـ اق فۋتبول الاڭىنان باسكەتبول الاڭىنا اۋىستى.

5 جىلدان كەيىن ٴانقار شينجياڭ شىفان داشۋەسى دەنە تاربيە اعارتۋ كاسىبىنە ەمتيحان بەرىپ وتەدى، بويى 1.88 مەتر كەلەتىن ول مەكتەپتىڭ باسكەتبول كومانداسىنىڭ ٴبىر مۇشەسى بولۋدى ارماندادى. ٴبىراق ەشقاشان كاسىپتىك جاتتىعۋ قابىلداماعان ”الاسا جىگىتتى“ جاتتىقتىرۋشى مەن ساباقتاستارى تىم ەلەپ كەتپەدى.

”ول كەزدە مەكتەپ كومانداسىنىڭ مۇشەلەرى بۇكىل شينجياڭنىڭ ٴارقايسى ايماق، وبلىس، قالالارىنان كەلگەن باسكەتبول جۇلدىزدارى ەدى، مەن بوي بيىكتىگى، دەنە ساپاسى جانە جارىس تاجىريبەسى جاقتارىندا ولارعا جەتپەۋشى ەدىم“. ٴانقار ەسكە الىپ بىلاي دەدى: سول كەزدە مەكتەپتىڭ قىزدار باسكەتبول كومانداسىنىڭ جاتتىقتىرۋشسى مەنىڭ باسكەتبولعا ىنتىزارلىعىمدى كورىپ، ماعان قىزدارمەن بىرگە جاتتىعۋ جاساۋ ورايىن بەردى. مەن ەشقانداي ٴارى ـ ٴسارى بولماي ماقۇل بولدىم. تاقتاي ەدەندى باسكەتبول الاڭىندا دوپ قاعۋ بالا كەزىنەن دالادا دوپ قاعىپ كەلگەن مەن جونىنەن ٴبىر ٴتۇرلى باقىت سەزىلدى.

داشۋەنىڭ 1 ـ جىلدىعىنان 3 ـ جىلدىعىنا دەيىن ٴانقار قىزدار باسكەتبول كومانداسىمەن بىرگە 3 جىل جاتتىعۋ جۇرگىزدى، كۇندەلىكتى جاتتىعۋ جانە ۇيرەنۋدەن سىرت، ٴانقار تورعا دوپ ٴتۇسىرۋ مەن دوپتى مەڭگەرۋ جاتتىعۋىن جاسادى. وسى بارىستا، ونى كەلەكە ەتكەندەر جانە مۇقاعاندار بولدى، ٴبىراق ٴانقاردىڭ ويىندا تەك باسكەتبول عانا بولدى، ول باسكەتبول الاڭىنداعى ۇزدىك بەينەسىمەن ٴوزىن دالەلدەۋدى تاڭدادى.

ەڭبەگى باردىڭ ونبەگى بار. مەكتەپتەگى باسكەتبول بىرىككەن جارىسىنداعى ونەرى بارعان سايىن ارتا ٴتۇسىپ، داشۋەنىڭ 4 ـ جىلدىعىندا ٴانقاردىڭ ارمانى ورىندالىپ شينجياڭ شىفان داشۋەسى ەرلەر باسكەتبول كومانداسىنىڭ مۇشەسى بولادى، ”داشۋەدەگى جاتتىقتىرۋشىمنىڭ ’شىنايى ٴسۇيۋ عانا ەڭ جاقسى تۋما تالانت‘ دەگەن ٴسوزى ٴالى ەسىمدە. كوكەيدە باسكەتبول ارمانىن ساقتاعان ٴاربىر باسكەتبولشى شىن ٴسۇيىپ، تىنباي قۇلشىنىس جاساسا بولعانى، ارمانى ٴبىر كۇنى ورىندالادى“.

2014 ـ جىلى داشۋەدەن وقۋ تاۋىسقان ول اۋىلىنا ورالىپ دەنە تاربيە مۇعالىمى جانە باسكەتبول جاتتىقتىرۋشىسى بولدى، ونىڭ بۇكىل شينجياڭنىڭ كاسىپتەن سىرتقى باسكەتبول جارىستارىندا بارعان سايىن ەرەن ونەر كورسەتۋىنە بايلانىستى، ٴانقار قاشقار ايماعى ەرلەر باسكەتبولى ورتا مەكتەپ گرۋپپاسىنىڭ جاتتىقتىرۋشىسى بولىپ تاعايىندالدى. بىلتىر ول قاعىلىق اۋداندىق مادەنيەت، دەنە تاربيە، راديو، تەلەۆيزيا جانە ساياحات مەكەمەسىنە اۋىسىپ، دەنە تاربيە كادرى بولدى.

10 جىلدان بەرى ٴانقار شينجياڭنىڭ كاسىپتەن سىرتقى باسكەتبول سالاسىنىڭ ناعىز جۇلدىزى بولدى، ەرەن 3 ۇپايلىق دوبى ونىڭ اتىن شىعاردى. بۇدان سىرت، جارىپ ٴوتۋ، ورتا ارالىقتا تورعا دوپ ٴتۇسىرۋ جانە اتويعا وتۋگە ۇيىمداستىرۋ ونىڭ ەڭ شەبەر تەحنيكاسى. جاسىنىڭ ۇلعايۋىنا، دەنە قۋاتى مەن ەكپىنىنىڭ تومەندەۋىنە ىلەسە، ول اتويعا ٴوتۋدى بىرتىندەپ سىرتقى شەپكە ويىستىردى. ”تۇراقتى ورىندا تورعا 3 ۇپايلىق دوپتى 100 رەت ٴتۇسىرۋ جەڭىل شارۋا، بىردەمدە تۇسىرە سالامىن. شىنىن قۋعاندا، تورعا دوپ ٴتۇسىرۋ جاتتىعۋىندا ەڭ قيىنى كوڭىل كۇيدى رەتتەۋ، كەڭ تىنىستاپ جاتتىعۋ بارىسىنداعى جايبىراقات سەزىمدى قالاي تابۋ بارىنەن ماڭىزدى“، ـ دەپ ٴانقار ٴوزىنىڭ ونەرى تۋرالى اسەرىن تىلشىگە اقتارىلا ايتتى.

ونىڭ كومانداسىندا ٴاربىر باسكەتبولشى، ٴسوزسىز، قورعانىستان باستاۋ كەرەك، بۇل دا ٴبىر كوماندانىڭ كوماندا قۇراۋ نەگىزى. وسى رەتكى ”قىستاق باسكەتبول بىرىككەن جارىسىنىڭ“ جارتىلاي شەشۋشى جارىسى مەن شەشۋشى جارىسىندا ٴانقار باستاعان كوماندا قورعانىستان باستاپ، باتىلدىقپەن قايتارما شابۋىلعا ٴوتىپ، ٴۇرتىس 2 رەتكى جارىستا جەڭىپ شىقتى. جارىستان كەيىن كوماندانىڭ نەگىزگى كۇشى رەتىندە كوماندا مۇشەلەرى ٴانقاردى كوتەرىپ بيىككە لاقتىرعاندا ول كوزىنە جاس الىپ جىلاپ جىبەردى.

”شينجياڭ قاعىلىق كومانداسى الاڭدا ارتتا قالعان ىرىقسىز جاعدايدا، جاپا تارتۋدان جاسقانباي، ماشاقاتتان تايسالماي، ارتتا قالۋدان باسىپ وزۋعا، ودان ەڭ سوڭىندا ارىپتەسىن جەڭگەنگە دەيىن ولار شينجياڭ رۋحىن اسقاقتاتتى“، ـ دەدى شينجياڭ ەرلەر باسكەتبول كومانداسىنىڭ بۇرىنعى كوماندا باستىعى قىرانبەك ماقان.

”جارىستا ٴۇرتىس 14 رەت تورعا 3 ۇپايلىق دوپ ٴتۇسىردى، ونىڭ ۇستىنە مەملەكەتتىك ’قىستاق باسكەتبول بىرىككەن جارىسى‘ الاڭىندا تورعا دوپ تۇسىرگەن مۇنداي قول تۇيسىگىن كورىپ مەن قاباعات اسەرلەندىم. ەسىمدە قالۋىنشا، جاتتىعۋ بارىسىندا كوپ كەزىككەنمەن، جارىستا مۇنداي كەرەمەتتى ورىنداي الاتىن ادام نەكەن ـ ساياق كەزدەسەدى“. شينجياڭ فيحۋ كومانداسىنىڭ بۇرىنعى مۇشەسى، شينجياڭ تيانشان شىنلۋ ايەلدەر باسكەتبول كلۋبىنىڭ باس ديرەكتورى ماۋلان تۇرسۇن جارىس الاڭىندا شينجياڭ قاعىلىق كومانداسىنا دەم بەرىپ، جەتەكشىلىك ەتتى، كوماندانىڭ ەرەن وجەت بەينەسىن كورگەندە ول اسەرلەنگەنىنەن ورنىنان تۇرىپ كەتتى.

”ٴاسىلى بۇرىننان بەرى مەنىڭ ەڭ ۇلكەن ارمانىم كاسىپتىك باسكەتبول كلۋبىنا كىرۋ ەدى، سىناق جاتتىعۋىنا قاتىناسىپ، رايدى سەزىنىپ، ۇيرەنسەم دە بولۋشى ەدى. تەك كاسىپتىك باسكەتبولدى تۇسىنگەندە عانا، بولاشاقتا كاسىپتىك باسكەتبولشىنى قالاي تاربيەلەپ شىعۋدى بىلە الامىن. باسكەتبولشى بولعان كەزدەگى بۇل ارمانىمدى ورىنداۋىم قيىن ەكەنى ماعان ايدان انىق، جاتتىقتىرۋشى رەتىندە بۇدان بىلاي كاسىپتىك باسكەتبول كلۋبىنا بارىپ كورۋ، ۇيرەنۋ ورايى بولۋىن ٴۇمىت ەتەمىن“، ـ دەپ ٴانقار كوڭىلىندەگى ورىندالماعان ارمانىن ايتتى.

”كەلەر جىلعى جارىستا بيىلداعىدان دا كۇشتى بولاتىندىعىمىزعا سەنەمىن“، ـ دەپ ٴانقار مەملەكەتتىك ”قىستاق باسكەتبول بىرىككەن جارىسىنىڭ“ اعا جۇلدەگەرلىگىن ساقتاپ قالۋ تىلەگىن ٴبىلدىردى.