سۋرەتتە: 8 - ايدىڭ 20 - كۇنگى اشىلۋ سالتىنداعى فۋتبولشى بالدىرعانداردىڭ  تارتىمدى بيىنەن كورىنىس. 

لاي يۇينيڭ، جاڭ چيڭحۋا فوتوسى 

تىلشىلەرىمىز ياڭ جيڭ - ي، لاي يۇينيڭ، جاڭ چيڭحۋا، چىن يىڭ، پراكتيكانت جاۋ يۇيبين حابارلايدى. 8 - ايدىڭ 20 - كۇنى جۇرت كوپتەن كوز تىككەن ”انار گۇلى . ارمان قۋعان قىزدار“ اتىنداعى 2024 - جىلعى اۆتونوميالى رايوندىق ٴوسپىرىم قىزدار فۋتبول ۇسىنىس جارىسى ىلەدە سالتاناتپەن باستالدى. وسى رەتكى جارىستى اۆتونوميالى رايوندىق ايەلدەر بىرلەستىگى، اۆتونوميالى رايوندىق دەنە تاربيە مەكەمەسى، اۆتونوميالى رايوندىق وقۋ - اعارتۋ مەڭگەرمەسى باسقارىپ ۇيىمداستىرىپ، ىلە وبلىستىق ايەلدەر بىرلەستىگى، وبلىستىق دەنە تاربيە مەكەمەسى، وبلىستىق وقۋ - اعارتۋ مەكەمەسى مىندەتىنە الىپ وتكىزدى.

مەملەكەتتىك ايەلدەر بىرلەستىگىنىڭ ورىنباسار ٴتوراعاسى، شۋجيچۋىنىڭ شۋجيى، پارتيا باسشىلىق گرۋپپاسىنىڭ مۇشەسى جاڭ دۇڭمەي، ىلە وبلىستىق پارتكومنىڭ ورىنباسار شۋجيى، ۇگىت ٴبولىمىنىڭ باستىعى، وقۋ ـ اعارتۋ قىزمەت كوميتەتىنىڭ شۋجيى جاۋ سۇيفاڭ، اۆتونوميالى رايوندىق دەنە تاربيە مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى شاڭ حۇڭبو، اۆتونوميالى رايوندىق وقۋ ـ اعارتۋ مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى قايرات، ىلە وبلىستىق پارتكومنىڭ تۇراقتى مۇشەسى قايرات اشىك ۇلى قاتارلى باسشىلار اشىلۋ سالتىنا قاتىناستى. مەملەكەتتىك ايەلدەر بىرلەستىگىنىڭ ۇيىمداستىرۋ ٴبولىمى، اۆتونوميالى رايوننىڭ، اۆتونوميالى وبلىستىڭ قاتىستى تاراۋلارىنىڭ جاۋاپتىلارى، سونداي ـ اق بۇكىل شينجياڭنىڭ ايماق، وبلىس، قالالارىنان كەلگەن 14 ٴوسپىرىم قىزدار فۋتبول كومانداسىنىڭ سپورتشىسى، جاتتىقتىرۋشىلارى، تورەشىلەرى جانە ناق مايدانداعى كورەرمەندەر، ەرىكتىلەر سياقتى 1500 گە جۋىق ادام وسى سالتاناتتى جينالىستىڭ اشىلۋىنا كۋا بولدى.

اشىلۋ سالتىندا مەملەكەت تۋى شارشى توبى، جارىس تۋى  شارشى توبى، تورەشىلەر شارشى توبى جانە 14 ايماق، وبلىس، قالانىڭ سپورتشىلار ۋاكىلدەر ۇيىرمەسى رەتىمەن الاڭعا كىردى. اۆتونوميالى رايوندىق ايەلدەر بىرلەستىگى پارتيا باسشىلىق گرۋپپاسىنىڭ شۋجيى، ورىنباسار ٴتوراعاسى لي ليڭحۇي اشىلۋ سالتىن باسقاردى ٴارى جارىس ۇيىمداستىرۋ كوميتەتى اتىنان مەملەكەتتىك ايەلدەر بىرلەستىگىنە جانە ىلە وبلىستىق پارتكومعا، ۇكىمەتكە شىنايى العىس ايتتى. جاۋ سۇيفاڭ ٴسوز سويلەپ، فۋتبولدى دانەكەر ەتىپ، جارىستان پايدالانىپ دوستاسىپ، وسى رەتكى ۇسىنىس جارىستى اسەرلى سەزىمگە تولى، ىنتىماق پەن داڭققا بىرگە ۇمتىلاتىن، دوستىق اۋىس ـ كۇيىس ورناتاتىن جارىس ەتىپ وتكىزىپ، بۇكىل شينجياڭداعى ايماق، وبلىس، قالالاردىڭ دوستىق سۇيىسپەنشىلىگى مەن سەلبەستىگىن شىنايى تەرەڭدەتىپ، ۇلتتار ىنتىماعى، العاباسارلىعى ىستەرىنىڭ تىڭ داستانىن قول ۇستاسا بىرگە جازۋدى ٴۇمىت ەتتى. تورەشىلەر ۋاكىلى يۋان فۋ مەن سپورتشىلار ۋاكىلى زايىرام نيجات جەكە - جەكە سەرت بەردى. جاڭ دۇڭمي ۇسىنىس جارىسىنىڭ باستالعانىن جاريالادى.

اشىلۋ سالتىندا مەملەكەت تۋىن شىعارۋ، مەملەكەت ٴانىن ايتۋ قيمىلى وتكىزىلدى.  ”انار گۇلى“ جەلەكتىلەر ٴبي ۇيىرمەسى دايىنداعان ”انار گۇلى جاڭا داۋىردە شەشەك اتۋدا“ اتتى ٴان - ٴبي، ”جۇڭگو سايىسكەرلىگى“ اتتى سايىسكەرلىك ويىنى، سونداي - اق فۋتبولشى بالدىرعانداردىڭ ”كورىكتى ىلەدە مىڭ بۇرالا بيلەيىك“ سياقتى ويىن نومىرلەرى قويىلدى. 

بۇل رەتكى ۇسىنىس جارىسقا بۇكىل شينجياڭداعى 14 ايماق، وبلىس، قالادان ۋاكىلدەر قۇراماسى قاتىناستى، قاتىناسۋشىلار 335 ادامعا جەتتى، مۇنىڭ ىشىندە 28 باپكەر، 210 سپورتشى، سونداي - اق 31 باس تورەشى جانە تورەشى بار. 5 كۇندىك جارىستا جارىسقا قاتىناسقان ٴوسپىرىم فۋتبولشى قىزدار ىلەنىڭ فۋتبول الاڭىندا ارمانعا قۇلاش سەرمەپ، جاستىق كوكتەمنىڭ لاۋلاعان جالىنى مەن اسەرلى سەزىمىن ايگىلەيدى.