ىلەلىك بويجەتكەن ايمان جەڭىسنۇر قىزى مەملەكەتتىك رۋداۋ كۇرەسىنىڭ جالپى ۇپاي جارىسىندا اعا جۇلدەگەر بولدى 

ٴتىلشىمىز ليۋ چۇنشيڭ حابارلايدى. دالمە ـ ٴدال شابۋىلعا ٴوتىپ، بۇكىل الاڭدى ٴدۇر سىلكىندىردى. 10 ـ ايدىڭ 4 - كۇنىنەن 9 ـ كۇنىنە دەيىن 2024 ـ جىلعى مەملەكەتتىك رۋداۋ جالپى ۇپاي جيناۋ جارىسىنىڭ العاشقى بەكەتى ىشكى موڭعۇل اۆتونوميالى رايونىنىڭ چىفىڭ قالاسى ارۋحورچىن حوشۇنىندا وتكىزىلدى. ىلە وبلىسىنىڭ موڭعۇلكۇرە اۋدانىنان كەلگەن شينجياڭدىق رۋداۋ شەبەرى ايمان جەڭىسنۇر قىزى ايەلدەر 78+ كيلوگرام دارەجەسىندەگىلەر بويىنشا التىن مەدال ەنشىلەدى. وسى جاس ساڭلاقتىڭ اعا جۇلدەگەرلىكتى الۋى ونىڭ ٴوزىنىڭ كۇش - قۋاتىنىڭ تاعى ٴبىر رەت دالەلدەنۋى، ونان دا ماڭىزدىسى، شينجياڭنىڭ رۋداۋ جارىسنىڭ دامىپ كەلە جاتقاندىعىنىڭ، دارىندىلاردىڭ توپ - توبىمەن جارىققا شىققاندىعىنىڭ پارمەندى دالەلى.

ايەلدەر 78+ كيلوگرام دارەجەسىندەگىلەردىڭ شەشۋشى جارىسىندا ايمان چىڭدۋ 31 - كەزەكتى ستۋدەنتتەردىڭ جازعى سپورت جارىسىنىڭ اعا جۇلدەگەرى، تيانجين شەبەرى جيا چۇنديمەن بەلدەستى. ەڭ سوڭىندا، ول ۇستەم باسىمدىقپەن وسى رەتكى تاماشا ناتيجەگە قول جەتكىزىپ، ٴوزىنىڭ ەلدەن ەرەك تالانتى مەن جاپالى جاتتىعۋىنىڭ جەتىستىكتەرىن ايگىلەدى.

بۇل التىن مەدال ايماننىڭ 2024 - جىلعى بريكس ەلدەرى سپورت جارىسىنىڭ رۋداۋ جارىس ٴتۇرىنىڭ 78+ كيلوگرام دارەجەسىندەگى سالماقتاعىلاردىڭ التىن مەدالىن ەنشىلەگەننەن كەيىن وسى دارەجەدەگىلەر بويىنشا بيىل تاعى دا العان 2 - التىن مەدالى. وسى رەتكى جارىستا بۇكىل ەلدەگى 33 ۋاكىلدەر قۇراماسىنداعى 528 سپورتشى ٴبىر ساحنادا ونەر كورسەتىپ، 15 ـ كەزەكتى مەملەكەتتىك سپورت جارىسىنىڭ تولىمدىلىعىن الۋ ٴۇشىن قيان ـ كەسكى سايىس جۇرگىزدى.

جارىستان كەيىن باپكەر ۋاڭ پىڭفي بىلاي دەدى: ”بۇل التىن مەدال ونىڭ سەنىمىن ارتتىردى، سونداي ـ اق قۇرامامىزدى 15 ـ كەزەكتى مەملەكەتتىك سپورت جارىسىنا ۇزدىكسىز كۇش سالا دايىندالۋعا جىگەرلەندىردى“.

10 ـ ايدىڭ 8 ـ كۇنى، كەزىندە ايمانعا ساباق بەرگەن ىلە وبلىستىق دەنە تاربيە مەكتەبىنىڭ رۋداۋ جاتتىقتىرۋشىسى جوۋ يۇنفاڭ ٴۇنحات دوستار شەڭبەرىنە جولداپ، ايماندى قۇتتىقتادى.

جوۋ يۇنفاڭ تانىستىرىپ بىلاي دەدى: ايمان موڭعۇلكۇرە اۋدانىنان كەلگەن، بيىل 21 جاستا. قازىر ايماننىڭ بويى 1.8 مەتردەن اسادى. ايمان العاش كەلگەن كەزدە 12 جاستا ەدى، بويى الاسا، ارىق بولاتىن، ايەلدەردىڭ 57 - كيلوگرامدىقتاعىلار جارىسىنا تۇسەتىن ەدى. ٴبىراق ايمان وتە الىمدى بولاتىن. 2017 - جىلدىڭ اياعىندا ايمان اۆتونوميالى رايوندىق كاسىپتىك قۇراماعا (اۆتونوميالى رايوندىق دەنە تاربيە مەكەمەسىنىڭ بالۋاندار رۋداۋ سپورتىن باسقارۋ ورتالىعىنا) جىبەرىلەدى. جوۋ يۇنفاڭ بىلاي دەدى: 2018 ـ، 2019 ـ جىلدارى ايمان مەملەكەتتىك ورەندەر رۋداۋ جارىس ٴتۇرىنىڭ 78+ كيلوگرام دارەجەسى بويىنشا اعا جۇلدەگەر بولدى.

جاڭا جۇلدىز شۇعىلا شاشىپ، ارمان قۋىپ العا باستى. 2023 - جىلى 7 - ايدىڭ 11 - كۇنى مەملەكەتتىك ايەلدەر رۋداۋ جۇلدەلى جارىسى مەن ەر - ايەل ارالاس توپتىق جارىسىندا ايمان ايەلدەردىڭ 78+ كيلوگرام دارەجەسى بويىنشا اعا جۇلدەگەر بولدى. سول جىلى 9 - ايدا 2023 - جىلعى مەملەكەتتىك رۋداۋ كۇرەسىنىڭ جالپى ۇپاي جارىسى. چۋجوۋ بەكەتىندە ايمان ايەلدەردىىڭ 78+ كيلوگرام دارەجەسى بويىنشا ٴبىرىنشى بولدى. سول جىلى 10 - ايدا 2023 - جىلعى مەملەكەتتىك رۋداۋ كۇرەسىنىڭ جالپى ۇپاي جارىسى. جينجياڭ بەكەتىندە ايمان ايەلدەردىڭ 78+ كيلوگرام داەجەسى بويىنشا اعا جۇلدەگەر بولدى. 10 - ايدىڭ 29 - كۇنى 1 - كەزەكتى مەملەكەتتىك وقۋشىلار (جاستار) سپورت جارىسىنىڭ رۋداۋ ٴتۇرى بويىنشا ايمان 78 كيلوگرامنان جوعارى دارەجەدەگى ايەلدەر جارىسىنىڭ جۇلدەگەرلىگىن ەنشىلەدى.

ىلە وبلىستىق دەنە تاربيە مەكەمەسىنىڭ 3 - دارەجەلى زەرتتەۋشىسى يۇي شىڭ بىلاي دەپ تانىستىردى: ىلە رۋداۋ سپورتىنىڭ دامۋى وتە جاقسى، ىلە وبلىستىق دەنە تاربيە مەكتەبىندە قازىر ەر، ايەل رۋداۋ قۇراماسىندا 100 دەن استام ادام بار. قازىر ىلە وبلىسىنىڭ رۋداۋ سپورتشىلارى شامامەن 300 ادام بولىپ، باسەكەلىك ورەسى بۇكىل شينجياڭ بويىنشا باسىم ورىندا تۇرادى. ٴبىز تاعى اۆتونوميالى رايونعا ايمان جەڭىسنۇر قىزى، يان شينرۇي، گۇلنار اسەت قىزى قاتارلى سپورتشىلاردىڭ ٴىزباسار دارىندىلارىن جىبەردىك.

سۋرەتتە: ايمان جەڭىسنۇر قىزى (سولدان 4 - ادام) مەن جاتتىقتىرۋشى ۋاڭ پىڭفي (سولدان 3 - ادام).

سۋرەتتى اۆتونوميالى رايوندىق دەنە تاربيە مەكەمەسىنىڭ بالۋاندار رۋداۋ سپورتىن باسقارۋ ورتالىعى قامداعان.