ٴتىلشىمىز ليۋ چۇنشيڭ حابارلايدى. ەل ىشىندەگى ارالىعى ەڭ ۇزاق، ەڭ باسەكەلى سيپات العان ات ونەرى جارىسى ـــ ”جىبەك جولى“ جۇڭگو ەرەكشە ات ونەرى باعىتتامالى توزىمدىلىك جارىسى . موڭعۇلكۇرە ايالداماسى 5 - ايدىڭ 30 - كۇنىنەن 6 - ايدىڭ 5 ـ كۇنىنە دەيىن وتكىزىلەدى. ٴتىلشى بۇل حاباردى 2 - ايدىڭ 5 -كۇنى موڭعۇلكۇرە اۋداندىق مادەنيەت، دەنە تاربيە، راديو ـ تەلەۆيزيا جانە ساياحات مەكەمەسىنەن  ۇعىسقان.

جۇڭگو از ۇلتتار دەنە تاربيە قوعامى جۋىردا بەيجيڭدە جارىس جونىندە اقپار جاريالاۋ ٴماجىلىسىن جانە ”2025 جۇڭگو جىلقى مادەنيەتى سپورتىن جاڭالىق اشا دامىتۋ جونىندەگى تالقى ٴماجىلىسىن“ وتكىزدى، جارىس وتكىزۋشى ورىن مەن ات ونەرى سالاسىنداعى ماماندار جارىسقا قاتىستى جاعدايلاردى تانىستىردى.

جۇڭگو از ۇلتتار دەنە تاربيە قوعامىنىڭ جىلقى مادەنيەتى سپورتى كوميتەتىنىڭ باستىعى، جۇڭگو جىلقى مادەنيەتى سپورتى ساياحات جوباسىن زەرتتەۋ ورنىنىڭ باستىعى ۋ گاڭفاڭ تانىستىرىپ بىلاي دەدى: كاسىپتىك گرۋپپانىڭ جارىس ارالىعى 500 كيلومەتر، جارىس ۋاقىتى 7 كۇن، بۇقارالىق جارىس گرۋپپاسىنىڭ ارالىعى 220 كيلومەتر، جارىس ۋاقىتى 3 كۇن. ٴبىر ادام ٴبىر اتقا ٴمىنىپ بىرنشە كۇندىك جارىسقا تۇسەدى ٴارى ٴبىر اتپەن جارىستى سوڭىنا دەيىن جالعاستىرادى، زاپاس ات پايدالانۋعا جول بەرىلەدى. جارىسقا قاتىناساتىن جىلقىلار نەگىزىنەن ەلىمىزدىڭ ٴوز جىلقىلارى بولۋى كەرەك، جارىستا جاساندى سەرىك ارقىلى باعىتتامالى جول باستايدى.

تانىستىرۋعا قاراعاندا، وسى رەتكى جارىستى جۇڭگو از ۇلت دەنە تاربيە قوعامى مەن موڭعۇلكۇرە اۋداندىق حالىق ۇكىمەتى بىرلەسىپ ۇيىمداستىرادى ەكەن. جارىسقا ەل ٴىشى - سىرتىنان قاتىناسۋشىلاردى قابىلدايدى، تىزىمدەلۋ تەرەزەسى 1 - ايدىڭ 20 - كۇنىنەن باستاپ اشىلادى.

ات بايگەسى − ىلە ساحاراسىنداعى ٴداستۇرلى بۇقارالىق دەنە تاربيە قيمىلى، ىلە وبلىسى ىلە جىلقىسىنىڭ قۇندىلىعىن ارتتىرۋدى ارقاۋ، جىلقىنى دانەكەر ەتىپ، ”جىلقى شارۋاشىلىعى +“ نەگىزدى ۇزدىكسىز بەكەمدەپ، ساياحات، سپورت جارىستارىمەن توعىستىرا دامىتۋدى جەبەيدى. سوڭعى جىلداردان بەرى موڭعۇلكۇرە اۋدانى جۇڭگو ات ونەرى قوعامى، شينجياڭ ات ونەرى قوعامدارىمەن جانە ٴار دارەجەلى جىلقى شارۋاشىلىعى قوعامدارىمەن بەلسەنە سەلبەسىپ، مەملەكەتتىك ات ونەرى بويىنشا توزىمدىلىك كوشپەلى جارىسى، جۇڭگو ۇشقىر ات بايگەسى سيلىقتى جارىسى، جىبەك جولى جۇڭگو ساۋىتى، شينجياڭ اتبەگىلەرى ساۋىتى سياقتى ەل ىشىندەگى ماڭداي الدى جارىستاردى وتكىزدى. 2020 ـ جىلدان 2024 ـ جىلى 7 ـ ايعا دەيىن موڭعۇلكۇرە اۋدانى 238 مايدان ٴار دارەجەلى، ٴار ٴتۇرلى ات بايگەلەرىن وتكىزىپ، جارىسقا قاتىناستىرىلعان جىلقى 3605 كە جەتىپ، قويۋ ات بايگەسى اۋانىن قالىپتاستىرىپ، ات ونەرى ورلەۋىن كوتەردى. مۇنىڭ ىشىندە، 2023 - جىلى 2 - ايدىڭ 11 - كۇنى موڭعۇلكۇرە اۋدانىنىڭ تۇلپار ساياحات - مادەنيەت باقشاسىندا اۆتونوميالى رايوندىق 1 - كەزەكتى قىسقى سپورت جارىسىنىڭ شينجياڭ قارلى القاپ ات بايگەسى وتكىزىلدى؛ 2024 - جىلى 7 - ايدىڭ 8 - كۇنىنەن 13 - كۇنىنە دەيىن از ۇلتتاردىڭ مەملەكەتتىك 12 - كەزەكتى ٴداستۇرلى سپورت جارىسىنىڭ ات ٴۇستى ونەرى جارىسى موڭعۇلكۇرە اۋدانىندا وتكىزىلدى.

2025 - جىلى 2 - ايدىڭ 8 - كۇنى اۆتونوميالى رايوندىق 2 - كەزەكتى قىسقى سپورت جارىسى قارلى القاپ ات بايگەسى (بۇقارالىق گرۋپپا) جانە ىلە وبلىسىنىڭ 2 - كەزەكتى قارلى القاپ ات بايگەسى موڭعۇلكۇرە اۋدانىنىڭ تۇلپار ساياحات - مادەنيەت باقشاسىندا وتكىزىلدى.