ازيا قىسقى سپورت جارىسى مەدالدارىنداعى شينجياڭ ۇلەسى

شينجياڭ گازەتىنىڭ تىلشىلەرى ۋاڭ جيڭجيڭ، حۋاڭ شيڭ

32 التىن مەدال، 27 كۇمىس مەدال، 26 قولا مەدال. 9 ـ كەزەكتى ازيا قىسقى سپورت جارىسىنىڭ نەگىزگى الاۋىنىڭ حاربيندە باياۋ سونۋىمەن، جۇڭگو دەنە تاربيە ۋاكىلدەر ۇيىرمەسى جاندى تەبىرەنتەتىن ناتيجە جاراتتى. مۇنىڭ ىشىندە شينجياڭ سپورتشىلارى 5 التىن مەدال، 2 كۇمىس مەدال، 4 قولا مەدال الىپ، جۇڭگونىڭ تاريحتاعى ەڭ جاقسى ناتيجەنى جاراتۋىنا دەم بەرىپ قانا قويماي، شينجياڭنىڭ ازيا قىسقى سپورت جارىسىندا شينجياڭنىڭ مەدال الا الماۋ جاعدايىن دا وزگەرتىپ، شينجياڭ قار ـ مۇز سپورتىندا شىت جاڭا تاراۋ جازدى.

قوم قىستاعىنان كەلگەن دوۋيىن بۇركەنشىك اتى ”شاڭعىمەن تاۋعا شىققان كىشكەنتاي بالاقاي“ اتالعان بۇلۇر وسى كەزەكتى ازيا قىسقى سپورت جارىسىنىڭ شاڭعىمەن تاۋعا شىعۋ تۇرىندە 2 التىن مەدال الدى؛ تەز سىرعاناۋ شەبەرلەرى تيان رۇينيڭ مەن قاناعات مۇقامەت شينجياڭ تەز سىرعاناۋشىلارىنىڭ 35 جىل كۇتكەن ازيا قىسقى سپورت جارىسىندا مەدال الۋداي ارمانىن ورىنداپ، ەكەۋى جيىنى ٴبىر التىن مەدال، ٴبىر كۇمىس مەدال، 2 قولا مەدال الدى. شينجياڭ سپورتشىلارىنىڭ ازيا قىسقى سپورت جارىسىنداعى تاماشا بەينەلەرى شينجياڭ قار ـ مۇز سپورتىنىڭ جوعارى ساپالى دامۋىنىڭ تاماشا جاعدايىن جاندى بەينەلەدى.

قۇرىلعىلار كەمەلدەنىپ، جالپى حالىق بىرگە يگىلىكتەندى

وسى كەزەكتى ازيا قىسقى سپورت جارىسىنىڭ مۇزدا تەز سىرعاناۋ ٴتۇرى حيلۇڭجياڭ ولكەسى مۇز ٴۇستى جاتتىعۋ ورتالىعىنىڭ تەز سىرعاناۋ سارايىندا وتكىزىلدى، حاربين گازەتىنىڭ ٴتىلشىسى جاڭ كۇنلەي شينجياڭ سپورتشىلارىنىڭ قورجىندارىنا التىن، كۇمىس مەدالداردى سالعان مەرەيلى ساتتەرىنە كۋا بولدى. ول 2016 ـ جىلعى 13 ـ كەزەكتى مەملەكەتتىك قىسقى دەنە تاربيە جارىسى كەزىندەگى شينجياڭ ساپارىن ەسكە الىپ: ”13 ـ كەزەكتى مەملەكەتتىك قىسقى دەنە تاربيە جارىسىنان كەيىن شينجياڭنىڭ مۇز ٴۇستى ٴتۇرى قارىشتاپ دامۋدى جۇزەگە اسىردى. شينجياڭدا ەل ىشىندە تەڭىز دەڭگەيىنەن ەڭ بيىك تەز سىرعاناۋ سارايى بار، كەمەلدەنگەن الاڭ ـ ساراي قۇرىلعىلارى شينجياڭ مۇز ٴۇستى سپورتى دارىندىلارىنىڭ كوپتەپ شىعۋىنا بەرىك نەگىز قالادى“ دەدى.

13 ـ كەزەكتى مەملەكەتتىك قىسقى دەنە تاربيە جارىسىن ۇستىنە الىپ وتكىزگەننەن بەرى مەملەكەتتىك دەنە تاربيە باس مەكەمەسىنىڭ، اۆتونوميالى رايوندىق پارتكوم مەن ۇكىمەتتىڭ قولداۋىندا شينجياڭ كوپتەگەن جوعارى ولشەمدى قار ـ مۇز سپورت الاڭ ـ سارايلارى قۇرىلعىلارىن سالدى. اۆتونوميالى رايوندىق دەنە تاربيە مەكەمەسىنىڭ قىسقى سپورتقا جاتتىعۋ ورتالىعى كەزىندە 13 ـ كەزەكتى مەملەكەتتىك قىسقى دەنە تاربيە جارىسىنىڭ جارىس الاڭى ەدى. مۇنىڭ ىشىندە، شينجياڭ تەز سىرعاناۋ سارايى ەل ىشىندەگى تەڭىز دەڭگەيىنەن ەڭ بيىك تەز سىرعاناۋ سارايى بولىپ، قوسالقى ٴۇستىرت جەرگە ورنالاسقاندىقتان، اۋا كەدەرگى كۇشى ٴبىرشاما ٴالسىز بولىپ، مەملەكەتتىك قىسقا ارالىققا تەز سىرعاناۋ كومانداسىنىڭ قوسالقى ۇستىرتتە جاتتىعۋ بازاسى بولىپ تاڭدالدى. وسى الاڭ ـ سارايمەن بىرگە امەريكانىڭ سالت لەيك قالاسىنداعى جانە كانادانىڭ كالگاريىنداعى تەز سىرعاناۋ سارايى ”دۇنيەدەگى ٴۇش ۇلكەن ۇستىرتتەگى مۇز الاڭى“ دەپ اتالدى.

2023 ـ جىلى مەملەكەتتىك دەنە تاربيە باس مەكەمەسى شينجياڭ التاي گەنەرال تاۋى حالىقارالىق شاڭعى تەبۋ، دەمالىس اۋماعى مەن كوكتوعاي حالىقارالىق شاڭعى تەبۋ، دەمالىس اۋماعىنا جەكە ـ جەكە ”مەملەكەتتىك شاڭعى تەبۋ التاي قالاسى گەنارال تاۋى جاتتىعۋ بازاسى“ جانە ”مەملەكەتتىك شاڭعى تەبۋ كوكتوعاي جاتتىعۋ بازاسى“ دەگەن اتاق بەردى. 2020 ـ جىلدان باستاپ 18 مەملەكەتتىك توپتىق جاتتىعۋ كومانداسى مەن 15 ولكەلىك كوماندا، 800 دەن استام جاتتىقتىرۋشى مەن سپورتشى ىلگەرىندى ـ كەيىندى كوكتوعاي حالىقارالىق شاڭعى تەبۋ، دەمالىس اۋماعىنا كەلىپ جاتتىعۋ جاسادى.

2023 - 2024 ـ جىلدىڭ قارلى ماۋسىمىنىڭ سوڭىنا دەيىن شينجياڭدا ٴتۇرلى قار ـ مۇز الاڭىنىڭ سانى 121 گە جەتتى، بۇل 58 شاڭعى الاڭىن، 39 مۇزدا سىرعاناۋ الاڭى مەن 24 قار سايرانباعىن قامتيدى.

نەگىزدى بەكەمدەپ، دارىندى دايىندادى

وسى كەزەكتى ازيا قىسقى سپورت جارىسىنىڭ الدىندا شينجياڭ سپورتشىلارى جۇڭگو كومانداسى اتىنان ازيا قىسقى سپورت جارىسىنا 3 كەزەك قاتىناسىپ، ەڭ تاماشا ناتيجەسى 4 ـ ورىن عانا بولعان ەدى. 2 ـ ايدىڭ 8 ـ كۇنى تۇستەن كەيىن شينجياڭدىق جۇڭگو دالالىق قار شاڭعى سپورتشىلارى دىلنيگار يىلھامجان مەن سامعار سەرىكتىڭ ەكەۋى بىردەي قولا مەدال العاندىعىنان حابار تاپقاندا، اۆتونوميالى رايوندىق دەنە تاربيە مەكەمەسى قىسقى سپورت جاتتىقتىرۋ ورتالىعىنىڭ پارتكوم شۋجيى كاڭ يۇڭشين تەبىرەنە بىلاي دەدى: ”2000 ـ جىلداردان كەيىن تۋعان وسى 2 سپورتشى بىلتىر مەملەكەتتىك قىسقى سپورت جارىسىنىڭ شىڭداۋىنان ٴوتىپ، ونان ارى جەتىلە ٴتۇستى. ولار وتانعا داڭق اپەرىپ قانا قويماي، شينجياڭ قار ـ مۇز سپورتىنىڭ تاريحىن دا جاراتتى. بۇل ٴبىزدىڭ جاستار مەن ورەندەر اراسىنداعى قار ـ مۇز دارىندىلارى نەگىزىن نىعايتىپ، اناعۇرلىم زور داڭققا قول جەتكىزۋ بەكىمىمىزدى ونان ارى بەكەمدەي ٴتۇستى“.

2024 ـ جىلدىڭ باسىندا وتكىزىلگەن 14 ـ كەزەكتى مەملەكەتتىك قىسقى سپورت جارىسىندا شينجياڭ ۋاكىلدەر ۇيىرمەسى 8 التىن، 15 كۇمىس، 12 قولا مەدال الۋداي ۇزدىك ناتيجەگە قول جەتكىزىپ، مەدال جالپى سانى جاعىنان مەملەكەت بويىنشا 9 ـ ورىندى، باتىس سولتۇستىك 5 ولكە، اۆتونوميالى رايون بويىنشا 1 ـ ورىندى يەلەدى. 2022 ـ جىلدان باستاپ شينجياڭ ٴۇرتىس 2 كەزەك اۆتونوميالى رايوندىق قىسقى سپورت جارىسىن وتكىزدى. اۆتونوميالى رايوندىق قىسقى سپورت جارىسىندا سارالانعان سوڭ ٴبىر توپ زاپاس دارىندىلار ٴتۇرلى كاسىپتىك كوماندالاردى تولىقتادى، ولاردىڭ تاماشا بەينەلەرى مەملەكەتتىك قىسقى سپورت جارىسىندا شينجياڭ قار ـ مۇز سپورتىنىڭ دامۋىنداعى كورنەكتى ناتيجەلەردى ايگىلەدى.

شينجياڭ قار ـ مۇز دارىندىلارىن باۋلۋ سىندى شىعىس جەلىن وراي ەتىپ، ٴبىر توپ زاپاس دارىندىلاردى باۋلۋمەن قاتار، قاتىستى كاسىپتەردى اشىپ، دارىندى قاجەتىن قامتاماسىز ەتتى. التاي ايماعىن مىسالعا الساق، جەرگىلىكتى ورىندا ورتا، جوعارى دارەجەلى 4 كاسىپتىك مەكتەپتە سپورتتىق جاتتىعۋ، قار ـ مۇز سپورتى جانە باسقارۋ، قار ـ مۇز قۇرىلعىلارىن كۇتىمدەۋ جانە باسقارۋ، سپورتتىق قورعانۋ سياقتى قار ـ مۇز باعىتىنداعى 7 ماماندىقتى اشتى، مەكتەپتە وقىپ جاتقان وقۋشى 735 كە، مەكتەپ تاۋىسقان وقۋشى 228 گە جەتتى. التاي ايماقتىق 2 ـ جوعارى دارەجەلى ورتا مەكتەپ تاعى قار ـ مۇز سپورتى ەرەكشەلىگىندەگى كلاس اشىپ، دالالىق شاڭعى، تاۋ شاڭعى، مۇزدا تەز سىرعاناۋ بويىنشا 4 جاتتىقتىرۋشى دايىنداپ، تۇڭعىش توپتا 15 وقۋشى قابىلدادى.

قاجىماي كۇش سالىپ، ۇزدىكسىز دامىدى

حاربيندەگى كوركى كوز تارتقان قار ـ مۇز الەمىنەن شينجياڭداعى ايبىندى دا كوركەم، كەڭ ـ بايتاق التاي تاۋىنا دەيىن؛ جيليندەگى قيال الەمىندەي كورىنەتىن قىراۋ كورىنىسىنەن ىشكى موڭعۇلداعى شەتسىز دە شەكسىز قىس ماۋسىمىنداعى ساحاراعا دەيىن... ازيا قىسقى سپورت جارىسى سىندى وسى تۇعىردان پايدالانىپ، جۇڭگونىڭ قار ـ مۇز كەلبەتى، قار ـ مۇز رومانتيكاسى دۇنيە جۇزىنە تانىلا باستادى. جۇڭگو قار ـ مۇز سپورتى كارتاسىنىڭ ماڭىزدى قۇرامداس بولىگى رەتىندە شينجياڭدىق سپورتشىلار جاستىق كەلبەتتەرىمەن، قايسار جىگەرلەرىمەن جانە قاجىرلى رۋحتارىمەن وسى كەزەكتى ازيا قىسقى سپورت جارىسىندا دۇنيە جۇزىنە شينجياڭدىق جاس بۋىنداردىڭ جالىندى بەينەسىن كورسەتتى ٴارى شينجياڭنىڭ قار ـ مۇز سپورتى دامۋىنداعى سۇبەلى جەتىستىكتەرىن ايگىلەدى.

اۆتونوميالى رايوندىق دەنە تاربيە مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى شاڭ حۇڭبو مىنالاردى ٴبىلدىردى: شينجياڭ مەملەكەتتىك كەڭەس كەڭسەسىنىڭ «قار ـ مۇز سپورتىن جوعارى ساپالى دامىتۋ ارقىلى قار ـ مۇز ەكونوميكاسىنىڭ ومىرشەڭ كۇشىن قاۋلاتۋ جونىندەگى ٴبىرقانشا پىكىرىن» جانە «اۆتونوميالى رايوننىڭ قار ـ مۇز سپورتىن جوعارى ساپالى دامىتۋ ارقىلى قار ـ مۇز ەكونوميكاسىنىڭ ومىرشەڭ كۇشىن قاۋلاتۋ جونىندەگى اتقارۋ جوباسىن» ۇزدىكسىز ىشكەرىلەي دايەكتىلەندىرىپ، تياناقتاندىرىپ، قار ـ مۇز ”سۋىق بايلىعىنىڭ“ ۇزدىكسىز ”ىستىق اسەر“ تاراتۋىن جەبەيدى.

شينجياڭ ٴۇرىمجى حالىقارالىق مۇز ٴۇستى جاتتىعۋ بازاسى مەن التاي حالىقارالىق قاردا جاتتىعۋ بازاسىنىڭ ۇلگىلىك، جەتەكشىلىك رولىن تولىق ساۋلەلەندىرىپ، ولاردى مەملەكەتتىك ىقپالعا يە قار ـ مۇز سپورتىنىڭ ايگىلى جەرى ەتىپ قۇرىپ شىعۋعا قۇلشىنادى. سونىمەن بىرگە، ”مۇز ەكى ٴتۇرى، قار ٴۇش ٴتۇرى“ (مۇز ەكى ٴتۇرى: مۇزدا تەز سىرعاناۋ، قىسقا ارالىقتا تەز سىرعاناۋ؛ قار ٴۇش ٴتۇرى: دالالىق شاڭعى، تاۋ شاڭعى، شاڭعىمەن تاۋعا شىعۋ) بويىنشا كاسىپتىك كوماندا قۇرىلىسىن ۇزدىكسىز كۇشەيتىپ، جاتتىعۋ سەرپىنىن ارتتىرىپ، ۇزدىك زاپاس دارىندىلاردى باۋلىپ، ميلان قىسقى وليمپيادا سپورت جارىسىنا دايىندالۋعا بەرىك نەگىز قالايدى. مۇنان سىرت، تاعى الۋان ٴتۇرلى بۇقارالىق قار ـ مۇز قيمىلدارىن ۇزدىكسىز ورىستەتىپ، ”300 ميلليون ادامدى قار ـ مۇز سپورتىنا قاتىناسۋعا باستاۋدىڭ“ جەتىستىكتەرىن بەكەمدەپ جانە كەڭەيتىپ، تۇتاس رايوننىڭ بۇقارالىق دەنە تاربيەسىنىڭ، باسەكەلىك دەنە تاربيەسىنىڭ، جاستار مەن ورەندەر دەنە تاربيەسىنىڭ جانە دەنە تاربيە كاسىپ سالاسىنىڭ جاپپاي دامۋىن جەبەپ، دەنە تاربيەدە قۋاتتى رايون قۇرىلىسى مەن سالاماتتى شينجياڭ قۇرىلىسىنا تىڭ ومىرشەڭ كۇش ۇستەيدى.