ەرىكتى ٴتىلشى لي رىنليان حابارلايدى. 3 - ايدىڭ 13 - كۇنى شينجياڭ ات ونەرى قوعامى موڭعۇلكۇرە اۋداندىق كاسىپتىك - تەحنيكالىق مەكتەبىمەن جانە موڭعۇلكۇرە اۋداندىق تەحنيك جۇمىسشىلار مەكتەبىمەن بىرلەسىپ، شينجياڭداعى تۇڭعىش ات دوپ كومانداسىن الدىن الا تاڭداۋ قوسىنىن قۇرۋ سالتىن وتكىزدى. قيمىل موڭعۇلكۇرە اۋداندىق تەحنيك جۇمىسشىلار مەكتەبىنىڭ دەنە تاربيە الاڭىندا وتكىزىلدى، بۇل شينجياڭنىڭ ات ونەرى قيمىلىن دامىتۋ جونىندەگى ماڭىزدى قادام ەكەنىن كورسەتەدى. وسى رەتكى مەكتەپ پەن كاسىپورىن سەلبەستىگىنىڭ ماقساتى − جۇيەلى، كاسىپتىك تاربيەلەۋ ارقىلى تەحنيكاعا جەتىك ات دوپ كومانداسىن قۇرىپ، شينجياڭنىڭ ات ونەرى ىستەرىنە تىڭ ومىرشەڭدىك كۇش سيلاۋ.

موڭعۇلكۇرە بۇكىل ەلگە ايگىلى جىلقى شارۋاشىلىعىنداعى قۋاتتى اۋدان رەتىندە، جىلقى باعۋ تاريحى مەن جىلقى مادەنيەتىنىڭ تەرەڭ استارى بار، ات دوپ سپورتىن دامىتۋ ٴداستۇرلى دەنە تاربيە نىساندارىن جانداندىرۋمەن بىرگە، مادەنيەت، ساياحات كاسىبىنە جاڭا قوزعاۋشى كۇش ۇستەيدى. سالت وتكىزۋ الاڭىندا كومانداعا تاڭدالعان 24 وقۋشىنىڭ رۋحى كوتەرىڭكى ەدى، ولاردىڭ جۇزىنەن اشىلۋ الدىندا تۇرعان ات ونەرىنە تاربيەلەۋ كۋرسىنا دەگەن تاماشا ٴۇمىت مەنمۇندالايدى.

موڭعۇلكۇرە اۋداندىق كاسىپتىك ـ تەحنيكالىق مەكتەبىنىڭ وقۋشىسى ەرلىك وتانقابىل ۇلى بىلاي دەدى: ”مەن كىشكەنتايىمنان ات بايگەسى، كوكپار سياقتى سپورتتاردى وتە جاقسى كورەمىن، وسى رەتكى مەكتەپتە ات دوپ سپورتىنا جاتتىقتىرۋ ورايى بولعاندىقتان، دەرەۋ تىزىمدەلىپ قاتىناستىم. مەن وسى ورايدى قاستەرلەپ، قۇلشىنا جاتتىعىپ، تاڭدالۋعا قۇلشىنامىن“.

موڭعۇلكۇرە اۋداندىق تەحنيك جۇمىسشىلار مەكتەبى كاسىپتىك - تەحنيكالىق شەبەرلىككە تاربيەلەۋ باسىمدىعىن تولىق ساۋلەلەندىرىپ، شوعىرلى تاربيەلەۋدى جان ـ جاقتى قامتاماسىز ەتىپ، كاسىپتىك جاتتىعۋ الاڭى، ارتقى شەپ قىزمەت كورسەتۋ ۇجىمى سياقتىلاردى ورنالاستىرۋ ارقىلى وسى كۋرستى حاۋىپسىز، جوعارى ٴونىمدى ورىستەتۋگە كەپىلدىك ەتىپ، اناعۇرلىم كوپ تاڭداۋلى ات ونەرى دارىندىلارىن تاربيەلەۋدى نىسانا ەتىپ، دارىندىلاردى تاربيەلەۋ جۇيەسىن كەمەلدەندىرىپ، جىلقى شارۋاشىلىعىنىڭ گۇلدەنىپ ـ كوركەيۋىنە، دامۋىنا جەتەكشىلىك ەتەدى.

”موڭعۇلكۇرە اۋداندىق تەحنيك جۇمىسشىلار مەكتەبى مەن كاسىپتىك ـ تەحنيكالىق مەكتەپ ۇزاق ۋاقىتتان بەرى جىلقى شارۋاشىلىعى دارىندىلارىن تاربيەلەۋگە دەن قويىپ، كەمەلدى كاسىپتىك وقىتۋ جۇيەسىن قۇرىپ، تولىق پراكتيكالىق جابدىقتارمەن قامداپ، شينجياڭنىڭ جىلقى شارۋاشىلىعىنىڭ دامۋى ٴۇشىن كوپتەگەن ۇزدىك دارىندىلاردى تاربيەلەۋدى نىسانا ەتتى. بۇل وسى رەت شينجياڭداعى تۇڭعىش ات دوپ كومانداسىن قۇرۋعا ات سالىسقان 2 مەكتەپتىڭ دامۋ بارىسىنداعى تىڭ باستاماسى بولدى، مەكتەپ ات دوپ كومانداسىن بار كۇشپەن قولداپ، ٴتۇرلى وقىتۋ بايلىعىن ساپالىلاندىرىپ، كوماندا مۇشەلەرى ٴۇشىن اناعۇرلىم ساپالى جاتتىعۋ ورتاسىن جاراتادى“. موڭعۇلكۇرە اۋداندىق تەحنيك جۇمىسشىلار مەكتەبىنىڭ ورىنباسار باستىعى، موڭعۇلكۇرە اۋداندىق كاسىپتىك ـ تەحنيكالىق مەكتەپتىڭ ورىنباسار باستىعى لۇي ۋيرۇڭ بىلاي دەدى: ”ٴبىز ات دوپ كومانداسىن قۇرۋ ارقىلى ٴتىپتى دە كوپ جاستار مەن ورەندەردى ات دوپ وينىنا باۋراپ، جىلقى شارۋاشىلىعىنا ات سالىسىپ، شينجياڭنىڭ جىلقى شارۋاشىلىعى مەن دەنە تاربيە ىستەرىنىڭ قارىشتاپ دامۋىنا ۇزدىكسىز ومىرشەڭدىك كۇش ۇستەۋدى ٴۇمىت ەتەمىز“.

ات دوپ سپورتىنىڭ ەنگىزىلۋى شينجياڭنىڭ ات ونەرى جاعىنداعى تىڭ بەلەس قانا ەمەس، ونان دا ماڭىزدىسى ٴداستۇرلى جىلقى شارۋاشىلىعىنىڭ تيپىن وزگەرتىپ، مادەنيەت پەن ساياحاتتى توعىستىرۋدىڭ پارمەندى تۇتقاسى. ىلە ـ شالا شينجياڭ ات ونەرى قوعامىنىڭ ات دوپ كاسىپتىك كوميتەتى ات دوپ دارىندىلارىن تاربيەلەيتىن، جارىس جۇرگىزەتىن، مادەنيەتتى جالپىلاستىراتىن ەكولوگيالىق جۇيەنى جان ـ جاقتى قالىپتاستىرۋ ارقىلى شينجياڭنىڭ جۇڭگو ات دوپ سپورتىنىڭ جاڭا بيىگىن تۇلعالاۋعا قوزعاۋشى كۇش قوسادى.

”ٴبىز وسى رەت موڭعۇلكۇرە اۋدانىندا شينجياڭداعى تۇڭعىش ات دوپ كومانداسىن قۇردىق، مۇنداعى ماقسات − موڭعۇلكۇرە اۋدانىنداعى تەحنيك جۇمىسشىلار مەكتەبىمەن جانە كاسىپتىك - تەحنيكالىق مەكتەبىمەن مەكتەپ پەن كاسىپورىن سەلبەستىگىن قالىپتاستىرۋ. ٴبىز ات ونەرى كاسىبىندەگى وقۋشىلار اراسىنان دەنساۋلىق ساپاسى مەن پسيحيكالىق ساپاسى ۇزدىك وقۋشىلاردى تاڭداپ الىپ، كاسىپتىك ات دوپ سپورتى نازاريالىق بىلىمدەرى مەن ناقتى گيمناستيكا ونەرىنە باۋلىپ، شينجياڭداعى تۇڭعىش تەحنيكادا ىسىلعان ات دوپ كومانداسىن جەتىلدىرىپ، شينجياڭنىڭ دەنە تاربيەسى مەن مادەنيەت ساياحاتىنا تىڭ ومىرشەڭدىك كۇش قوسامىز“ دەدى شينجياڭ ات ونەرى قوعامى ات دوپ كاسىپتىك كوميتەتىنىڭ مەڭگەرۋشىسى، بەيجيڭ ميڭيۇن دەنە تاربيە، مادەنيەت شەكتى سەرىكتەستىگىنىڭ باس جوراسى چين حۋا.