شينجياڭدىق فۋتبولشى قىز:

سول اياعىمدا دوپ شاقاي، وڭ اياعىمدا بيىك وكشەلى تۋفلي

انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ

3 ـ ايدىڭ 29 ـ كۇنى ٴۇرىمجى وليمپيادا دەنە تاربيە ورتالىعىنىڭ ۋنيۆەرسال دەنە تاربيە سارايىندا 2025 ـ جىلعى ”ازيا فۋتبول بىرلەستىگى ايەلدەر فۋتبول كۇنى“ ايەلدەر فۋتبول مەرەكەسى ”انار گۇلى · ارمانعا قۇلاش سەرمەگەن قىز بالا“ ٴۇرىمجى 2 ـ كەزەكتى ايەلدەر فۋتبول جارىسى قيان ـ كەسكى ٴجۇرىلدى، شي ـ اننان ارنايى شينجياڭعا قايتىپ جارىسقا قاتىناسقان زۇلپينۇر تۇرعۇنجان جارىسقا تولىق قاتىناستى، ”بۇگىن جازا دوپ تەپسەم بولعانى جۇرەكسىنەتىن پسيحيكالىق ۇرەيىمدى جەڭدىم، وتە كەرەمەت بولدى!“

23 جاستاعى زۇلپينۇر شانشي كيىم ـ كەشەك ينجەنەريا شۋەيۋانىنىڭ وقۋشىسى، ٴۇيى اتۇشتا، بالا كەزىنەن اعا ـ باۋىرلارىنىڭ دوپ تەپكەنىن كورگەن ول دا دوپ تەبۋدى ۇناتىپ قالادى. شينجياڭ رايونى ىشىندەگى ورتالاۋ مەكتەپتەن وقىعاندا بارىپ ول جاتتىقتىرۋشىنىڭ جەتەكشىلىگىندە دوپ تەبۋگە جاتتىعا باستايدى. ”اتا ـ انام قاراپايىم ديقان بولعانىمەن، مەنىڭ دوپ تەبۋىمدى ولار ايرىقشا قولدايدى، سوندىقتان دا مەن بۇگىنگى كۇنگە دەيىن تاباندىلىقپەن جالعاستىرا الدىم“، ـ دەدى زۇلپينۇر.

دوپ تەبۋدى ۇناتاتىندىقتان زۇلپينۇر قاشاندا الاڭداعى ەڭ وزگەشە ادام ەدى. ”دوپ تەبەتىندەردىڭ ٴبارى ۇل بالالار، جالعىز جاتتىعۋىما بولادى، الايدا جارىسقا قاتىناسىپ دوپ ونەرىمدى جوعارىلاتۋ ٴۇشىن، ٴسوز جوق، ۇلدارمەن قۇراما قۇراۋىم كەرەك بولدى“. ول بىلاي دەدى: ۇل بالالارمەن قۇراما قۇراپ دوپ تەبەتىندىكتەن مىنەزىم اشىق ـ جارقىن بولدى ٴارى كوپتەگەن دوستارمەن تانىستىم، ”كوپشىلىك ٴبىر نيەتتە بولعاندا عانا جارىستا جەڭە الادى، فۋتبولدىڭ مەنى باۋراۋىنداعى سەبەپ تە وسى“.

دالياندا ورتا مەكتەپ وقىپ جۇرگەن كەزىندە الاڭدا ٴۇن ـ ٴتۇنسىز دوپ تەۋىپ جۇرگەن زۇلپينۇر جاقسى دوسى ۋىن شينمەن تانىسادى. ”ونىڭ فۋتبول الاڭىندا جاپادان ـ جالعىز دوپ تەبۋگە جاتتىعىپ جۇرگەنىن كوردىم، جالعىز دوپ تەبەتىن قىز بالانىڭ كوڭىل كۇيىن تۇسىنەتىندىگىمنەن ٴوزىم بارىپ وعان سويلەدىم“، ـ دەدى ۋىن شين. ٴۇيى دالياندا تۇراتىن، اشىق مىنەزدى ۋىن شين ەشقانداي تانىسى جوق، ەل مەن جەرگە دە قانىق ەمەس زۇلپينۇردى باستاپ دوپ تەۋىپ مەكتەپتىڭ ەرلەر فۋتبول كومانداسىنا كىرەدى.

2018 ـ جىلى داليان مەكتەپتەر فۋتبول بىرلەسپە جارىسى باستالادى، ۋىن شين مەن زۇلپينۇر ايەلدەر فۋتبول كومانداسىن قۇرىپ جارىسقا قاتىناسۋ ويىنا كەلەدى. ”ەكەۋىمىز جەكە ـ جەكە ٴوز جاتاعىمىزداعى قىزداردى جارىسقا قاتىناسۋعا جۇمىلدىردىق، ونان سوڭ بىرەۋدەن ـ بىرەۋگە تاپسىرىپ ٴجۇرىپ 14 قىز بالا تاپتىق“. زۇلپينۇر ۋىن شيننىڭ وزىنە كوپتەگەن نارسەلەردى ۇيرەتكەندىگىن ايتتى، مىسالى، باسكەتبول وينايتىن قىزداردىڭ دەنە ساپاسى جاقسى بولاتىندىقتان فۋتبول تەبۋدى سىناپ كورۋىنە بولادى؛ تۇرلىشە مىنەزدەگى ارىپتەستەرمەن قارىم ـ قاتىناس جاساعاندا ادەپ ـ يباعا ٴمان بەرۋ كەرەك. سوڭىندا مەكتەپتىڭ قولداۋىمەن قىزدار جارىسقا ٴساتتى قاتىناسادى.

بۇل كەشىرمەلەر زۇلپينۇرعا شارت ـ جاعداي بولماسا دا شارت ـ جاعداي جاراتىپ دوپ تەبۋدى ۇيرەتتى. شانشي مەملەكەت قورعانىسى ونەركاسىپ كاسىپتىك تەحنولوگيا شۋەيۋانىنا كىرىپ جوعارى تەحنيكۋم وقىعاننان كەيىن، ول شۋەيۋان ـ فاكۋلتەت فۋتبول كومانداسىنا قاتىناسادى — ”سولاي، تاعى دا ۇلدار كومانداسى. ول كەزدە دوپ تەپكەنىمە 6 جىل بولعان، دوپ تەبۋ ونەرىم ۇلداردان قالىسپايتىن“. ۇل مۇشەلەردەن دە قاجىرلى بولعان، ناتيجە جاراتۋعا تالپىنعان، دوپ كومانداسىنىڭ قىزمەتىنە ٴتىپتى دە قىزعىندىلىق كورسەتكەن ول تۇتاس كومانداداعى بىردەن ـ ٴبىر قىز كوماندا باستىعىنا اينالادى.

زۇلپينۇردىڭ جوعارى تەحنيكۋم وقىعان كەزىندە دوپ كومانداسىنداعىلارمەن تۇسكەن توپتىق سۋرەتىن كورگەنىمىزدە، بارلىق ۇل كوماندا مۇشەلەرى جارقىراعان كۇلگىن ٴتۇستى دوپ كيىمىن كيىپتى. ”مەن كوماندا باستىعى بولعاندىقتان كوپشىلىكتەن پىكىر الىپ وسى رەڭدى تاڭدادىم، ولاردىڭ بارلىعى قوسىلدى!“ ول كۇلە: مەنىڭ جەتەكشىلىگىمدە شۋەيۋان تۇڭعىش رەت جارىسقا قاتىناسقاندا ـ اق بۇكىل مەكتەپ بويىنشا ەكىنشى بولدى، ـ دەدى.

داشۋە وقىعان كەزىندە زۇلپينۇر ”شاڭدي پيان ـ اي تيچيۋ“ اتتى قىسقا بەينەجازبا ٴنومىرىن تىزىمگە الدىرىپ، دوپ تەپكەن ساتتەرىن بولىسەدى. مۇنىڭ ىشىندەگى ”سول اياعىمدا دوپ شاقاي، وڭ اياعىمدا بيىك وكشەلى تۋفلي“ اتتى بەينەجازبا نەشە 100 مىڭ كورىلىمگە يە بولادى. مەكتەپتەس ٴسىڭلىسى گو شياۋگى وسى سەبەپتەن وعان نازار اۋدارىپ، ەكەۋى بىرگە مەكتەپ ايەلدەر فۋتبول كومانداسىن قۇرىپ، شانشي ولكەلىك جوعارى مەكتەپ وقۋشىلارىنىڭ فۋتبول بىرلەسپە جارىسىنا قاتىناسادى.

گو شياۋگىنىڭ نازارىندا اپەكەسىندە شينجياڭدىقتارعا ٴتان وزگەشە باۋراۋ قۋاتى بار. ”مەكتەپتەس اپەكەم ۇنەمى ’دوپ تەپسەم بولعانى كوڭىلدى بولامىن‘، ـ دەيدى، ونىڭ كۇلكىسىمەن كىسىنى ٴۇيىرىپ اكەتەتىن بەينەسىنىڭ اسەرىندە كوپ قىز بالا فۋتبول تەبۋگە قىزىقتى“. زۇلپينۇردىڭ ورتا مەكتەپتەگى كەزىندە ـ اق ايەلدەر فۋتبول كومانداسىن قۇرعاندىعىن، قايدا بارسا دا دوپ تەبەتىندىگىن ول كەيىن بىلەدى.

2022 ـ جىلى زۇلپينۇر جۇڭگو فۋتبول بىرلەستىگىنىڭ D دارەجەلى جاتتىقتىرۋشى كۋالىگىن ەمتيحان بەرىپ الىپ، شي ـ انداعى بەلگىلى فۋتبول كلۋبىنىڭ جاتتىقتىرۋشىسى بولادى. قىستىق، جازدىق دەمالىسىندا اتۇشقا قايتقاندا ول چيڭشۇن كلۋبىندا بالالارعا دوپ تەبۋدى ۇيرەتەدى. ”اتۇشتىڭ فۋتبول مايداندارى بارعان سايىن جاقسارىپ كەلەدى، كوپتەگەن قىز بالا كىشكەنتايىنان باستاپ دوپ تەبەدى، قالادا جانە وبلىستا ارناۋلى ايەلدەر فۋتبول جارىسى ۇيىمداستىرىلىپ تۇرادى، مەن بۇگىنگى تاڭداعى ولارعا قاتتى سۇيىنەمىن“.

جوعارى تەحنيكۋمدى بىتىرگەننەن كەيىن زۇلپينۇر تولىق كۋرس شۋەيۋانىنا ەمتيحان بەرىپ قابىلدانادى. قازىر ول قىسقا بەينەجازبا تۇعىرىندا فۋتبولعا قاتىستى نەشە جۇزدەگەن مازمۇن جاريالاپ، 20 مىڭنان استام جانكۇيەر باۋرادى. ماڭايىنا فۋتبولدى قىزۋ سۇيەتىن كوپتەگەن ساباقتاسى جينالدى، ”بىلتىر مەكتەپتىڭ ايەلدەر فۋتبول كومانداسىن باستاپ شانشي ولكەلىك جوعارى مەكتەپ وقۋشىلارى بىرلەسپە جارىسىندا 24 كوماندانىڭ ىشىندە بەسىنشى بولىپ، مەكتەپ تاريحىنداعى ەڭ تاماشا ناتيجەنى جاراتتىق“.

دوپ تەبەتىن قىزداردىڭ بەت تەرىسى قارايىپ، سانى جۋانداپ كەتەدى، ”الايدا مەن فۋتبولدى قىزۋ سۇيەمىن. ول اۋەس قانا ەمەس، ونان دا ماڭىزدىسى، قوعامدا تابان تىرەپ تۇراتىن ونەر — مەن قاشاندا فۋتبولمەن سەرىك بولامىن“، ـ دەدى زۇلپينۇر.