ٴتىلشىمىز لۋ جۇڭ حابارلايدى. بيىل ”ٴبىر بەلدەۋ، ٴبىر جولدى“ بىرگە قۇرۋ باستاماسى العا قويىلعاندىعىنىڭ 10 جىلدىعى. 10 جىلدان بەرى قورعاس قالاسى مەملەكەت جۇكتەگەن ستراتەگيالىق ورىن تۇراقتاندىرۋىن جانە بورىش پەن مىندەتتى تياناق ەتىپ، ”ٴبىر بەلدەۋ، ٴبىر جول“ قۇرىلىسىمەن بەلسەنە توعىسىپ، ”ەكى بازاردان، ەكى ٴتۇرلى بايلىقتان“ تولىق پايدالانىپ، وڭىرلىك ورىن، ساياسات، ەسىك اشۋ سياقتى ەرەكشە باسىمدىقتاردى ساۋلەلەندىرىپ، قۇرلىقتاعى شەكارا وتكەلى تيپىندەگى مەملەكەتتىك زات اينالىمى تورابى قۇرىلىسىن جەدەلدەتىپ، جوعارى دەڭگەيدە سىرتقا ەسىك اشۋدى ىلگەرىلەتىپ، شەكارا وتكەلىنىڭ يقۋاتىن ۇزدىكسىز كەمەلدەندىردى، كەدەننەن ٴوتۋدى قولايلىلاندىرۋ دەڭگەيى ۇزدىكسىز جوعارىلاپ، قورعاس ورتا ازيا، باتىس ازيا، ەۆروپا سياقتى جەرلەرگە تۇتاسقان زات اينالىمى تورابىنا جانە سىرتقى ساۋدادا الدىمەن تاڭدالعان وڭىرگە، كوپتەگەن سىرتقى ساۋدا كاسىپورىندارى وسىندا كەلىپ بايلىق اشاتىن حالىقارالىق بازارعا اينالدى.

قورعاس حۋاميان تازالىق بۇيىمدارى شەكتى سەرىكتەستىگى تازالىق بۇيىمدارى جەلىلەس ماتەريالدارىن وندىرەتىن كاسىپورىن، بۇل سەرىكتەستىك 2019 ـ جىلى قورعاسقا ىرگە تەپكەن، نەگىزىنەن قاعاز جايالىق، تازالىق قاعازى سياقتى جەلىلەس ونىمدەردى وندىرەدى.

 ”سەرىكتەستىگىمىز قورعاستا قارجى قوسىپ زاۆود قۇرۋدى تاڭداعاندا وسى جەردىڭ وڭىرلىك باسىمدىعىن كوزدەپ، وسى ارقىلى ورتا ازياعا بازار اشۋدى ويلادىق“ دەدى سەرىكتەستىكتىڭ ورىنباسار باس ديرەكتورى ۋاڭ شينحۋا تىلشىگە.

بيىل سەرىكتەستىك ورتا ازيا بازارىن بەلسەنە اشۋ ارقىلى تاپسىرىستى مولايتتى. تەك بيىل 9 ـ ايدىڭ وزىندە قازاقستاننىڭ ٴبىر ساۋداگەرى سەرىكتەستىكپەن 100 ميلليون يۋاندىق ۇزاق ۋاقىت زاتپەن قامداۋ تاپسىرىسىنا قول قويىسىپ، ايىنا ٴار قورابىندا 500 مىڭ دانا قاعاز جايالىق بار 20 تيەۋىش قوراپ زاتپەن قامداۋعا كەلىستى. بۇعان قالعان ەكسپورت زاكازدارىن قوسقاندا قازىر سەرىكتەستىكتىڭ ٴار ايداعى ەكسپورت مولشەرى شامامەن 90 تيەۋىش قوراپ بولىپ، شامامەن 45 ميلليون داناعا جەتەدى.

10 ـ ايدىڭ 30 ـ كۇنى ٴتىلشى قورعاس حۋاميان تازالىق بۇيىمدارى شەكتى سەرىكتەستىگىنىڭ قاعاز جايالىق ٴوندىرىس جەلىسىنەن بۇكىلدەي اۆتوماتتاندىرىلعان ۇلاسپالى جەلىنىڭ جوعارى قارقىنمەن جۇمىس جۇرگىزىپ جاتقانىن، ٴبىر ٴجۇرىس جۇمىس تارتىبىنەن سوڭ قاعاز جايالىقتىڭ ٴوندىرىس جەلىسىنەن تولاسسىز شىعىپ جاتقانىن كوردى.

 ”سەرىكتەستىكتە قازىر ەكى قاعاز جايالىق ٴوندىرىس جەلىسى مەن ٴبىر جايالىق سىم ٴوندىرىس جەلىسى بار، كۇنىنە 300 مىڭ دا 320 مىڭ دانا قاعاز جايالىق وندىرۋگە بولادى. الايدا، قازىرگى ٴوندىرىس قۋاتى قازاقستان مەن قىرعىزستاننىڭ بازار قاجەتىن عانا قاناعاتتاندىرا الادى“ دەدى ۋاڭ شينحۋا.

ورتا ازيا بازارىنىڭ قاجەتىن قاناعاتتاندىرۋ ٴۇشىن سەرىكتەستىك كەلەر جىلى 13 ٴوندىرىس جەلىسىن تىڭنان قوسۋدى جوسپارلادى، مۇنىڭ ىشىندە تازالىق قاعازىن وندىرەتىن 10 جەلى، قۇرعاق، دىمقىل ەكى ٴتۇرلى  سۋىرما قاعاز  ونىمدەرىن وندىرەتىن 3 جەلى بار. ”وسى 13 ٴوندىرىس جەلىسى كەلەر جىلدىڭ باسىندا قۇرىلىس باستاپ، 6 - ايدا وندىرىسكە قوسىلاتىندىعى مەجەلەنۋدە، ٴوندىرىس جەلىسى كوبەيتىلگەننەن كەيىن، سەرىكتەستىكتىڭ ونىمدەرى ٴتىپتى دە مولايىپ، جىلدىق ٴونىم قۇنى مەجەمەن بيىلعى 50 ميلليون يۋاننان 500 ميلليون يۋانعا ارتادى ٴارى 200 دەن استام جۇمىس ورنى تىڭنان قوسىلادى“ دەدى ۋاڭ شينحۋا .

سول كۇنى قورعاس كەشەندى قورعامالى باجى رايونىنداعى قورعاس تەرى كيىم - كەشەك ساۋدا - ونەركاسىبى شەكتى سەرىكتەستىگىنىڭ ٴوندىرىس سەحىندا، ٴوندىرىس لەنياسىنداعى جۇمىسشىلار تەرىنى تۇزداۋ، شەلدەۋ، يگە سالۋ جۇمىستارىن جۇرگىزىپ، مانەرلەۋ تاپسىرىستارىن قاۋىرت، ٴتارتىپتى دايىنداپ جاتتى.

قورعاس تەرى كيىم - كەشەك ساۋدا - ونەركاسىبى شەكتى سەرىكتەستىگى قورعاس كەشەندى قورعامالى باجى رايونىنداعى سۋسار تەرىسىن شيكىزات ەتكەن تۇڭعىش قورعامالى باجى مانەرلەۋ كاسىپورىنى، قورعاس حالىقارالىق شەكارالىق سەلبەستىك ورتالىعىنىڭ كەدەنى كاسىپورىنداردى سايكەستىرۋ مەحانيزمىن تولىق ساۋلەلەندىرىپ، ساياساتتىق سۇيەمەلدەۋدى ورىستەتىپ، كەشەندى قورعامالى باجى رايونىنىڭ قورعامالى باجىعا قاتىستى ساياساتتارىن ەگجەي - تەگجەيلى ٴتۇسىندىرىپ، كاسىپورىندار العا قويعان بارىستىق، كەزەڭدىك ماسەلەلەرگە ٴبىر - بىرلەپ جاۋاپ قايتاردى ٴارى كاسىپورىنداردىڭ بازارعا تەكسەرۋ - زەرتتەۋ جۇرگىزۋىنە كومەكتەسىپ، كەشەندى قورعامالى باجى رايونىنىڭ مانەرلەۋدى مىندەتتەۋ ساياساتىنىڭ باسىمدىعىنان ۇيلەسىمدى پايدالانىپ، ەسەپ - قيساپ داپتەرىن ورناتۋ، زاتتاردى كەدەننەن وتكىزۋ سياقتى جاقتاردا جالپى بارىستىق جەتەكشىلىك ەتۋ، قىزمەت وتەۋ ارقىلى كاسىپورىنداردىڭ تاپسىرىستاردى جەدەل ورىنداپ، رايوننان جەدەل شىعارۋىنا كومەكتەستى.

قورعاس تەرى كيىم - كەشەك ساۋدا - ونەركاسىبى شەكتى سەرىكتەستىگى ٴوندىرىس زاۆودىنىڭ باستىعى ۋاڭ حۇڭفىڭ تىلشىگە بىلاي دەدى: ”كاسىپورىن بيىل 7 - ايدا وندىرىسكە قوسىلعاننان بەرى، تاماشا ٴوندىرىس ساپاسىنىڭ ارقاسىندا ونىمدەرى ورتا ازيا تۇتىنۋشىلارىنىڭ قىزۋ قارسى الۋىنا بولەندى. 9 - ايدان باستاپ تاپسىرىس كورنەكتى ارتتى. قازىر سەرىكتەستىكتىڭ تەرى كيىم - كەشەكتەرىنىڭ كۇندىك مانەرلەۋ مولشەرى 50 دانا شاماسىندا بولىپ، مولشەرمەن تۇتاس جىلدا 5 مىڭ دانا ەكسپورت ەتىپ، ٴونىم قۇنى 40 ميلليون يۋاننان اسادى. ورتا ازيا بازارىنا تابان تىرەگەننەن كەيىن، سەرىكتەستىك سولتۇستىك ەۆروپا، شىعىس ەۆروپا جانە ورتا شىعىس بازارلارىن بەلسەنە اشادى ٴارى قورعاستى بازا ەتىپ، تەرى يلەۋ، مانەرلەۋ، تەرى كيىم - كەشەك ٴوندىرۋ، حالىقارالىق تەرى ونىمدەرىن باسەكەلەستىرە ساتۋ، حالىقارالىق تەرى ونىمدەرىن تاپسىرىسپەن جاساپ ساتۋ ورتالىعى سياقتى ساۋدا، مانەرلەۋ، ٴوندىرۋ، كورمەگە قويۋ، ساتۋ ٴبىر تۇلعالانعان تۇتاس كاسىپ تىزبەگى نىسانىن قۇرادى“.

”بيىل الدىڭعى 3 توقساندا قورعاستا 120 دان استام كاسىپورىن سىرتقى ساۋدا قيمىلدارىن بەلسەنە ورىستەتىپ، سىرتقى ساۋدا سوماسى 7 ميلليارد 388 ميلليون دوللارعا جەتتى. ٴبىز مەحانيزم ورناتۋ، تۇعىر ورناتۋ، قىزمەت وتەۋدى كۇشەيتۋ ارقىلى وسى زامانعى كاسىپ سالاسى جۇيەسىن جەدەل قۇرىپ، كاسىپ سالاسى ارقىلى ساۋداگەر شاقىرۋدى، شوعىرلى ساۋداگەر شاقىرۋدى، دالمە - ٴدال ساۋداگەر شاقىرۋدى ىلگەرىلەتىپ، كاسىپورىندار مەن كاسىپورىنشىلارعا تاماشا دامۋ ورتاسىن جاراتۋعا بار كۇشىمىزدى سالىپ، كاسىپورىندارمەن بىرگە كەلەلى تاريحي ورايدى مىقتى يگەرىپ، جوعارى ساپالى دامۋدى بىرگە ىلگەرىلەتىپ، ەركىن ساۋدا رايونى قۇرىلىسىنا ۇلەس قوسامىز“ دەدى قورعاس قالالىق ساۋدا ىستەرى مەكەمەسىنىڭ ورىنباسار باستىعى جاڭ فۋچياڭ.

سۋرەتتە: قورعاس حۋاميان تازالىق بۇيىمدارى شەكتى سەرىكتەستىگىنىڭ جۇمىسشىلارى قاعاز جايالىق وندىرۋدە.      لۋ جۇڭ فوتوسى