ابدىراحمان سەيت 6 جىلدا 16 ادامدى قۇتقاردى

جىرعالاڭ وزەنى بويىنداعى اماندىق قورعاۋشى

ماقالاسىن جازىپ، سۋرەتىن تۇسىرگەن تىلشىلەرىمىز شىن شياۋمىڭ، گۋ رۇڭ

”بىرەۋ سۋعا ٴتۇسىپ كەتتى!“ 2023 - جىلى 7 - ايدىڭ 5 - كۇنى سول جەردەگى بۇقارا ٴبىر ايەلدىڭ سۋعا تۇسكەنىن بايقاعاننان كەيىن وزەن جاعاسىن بويلاپ قۇتقارىڭدار دەپ ايعايلايدى. قولباسشىلىق ورتالىعى حاۋىپتى جاعدايدى بىلگەننەن كەيىن قۇلجا اۋداندىق قوعام حاۋىپسىزدىگى مەكەمەسى جەلىجۇزى ساقشى بولىمشەسىنىڭ جىرعالاڭ كوپىرى حالىققا قولايلى ساقشى پۋنكتىنىڭ كومەكشى ساقشىسى ابدىراحمان سەيت قۇتقارۋ جابدىقتارىن تەز ارادا الىپ شىعىپ، قۇتقارىڭدار دەگەن داۋىس شىققان جاققا قاراي ۇشىرتا جونەلدى، بۋىرقانعان سۋعا الدىمەن سەكىرىپ تۇسكەن ول ىلە - شالا جەتكەن جاۋىنگەر سەرىكتەرىنىڭ كومەگىندە سۋعا كەتكەن ايەلدى ٴساتتى قۇتقاردى. بۇل − ابدىراحمان قىزمەت ىستەگەن 6 جىلدا ٴساتتى قۇتقارعان ون التىنشى ادام ەدى.

2017 ـ جىلى قوعام حاۋىپسىزدىگى قىزمەتىنە قاتىناسقاننان بەرى ابدىراحمان حالىققا قولايلى ساقشى پۋنكتىنىڭ شارلاۋ، ساقتانۋ ـ تىزگىندەۋ قىزمەت ورنىندا قىزمەت ىستەپ، قىزمەتىن مۇقيات، جاۋاپكەرلىكپەن، شوگەلدىكپەن ىستەدى. ٴار رەتكى قۇتقارۋ ـ كومەكتەسۋ − ٴولىم مەن ومىرگە قاتىستى ٴبىر رەتكى سىناق، ٴبىراق ىسىلعان قۇتقارۋ ـ كومەكتەسۋ قابىلەتىنە سۇيەنىپ، قاتەر تونگەن جانداردى امان - ەسەن قۇتقارىپ تۇردى. ونىڭ ەشنارسەدەن تايىنبايتىن ەرلىگىنە سۇيىنگەن جۇرتشىلىق ونى ”جىرعالاڭ وزەنى بويىنداعى اماندىق قورعاۋشى“ دەپ اتادى. الايدا ابدىراحمان بۇعان بولا ماساتتانبادى. ول بىلاي دەدى: ”ٴبىر ادامنىڭ كۇشى شەكتى، تەك اناعۇرلىم كوپ ادامدى ىنتىماقتاستىرعاندا عانا حالىق بۇقاراسىنىڭ حاۋىپسىزدىگىن اناعۇرلىم ويداعىداي قورعاۋعا بولادى“. سوندىقتان ونىڭ ۇسىنىسىمەن جىرعالاڭ كوپىرى حالىققا قولايلى ساقشى پۋنكتىن وزەك ەتىپ، وزەن ماڭىنداعى حالىققا قولايلى ساقشى پۋنكتتەرىن قامتىعان، دەنساۋلىعى مىقتى، سۋ جاعدايىن جاقسى بىلەتىن جاس كومەكشى ساقشىلاردان ۇيىمداسقان ”شۇعىل جاعدايعا توتەپ بەرۋ، قۇتقارۋ قىزمەت وتەۋ اترەتىن“ قۇرىپ، ”شارلاۋ، ساقتانۋ اۋماعى، حالىققا قولايلى ساقشى ىستەرى پۋنكتى“ بىرلەسىپ مىندەت وتەۋ، بىرلەسىپ قيمىلداۋ مەحانيزمىن ورناتتى جانە كەمەلدەندىردى. ولار نەگىزىنەن كۇندەلىكتى وزەن جاعالاۋىن شارلاۋ، ساقتانۋ، توسىن ۋاقيعالارعا شۇعىل توتەپ بەرۋ، قۇتقارۋ، سۋعا كەتۋدەن ساقتانۋ حاۋىپسىزدىگى تاربيەسىن ۇگىتتەۋ سياقتى قىزمەتتەرگە جاۋاپتى بولادى. قۇتقارۋ ـ كومەكتەسۋ قوسىنىنىڭ كاسىپتىك ورەسىن ۇزدىكسىز جوعارىلاتۋ ٴۇشىن، ابدىراحمان ىرىقتىلىقپەن تاربيەشى بولىپ، اپتاسىنا 4 - 5 ساعات ۋاقىت شىعارىپ، وزىندىك حاۋىپسىزدىك تانىمى، قۇتقارۋ جابدىقتارىن پايدالانۋ، سۋعا سۇڭگۋ شەبەرلىگى سياقتى جاقتاردان شوعىرلى باۋلۋ جۇرگىزدى ٴارى مەملەكەتتىك ەرەكشە دارەجەلى تاڭداۋلى حالىق ساقشىسى حى يۇڭجۇننەن اقىل سۇراپ، ونى حالىق كومەكشى ساقشىلارىنا ناق مايداندا ساباق وتۋگە ۇسىنىس ەتىپ، شۇعىل جاعدايعا توتەپ بەرۋ، قۇتقارۋ ـ كومەكتەسۋ ونەرىن ۇيرەتتى.

ابدىراحمان تاعى ”جازدا كەزەكتەسىپ شارلاۋ، ساقتانۋ - تىزگىندەۋ ٴادىسىن“ العا قويىپ، مەكتەپكە بارىپ - كەلۋ، ٴتۇس الەتى، كەشكى مەزگىل سىندى 3 ٴتۇيىندى ۋاقىت كەزەڭىندە قىزمەتكەرلەردى وزەن بويىن شارلاۋعا ۇيىمداستىردى. جىرعالاڭ وزەننەن وتەتىن جول بولەكتەرى، سۋ ايدىنى تاياز قايراڭدى رايون سياقتى جەرلەردە ابدىراحمان ارناۋلى مىندەت وتەپ، اۆتوكولىككە ورناتىلعان كەرنايدان پايدالانىپ، سۋعا كەتۋدەن ساقتانۋ ۇگىتىن ۇدايىلاندىردى. بۇدان سىرت، ول وزەن بويىنداعى الەۋمەتتىك اۋماقتاعى كادرلار مەن بۇقارانى، ورتا، باستاۋىش مەكتەپتەردەگى وقىتۋشى ـ وقۋشىلاردى بەلسەنە ۇيىمداستىرىپ، ”سۋعا كەتۋدەن ساقتانۋ“ ارناۋلى تاقىرىپتىق شوعىرلى ۇگىت ساباعىن مەرزىمسىز ورىستەتىپ، قالىڭ كادرلار مەن بۇقارانى، وقىتۋشى ـ وقۋشىلاردى قول ۇستاسىپ اماندىقتى قورعاۋعا تاربيەلەدى.

ابدىراحمان ٴىس جۇزىندىك ارەكەتى ارقىلى قوعام حاۋىپسىزدىگى حالىق ساقشىلارىنىڭ اۋەلگى ماقساتى مەن بورىشىن ٴتۇسىندىردى، ونىڭ كورنەكتى قىزمەتى دە جوعارى دارەجەلى ورىننىڭ جاقسى باعاسىنا جانە بۇقارانىڭ القاۋىنا يە بولىپ، ىلگەرىندى ـ كەيىندى ”شينجياڭداعى جاقسى ادام“، ”اۆتونوميالى رايون بويىنشا قوعام حاۋىپسىزدىگى ورگاندارىنداعى ناتيجەسى كورنەكتى جەكە“، ”اۆتونوميالى رايون بويىنشا 100 تاڭداۋلى كومەكشى ساقشى - كومەكشى ساقشى جۇلدىزى“ سياقتى اتاقتارعا يە بولدى. وسى داڭقتارعا يە بولسا دا، ابدىراحمان باستان ـ اياق داندايسىپ كورمەدى. ول بىلاي دەدى: ”ساقشى كيىمىن كيۋ جاۋاپكەرشىلىك پەن مىندەت وتەۋدەن دەرەك بەرەدى. بۇقارانىڭ ٴومىرى قاتەرگە تاپ بولسا، مەن قايتكەن كۇندە دە بار كۇشىممەن قۇتقارامىن“.

سۋرەتتە: ابدىراحمان مەن جاۋىنگەر سەرىكتەرى وزەن جاعاسىن شارلاۋدا.