اۆتونوميالى رايوننىڭ 2024 - جىلعى ”ٴجۇز كۇندە ون ميلليون ادامدى ينتەرنەتتە جۇمىسقا قابىلداۋ ارناۋلى قيمىلىنىڭ“ باستالۋ سالتى جانە جياڭسۋدىڭ جۇمىستاندىرۋ جاعىنان ىلەگە كومەكتەسۋ بويىنشا ارناۋلى قىزمەتكەر قابىلداۋ جينالىسى قۇلجا قالاسىندا وتكىزىلدى
تىلشىلەرىمىز حان شاشا، جاڭ چيڭحۋا، لي يافىڭ، ەرىكتى ٴتىلشى چي يۇيۋەي حابارلايدى. 6 - ايدىڭ 3 - كۇنى تۇستەن بۇرىن اۆتونوميالى رايوننىڭ 2024 - جىلعى ”ٴجۇز كۇندە ون ميلليون ادامدى ينتەرنەتتە جۇمىسقا قابىلداۋ ارناۋلى قيمىلىنىڭ“ باستالۋ سالتى جانە جياڭسۋدىڭ جۇمىستاندىرۋ جاعىنان ىلەگە كومەكتەسۋ بويىنشا ارناۋلى قىزمەتكەر قابىلداۋ جينالىسى قۇلجا قالاسىندا وتكىزىلدى
ارناۋلى قىزمەتكەر قابىلداۋ جينالىسى نازاردى اۆتونوميالى رايوننىڭ “سەگىز ٴىرى كاسىپ سالاسى شوعىرى” قۇرىلىسىنا جانە قاجەتسىنۋ مولشەرى زور، بازاردا تاپشى، دامۋدىڭ الدىڭعى لەگىندە تۇرعان سالالارعا؛ جوعارى مەكتەپ بىتىرەتىن وقۋشىلار، قالا - قالاشىقتاعى جۇمىسسىزدار سياقتى ٴتۇيىندى قاۋىمدى جۇمىستاندىرۋعا شوعىرلاندىرىپ، ”كاسىپورىندى تانىستىرۋ + جۇمىس ورنىن كورسەتۋ + ىقپالداسىپ اۋىس - كۇيىس جاساۋ“ سىندى بۇلتتىق تانىستىرۋ فورماسى ارقىلى وڭىرلىك، كاسىپتىك، شوعىرلى سيپاتتاعى ٴبىر قىدىرۋ جەلىدە جانە جەلىدەن تىس قىزمەتكەر قابىلداۋ قيمىلىن ۇيىمداستىرىپ، قولايلى، جوعارى ٴونىمدى ٴتۇيىلىسۋ ارناسىن ازىرلەپ، اناعۇرلىم ناقتى شارالار ارقىلى ورنىقتى جۇمىستاندىرىپ، حالىق تۇرمىسىنا تيىمدىلىك جاسادى.
بۇل رەتكى قيمىلدى اۆتونوميالى رايوندىق ادام كۇشى بايلىعى جانە قوعامدىق قامتاماسىزداندىرۋ مەڭگەرمەسى، جياڭسۋ ولكەلىك ادام كۇشى بايلىعى جانە قوعامدىق قامتاماسىزداندىرۋ مەڭگەرمەسى، جياڭسۋ ولكەسىنىڭ ىلەگە كومەك بەرۋ الدىڭعى شەپ قولباسشىلىق شتابى بىرلەسىپ ۇيىمداستىرىپ، اۆتونوميالى رايوندىق الەۋمەتتىك جۇمىستانۋعا قىزمەت وتەۋ ورتالىعى، جياڭسۋ ولكەلىك دارىندىلار اۋىس - كۇيىسى ورتالىعى، ىلە وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسى ۇستىنە الىپ وتكىزدى. جياڭسۋ ولكەلىك ادام كۇشى بايلىعى جانە قوعامدىق قامتاماسىزداندىرۋ مەڭگەرمەسىنىڭ 2 ـ دارەجەلى شارلاۋشىسى جاڭ بينفىڭ بىلاي دەدى: ”جياڭسۋ مەن ىلەنىڭ ەڭبەككۇش سەلبەستىگى، تەحنيكالىق سەلبەستىكتى كەڭەيتۋى، دارىندىلار اۋىس ـ كۇيىسىن ورىستەتۋى، سوڭىنا ٴتۇسىپ قىزمەت وتەۋدى كۇشەيتۋى سياقتى جاقتارداعى اۋىس ـ كۇيىس سەلبەستىگىن تىڭعىلىقتى ىلگەرىلەتىپ، جياڭسۋ مەن ىلە اراسىنداعى ادام كۇشى بايلىعىنىڭ ٴوڭىر اتتاعان اۋىسپالىلىعىن جەبەپ، شينجياڭدىق جوعارى مەكتەپ بىتىرەتىن وقۋشىلار سىندى ٴتۇيىندى قاۋىمنىڭ جوعارى ساپادا، تولىق جۇمىستانۋىن قول ۇستاسا كۇشەيتسەك دەدىك“.
”بۇدان كەيىن كاسىپ سالاسى ارقىلى جۇمىستانۋعا دەم بەرۋدى كورنەكتى ورىنعا قويۋعا تاباندى بولىپ، جەرگىلىكتى ورىننىڭ جۇمىس ورنىن اشۋىنا قولداۋ كورسەتۋ، ەڭبەك ونەرىنە باۋلۋ كۋرستارىن اشۋ، جوعارى ساپالى ەڭبەككۇش ماركاسىن جاراتۋ، شارۋاشىلىق قۇرۋدى جەتىلدىرۋ بازاسىن قۇرۋ، تەحنيك جۇمىسشىلار مەكتەپتەرىنىڭ قابىلەت دەڭگەيىن جوعارىلاتۋدى كۇشەيتۋ سياقتى ٴبىرقىدىرۋ شارالار ارقىلى ىلە وبلىسىنا توتە قاراستى ورىندار مەن بيڭتۋان 4 - شىسىنىڭ، 7 - شىسىنىڭ جۇمىسقا ورنالاستىرۋ دەڭگەيىن جوعارىلاتىپ، جەرگىلىكتى ورىن ەكونوميكاسىنىڭ، قوعامىنىڭ جوعارى ساپالى دامۋىنا دەم بەرىپ، ٴار ۇلت بۇقاراسىنىڭ ورنىقتى جۇمىستانۋىن جانە كىرىستەرىن ارتتىرىپ اۋقاتتانۋىن ەڭ جوعارى شەكتە ىلگەرىلەتەمىز“ دەدى ىلە وبلىستىق ۇكىمەت پارتيا باسشىلىق گرۋپپاسىنىڭ مۇشەسى، جياڭسۋ ولكەسىنىڭ ىلەگە كومەك بەرۋ الدىڭعى شەپ قولباسشىلىق شتابى پارتكومىنىڭ ورىنباسار شۋجيى، ورىنباسار باس قولباسشىسى لي جانچاۋ.
ناق مايدانداعى قىزمەتكەر قابىلداۋ جينالىسىنا ايگىلى كاسىپورىندار جينالدى، جياڭسۋ مەن ىلەنىڭ 170 ساپالى كاسىپورنى ناق مايدانعا كەلىپ، 4000 نان استام جۇمىس ورنىمەن قامدادى، اسىرەسە، جياڭسۋ كاسىپورىندارى، ٴتۇيىندى كاسىپورىندار، ساياحاتتىق قىزمەت وتەۋ كاسىپورىندارى، بيڭتۋان كاسىپورىندارى، ورتا، شاعىن، ۇساق كاسىپورىندار، قورعاس ەركىن ساۋدا رايونىنداعى كاسىپورىندار سىندى 6 ەرەكشە ارناۋلى رايون قۇرىلىپ، ىلە شىفان داشۋەسى سياقتى وبلىسقا توتە قاراستى ورىندارداعى جوعارى مەكتەپتەر مەن ورتا تەحنيكۋم مەكتەپتەرىندەگى بيىل وقۋ بىتىرەتىن وقۋشىلار مەن بۇرىنعى جىلدارى وقۋ بىتىرگەندەردى نەگىز ەتكەن، جياڭسۋ مەن ىلە سىندى ەكى جەردە قىزمەتكەر قابىلداۋ قاجەتى بار ٴار ٴتۇرلى ادام ىستەتۋشى ورىندارمەن بەتپە - بەت پىكىر الماستىرۋ، ۇشتاسۋ تەكشەسىن دالمە - ٴدال قۇرىپ، جۇمىستاندىرۋ مەن كاسىپ سالاسىنىڭ ۇشتاسۋىن، قىزمەت ىزدەۋشىلەر مەن قىزمەت ورنىنىڭ ۇشتاسۋىن جۇزەگە اسىردى.
”كىچىڭ عىلىم ـ تەحنيكا (سۋچيان) شەكتى سەرىكتەستىگى وسى جولى اۆتوماتتاندىرىلعان مەڭگەرۋ، حيميا تاجىريبەحاناسى، جابدىقتاردى جوندەۋ، كۇتىمدەۋ سياقتى جۇمىس ورىندارىن قامتىعان 60 نەشە جۇمىس ورنىن ازىرلەدى، ەندى عانا جۇمىسقا قابىلدانعانداردىڭ ەڭبەكاقىسى قازىر 5000 يۋاننان 9000 يۋان ارالىعىندا بولادى“ دەدى جياڭسۋ سۋجوۋ سۋچيان ونەركاسىپ باقشا رايونى قوعامدىق ىستەر مەكەمەسىنىڭ باستىعى حۋ ميڭبو.
تارىم داشۋەسىنىڭ ينتەرنەت ينجەنەرياسى كاسىبىنەن وقۋ بىتىرگەن ما كۇن تاڭ سارىدە 3 ورىنعا ٴوزىنىڭ قىسقاشا ٴومىر بايانىن جىبەردى، ول بىلاي دەدى: ”مەن قىسقاشا ٴومىر بايانىمدى بەرگەن 3 كاسىپورىننىڭ دا قاجەتى مەنىڭ ماماندىعىممەن ساي كەلەدى ەكەن، كاسىپورىننىڭ دامۋ بولاشاعىنا جانە ٴوسۋ كەڭىستىگىنە ٴتىپتى دە ٴمان بەرەمىن“.
سول كۇنى 2300 دەن استام جۇمىس قاراستىرۋشى الاڭعا كىردى، 927 ادام العاشقى ادىمدا جۇمىسقا ورنالاسۋ نيەتىنە كەلىستى.
قيمىلدىڭ ىقپال كولەمىن كەڭەيـتۋ ٴۇشىن، قىزمەتكەر قابىلداۋ جينالىسى ”قىزمەت ورنى ٴسىزدى كۇتۋدە، الاڭسىز جۇمىستانىپ، ىلەگە ىرگە تەبىڭىز“ اتىنداعى ەرەكشە تىكە تاراتۋ بولمەسىن قۇردى، قىزمەتكەر قابىلدايتىن كاسىپورىن ۋاكىلدەرى كاسىپورىننىڭ دامۋ جاعدايى مەن قىزمەت ورنى ينفورماتسياسىن تانىستىرۋدان سىرت، مەكتەپ بىتىرگەن وقۋشىلاردىڭ تىكە تاراتۋ تۇعىرى ارقىلى قىزمەت ىزدەۋ تىلەگىن بەينەلەۋىنە، كاسىپتىك شەبەرلىك پەن جاڭالىق اشۋ جەتىستىكتەرىن ايگىلەۋىنە بولادى. ناق مايداندا ”شينجياڭ جىبەك جولى دىبىس - كەسكىنى“، ”قىزمەت ورنى ٴسىزدى كۇتۋدە، الاڭسىز جۇمىستانىپ، ىلەگە ىرگە تەبىڭىز“ سىندى 2 تۇعىر ٴبىر ۋاقىتتا تىكە تاراتىپ، جيىنى 3 ميلليون 940 مىڭ ادام - رەت كوردى.
قىزمەتكەر قابىلداۋ جينالىسىندا تاعى ”جۇمىستانۋعا قىزمەت وتەۋ پۋنكتى“ قۇرىلىپ، ەرەكشە ۇسىنىس ەتىلگەن ادام كۇشى بايلىعى جانە قوعامدىق قامتاماسىزداندىرۋ تاراۋلارىنىڭ ساياسات ماماندارى، جوعارى مەكتەپتەردىڭ جۇمىسقا ورنالاستىرۋ قىزمەتىنە جەتەكشىلىك ەتەتىن ماماندار، زاڭ اقىلشىلارى مەكتەپ بىتىرگەن وقۋشىلارعا ساياساتتىق كەڭەس بەرۋ، جۇمىستانۋعا جەتەكشىلىك ەتۋ، قىسقاشا ٴومىر بايانىن سارالاۋ، زاڭدىق كومەك بەرۋ جانە قىزمەت ورنىن تانىستىرۋ سياقتى ٴبىر بەكەتتىك بەلسەنە قىزمەت وتەدى.
ىلە وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسى ”ٴجۇز كۇندە ون ميلليون ادامدى ينتەرنەتتە جۇمىسقا قابىلداۋ ارناۋلى قيمىلىنىڭ“ باستالۋ سالتىن وراي ەتىپ، ىرىقتىلىقپەن الدىڭعى شەپتە قىزمەت وتەپ، ىلە وبلىسىنىڭ ”1 + 1 + 8 كاسىپ سالاسى شوعىرىن“ تىعىز ارقاۋ ەتىپ، الەۋمەتتىك جۇمىستانۋعا جان - جاقتى قىزمەت وتەۋدى تىڭعىلىقتى ىلگەرىلەتىپ، تاماشا شارۋاشىلىق - ساۋدا ورتاسىن جاراتىپ، جياڭسۋ مەن ىلە سىندى ەكى جەردىڭ ادام كۇشى بايلىعىنىڭ ٴوڭىر اتتاپ جىلجۋىن جەبەپ، اناعۇرلىم كوپ جۇمىس ىزدەۋشىلەرگە جۇمىستانۋ، شارۋاشىلىق قۇرۋ جاعىنان قىزمەت وتەدى، ـ دەدى ىلە وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسى جۇمىستاندىرۋعا قىزمەت وتەۋدى باسقارۋ مەكەمەسىنىڭ ورىنباسار باستىعى اسحات ٴماتسۇپ ۇلى.
سۋرەتتە: جۇمىس ىزدەۋشىلەر ايىرىقشا ىنتا تانىتىپ، كاسىپورىنداردىڭ كورمە ورنى الدىندا ۇزاق قاتارعا تۇردى.
سۋرەتتى جاڭ چيڭحۋا تۇسىرگەن