ٴتىلشىمىز ۋاڭ جىحۋا، پراكتيكانت ٴتىلشى جاڭ جيايۋان حابارلايدى. ٴان - ٴبي قالىقتاپ، بايىرعى اۋەندەر ۇزاققا دەيىن كۇمبىرلەدى. ىلە قازاق اۆتونوميالى وبلىسى قۇرىلعاندىعىنىڭ 70 جىلدىعىن قۇتتىقتاۋ ٴۇشىن، 6 - ايدىڭ 10 -، 11 - كۇندەرى كەشتە جۇڭگو دۇڭفاڭ ويىن - ساۋىق توبى ىلە تەاترحاناسىندا كورەرمەنگە 2 مايدان «ٴانىم تيانشاندا شىرقالسىن» اتىنداعى الەۋمەتتىك يگىلىك كونسەرتىن قويدى.
بۇل جۇڭگو دۇڭفاڭ ويىن - ساۋىق توبىنىڭ شينجياڭدى مادەنيەتپەن نارلەندىرۋدى بەلسەنە ىلگەرىلەتىپ، مادەنيەت ارقىلى حالىققا تيىمدىلىك جەتكىزۋدى امالياتتا ايگىلەۋ ٴۇشىن، مادەنيەت جانە ساياحات مينيسترلىگى، مەملەكەتتىك ۇلت ىستەرى كوميتەتى بىرلىكتە ۇيىمداستىرىپ ورىستەتكەن ”كوكتەم جاڭبىرى ينجەنەرياسى“ اتىنداعى مادەنيەت جانە ساياحات جاعىنان ەرىكتى قىزمەت وتەۋ بويىنشا شەكارا وڭىرگە ساپار جوسپارىنا بەلسەنە ات سالىسقان ٴبىر رەتكى ناقتى ارەكەتى، سونىمەن بىرگە، ىلە قازاق اۆتونوميالى وبلىسى قۇرىلعاندىعىنىڭ 70 جىلدىعىنا ارنالعان ”مادەنيەت شاشۋى“ بولدى.
”وسى ساۋىق كەشتە ونەرپازدار وزگەشە سالت ـ سانالىق تۇسكە يە كوركەمونەر تۋىندىلارىن عانا ەمەس، جۇڭحۋانىڭ تاڭداۋلى ٴداستۇرلى مادەنيەتىنىڭ استارىن تولىق ايگىلەيتىن ٴان - ٴبي نومىرلەرىن دە الا كەلدى، ىلە حالقىمەن وسى تاماشا ساتتەن بىرگە ٴلاززات الىپ، مادەنيەت پەن كوركەمونەردىڭ وزگەشە باۋراۋ قۋاتىن سەزىندىرسەك دەدىك“. جۇڭگو دۇڭفاڭ ويىن ـ ساۋىق توبىنىڭ مەملەكەتتىك 1 ـ دارەجەلى ارتيسى، جۇرگىزۋشىسى لو شان بىلاي دەدى: ساۋىق كەشتەگى جالپى كونسەرت نومىرلەرىنىڭ مازمۇنى باي، جەكە ٴان، حور، اسپاپتىق مۋزىكالاردى ورىنداۋ، ٴبي سياقتىلار قامتىلدى.
6 - ايدىڭ 10 - كۇنى كەشتە كونسەرت بەتاشار ٴان «بوگەۋ بەرمەس» انىمەن شىمىلدىعىن اشتى، ويناقى اۋەن الاڭداعىلاردى لەزدە باۋراپ الدى. «ماياك»، «سامعاۋ»، «ٴبىر وزەننەن سۋ ىشتىك»، «شالعايدان ەسكەن كوكتەم سامالى»، «تىلەك» سياقتىلار جان تەبىرەنتەرلىك ٴان ٴسوزى جانە قويۋ سۇيىسپەنشىلىككە تولى مۋزيكا ىرعاعى ارقىلى جاڭا داۋىردەگى حالىق بۇقاراسىنىڭ باقىتتى تۇرمىسى مەن رۋحاني بەت - بەينەسىن جىرلاپ، كورەرمەنگە تەرەڭ اسەر قالدىردى. ىرحۋدا ورىندالعان جەكە كۇي «ٴجۇزىم پىستى» شينجياڭ حالقىنىڭ جۇزىمنەن مول ٴونىم العان مەزگىلدە ٴان ايتىپ، ٴبي بيلەگەن اسەرلى كورىنىستەرىن جاندى بەينەلەدى، «جەلپۋىش»، « كوتەرەيىك رومكا»، «ساعىنىش» سياقتى بيلەردەگى اسەم دە شيراقى ٴبي ارەكەتتەرى جۇڭگونىڭ كلاسسيكالىق كوركەمدىگىن ەگجەي - تەگجەيلى ايگىلەپ بەردى.
مەملەكەتتىك 1 - دارەجەلى ارتيس شىرالي «سۇيىكتىم» ٴانىن جانە شينجياڭ ەرەكشەلىگىنە يە كلاسسيكالىق ٴان «جەلەگىڭدى اش» ٴانىن اسەرلى سەزىممەن شىرقاپ، كونسەرتتى جوعارى ورلەۋگە كوتەردى. قىزۋ ىنتا تانىتقان كورەرمەن دە مۋزيكا اۋەنىمەن بىرگە ىرعالىپ، كەيبىرەۋلەرى ساحناعا شىعىپ ويناقى ٴماشىراپ بيىنە باستى، كونسەرت الاڭى جاراسىمدى دا دۋماندى بەينەگە شومدى.
ىلە وبلىسىنىڭ 7 - كەزەكتى ٴمورال ۇلگىسى ٴساناۋار ابدىرەشيت ۇستىنە قىزىل كويلەك كيىپ، ساحناعا شىعىپ انشىمەن بىرگە بۇرالا بيگە باستى. ”كونسەرت كەرەمەت بولدى، اسەرلەنگەنىم سونشا، ساحناعا شىعىپ ٴبي بيلەدىم“ دەدى ول.
كونسەرت «وتاندى جىرلايمىز» حورىمەن ٴساتتى اياقتادى، كورەرمەندەر ارتيستەرمەن بىرگە قوسىلا شىرقاپ، ۇلى وتانعا ٴان - جىرمەن ماداق ايتتى.
”دۇڭفاڭ ٴان ـ ٴبي توبىنىڭ وسىندا كونسەرت قوياتىنىن ەستىپ قاباعات قۋاندىق، ەرتە كەلىپ الدىق. بەتاشار ٴانى وتە تارتىمدى ەكەن، ويىن نومىرلەرىن بار نازارىممەن كورگەنىم سونشا، سۋرەت، كەسكىن ٴتۇسىرۋ دە ەسىمە كەلمەپتى، كوڭىل كۇيىم كوتەرىلىپ، ٴبىر جاساپ قالدىم. دۋان -ۋ مەرەكەسىندە وسىنداي تارتىمدى مادەنيەت ويىن - نومىرلەرىن تارتۋ ەتكەنىنە ٴدان ريزا بولدىم“ دەدى قۇلجا قالاسىنىڭ تۇرعىنى فان جيڭ كونسەرتتى كورگەننەن كەيىن اسەرلى سەزىمىن باسا الماي.
ۇعىسۋىمىزشا، جۇڭگو دۇڭفاڭ ويىن ـ ساۋىق توبىنىڭ توركىنى − ورتالىق ٴان ـ ٴبي ۇيىرمەسى، دۇڭفاڭ ٴان ـ ٴبي ۇيىرمەسى جانە جۇڭگو جەڭىل مۋزيكا ۇيىرمەسى ەكەن، پارتيا مەن مەملەكەتتىڭ نەشە ۇرپاق باسشىلارىنىڭ شىنايى قامقورلىعىندا قۇرىلعان جاڭا جۇڭگوداعى ەڭ ايگىلى مەملەكەت دارەجەلى ٴان ـ ٴبي ۇيىرمەسى بولىپ، جۇڭگونىڭ مۋزيكا ـ ٴبي كوركەمونەرىنىڭ ەڭ جوعارى تابىسىنا ۋاكىلدىك ەتكەن. تاياۋ جىلداردان بەرى بۇل توپ ٴبي، ولەڭ، سۋرەت كىرىكتىرىلگەن «جۇڭگو كەلبەتى»، ٴبي مۋزيكاسى «جۇڭگو حيكاياسى . 12 مۇشەل»، ٴبي، ولەڭ تەاتر «جاسىل القاپ - <مىڭ شاقىرىم تاۋ - داريا كارتاسىن> بيمەن بەينەلەۋ»، مۋزيكالى تەاتر «قۇلپىرۋ» سياقتى ٴبىر توپ جاقسى باعاعا يە بولعان ادەبيەت ـ كوركەمونەر تۋىندىلارىن جاراتتى.
سۋرەتتە: كونسەرتتەن ٴبىر كورىنىس. جاڭ جيايۋان فوتوسى