قۇلجا اۋەجايىنىڭ جولاۋشى قابىلداۋ ـ جونەلتۋ مولشەرى ٴبىر ميلليون ادامنان (رەت) استى

سايكەس مەزگىلدەگىدەن %45 ارتتى

ەرىكتى تىلشىلەر ليۋدان چىنزى، يۋە جيە حابارلايدى. 6 - ايدىڭ 21 - كۇنى قۇلجا اۋەجايىنىڭ 2024 - جىلعى ساياحاتشى قابىلداۋ - جونەلتۋ مولشەرى ٴبىر ميلليون ادامنان (رەت) اسىپ، سايكەس مەزگىلدەگىدەن %45 ارتىپ، 2023 - جىلداعىدان 43 كۇن بۇرىن بولدى.

سول كۇنى قۇلجا باسقارۋ بولىمشە سەرىكتەستىگىنىڭ قاتىستى باسشىلارى جەكە - جەكە 3 جولاۋشىعا چىڭدۋ اۆياتسياسى قامداعان شينجياڭ ىشىندەگى ۇشاق بەلەتىن تارتۋ ەتتى. ”ٴىسساپارمەن قۇلجاعا ۇنەمى كەلەمىن، ويلاماعان جەردەن باعىم جانىپ، ٴبىر ميلليونىنشى جولاۋشى بولىپپىن. قۇلجا اۋەجايى مەن چىڭدۋ اۆياتسياسىنىڭ بارعان سايىن جاقسارۋىن تىلەيمىن!“ دەدى قۇلجا اۋەجايىنىڭ 2024 ـ جىلعى ٴبىر ميلليونىنشى جولاۋشىسى تاڭ حانىم.

2024  - جىلى چىڭدۋ اۆياتسياسى قۇلجا اۋەجايىندا تاسىمال بازاسىن قۇردى ٴارى قۇلجا اۋەجايىن ارقاۋ ەتىپ، شينجياڭدا 10 نان استام ”اينالىپ ۇشاتىن، ارالاپ ۇشاتىن“ اۋە لەنياسىن اشتى، اۋە قاتىناس ٴتۇيىنى 10 نان اسىپ، ”تارماق لەنيالار“ اۋە لەنياسىنىڭ تورابىن كەڭەيتىپ، تاڭەرتەڭگى، كەشكى كەزەكشى ۇشاقتاردىڭ ۇشۋ ۋاقىتىن پايدالانۋ مولشەرىن جوعارىلاتىپ، اۋەجايدىڭ قاتىناۋ ونىمدىلىگىن ارتتىرىپ، العاشقى ۇشاتىن جانە ورتا جولدا اۋىساتىن جولاۋشىلاردىڭ جوعارى ٴونىمدى، قولايلى ٴجۇرىس - تۇرىس قاجەتىن بارىنشا قاناعاتتاندىردى. قازىر قۇلجا اۋەجايىندا وڭتۇستىك اۆياتسيا، شىعىس اۆياتسيا، مەملەكەتتىك اۆياتسيا، سىچۋان اۆياتسياسى، تيانجين اۆياتسياسى، چۇنچيۋ اۆياتسياسى، حۋاشيا اۆياتسياسى، استانا اۆياتسياسى، چىڭدۋ اۆياتسياسى، چۇڭچيڭ اۆياتسياسى، شىنجىن اۆياتسياسى سياقتى 11 اۆياتسيا سەرىكتەستىگى جۇمىس جۇرگىزىپ، جيىنى 26 اۋە جەلىسىن اشىپ، شينجياڭنىڭ ٴىشى ـ سىرتىنداعى 23 قالانى تۇتاستىردى.

قۇلجا اۋەجايى ەرەكشە جولاۋشىلاردىڭ ٴجۇرىس - تۇرىسى قيىن بولۋ ماسەلەسىن شەشۋدى تياناق ەتىپ، ”تىلەكتەس بولۋ . كىشىپەيىلدىلىكپەن قىزمەت وتەۋ“ سىندى ەرەكشە جولاۋشىلارعا قىزمەت وتەۋ ونىمدەرىن ۇزدىكسىز كەمەلدەندىرىپ، قارتتار، ٴالجۋازدار، ناۋقاستار، مۇگەدەكتەر، جۇكتى ايەلدەر، ۇشاققا تۇڭعىش وتىرۋشىلار سياقتى ەرەكشە جولاۋشىلاردى تەكسەرۋدەن الدىمەن وتكىزدى ٴارى ارناۋلى ادام ورنالاستىرىپ، ۇشاققا شىعۋ رەسمياتىن ٴبىتىرۋ، حاۋىپسىزدىك تەكسەرۋىنەن تارتىپ ۇشاققا شىعۋعا دەيىنگى جالپى بارىستا سەرىك بولاتىن ٴبىر بەكەتتىك ۇشاققا جەتكىزۋ قىزمەت وتەۋىن جۇزەگە اسىردى.

4  ـ ايدىڭ 15 ـ كۇنى قۇلجا اۋەجايى قۇلجا ـ الماتى حالىقارالىق اۋە لەنياسىن اشقاننان بەرى، قۇلجا اۋەجايى ىلە وبلىستىق جولاۋشى تاسىمال باس پۋنكتىمەن بەلسەنە سەلبەسىپ، بۇرىنعى ”اۋە ـ قۇرلىق بىرلەسكەن تاسىمالى“ سەلبەستىگى نەگىزىندە قۇلجا ـ قورعاس ارناۋلى لەنياسىن كوبەيتىپ، جولاۋشىلاردىڭ ”قولايلى، ىركىلىسسىز بولۋ، كورىنىس تۇيىندەرىنە توتە بارۋ“ سىندى ساپار تالابىن قاناعاتتاندىرىپ، جولاۋشىلاردىڭ سەزىنۋ اسەرىن شىنايى جوعارىلاتتى.

بۇدان بىلاي، قۇلجا اۋەجايى شينجياڭ اۋەجاي توبىنىڭ ٴتۇرلى شەشىمدەرى مەن ورنالاستىرۋلارىن باستان ـ اياق دايەكتىلەندىرىپ، تياناقتاندىرىپ، جولاۋشىلار مەن قاريدارلاردىڭ قاجەتىن قىزمەت وتەۋ نىساناسى ەتۋگە تاباندى بولىپ، قالىڭ جولاۋشىلاردىڭ كۇن سايىن ارتقان تاماشا اۆياتسيالىق ساپار قاجەتىن ۇزدىكسىز قاناعاتتاندىرماق.

سۋرەتتە: قۇلجا اۋەجايىنىڭ جولاۋشى قابىلداۋ ـ جونەلتۋ مولشەرى ٴبىر ميلليون ادامنان (رەت) اسقاندىعى بايلانىسىمەن وتكىزىلگەن قيمىلدان كورىنىس.

(سۋرەتتى قۇلجا اۋەجايى قامداعان)