سۋرەتتە: حور ۇيىرمەسى كورەرمەنمەن بىرگە ”مەن جانە مەنىڭ وتانىم“ ٴانىن شىرقاۋدا. سۋرەتتى ۋاڭ جىحۋا تۇسىرگەن
ٴتىلشىمىز ۋاڭ جىحۋا حابارلايدى. ٴان اۋەنى كەشكى سامالمەن شالقىپ، اسەرلى سەزىم اسەم سازبەن تەربەلدى. 6 - ايدىڭ 23 - كۇنى كەشتە 2024 ـ جىلعى تۇڭعىش كەزەكتى ”كورىكتى شينجياڭ ساپارى. ۇندەستىك اۋەنى ىلەنى نارىلەندىردى“ اتىنداعى حور مۋزيكا فەستيۆالى ىلە تەاترحاناسىندا سالتاناتتى وتكىزىلدى، اسەم اۋەن كوكتى كەرنەپ، ٴان قاناتىندا قالىقتاعان حور اۋەسكەرلەرى جۇرەك ۇندەرىمەن باقىت جىرىن جىرلادى. ٴار ۇلت كورەرمەندەرى مەن ساياحاتشىلار ٴان اۋەنىنەن ٴلاززات الىپ، كوڭىل قۇسى كوككە ورلەپ، بىرگە ٴان شىرقادى.
وسى رەتكى حور مۋزيكا فەستيۆالىن قۇلجا قالالىق پارتكوم، قۇلجا قالالىق ۇكىمەت، جياڭسۋ ولكەسىنىڭ ىلەگە كومەك بەرۋ. نانجيڭ قىزمەت گرۋپپاسى ۇيىمداستىرىپ، قۇلجا قالالىق پارتكوم ۇگىت ٴبولىمى، قۇلجا قالالىق ادەبيەت - كوركەمونەرشىلەر بىرلەستىگى، مەملەكەتتىك قوعامدىق حور ۇيىرمەسىنىڭ اۋىس - كۇيىس سەلبەستىك وداعى ۇستىنە الىپ وتكىزدى. بۇكىل ەلىمىزدىڭ جەر - جەرىنەن كەلگەن جانە ىلەدەگى 10 حور ۇيىرمەسى كورىكتى ىلە وزەنى جاعاسىندا باس قوسىپ، مۋزيكا ارقىلى سۇيىسپەنشىلىكتەرىن جەتكىزىپ، ٴان اۋەنى ارقىلى كۇش - قۋات ۇيىستىرىپ، ىلە قازاق اۆتونوميالى وبلىسى قۇرىلعاندىعىنىڭ 70 جىلدىعى قارساڭىندا ەڭ ادەمى ۇندەستىكپەن قارىم - قاتىناس، اۋىس - كۇيىستەرىن باستاپ، ”ٴبىر بەلدەۋ ٴبىر جولدى“ بىرگە قۇرۋدىڭ تىڭ حيكاياسىن، جاڭاشا كەلبەتىن ايگىلەدى.
حيلۇڭجياڭنىڭ داچيڭ قالاسى، چۇڭچيڭ قالاسى، حۋبەيدىڭ ۋحان قالاسى، گۇيجوۋدىڭ كايلي قالاسى سياقتى قالالاردان كەلگەن تاڭداۋلى حور ۇيىرمەلەرى مەن ىلەنىڭ جەرگىلىكتى حور ۇيىرمەلەرى ٴداۋىر ٴۇنىن اسەرلى دە اسقاق ٴان اۋەنىمەن جەتكىزىپ، دامۋدىڭ اسقاق ۇنىنە شىنايى سۇيىسپەنشىلىكتەرىمەن ماداق ايتىپ، جۇڭحۋا ۇلتى ورتاق تۇلعا تانىمىن بىرگە بەكەمدەپ، ۇلتتاردىڭ ارالاسۋ، ىشتەسۋ، توعىسۋ بارىسىنداعى مادەنيەتتىڭ گۇلدەنىپ - كوركەيگەن جاعدايى مەن باقىتتى تۇرمىستىڭ تاماشا كورىنىسىن ساحنادا سۇيىسپەنشىلىكپەن ايگىلەدى.
”مەن وتاننان ٴبىر مينۋت تا ايرىلا المايمىن“... كونسەرت اياقتاعاننان كەيىن دە قۇمارى قانباعان كوپشىلىك ”مەن جانە مەنىڭ وتانىم“ اتتى ٴاندى بىرگە ورىندادى، ٴان مەن كۇلكى ٴبىر - بىرىنە ۇلاسىپ، كوڭىلدەرگە شۋاق سيلادى. ”وسى رەتكى تاماشا مۋزيكا فەستيۆالىن تاماشالاپ، ەرەكشە قۋاندىم، قاتتى اسەرلەندىم. زەينەتكە شىققاننان كەيىن حور ۇيىرمەسىنىڭ قيمىلدارىنا قاتىناسىپ تۇرامىن. وسى ەكى جىلدان بەرى ىلەنىڭ مادەني تۇرمىسى بارعان سايىن بايي ٴتۇستى، تاياۋدا چۇڭچيڭگە بارىپ كونسەرتكە قاتىناستىم“. قۇلجا قالاسىنىڭ تۇرعىنى ياڭ دۇڭلين بىلاي دەدى: بۇدان بىلاي ىلەنىڭ مادەنيەت قيمىلدارىنىڭ بارعان سايىن كوبەيىپ، ادامداردىڭ رۋحاني بەت ـ بەينەسىنىڭ ٴتىپتى دە جارقىن بولۋىن ٴۇمىت ەتەمىن.
جۇڭگو حور قوعامىنىڭ ورىنباسار باس القاسى، حاينان ولكەلىك حور قوعامىنىڭ ٴتوراعاسى، مەملەكەتتىك 1 - دارەجەلى كومپوزيتور، دريجور جاڭ دى - مەي مۋزيكا فەستيۆالىن تاماشالاعاننان كەيىن تەبىرەنە بىلاي دەدى: ”حور ايتۋ بارلىق ادام قاتىناسا الاتىن كوركەمونەر فورماسى، ول − مادەنيەتتى، ونەگەنى، جاراسىمدىلىقتى جىرلايدى. وسىنداي مۋزيكا فەستيۆالىنىڭ ىلەدە ٴار جىلى ٴبىر كەزەك وتكىزىلۋىن، ىلەدە ۇلتتىق ەرەكشەلىككە يە، ٴداۋىر رۋحىنا باي، ٴتىپتى دە كوپ حور تۋىندىلارىنىڭ جارىققا شىعۋىن، جۇڭگونى جىرلاۋىن، بۇكىل دۇنيە جۇزىنە بەت الۋىن ٴۇمىت ەتەمىن؛ ىلەدە ٴتىپتى دە كوپ قوعامدىق حور ۇيىرمەسىنىڭ دۇنيەگە كەلۋىن ٴۇمىت ەتەمىن، ٴتىپتى دە كوپ ورتا، باستاۋىش مەكتەپتەردەگى بالالار ٴۇنى حور ۇيىرمەسى، ورتا جاستاعىلار مەن قارتتار حور ۇيىرمەسى، ستۋدەنت جاستار حور ۇيىرمەسى ىلەنى ٴتىپتى دە كوپ حور مادەنيەتىنە يە ەتەدى؛ كورىكتى ىلە بۇكىل ەلدەگى، ٴتىپتى، بۇكىل دۇنيە جۇزىندەگى كوپتەگەن حور ۇيىرمەلەرىن ىلەگە باۋراپ، ىلەنى ۇگىتتەپ، بارلىق ادام ىلەنىڭ ۇگىتشىسى، جارشىسى بولۋىن ٴۇمىت ەتەمىن“.