جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتادى

　　اۆتونوميالى رايون مەملەكەت تۋىن شىعارۋ سالتىن سالتاناتپەن وتكىزدى

　　ما شيڭرۇي، ەركىن تۇنياز، ٴزۇمىرات وبۇل، نۇرلان ٴابىلماجىن، حى جۇڭيوۋ، جاڭ جۋ قاتىناستى

10 - ايدىڭ 1 - كۇنى اۆتونوميالى رايون ۇرىمجىدە مەملەكەت تۋىن شىعارۋ سالتىن سالتاناتپەن وتكىزىپ، جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتادى.

□ سۋرەتتى انار بۇلت \ شينجياڭ گازەتىنىڭ ءتىلشىسى شيە لۇڭ تۇسىرگەن

انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 10 ـ ايدىڭ 1 ـ كۇنى ۇرىمجىدەن حابارلايدى. جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى ساتىندە، 10 ـ ايدىڭ 1 ـ كۇنى تۇستەن بۇرىن اۆتونوميالى رايون ۇرىمجىدە مەملەكەت تۋىن شىعارۋ سالتىن وتكىزىپ، جاڭا جۇڭگونىڭ مەرەيتويىن سالتاناتپەن قۇتتىقتاپ، جاڭا جورىقتا كورىكتى شينجياڭدى اناعۇرلىم ويداعىداي قۇرۋدىڭ سەنىم كۇشىن ۇيىستىرىپ، جۇڭگو ۇلگىسىندەگى وسىزامانداندىرۋدىڭ تاماشا بولاشاعىنا بىرگە كوز جىبەردى. ما شيڭرۇي، ەركىن تۇنياز، ٴزۇمىرات وبۇل، نۇرلان ٴابىلماجىن، حى جۇڭيوۋ قاتارلى اۆتونوميالى رايوننىڭ جانە بيڭتۋاننىڭ باسشىلارى ٴار ۇلت، ٴار سالا ۋاكىلدەرىمەن بىرگە سالتقا قاتىناسىپ، ۇلى وتانعا ىزگى تىلەكتەرىن ٴبىلدىردى. جاڭ جۋ ارناۋ ٴسوز سويلەدى.

ٴۇرىمجى حالىق الاڭىنىڭ اسپانى شايداي اشىق، كۇن شۇلەن شۋاعىن شاشىپ تۇر، الاڭنىڭ ەكى جاعىنا قويىلعان گۇلدەردەن جاسالعان ٴپىشىن ـ كورىنىستەر جيناقى دا ايشىقتى، ”جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قىزۋ قۇتتىقتايمىز“، ”جۇڭگو ۇلگىسىندەگى وسىزامانداندىرۋ ۇردىسىندە كورىكتى شينجياڭدى اناعۇرلىم ويداعىداي قۇرايىق“ دەگەن نارت قىزىل ۇلكەن جازۋلار ەرەكشە كوز تارتادى.

مەملەكەت تۋىنا قاراپ، مەملەكەت تۋىن شىعارۋ سالتىنا قاتىناسقان ٴار ۇلت، ٴار سالا ۋاكىلدەرى اسقاق سەزىمگە بولەنىپ، رەتتى قاتارعا تۇردى. سالتقا وزدىكتەرىنەن كەلىپ قاتىناسقان ٴار ۇلت بۇقاراسى ٴتارتىپتى ٴتىزىلىپ، سالتاناتتى ٴساتتىڭ كەلۋىن ٴۇنسىز كۇتتى.

ساعات 10نان 30 مينۋت مولشەرىندە مەملەكەت تۋىن شىعارۋ سالتى باستالدى. مەملەكەت تۋىن قورعاۋ اترەتىندەگى وفيتسەر ـ اسكەرلەر مىلتىقتارىن سەرت ۇستاپ، ايبىنمەن ارشىنداي العا باسىپ، بەس جۇلدىزدى نارت قىزىل تۋدى قورعاپ تۋ شىعارۋ تۇعىرىنا قاراي ٴجۇردى.

ايبىندى «ەرىكتىلەر مارشى» ورىندالدى، بۇكىل الاڭداعىلار جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى، بەس جۇلدىزدى قىزىل تۋ باياۋ كوتەرىلدى. بارلىق كادر ـ بۇقارا سالتاناتتى تۇردە ٴۇنسىز تۇرىپ، مەملەكەت تۋىنا كوز الماي قاراپ قۇرمەت ٴبىلدىردى.

سىڭعىرلاعان بالعىن ۇندەر «ۋانجياڭدى» شىرقاپ، پيونەرلەر بىركەلكى داۋىسپەن ارناۋ ٴسوز ايتتى. ”بۇگىنگى جۇڭگو ارىندى دا ەڭسەلى، قادامى نىق. بۇگىنگى جۇڭگو شۇعىلالى ناتيجە جاراتىپ، شىعىستا قاسقايىپ تۇر“. بالالار: ٴبىز ۇلى وتانىمىزدى قىزۋ سۇيەمىز، ٴبىز كورىكتى مەكەن قۇرۋدى ماقسات تۇتامىز! كوممۋنيزم ٴىسى جولىندا كۇرەس جاساۋعا ٴارقاشاندا دايىنبىز! ـ دەپ اسقاق داۋىسپەن ۇراندادى.

75 جىل قايسارلىقپەن ەڭبەكتەنگەن ۇلى وتاننىڭ بەت ـ بەينەسىندە ۇلىقسان تاريحي زور وزگەرىس تۋىلدى. 75 جىلدان بەرى، اسىرەسە، پارتيا 18 ـ قۇرىلتايىنان بەرى، باس شۋجي شي جينپيڭنىڭ جانە پارتيا ورتالىق كوميتەتىنىڭ پارمەندى باسشىلىعىندا، ىقىلاستى قامقورلىعىندا، شينجياڭ ٴتۇرلى ىستەردە تاريحي تابىسقا قول جەتكىزىپ، تيانشان الابىنىڭ بەت ـ بەينەسىندە شىت جاڭا وزگەرىس بولىپ، دامۋى كۇن سايىن جاڭارىپ، اي سايىن تۇلەجىپ، جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ ايبىندى جورىعىنا قادام تاستادى. مەملەكەت تۋىن شىعارۋ سالتىنا قاتىناسقان ٴار ۇلت كادر ـ بۇقاراسى مىنالاردى ٴبىلدىردى: شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، باس شۋجي شي جينپيڭنىڭ شينجياڭ قىزمەتى جونىندەگى ماڭىزدى ٴسوزىنىڭ، ماڭىزدى نۇسقاۋىنىڭ، بەكىتۋىنىڭ رۋحىن ىشكەرىلەي دايەكتىلەندىرىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، تاپسىرمانى ەستە بەرىك ساقتاپ، العىس ايتا ەكپىندەي ىلگەرىلەپ، مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدىڭ جاڭا جورىعىندا جۇڭگو ۇلگىسىندەگى وسىزامانداندىرۋدىڭ شينجياڭ تاراۋىن ٴبىر جاعادان باس، ٴبىر جەڭنەن قول شىعارا وتىرىپ جازىپ، شينجياڭنىڭ اناعۇرلىم كوركەم بولاشاعىن قۇلشىنا اشامىز.

مەملەكەت تۋىن شىعارۋ سالتىنا قاتىناسقانداردان تاعى ياڭ چىڭ، چىن ميڭگو، ٴيۇسۇپجان مامەت، ەلزات احمەتجان، قادەن كابەن، اۆتونوميالى رايوندىق حالىق قۇرىلتايى تۇراقتى كوميتەتىنىڭ، ۇكىمەتتىڭ، ساياسي كەڭەستىڭ، بيڭتۋاننىڭ باسشىلىق القا مۇشەلەرى، قارۋلى ساقشى شينجياڭ باس اترەتىندەگى قاتىستى باسشىلار جانە اۆتونوميالى رايوندىق سوت مەكەمەسىندەگى، پروكۋراتۋراداعى نەگىزگى جاۋاپتى جولداستار، ٴۇرىمجى قالاسىنداعى قاتىستى جاۋاپتى جولداستار جانە كادر ـ بۇقارانىڭ ۋاكىلدەرى قاتارلىلار بار.