جاۋ شياۋفاڭ، اراي (ٴوز ٴتىلشىمىز)

سۋرەتتە: ىلە وبلىستىق قوعامدىق يگىلىك ورنى ساۋىقتىرۋ، كۇتىمدەۋ جالپىلىق عيماراتىنىڭ قۇرىلىس الاڭى.    جاۋ شياۋفاڭ فوتوسى

2024 - جىلى ىلە وبلىسىنا توتە قاراستى حالىق ىستەرى جۇيەسى بويىنشا جيىنى 37 نىسانعا قول جەتكىزىلدى، بۇعان ساياتىن قارجى 298 ميلليون 270 مىڭ يۋان بولدى، قازىر زەينەتكەرلىككە قىزمەت وتەۋ، بالالار يگىلىگى، جەرلەۋ ىستەرىنە قىزمەت وتەۋ، ساتىپ الۋعا قىزمەت وتەۋ سياقتى نىسان قۇرىلىستارى تارتىپپەن ىلگەرىلەتىلۋدە.

ىلە وبلىستىق قوعامدىق يگىلىك ورنى ساۋىقتىرۋ، كۇتىمدەۋ جالپىلىق عيماراتىنىڭ قۇرىلىس كولەمى 20 مىڭ 850 شارشى مەتر، بۇعان 62 ميلليون 500 مىڭ يۋان قارجى قوسىلعان، وندا جاتىن ٴۇي، ەمدەۋ ٴۇيى، كۇتىمدەۋ - ەمدەۋ ٴۇيى، ساۋىقتىرۋ بويىنشا جاتتىقتىرۋ ٴۇيى، ساباقحانا، كىتاپ وقۋ ٴۇيى سياقتى ۇيلەر بولىپ، مۇندا ەمدەۋ، كۇتىمدەۋ، تاربيەلەۋ، كوڭىل اشۋ سياقتى كوپ ٴتۇرلى يقۋات ٴبىر تۇلعالاندىرىلعان. ساۋىقتىرۋ، كۇتىمدەۋ جالپىلىق عيماراتىنىڭ جانىندا قۇرىلىس كولەمى 12 مىڭ 240 شارشى مەتر كەلەتىن قارتتار كۇتىمحاناسى نىسانىنىڭ جەر استى بولىگىنىڭ قۇرىلىسى جۇرگىزىلۋدە، سالىنىپ بولعاننان كەيىن جاسى ۇلعايعان، مۇمكىندىگى شەكتەۋلى، مۇگەدەك قارتتار سياقتى ەرەكشە قيىنشىلىعى بار قارتتاردى شوعىرلى باعۋ ماسەلەسىن ٴونىمدى شەشىپ، ۇكىمەت باسقارۋىنداعى زەينەتكەرلىككە قىزمەت وتەۋ قۇرىلىمدارىنىڭ قۇرىلعى قۋاتىن جوعارىلاتىپ، قوعامنىڭ كۇن سايىن ارتقان زەينەتكەرلىك جانە يگىلىك قىزمەت وتەۋ قاجەتىن قاناعاتتاندىرادى.

ىلە وبلىستىق قوعامدىق يگىلىك ورنى نىسان قۇرىلىسىنىڭ جاۋاپتىسى ۋاڭ شيا تىلشىگە بىلاي دەدى: بيىل نىساننىڭ جەر استى نەگىزگى تۇلعالىق قۇرىلىسى قىزمەتىن اياقتاۋ جوسپارلاندى. وسى ەكى نىسان بويىنشا جاڭادان 705 توسەك ورنى قوسىلىپ، 2025 ـ جىلى 12 ـ ايدىڭ 31 ـ كۇنى قۇرىلىسى ٴبىتىپ، تەكسەرىپ وتكىزىپ الۋ ٴارى پايدالانۋعا بەرۋ جوسپارلاندى.

قورعاس ەكونوميكالىق اشۋ رايونى (چيڭشۇيحى قالاشىعى) قورعاس اۋداندىق جالپىلىق كۇتىمدەۋ ورنى قۇرىلىسى نىسانىنىڭ (چيڭشۇيحى قالاشىعى جالپىلىق كۇتىمدەۋ ورتالىعى) قۇرىلىس ورنىندا قۇرىلىسشىلار نىسان قۇرىلىسىنىڭ اياق الىسىن مىقتى يگەرىپ، جەدەل قۇرىلىس جۇرگىزۋدە. بۇل نىسانعا جالپى 8 ميلليون يۋان قارجى قوسىلعان، جالپى قۇرىلىس كولەمى ٴبىر مىڭ 771 شارشى مەتر، وندا جاتاق، ەمدەۋ ٴۇيى، قيمىل وتكىزۋ  ٴۇيى سياقتى فۋنكتسيالىق ۇيلەر بولىپ، بۇل − كۇتىمدەۋ، ەمدەۋ، كوڭىل اشۋ ٴبىر تۇلعالانعان ەمدەۋ، كۇتىمدەۋ جالپىلىق تۇلعاسى، مەجەمەن بيىل 11 - ايدىڭ سوڭىندا سالىنىپ بولادى.

10 ـ ايدىڭ 11 ـ كۇنى قورعاس ەكونوميكالىق اشۋ رايونى (چيڭشۇيحى قالاشىعى) جاندى، چىڭشي الەۋمەتتىك اۋماقتارىنىڭ كۇندىز قارايلاسۋ ورتالىعى رەسمي ىسكە قوسىلدى، وندا جابىق قيمىل اۋماعى، باعىپ ـ قاعۋ اۋماعى، ازىق ـ تۇلىك دۇكەنى، جۇڭگوشا ەمدەۋ، قارتتار داشۋەسى سياقتى اۋماقتار قۇرىلدى. قارتتاردىڭ بۇل ارادا كىتاپ وقۋىنا، گازەت كورۋىنە، شاحمات، قارتا ويناۋىنا، تەلەۆيزور كورۋىنە، فيزيكالىق ەمدەلۋىنە، دەنساۋلىعىن داعدىلى تەكسەرتۋىنە بولادى. بۇل ورتالىق تاماقتانۋعا دا قىزمەت وتەپ، قارتتاردىڭ كۇندەلىكتى قاجەتىن قاناعاتتاندىرادى.

جاندى، چىڭشي الەۋمەتتىك اۋماقتارى كۇندىز قارايلاسۋ ورتالىعىنىڭ جاۋاپتىسى چىن زۇڭگۇي بىلاي دەدى: نىسان سالىنىپ بولعاننان كەيىن قارتتار ٴار كۇنى الەۋمەتتىك اۋماقتىڭ كۇندىز قارايلاسۋ پۋنكتىنە بارىپ كوڭىل اشۋ قيمىلىن ورىستەتەدى جانە جۇڭگوشا ەمدەلەدى. شيپاحانانىڭ شيپاگەرلەرى مەن سەسترالارى اپتا سايىن كۇندىز قارايلاسۋ پۋنكتىنە بارىپ، قارتتارعا دەنساۋلىق جاعىنان قىزمەت وتەيدى.

قازىر ىلە وبلىسىنىڭ ەرەكشە قيىنشىلىعى بار قارتتاردىڭ ٴۇيىن وزدەرىنە قولايلى ەتىپ جاڭالاۋ نىسانى، ىلە وبلىسى ساتىپ العان قارتتاردىڭ تاماقتانۋىنا كومەكتەسۋ ”كەشكى التىن اراي“ قىزمەت وتەۋدەن ۇلگى كورسەتەتىن 56 نىسانى، ىلە وبلىسىنىڭ ”ارماندى جۇزەگە اسىرۋ، جەتىم بالالاردىڭ وقۋىنا كومەكتەسۋ ينجەنەرياسى“ سياقتى نىسانداردىڭ دا قۇرىلىسى جەدەل جۇرگىزىلۋدە.

ىلە وبلىستىق حالىق ىستەرى مەكەمەسى پارتيا باسشىلىق گرۋپپاسىنىڭ مۇشەسى، مەكەمەنىڭ ورىنباسار باستىعى ۋ حۋشوۋ بىلاي دەدى: ”قازىرگە دەيىن نىسان قۇرىلىسىنىڭ %80 ى، كۇندىز قارايلاسۋ ورتالىعى مەن قارتتاردىڭ ٴۇيىن وزدەرىنە قولايلى ەتىپ جاڭالاۋ نىسانى تولىق اياقتالىپ، 900 تاماقتانۋ ٴتۇيىنى سالىنىپ بولدى. ٴبىز سەرپىندى ۇزدىكسىز ارتتىرىپ، جۇمىس مەرزىمىن شەگەرىپ ورنالاستىرىپ، قارتتاردىڭ ەرتەرەك يگىلىككە كەنەلۋىنە كۇش سالامىز“.