ــ− ىلە وبلىسى قىسقى ساياحاتتى جوعارى ولشەممەن جوسپارلاۋدا

سۋرەتتە: قۇلجا اۋدانىنىڭ اققۋ كولى ساياحات نەگىزدىك قۇرىلعىلارىنىڭ دارەجەسىن جوعارىلاتۋ نىسانى.     حان شاشا فوتوسى

تـىلشىلەرىمىـز حـان شاشا، چىن تيانجين، ەرىكتى ٴتىلشى زامىرا، حـۋاي جـيـچـاۋ، ۋاڭ دۇڭـشـۇي، لي ۋىنپىڭ حابارلايدى. ىلە وبلىسى ەرەكشە وڭىرلىك باسىمدىعى مەن ەكولوگيالىق بايلىق باسىمدىعىنا سۇيەنىپ، الدىن الا جوبالاپ، اق قار - كوك مۇز سىندى باسىمدىعىن تولىق كادەگە جاراتىپ، كاسىپ كۇيىن جانداندىرۋ، قامداۋدى جەبەۋ، نەگىزدىك قۇرىلعى قۇرىلىسى سياقتى كوپتەگەن تۇيىندەرگە كۇش سالىپ، قار - مۇز كاسىپ سالاسىن كۇشەيتىپ، قار - مۇز ماركاسىن ايگىلەپ، قىسقى ساياحاتتىڭ ساپاسىن جوعارىلاتىپ، دارەجەسىن ٴوسىرۋدى ىلگەرىلەتىپ، ”سۋىق بايلىقتىڭ“ ”ىستىق كاسىپ سالاسىنا“ اينالۋىن جەبەپ، جوعارى ساپالى ساياحاتتىڭ كوزەۋلى جەرىنە اينالدىرماقشى.

”قاراشى، اققۋلار ۇشىپ كەلەدى!“ بۇل − 10 - ايدىڭ 16 - كۇنى قۇلجا اۋدانى جاڭاتام قالاشىعى شاقلىقتام قىستاعى اققۋ كولى كورىنىس رايونىندا ساياحاتشىلاردىڭ اققۋدىڭ قالىقتاپ ۇشىپ كەلە جاتقانىن كورگەندەگى ايعايى ەدى.  سىبەريادان ىلگەرىندى - كەيىندى اققۋ كولىنە كەلىپ قىستايتىن اققۋلار ٴدال قۇلجا اۋدانى قىسقى ساياحاتىنىڭ شىمىلدىعىن اشىپ بەرگەندەي.

10 - اي كىرگەننەن بەرى شاقلىقتام قىستاعىنداعى اققۋ كولى كورىنىس وڭىرىنە اققۋلار توپ - توبىمەن ۇشىپ كەلۋدە، جىلىپ اققان جەر استى بۇلاعى مەن تاماشا ەكولوگيالىق ورتا  ٴار جىلى اققۋلاردى وسى ارادا قىس قىرىنان امان وتەۋگە باۋرايدى.

ٴتىلشى اققۋ كولى ساياحات نەگىزدىك قۇرىلعىلارىنىڭ دارەجەسىن جوعارىلاتۋ نىسانىنىڭ جۇمىس باسىنان قۇرىلىس جۇرگىزىپ جاتقان اۆتوموبيلدەردىڭ ارلى - بەرلى قايشالىسىپ، قۇرىلىس جۇرگىزۋشىلەردىڭ الدىڭعى شەپتە شايقاس جاساپ، قۇرىلىس قارقىنىن جەدەلدەتىپ، سان جانە ساپا جاقتان قامال الۋعا ۇمتىلىپ جاتقان دۋماندى كورىنىسىن كوردى.

”اققۋ كولى نىسانى 4 - ايدان باستاپ قۇرىلىس جۇرگىزگەن، قازىر %90 ى ورىندالىپ بولدى. كەزەكتە الاڭ، اۆتوكولىك توقتاتۋ ورنى، كولدى اينالا جۇرەتىن جول پايدالانۋعا بەرىلىپ، كورىنىس تاماشالاۋ تۇعىرى مەن ساياحاتشىلار ورتالىعىندا جەدەل قۇرىلىس جۇرگىزىلىپ، 11 - ايدىڭ باسىندا پايدالانۋعا بەرىلمەكشى“ دەدى قۇلجا اۋدانى اققۋ كولى ساياحات نەگىزدىك قۇرىلعىلارىنىڭ دارەجەسىن جوعارىلاتۋ نىسانىنىڭ جۇمىس باسى جاۋاپتىسى ليۋ دۇڭچي.

قۇلجا اۋدانى تۋراسۋ كورىنىس ٴوڭىرىن باسقارۋ كوميتەتىنىڭ مەڭگەرۋشىسى ليۋ يانجۇن بىلاي دەدى: ”ٴار ۇلت بۇقاراسى مەن ساياحاتشىلارعا اناعۇرلىم تاماشا ساياحاتتى سەزىندىرۋ ٴۇشىن ٴبىز بيىل اققۋ كولى كورىنىس ٴوڭىرىنىڭ نەگىزدىك قۇرىلعىلارىنىڭ دارەجەسىن جوعارىلاتىپ، تىڭنان 837 شارشى مەترلىك ساياحات ورتالىعى مەن 7 مىڭ شارشى مەترلىك اۆتوكولىك توقتاتۋ ورنىن جاسادىق ٴارى كورىنىستى تاماشالاۋ تۇعىرىن، جول بەتىن قاتايتۋدى كەمەلدەندىرىپ،  ساياحات دارەتحاناسى مەن ساياحاتشىلار دەمالىس ورنىنان ەكەۋىن جاڭادان سالدىق“.

قىس كەلۋىنە بايلانىستى كۇنەس اۋدانى نارات كورىنىس رايونىنداعى قايىڭدىساي قار شاڭعى الاڭىنىڭ قۇرىلعىلارىنىڭ دارەجەسىن جوعارىلاتۋ، ساپالىلاندىرۋ جۇمىسى قولعا الىندى. ٴتىلشى جاڭادان سالىنعان قار شاڭعى زالى نىساننىڭ تۇلعالىق قۇرىلىسى سالىنىپ بولعانىن، جۇمىسشىلار ٴۇي ٴىشىن اشەكەيلەۋمەن قاربالاستانىپ جاتقانىن كوردى.

”بيىل نارات كورىنىس وڭىرىندەگى قار شاڭعى الاڭىنىڭ اتى نارات قايىڭدىساي قار شاڭعى الاڭى دەپ وزگەرتىلدى. بيىل كولەمى 3 مىڭ شارشى مەترلىك قار شاڭعى زالى تىڭنان سالىندى. زالدىڭ ٴبىرىنشى قاباتىنا كەڭەس سۇراۋ، بەلەت ساتۋ، شاڭعى جابدىقتارىن مايعا بەرۋ، كيىم، كەرەك - جاراقتارىن  ساقتاۋ، كيىم الماستىرۋ، ساۋدا ورنى، قار شاڭعى وقىتۋى، شۇعىل جاعدايعا توتەپ بەرۋ، قۇتقارۋ - كومەكتەسۋ، سونداي - اق ەمدەۋ بولمەسى سياقتى فۋنكتسيالىق وڭىرلەر ورنالاستىرىلىپ، ساياحاتشىلاردىڭ جان - جاقتى، قولايلى قىزمەت وتەۋدەن يگىلىكتەنۋىنە مۇمكىندىك جاسالدى. ال زالدىڭ ەكىنشى قاباتىنا اس - سۋ قىزمەت وتەۋى مەن بالالار سايران باقشاسى قۇرىلىپ، ساياحاتشىلارعا ٴتىپتى دە كوپ تاڭداۋ ورايى ازىرلەندى. كەزەكتە جالپى قۇرىلىس 11 - ايدىڭ باسىندا تامامدالاتىندىعى مەجەلەنۋدە“ دەدى نارات كورىنىس ٴوڭىرىن باسقارۋ كوميتەتى ساياحاتتى دامىتۋ - باسقارۋ مەكەمەسىنىڭ كادرى ما دىجۇن.

اناعۇرلىم جانعا جايلى، قولايلى قار شاڭعى كەشىرمەلەرىمەن قامداۋ ٴۇشىن، قار شاڭعى الاڭىندا تاعى قار تۇسپەيتىن سىرعىمالى جول قالتقىسى جاسالۋمەن بىرگە، ٴبىر قىدىرۋ ٴتيىمدى ساياساتتار العا قويىلىپ، ٴتىپتى دە كوپ ساياحاتشىنى قىس ماۋسىمىنىڭ قىزىعىن سەزىنۋگە باۋرادى.

نارات كورىنىس ٴوڭىرى ساياحاتتى دامىتۋ - باسقارۋ مەكەمەسى تيجارات ورتالىعى مەديا ٴبولىمىنىڭ كادرى ايزوكرا تۇرسىنجان بىلاي دەپ تانىستىردى: 2024 - جىلى 10 - ايدىڭ 15 - كۇنىنەن 2025 - جىلى 3 - ايدىڭ 31 - كۇنىنە دەيىن ٴوز اۆتوكولىكتەرىمەن ساياحاتتاۋشىلارعا  بەلەت باعاسىندا جارتىلاي تيىمدىلىك جاساۋ، شاڭعى تەبۋ كورىنىس ٴوڭىرىنىڭ ەسىك بەلەتىن كەشىرىم ەتۋدەي تيىمدىلىكتەر جاسالادى. نارات كورىنىس رايونىنىڭ ەسىك بەلەتى ارقىلى كورىنىس رايونىنداعى قوعامعا مۇشە قوناق ۇيلەرگە جاتسا، بەلگىلەنگەن اسحانادان تاماقتانسا قوسىمشا تيىمدىلىكتەردەن يگىلىكتەنەدى. سونىمەن بىرگە، قار شاڭعى الاڭى قار ماۋسىمىندا ەرتە كەلگەندەرگە تيىمدىلىك كارتۋچكاسىن تاراتىپ، ساياحاتشىلاردى ات باسىن بۇرۋعا باۋرايدى.

موڭعۇلكۇرە اۋدانى شاعانسۇن اۋىلىنىڭ قار - مۇز جاتتىعۋ بازاسى نىسانىنىڭ جۇمىس باسىندا قۇرىلىس جۇرگىزۋشىلەر نىساننىڭ ٴبىرىنشى شەبىندە شايقاس جاساۋدا. بۇل نىسان سالىنىپ بولعاننان كەيىن سپورتتىق شاڭعى تەبۋ، دەمالۋ، تاماشالاۋ، زەرتتەۋ، كوڭىل اشۋ ٴبىر تۇلعالانعان حالىقارالىق بىرەگەي قار - مۇز سپورتىنىڭ نىسانالى جەرىنە اينالادى.

”قار - مۇز جاتتىعۋ بازاسى نىسانىندا سپورتشىلاردىڭ شاڭعىعا جاتتىعۋ ورتالىعى، قىزمەت وتەۋ ورتالىعىنىڭ بولات قۇرىلىمدى تۇلعاسىن ورناتۋ، ماشينا جوندەۋ قويماسىنىڭ تۇلعالىق قۇرىلىسى، اۆتوكولىك توقتاتۋ ورنى جانە ٴبىر مىڭ 770 شارشى مەترلىك سۋ ساقتاۋ كولشىگىنىڭ قوسىمشا قۇرىلىسى سياقتىلار قاۋىرت جۇرگىزىلۋدە. قۇرىلىس جۇرگىزۋ بارىسىندا ٴبىز تەحنيكالىق جاقتان باسقارۋدى اناعۇرلىم جوعارىلاتىپ، قۇرىلىس جۇرگىزۋ ولشەمىن كۇشەيتىپ، ’ماركا ينجەنەرياسىنىڭ‘ ۇلگى وبرازىن ورناتامىز“  دەدى جۇڭگو تەمىر جول 8 - مەكەمەسىنىڭ ىلە وبلىسى موڭعۇلكۇرە اۋدانى قار - مۇز جاتتىعۋ بازاسى نىسانى پارتيا ياچەيكاسىنىڭ شۋجيى ساۋ ۋ.

موڭعۇلكۇرە اۋداندىق مادەنيەت - ساياحات مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى گاۋ يۇڭشيا بىلاي دەپ تانىستىردى: ”بيىلعى قىسقى ساياحات كەزىندە موڭعۇلكۇرە اۋدانى قار - مۇز مادەنيەتى، مەرەكە - مەيرام، قار - مۇز جارىسى سياقتى نەگىزگى تاقىرىپتاردى ارقاۋ ەتىپ، جەلىلەس قار - مۇز ساياحات قيمىلدارىن ورىستەتىپ، ’تيانشان قار قالاسى‘ تانىسقىسىن ۇزدىكسىز ايگىلەيدى. سونىمەن بىرگە، موڭعۇلكۇرە اۋدانى ’اس - سۋ، قونالقى، سەيىل - سەرۋەن، زات ساتىپ الۋ، كوڭىل اشۋ‘ سىندى جالپى فاكتورلاردى تىعىز ارقاۋ ەتىپ، مادەنيەت، ساياحات ساپاسىن ۇزدىكسىز جوعارىلاتىپ، ساياحاتتىڭ سايكەستى قۇرىلعىلارىن بەلسەنە كەمەلدەندىرىپ، موڭعۇلكۇرە ەرەكشەلىگىنە يە قار - مۇز ساياحات ماۋسىمىن قالىپتاستىرىپ، قالىڭ ساياحاتشىلاردىڭ كوپ نەگىزدى ساياحات قاجەتىن قاناعاتتاندىرادى“.

”2024 - جىلعى قىسقى قار ـ مۇز ساياحاتى قىزمەتىن ويداعىداي ىستەۋ ٴۇشىن، اۆتونوميالى وبلىس قار شاڭعى الاڭىنىڭ نەگىزدىك قۇرىلعىلارىنا ۇسىنىلىمدى ۇزدىكسىز ارتتىردى، مۇنىڭ ىشىندە موڭعۇلكۇرە اۋدانى شاعانسۇن قار - مۇز سپورتى بازاسى 2024 - جىلى ورتالىقتىڭ 100 ميلليون يۋان ارناۋلى قارىز قارجىسىمەن اۆتوكولىك توقتاتۋ ورنى، شاڭعى جابدىقتارى زالى، ساياحاتشىلارعا قىزمەت وتەۋ ورتالىعى، سۋ ساقتاۋ كولشىگى سياقتى نەگىزدىك نىسان قۇرىلىسىن ورىندادى. مەجەمەن 2024 - جىلى قىسقى شاعانسۇن قارلى دالا باقشاسى الدىمەن ىسكە قوسىلادى. قورعاس جۇڭحۋا فۋشوۋشان تاۋى قار شاڭعى الاڭىنىڭ 2024 - جىلعى نىسانىنا جاڭادان 50 ميلليون يۋان قارجى قوسىلىپ، ٴبىر اسپالى جول لەنياسىن جاڭادان سالىپ، 16 قار شاڭعى ماشيناسىن ساتىپ الىپ، قار شاڭعى قۇرىلعىلارىن جاڭالاپ كەمەلدەندىرمەكشى. تەكەس اۋدانى قاراجون قارلى القاپ باقشاسى ونىمدەرىنىڭ جەلىسىن رەتتەپ، كەمەلدەندىرىپ، وزەكتى رايون ’گۇل تەكشەسى‘ قار شاڭعى الاڭى اۋماعىنىڭ دارەجەسىن جوعارىلاتىپ، قىسقى ساياحاتتىڭ باۋراۋ قۋاتىن ارتتىرادى. اۆتونوميالى وبلىسىمىزدا قىسقى قار - مۇز ساياحاتىنىڭ كوپ وزەكتى تىرەك جۇيەسى العاشقى ادىمدا قالىپتاستى“ دەدى وبلىستىق مادەنيەت، راديو - تەلەۆيزيا جانە ساياحات مەكەمەسى بايلىق قاينارىن اشۋ جانە كاسىپ سالاسىن دامىتۋ باسقارماسىنىڭ جاۋاپتىسى ۋاڭ تاۋ.

قازىرگە دەيىن ىلە وبلىسىندا 20 قار - مۇز سپورتى الاڭى، 13 S دارەجەلى قار شاڭعى الاڭى بار بولۋدان سىرت، تيانشان قار - مۇزى، قىراۋلى ورمان، قارلى القاپتاعى تۇلپار، اققۋ كەلبەتى، كوگىلدىر مۇز ايدىنى سياقتى ٴبىرشاما جوعارى ەستەتيكالىق، تاماشالاۋ جانە ساۋدا قۇنىنا يە قار - مۇز ساياحات بايلىعى دا بار. بيىل ىلە وبلىسى قار - مۇز ەكونوميكاسىنىڭ كومەسكى كۇشىن ۇزدىكسىز اشىپ، قار - مۇز ساياحات ونىمدەرىمەن قامداۋدى ساپالىلاندىرىپ، ”قار - مۇز + سپورت“، ”قار - مۇز+ مادەنيەت“، ”قار - مۇز + ساياحات“ سياقتى كوپتەگەن كاسىپتەردى توعىستىرا دامىتۋدى مىقتاپ ارقاۋ ەتىپ، قىسقى ساياحات كاسىبىن بايىتىپ، قار - مۇز ساياحاتى ماركاسىن جاراتىپ، قىسقى ساياحات بازارىنىڭ ۇزدىكسىز دۋمانعا بولەنۋىنە دەم بەرىپ، قىسقى ساياحاتتىڭ زورايۋىن، الۋەتتەنۋىن بار كۇشپەن ىلگەرىلەتىپ، ”سۋىق بايلىقتىڭ“ ”ىستىق  كاسىپ سالاسىنا“ اينالۋىن جەبەيدى.