سۋرەتتە: سەلبەستىك ورتالىعىنا ەنگىزىلگەن اۆتوكولىكتەر. جاڭ لياڭ فوتوسى
تىلشىلەرىمىز جاڭ لياڭ، حۋاڭ جيڭ حابارلايدى. 10 - ايدىڭ 20 - كۇنى جۇڭگو (شينجياڭ) ەركىن ساۋدا سىناق رايونى قورعاس اۋماعى جۇڭگو - قازاقستان قورعاس حالىقارالىق شەكارالىق سەلبەستىك ورتالىعىندا (تومەندە قىسقاشا سەلبەستىك ورتالىعى دەلىنەدى)، قازاقستان ساۋداگەرى دارىنتا قاجيشەۆ تاۋارلارىن جاڭا ساتىپ العان جۇڭگونىڭ چاڭ - ان ماركالى S U V اۆتوكولىگىنە سالىپ، اۆتوكولىگىنىڭ راسمياتىن تولىق الىپ، ەش كەدەرگىسىز باتىسقا جول الدى.
بيىل 3 - ايدىڭ 6 - كۇنى ەلىمىزدە وندىرىلگەن تۇڭعىش اۆتوكولىك ”5034“ كەدەن باقىلاۋ ـ باسقارۋ ۇلگىسى ارقىلى سەلبەستىك ورتالىعىنىڭ جۇڭگو جاق وڭىرىنە ەنگىزىلگەن - دى، بۇل وسى وڭىردەگى تاۋار اۆتوكولىكتەرىن كورمەگە قويىپ بولشەك ساتۋ كاسىبىنىڭ رەسمي ىسكە قوسىلعاندىعىنان دەرەك بەرەدى. بۇل شارا قازاقستان ازاماتتارىنا سەلبەستىك ورتالىعىنان تىكەلەي شەكارا اتتاپ جۇڭگونىڭ اۆتوكولىكتەرىن ساتىپ الۋدىڭ جاڭا جولىن اشتى.
سوڭعى جىلداردان بەرى حالىقارالىق جاعدايدا تۋىلعان زور وزگەرىستەرگە بايلانىستى، ورتا ازياداعى 5 ەلدىڭ اۆتوكولىك بازارىندا دا وزگەرىس تۋىلدى، جۇڭگو اۆتوكولىكتەرىنىڭ سىرتقى كورىنىسى جاڭاشا، ساپاسى جاقسى بولۋداي ەرەكشەلىگى قىزۋ قارسى الۋعا يە بولعانىمەن، ٴبىراق حالىقارالىق ساۋدانىڭ شەكتەمەسى سەبەبىنەن شەتەل قاريدارلارىنىڭ جۇڭگو اۆتوكولىگىن ساتىپ الۋ ويى جۇزەگە اسپاي كەلگەن ەدى. جۇڭگو اۆتوكولىك كاسىبىن شەتەل بازارىندا ونان ارى كەڭەيتۋ ٴۇشىن شينجياڭ ەركىن ساۋدا سىناق رايونى قورعاس اۋماعى سەلبەستىك ورتالىعىنىڭ جۇڭگو جاق وڭىرىندە تاۋار اۆتوكولىكتەرىن كورمەگە قويىپ بولشەك ساتۋ كاسىبىن ورىستەتۋ جونىندە ىزدەنىس جاسادى.
سەلبەستىك ورتالىعىنداعى ي ـ ۋ حالىقارالىق ساۋدا بازارى وسى ساۋدا ورايىن مىقتى يگەرىپ، ساۋدا بازارىنىڭ جەر استىنداعى 2 مىڭ شارشى مەتردەن استام ورىندى اشەكەيلەپ، ەلىمىز اۆتوكولىكتەرىنىڭ ورتا ازياداعى بەس ەلگە ساتىلۋى ٴۇشىن كورمەلەۋ، ساتۋ، رەسمياتىن ٴبىتىرۋ سياقتى جاقتاردان قىزمەت وتەدى. ەلىمىزدە وندىرىلگەن تاۋار اۆتوكولىكتەردى كەشەندى قورعامالى باجى رايونىندا باجىسىز ساقتاعاننان كەيىن، كاسىپورىنداردىڭ قاجەتىنە قاراي توپقا ٴبولىپ سەلبەستىك ورتالىعىنا كىرگىزىپ كورمەلەپ بولشەك ساتىپ، ەلىمىزدە وندىرىلگەن تاۋار اۆتوكولىكتەرىنىڭ سەلبەستىك ورتالىعىندا تەك كورمەگە قويىلىپ، ناق مايداندا ساۋدالاسۋعا بولمايتىن قيىن جاعدايدى بۇزىپ، سەلبەستىك ورتالىعى مەن قورعاس كەشەندى قورعامالى باجى رايونىندا ”الدى دۇكەن، ارتى قامبا“ سىندى ىقپالداس دامۋ جاعدايىن قالىپتاستىرۋىن جەبەدى.
دارىنتا قاجيشەۆ وسىنداي جاعدايدا سەلبەستىك ورتالىعى ي - ۋ حالىقارالىق ساۋدا بازارىنان اۆتوكولىك كورىپ جانە ساتىپ الىپ، قاتىستى رەسمياتتارىن تەز بىتىرگەننەن كەيىن، ساتىپ العان باسقا تاۋارلارىن سۋ جاڭا اۆتوكولىگىنە سالىپ، 3 ساعاتتان استام جول ٴجۇرىپ قازاقستاننىڭ الماتى قالاسىنا جەتىپ الدى.
سەلبەستىك ورتالىعىنداعى ي ـ ۋ حالىقارالىق ساۋدا ورتالىعىنىڭ القا باستىعى جين شيڭجۇڭ بىلاي دەدى: ”شەكارا اتتاپ اۆتوكولىك ساتىپ الۋ جۇڭگو اۆتوكولىكتەرىنىڭ كوپتەپ ەكسپورت ەتىلۋىنە تاماشا نەگىز قالادى، اۆتوكولىكتىڭ ساتىلۋ مولشەرى دە كورنەكتى ارتتى. ٴبىز ەل ىشىنەن 50 گە جۋىق اۆتوموبيل ماركاسىن ەنگىزىپ، كورمەگە قويدىق، كاسىپ مولشەرىنىڭ ارتۋىنا ىلەسە، ٴبىز اۆتوكولىك بولشەكتەرى سياقتى سايكەستى ونىمدەر مەن قىزمەت وتەۋدى دە ەنگىزىپ، ەڭ سوڭىندا ’جەلىلەس‘ كاسىپ سالاسىن قالىپتاستىرماقشىمىز“ـ دەدى.
قازىرگى اينالىم جاعدايىنان قاراعاندا، اۆتوكولىك جاساۋ ساۋداگەرلەرى حالىقارالىق تۇتىنۋشىلارعا تىكەلەي بەت الىپ، ٴداستۇرلى اۆتوكولىك ەكسپورت ەتۋ بارىسىنداعى ٴبولىپ ساتۋشى ساۋداگەر، ۋاكىلدىك ساۋداگەر سياقتى كوپ ٴتۇرلى ارالىق بۋىنداردى ازايتقاندىقتان، اۆتوكولىكتىڭ ساتىلۋ باعاسى ەل ىشىنەن تومەن بولىپ، ەلىمىزدە وندىرىلگەن تاۋار اۆتوكولىكتەردى بولشەك ساتۋ باعاسى اشىق، وزىندىك قۇندى مەڭگەرۋگە بولادى، ابزالدىلىعى كورنەكتى. شينجياڭ ەركىن ساۋدا سىناق رايونى قورعاس اۋماعى قىزمەت كەڭسەسى تۇزىمدە جاڭالىق اشۋ گرۋپپاسىنىڭ ورىنباسار باستىعى تالعار كامالجان ۇلى بىلاي دەدى: ”ٴبىز سەلبەستىك ورتالىعىنىڭ اۆتوكولىكتى كورمەلەپ ساتۋ ٴتۇزىم ٴتارتىبىن بەلگىلەپ جانە اتقارىپ، كاسىپ كۇيىنىڭ جۇيەلى، ٴتارتىپتى دامۋىن جەبەپ، جۇڭگو اۆتوكولىك ماركاسىنىڭ ازيا ـ ەۆروپا، ورتا شىعىس بازارىنا بەت الۋىنا دەم بەرەمىز“ ، ـ دەدى.