حالىققا تيىمدىلىك جاساۋ، قوسىمشا قاراجات بەرۋ ساياساتى قاباتتاسىپ، تۇتىنۋ قىزعىندىلىعىن قوزعادى

ىلە وبلىسى كونەسىنىڭ ورنىنا جاڭاسىن اۋىستىرۋعا قوسىمشا قاراجات بەرۋ ساياساتىن ۇزدىكسىز تياناقتاندىردى

11 ـ ايدىڭ 9 ـ كۇنى قۇلجا قالاسى شينماۋيە زات ساتىپ الۋ ورتالىعىنىڭ حۋاۋي قول تەلەفونى ۋاكىلدىك ساتۋ دۇكەنىنەن زات ساتىپ الۋعا كەلگەن تۇتىنۋشىلاردىڭ اياعى ۇزىلمەدى.   لي يافىڭ فوتوسى

ٴتىلشىمىز لي يافىڭ، چىن تيانجين حابارلايدى. 11 ـ ايدىڭ 9 ـ كۇنى قۇلجا قالاسى ىلە ليفىڭ ۋوجيا ەلەكتر جابدىقتارىن ساتۋ الاڭىندا سەرىكتەستىكتىڭ جاۋاپتىسى شى تيانيىڭ كەڭەس سۇراي كەلگەن تۇتىنۋشى جاڭ ۋىنليعا كونەسىنىڭ ورنىنا جاڭاسىن اۋىستىرۋ قيمىلىنىڭ ەگجەي ـ تەگجەيىن جانە قوسىمشا قاراجات بەرۋ ساياساتىن ىقلاسپەن تانىستىرىپ جاتتى.

”ىلگەرى مەن كورگەن بىرنەشە ۇلگىدەگى تەلەۆيزوردىڭ باعاسى ٴتۇسىرىلىپ قانا قويماي، كونەسىنىڭ ورنىنا جاڭاسىن اۋىستىرۋعا قوسىمشا قاراجات بەرۋ ساياساتى دا قاباتتاسىپتى، دايار زاتتى ۇيگە تىكە جەتكىزىپ بەرەدى ەكەن، بۇل شىنىمەن دە ٴتيىمدى ٴارى قولايلى بولدى، مەن ٴارى - ٴسارى بولماستان بىردەن تاپسىرىس بەردىم“ دەدى قالا تۇرعىنى جاڭ ۋىنلي.

ۇعىسۋعا قاراعاندا، بيىل اۆتونوميالى رايون تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ساياساتىنىڭ تياناقتاندىرىلىپ، ونىمدىلىك كورسەتۋىن بەلسەنە ىلگەرىلەتىپ، ساۋدا سالاسىنداعى اۆتوكولىك، ٴۇي ەلەكتر جابدىقتارى، اس ٴۇي، تازالىق ٴۇي بۇيىمدارى سياقتى ”6+1“ تۇتىنۋ بۇيىمدارى بويىنشا كونەسىنىڭ ورنىنا جاڭاسىن اۋىستىرۋ ساياسات جۇيەسىن ورناتقان. قازىرگە دەيىن ىلە وبلىسى ”ەكى جاڭا“ قارجىدان (كەڭ كولەمدى جابدىقتاردى جاڭالاۋ جانە تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ) جيىنى 140 ميلليون يۋانعا قول جەتكىزىپ، 65 ميلليون 80 مىڭ يۋان قاراجات بوساتقان، مۇنىڭ ىشىندە كونەسىن جاراقسىزعا شىعارىپ، جاڭادان اۆتوموبيل ساتىپ الۋعا قوسىمشا قاراجات بەرۋ مولشەرى %100، اۆتوموبيلدى باعاعا سىندىرىپ جاڭالاۋعا قوسىمشا قاراجات بەرۋ مولشەرى %100، كونەسىنىڭ ورنىنا جاڭاسىن اۋىستىرۋ بويىنشا قوسىمشا قاراجات بەرىلگەن ٴۇي ەلەكتر جابدىقتارى 17383 دانا، قوسىمشا قاراجات سوماسى 11 ميلليون 722 مىڭ يۋان، بەرىلگەن قوسىمشا قاراجات 6 ميلليون 282 مىڭ يۋان بولعان. 

قۇلجا قالاسى شينماۋيە زات ساتىپ الۋ ورتالىعىنىڭ حۋاۋي تەلەفونىن ۋاكىلدىك ساتۋ دۇكەنىندە زات ساتىپ الۋعا كەلگەن تۇتىنۋشىلاردىڭ اياعى ۇزىلمەدى، ساتۋشىلار الارماندارعا كونەسىنىڭ ورنىنا جاڭاسىن اۋىستىرۋ قوسىمشا قاراجات بەرۋ ساياساتىن ٴتۇسىندىرۋدىڭ قاربالاستىعىنا ٴتۇستى. 

”مىنا قولفون ٴاسىلى 7000 يۋاننان اساتىن، ۇكىمەت قوسىمشا قاراجات بەرىپ تيىمدىلىك جاساعاننان كەيىن، 1000 يۋان اقشا ۇنەمدەدىم، وتە ٴتيىمدى ەكەن“ دەدى قالا تۇرعىنى جوۋ يۋە قۋانا.

قۇلجا قالاسى شينماۋيە زات ساتىپ الۋ ورتالىعى حۋاۋي تەلەفونى ۋاكىلدىك ساتۋ دۇكەنىنىڭ جاۋاپتىسى جاڭ لينيۇي بىلاي دەپ تانىستىردى: كونەسىنىڭ ورنىنا جاڭاسىن اۋىستىرۋ قيمىلى جاپپاي باستالعاننان بەرى دۇكەندەگى زەردەلى قولفوننىڭ، قويىن كومپيۋتەردىڭ، زەردەلى تەلەۆيزوردىڭ ساتىلۋ مولشەرى قاۋىرت ارتتى، باسقا 8 دۇكەننىڭ دە ساتۋ مولشەرى ورتا ەسەپپەن %15 تەن استى. ول تاعى بىلاي دەدى: ”ساياساتتىڭ شىعارىلۋى ساۋداگەرلەرگە پايدا اكەلدى. قازىر كونە قولفوندى، قويىن كومپيۋتەردى، زەردەلى تەلەۆيزوردى جيناپ الۋ ٴتارتىبى، قوسىمشا قاراجات بەرۋ ٴتارتىبى، اقشا الۋ ٴتارتىبى سياقتىلار جاپپاي ساپالىلاندىرىلىپ، كونەسىنىڭ ورنىنا جاڭاسىن اۋىستىرۋ ارناسى كۇش سالا ىركىلىسسىزدەندىرىلىپ، ’باعالى بۇيىمداردىڭ‘ تيىمدىلىگى تۇتىنۋشىلارعا تىكە جەتكىزىلدى“ دەدى جاڭ لينيۇي. 

ٴتىلشىنىڭ ۇعىسۋىنشا، قازىر اۆتونوميالى رايون اس ٴۇي، تازالىق ٴۇي بۇيىمدارى سياقتىلارعا قوسىمشا قاراجات بەرىپ قولداۋ كورسەتۋ سەرپىنىن ارتتىرعاندىقتان، قاتىستى كاسىپورىندار ىركەس - تىركەس ورايدى مىقتى يگەرىپ، ولشەمدى سوماعا جەتكەندە - اق تيىمدىلىك جاساۋ، باعاسىن ارزانداتىپ تيىمدىلىك جاساۋ سياقتى جەلىلەس تۇتىنۋدى جەبەۋ قيمىلدارىن سايكەستى ورىستەتكەن. اسىرەسە، اس ٴۇي، تازالىق ٴۇي بۇيىمدارى سياقتىلارعا ”تيىمدىلىك جاساۋعا قوسا قوسىمشا قاراجات بەرۋدەن“ كەيىن، ساياساتتىڭ قاباتتاسۋ اسەرى قالىپتاسىپ، كونەسىنىڭ ورنىن جاڭاسىنا اۋىستىرۋ تۇتىنۋىنىڭ قىزۋ ورلەۋى كوتەرىلىپ، قالا تۇرعىندارىنىڭ كوپ نەگىزدى تۇتىنۋ قاجەتىن قاناعاتتاندىردى.

قۇلجا قالاسى شينشىجيە حالىقارالىق قۇرىلىس ماتەريالدارى، ٴۇي جيھازدارى الاڭىندا ٴۇي جابدىقتارى مەن اس ٴۇي، تازالىق ٴۇي بۇيىمدارىن كونەسىنىڭ ورنىنا جاڭاسىن اۋىستىرۋعا قوسىمشا قاراجات بەرۋ قيمىلى جونىندەگى كەرمە تۋ، ۇرانداردى بارلىق جەردەن كورۋگە بولادى. دارەت شەلەگى، وتىرعى شىلاپشىن، اينالى ىشكاپ، ۋاننا، ۇرىدان ساقتانۋ ەسىگى سياقتى ٴۇي جابدىقتارى وسى رەتكى قوسىمشا قاراجات بەرۋ تىزىمدىگىنە ەنگىزىلىپ، كوپتەگەن تۇتىنۋشىلاردى ساتىپ الۋعا باۋرادى. 

 ٴۇي جابدىقتارىن تاڭداپ جۇرگەن قالا تۇرعىنى جاۋ جينفىڭ بىلاي دەدى: ”قازىر كونەسىنىڭ ورنىنا جاڭاسىن الماستىرۋعا قوسىمشا قاراجات بەرۋ قيمىلى ورىستەتىلۋدە، قاباتتاپ ەسەپتەگەندە ٴبىرتالاي تيىمدىلىك جاسالادى ەكەن، بۇل ٴۇي اشەكەيلەۋدە ماعان تاپتىرماس تاماشا وراي بولدى“.

ىلە حۋاسۇن ساۋدا شەكتى سەرىكتەستىگىنىڭ جاۋاپتىسى شۇي جۋان بىلاي دەپ تانىستىردى: ٴۇي جابدىقتارى كاسىپورنى رەتىندە، ساياساتتىڭ تيىمدىلىگىنەن يگىلىكتەندىك، ٴبىر قىدىرۋ ٴتيىمدى ساياساتتار كاسىپورىننىڭ تۇتىنۋشى مولشەرىن ارتتىردى. سەرىكتەستىك جەلىدە، جەلىدەن تىس ۇگىت سەرپىنىن ارتتىرىپ ٴارى سايكەستى شارالار شىعارىپ، قاريدارلاردى مەملەكەتتىڭ قوسىمشا قاراجاتىنان يگىلىكتەندىرۋ نەگىزىندە، كاسىپورىننىڭ %20 قوسىمشا قاراجات قاباتتاۋ تيىمدىلىگىنەن يگىلىكتەنۋىنە مۇمكىندىك جاساپ، تۇتىنۋدىڭ ومىرشەڭدىك كۇشىن ۇزدىكسىز ارتتىردى.

”بىزدە كۋسى ٴۇي جيھاز - جابدىقتارى تۇرىندەگى ونىمدەر مول، وسى رەتكى ٴۇي جابدىقتارى مەن اس ٴۇي، تازالىق ٴۇي جابدىقتارىندا كونەسىنىڭ ورنىنا جاڭاسىن اۋىستىرۋعا قوسىمشا قاراجات بەرۋ قيمىلىمەن ۇشتاستىرىپ %15 تىك تيىمدىلىك جاساۋ ساياساتىن العا قويدىق، ونىڭ ۇستىنە زاۆود تاڭداپ دايىنداعان جوبالاۋشىلار، سايكەستىرۋشىلەر وزدەرى بارىپ تەگىن ولشەپ، رەڭ سايكەستىرىپ بەرەدى. كەيبىر ساتىپ العان ٴۇي جيھازدارىندا ٴبىر جىلدا ەكى رەت تەگىن سوگۋ - قۇراستىرۋ - جۋۋ جانە ٴومىر بويى تەگىن سوگۋ - قۇراستىرۋ قىزمەتىنەن يگىلىكتەنە الادى“. كۋسى ٴۇي جابدىقتارى ۇلكەن رايونىنىڭ باس باقىلاۋشىسى شيە ياڭ بىلاي دەدى: بۇل رەتكى قيمىلدىڭ تيىمدىلىگى وتە زور بولدى.

قازىر ىلە وبلىسى كونەسىنىڭ ورنىنا جاڭاسىن اۋىستىرۋعا قوسىمشا قاراجات بەرۋ ساياساتىن ۇزدىكسىز تياناقتاندىرىپ، ٴىشىنارا تۇتىنۋشىلاردىڭ كونە ٴۇي ەلەكتر جابدىقتارىن كەرەكتەن قالدىرۋ قاجەتىنە سايكەسىپ، تۇتىنۋشىلاردىڭ دارەجەسى جوعارىلاتىلعان ٴۇي ەلەكتر جابدىقتارىن تاڭداپ ساتىپ الۋ بەلسەندىلىگىن ارتتىردى. ۇكىمەتتىڭ قوسىمشا قاراجاتى مەن ساۋداگەرلەردىڭ ساتۋدى جەبەۋ قيمىلىنىڭ ٴوزارا ۇشتاسۋىندا ىلە وبلىسىنىڭ تۇتىنۋ بازارى ۇزدىكسىز جانداندى.

ىلە وبلىستىق ساۋدا ىستەرى مەكەمەسى بازار اينالىمى جانە تۇتىنۋدى جەبەۋ باسقارماسىنىڭ باستىعى گو جيانرۇڭ تانىستىرىپ بىلاي دەدى: بۇل مەكەمە جەلىدە جانە جەلىدەن تىس ٴتاسىل ارقىلى ساياسات ۇگىتىندە ٴتۇسىندىرۋ دەڭگەيى مەن قامتۋ اياسىن كەڭەيتەمىز. سونىمەن بىرگە، ٴۇي ەلەكتر جابدىقتارى، اۆتوموبيل سياقتى كاسىپورىنداردى بىرىگىپ، الەۋمەتتىك اۋماقتارعا، قىستاق ـ اترەتتەرگە بارۋ قيمىلىن ورىستەتىپ، كاسىپورىنداردى ارزانداتۋ، پايدا بەرۋ سياقتى جەلىلەس تۇتىنۋدى جەبەۋ قيمىلدارىن سايكەستى ورىستەتۋگە ات سالىسۋعا جەتەكتەپ، ساياساتتىڭ قاباتتاسۋ اسەرىن قالىپتاستىرىپ، تۇتىنۋدىڭ ومىرشەڭدىك كۇشىن ونان ارى قاۋلاتىپ، بۇقارانىڭ مەملەكەتتىڭ حالىققا تيىمدىلىك جاساۋ ساياساتىنان يگىلىكتەنۋىنە مۇمكىندىك جاسايمىز.