قۇلجا قالاسىنداعى قىستاقتار (الەۋمەتتىك اۋماق)：

”قىستاق بىرلەسكەن ساۋىق كەشىندە“ دۋماندى ٴان شىرقاپ، ٴبي بيلەپ، جاڭا جىلدى قۇتتىقتادى

ٴتىلشىمىز كاميلا حابارلايدى. اۋىل - قىستاق ساحنا ازىرلەپ، بۇقارا نەگىزگى رول الۋشى بولدى. بىرنەشە كۇننەن بەرى قۇلجا قالاسىنىڭ اۋىل - قىستاقتارى (الەۋمەتتىك اۋماق) كوكتەم مەرەكەسىن قارسى الۋ جەلىلەس قيمىلدارىن ىركەس - تىركەس ورىستەتتى، قىستاق تۇرعىندارى جاقىن ماڭنان ساحنا ازىرلەپ، اۋىل تىنىسىنا تولى ويىن نومىرلەرىمەن اۋىل - قىستاقتى گۇلدەندىرۋدىڭ جاڭا وزگەرىستەرىن، اۋىل - قىستاقتىڭ كوركەم جاڭا بەت - بەينەسىن ايگىلەپ، كوكتەم مەرەكەسىن شاتتىققا بولەدى.

1 - ايدىڭ 27 - كۇنى قۇلجا قالاسى تاسكوپىر اۋىلىندا ”التىن جىلان قۇت - بەرەكە بەرسىن. كوڭىلدى قىستاق ساۋىق كەشىمەن رەفورما جاساۋدىڭ، دامۋدىڭ جاڭا داستانىن جازايىق“ تاقىرىبىنداعى بىرلەسكەن دوستىق قيمىلى قىزۋ مەرەيمەن وتكىزىلدى. ٴارقايسى قىستاقتاعى (الەۋمەتتىك اۋماق) تۇرعىندار مەرەكەلىك كيىمدەرىن كيىپ، ٴبىر اراعا باس قوسىپ، كوكتەم مەرەكەسىن شات مەرەيمەن قارسى الدى. كادرلار مەن بۇقارانىڭ وزدەرى قۇراستىرىپ، وزدەرى ورىنداعان ٴان - ٴبي، كومەديا، ولەڭ وقۋ سياقتى ادەبيەت - كوركەمونەر نومىرلەرى ارت - ارتىنان قويىلىپ، اۋىل - قىستاق مادەنيەتىنىڭ جالىندى ومىرشەڭدىك كۇشىن ايگىلەدى. كوپشىلىك ادەبيەت - كوركەمونەر نومىرلەرى ارقىلى ٴوز اڭگىمەلەرىن ايتىپ، اۋىل - قىستاق مادەنيەتىنىڭ ”جارشىسىنا“ اينالىپ، شات كۇلكى مەن شاپالاق ٴۇنى ىشىندە ۇمىتىلماس ساتتەردى وتكىزدى.

قۇلجا قالاسى تاسكوپىر اۋىلى كوكشىلىك قىستاعىنىڭ تۇرعىنى تۇمارىس اسەت قىستاقتاعى اپەكە ـ سىڭلىلەرىمەن بىرگە ٴبي نومىرلەرىن ورىندادى، ول تىلشىگە: ”مەرەكە ـ مەيرامداردا قىستاق تۇرعىندار كوميتەتىندە ويىن نومىرلەرىنە جاتتىققاندى ۇناتامىز، وسى كونسەرت ٴۇشىن ٴبىز تالاي كۇن جاتتىعۋ جاسادىق، ويىن - ساۋىق ارقىلى كورشى - قولاڭدارىمىزعا شاتتىق سيلاعاندىعىمىز ٴۇشىن قاباعات قۋانىشتامىز. بۇدان كەيىن دە وسىنداي قيمىلداردىڭ كوبىرەك ورىستەتىلىپ، رۋحاني مادەنيەت تۇرمىسىمىزدىڭ ٴتىپتى دە تۇرلەنۋىن ٴۇمىت ەتەمىز“ - دەدى.

1 - ايدىڭ 28 ـ كۇنى، جاڭا جىلعا قاراعان ٴتۇنى قۇلجا قالاسى ايرانباق ٴمالى باسقارماسى تيانشان كوشەسى الەۋمەتتىك اۋماعىنا بارعانىمىزدا، بارلىق جەردە شامدار مەن رەڭدى لەنتالار ٴىلىنىپ، قىزىل قوراپتى لامپالار اسىلىپ، شات ـ شادىمان بەينەگە ەنگەن. سول كۇنى الەۋمەتتىك اۋماق كوكتەم مەرەكەسىن قۇتتىقتاۋ قيمىلىن دەن قويا ۇيىمداستىرىپ، قاراستى اۋماقتاعى ٴار ۇلت تۇرعىندارى بەلسەنە ات سالىسىپ، وسى ٴبىر باس قوسۋ مەرەكەسىن بىرگە وتكىزدى.

قيمىل الاڭى دۋمانعا بولەندى، تۇرعىندار قورالانا وتىرىپ تۇشپارا جەپ اڭگىمە دۇكەن قۇرىپ، وتكەن ٴبىر جىلداعى قىزىقتى ىستەرى مەن جاڭا جىلعا دەگەن تاماشا تىلەكتەرىن ٴبولىسىپ، باس قوسۋ مەن باقىت جونىندە اڭگىمەلەستى.

ويناقى مۋزيكا ريتىمىنە ىلەسە تۇرعىندار تۇس - تۇستان الدىعا شىعىپ، بار ىنتا - پەيىلىمەن بيگە باستى. جاندى دا جالىندى وسى زامانعى بيدەن تارتىمدى ۇلتتىق بيگە دەيىن، ٴاربىر كونسەرت تولاسسىز شاپالاق سوعۋ، الاقايلاۋ، ارقان تارتۋ سياقتى قىزىقتى سپورت بۋىندارىندا دوستاسۋ قيمىلى ٴتىپتى دە ورلەۋگە كوتەرىلدى. شاتتىق كۇلكىسى ىشىندە كوپشىلىك مەرەكەلىك تۇسكە يە، سۇيىسپەنشىلىككە تولى مادەنيەت سالتاناتىنان بىرگە ٴلاززاتتاندى.   

”جاڭا ٴبىر جىلدا ٴبىز مادەنيەت قيمىلدارىنىڭ ٴمانىن ۇزدىكسىز تەرەڭدەتىپ، نەگىزگى ساتى مادەنيەتىن اناعۇرلىم ارلەندىرەمىز“ دەدى تيانشان كوشەسى الەۋمەتتىك اۋماعى پارتيا ياچەيكاسىنىڭ شۋجيى مارۋا مۇعاي.

سۋرەتتە: تاشكوپىر اۋىلىنىڭ دوستىق قيمىل الاڭى.   كاميلا فوتوسى

سۋرەتتە: ويناقى ٴبي ورىنداۋدا.  كاميلا فوتوسى

سۋرەتتە: الەۋمەتتىك اۋماق تۇرعىندارى باس قوسۋدا تۇشپارادان ٴدام تاتۋدا.   ديليسار فوتوسى