تىلشىلەرىمىز حۋاڭ يان، شاۋكەت حابارلايدى. 4 - ايدىڭ 21 - كۇنى ”كىتاپ وقۋ مەرەيىنە شومعان ىلە،  مادەنيەتپەن نارلەنگەن گۇلىستان قالا“ اتىنداعى قۇلجا قالاسى بايانداي قالاشىعىنىڭ 4 - ايدىڭ 23 - كۇنگى دۇنيە جۇزىلىك كىتاپ وقۋ كۇنى جانە ۋاڭ مىڭنىڭ ىلەگە كەلگەنىنىڭ 60 جىلدىعىن ەسكە الۋ جونىندەگى كىتاپ وقۋ قيمىلى بايانداي قالاشىعى سەنترلى باستاۋىش مەكتەبىندە وتكىزىلدى.

بۇل رەتكى قيمىلدى ىلە وبلىستىق ادەبيەت - كوركەمونەرشىلەر بىرلەستىگى مەن قۇلجا قالالىق پارتكوم ۇگىت ٴبولىمىنىڭ جەتەكشىلىگىندە، قۇلجا قالالىق مادەنيەت - دەنە تاربيە، راديو - تەلەۆيزيا جانە ساياحات مەكەمەسى مەن قۇلجا قالاسى بايانداي قالاشىق حالىق ۇكىمەتى بىرلەسىپ ۇيىمداستىرعان، قۇلجا قالالىق كىتاپحانا، قالاشىق سەنترلى باستاۋىش مەكتەبى جانە قالاشىققا قاراستى قىستاقتار (الەۋمەتتىك اۋماق)، مەكتەپتەر بىرگە وتكىزگەن.

تۇستەن بۇرىن ساعات 11 دە قيمىل بايانداي قالاشىعى سەنترلى باستاۋىش مەكتەپ وقۋشىلارىنىڭ «جاستىق كوكتەم جاساسىن» دەگەن دەكلاماتسيا ٴۇنى ىشىندە باستالدى. وقىتۋشى - وقۋشىلار «اتا مەكەنگە ساپاردان» (ٴۇزىندى) وقىپ، ۋاڭ مىڭ مىرزانىڭ وسى قۇتتى مەكەنگە بولعان تەرەڭ سۇيىسپەنشىلىگىن ەسكە الدى. وسىدان كەيىن «كىتاپ وقۋ مەرەيىنە شومعان وسپىرىمدەر»، «كۇرىش اتىزىنداعى جۇڭگو ارمانى»، «تەاترمەن بىرگە ٴان شىرقاۋ» سياقتى دەن قويا ازىرلەنگەن 10 نەشە ادەبيەت - كوركەمونەر نومىرلەرى رەتىمەن قويىلىپ، كورەرمەندەردىڭ قىزۋ قارسى الۋىنا يە بولدى.

قيمىل مايدانىندا تاعى ۋاڭ مىڭ مىرزانىڭ بايانداي قالاشىعى سەنترلى باستاۋىش مەكتەبىنە جازىپ بەرگەن ارناۋ ٴسوزى كورسەتىلدى.

ۇعىسۋعا قاراعاندا، بايانداي قالاشىعى سەنترلى باستاۋىش مەكتەبى ىركەس ـ تىركەس ”كلاسسيكالىق شىعارمالارمەن جۇڭحۋانى نۇرلاندىرىپ، ادەبيەت ارقىلى شينجياڭدى نارلەندىرەيىك“، ”كىتاپ وقۋ ارقىلى جان دۇنيەمىزگە جارىق سيلايىق“، ”قىزىل كىتاپتاردى داۋىستاپ وقۋ قيمىلى“ سياقتى جەلىلەس قيمىلداردى ورىستەتەدى ەكەن.

سۋرەتتە: قيمىل مايدانى حۋاڭ يان فوتوسى