نىلقى اۋدانىنىڭ بال فەرماسى:

”اۋىل - قىستاق ساياحاتى + ەرەكشە حالىقتىق تۇسەلحانا“ حالىقتى اۋقاتتاندىرۋ جولىن تاعى دا كەڭەيتتى

ٴوز ٴتىلشىمىز لۋ جۇڭ حابارلايدى. سوڭعى جىلداردان بەرى نىلقى اۋدانى ساياحات كاسىپ سالاسىن دامىتۋ بارىسىندا، ساياحات بايلىعى ابزالدىعىن تولىق ساۋلەلەندىرىپ، كوركەم تابيعات كورىنىسى مەن تەرەڭ گۋمانيتارلىق استارىنا سۇيەنىپ، جەرگىلىكتى ورىننىڭ ۇلتتىق سالت ـ سانا مادەنيەتىن، اۋىل شارۋاشىلىق ٴوندىرىسىن سەيىل - سەرۋەن ساياحاتىمەن ۇشتاستىردى. نىلقى اۋداندىق بال فەرماسى «ٴجۇز شاقىرىمدىق  تابيعي كورىنىس كوريدورى» دەگەن اتى بار تاڭبالى جايلاۋىنا ورنالاسقان، ساياحات كاسىبىن دامىتۋدا ەرەكشە ابزالدىققا يە، كوپتەگەن بۇقارا اۋلاسىن ەرەكشە حالىقتىق تۇسەلحاناعا وزگەرتىپ، اۋىل - قىستاقتى كوركەيتۋدىڭ جاڭا ٴورىسىن اشتى.

2020 - جىلى اشىلعان جياڭفىڭچيڭ حالىقتىق تۇسەلحاناسى - بال فەرماداعى تۇڭعىش حالىقتىق تۇسەلحانا، ونىڭ قوجايىنى 36 جاستاعى ما لەي.

ما لەي وتباسى كەزىندە باعىمشىلىق كاسىبىن دامىتقان، كەيىن كوشە بويىنداعى ٴۇيىن قوناق ٴۇي ەتىپ اشىپ، جۇك اۆتوكولىكتەرىنىڭ شوفەرلەرىن قابىلداعان. 2020 - جىلى جەرگىلىكتى ورىننىڭ ساياحات كاسىبىن دامىتۋداعى وراسان زور كومەسكى كۇشىن كورگەن ما لەي ٴبىر ميلليون يۋاننان استام قارجى قوسىپ، اۋلانى 14 بولمەلى حالىقتىق  تۇسەلحاناعا وزگەرتىپ اشقاننان كەيىن، تاپسىرىس تولاستامادى.

”بيىل ما لەي تاعى ٴبىر ميلليون يۋاننان استام قارجى قوسىپ، تاعى ٴبىر اۋلامدى جاڭا دوستار حالىقتىق تۇسەلحاناسىنا وزگەرتتىم. بيىل 4 ـ ايدا قۇرىلىس باستاپ، 6 ـ ايدىڭ 14 ـ كۇنى ىسكە قوستىم“،- دەدى ما لەي.

7 ـ ايدىڭ 6 ـ كۇنى ٴتىلشى وسى تۇسەلحاناعا كەلدى، اعاشتان سالىنعان قوناق ۇيلەر كەڭ دە جارىق، سولتۇستىكتەگى بولمەلەردىڭ تەرەزەسىن اشسا اۋىل  كورىنىسىن تاماشالاۋعا بولادى ەكەن. 

اۋلاعا اعاشتان جاسالعان ۇستەل - ورىندىقتار مەن التىباقان قويىلعان، ساياحاتشىلار سالقىن سامال ەسكەن بۇل ارادا وتىرىپ ٴدامدى شاي ىشە الادى. ”جياڭفىڭچيڭ حالىقتىق تۇسەلحاناسى كونە اۋلادان وزگەرتىپ جاسالعاندىقتان، ونىڭ ۇستىنە تۇڭعىش رەت حالىقتىق تۇسەلحانا اشۋ بارىسىنداعى تاجىريبەسىزدىكتەن، كەزىندە قاراماققا جاقسى كورىنگەنىمەن، قازىرگىمەن سالىستىرعاندا ٴالى دە كوپتەگەن جەتەرسىزدىكتەر بار ەدى. جاڭا دوستار تۇسەلحاناسى جياڭفىڭچيڭ تۇسەلحاناسىنىڭ دارەجەسىن جوعارىلاتقان نۇسقاسى، ول ساياحاتشىلارعا  ٴتىپتى دە جايلى سەزىم جانە  جاقسى اسەر سيلايدى“ دەدى ما لەي.

ٴبىر قونالقى تابۋ قيىن دەگەن كۇندە دە، ما لەي سەنىمدى تيجارات جۇرگىزگەندە عانا ۇزاق بولاشاققا جەتۋگە بولاتىندىعىنا كامىل سەندى. ”ەكى حالىقتىق تۇسەلحانا  جونىنەن ساياحاتتىڭ قاۋىرت مەزگىلىندە دە ۇيلەسىمدى باعا بەلگىلەيمىن. جياڭفىڭچيڭ حالىقتىق تۇسەلحانامنىڭ قازىرگى باعاسى ەڭ جوعارى بولعاندا 300 يۋان، جاڭا دوستار تۇسەلحانامنىڭ كورىنىس تاماشالاۋ بولمەسى 500 يۋاننان اسادى، ادەتتەگى ولشەمدى بولمە 400 يۋاننان اسادى. ويتكەنى ساياحاتشىلاردىڭ كوپتەگەن ساياحات ورىندارىن تاڭداۋىنا بولادى، ٴبىر مەزەتتىك ىرعىن پايداعا بوي ۇرۋ تەك وزىنە عانا زيان جەتكىزەدى“ دەدى ما لەي.

2022 - جىلى اشىلعان قارا ارا شارۋالار حالىقتىق تۇسەلحاناسىنىڭ قوجايىنى ياڭ گوفىڭ ارا باعىمشىلىعىمەن شۇعىلداناتىن ديقان، سوندىقتان ول حالىقتىق تۇسەلحانانى بال ونىمدەرى مەن ساياحاتتى توعىستىرۋدىڭ سىناق ٴتۇيىنى ەتپەكشى. ”ساياحاتشىلار حالىقتىق تۇسەلحانادان ناعىز قارا ارا بالى ونىمدەرىن ساتىپ الا الادى، ارا مادەنيەتىنە قىزىعاتىن ساياحاتشىلاردىڭ ارا باعۋ ورنىنا بارىپ ارا مادەنيەتىن كورۋىنە بولادى. وسىلاي ىستەگەندە ارا مادەنيەتىن ۇگىتتەۋمەن بىرگە، ارا ونىمدەرىنىڭ ساتىلۋىنا دا تۇرتكى بولادى“ دەدى ياڭ گوفىڭ. 

بال فەرمادا وزىندىك ەرەكشەلىككە يە حالىقتىق تۇسەلحانالار قازىر بارلىق جەردەن اشىلدى. بال فەرمادا قازىرگە دەيىن 76 حالىقتىق تۇسەلحانا بار.

سۋرەتتە: نىلقى اۋدانىنىڭ بال فەرماسىنداعى حالىقتىق تۇسەلحانا. لۋ جۇڭ فوتوسى