سۋرەتتە: جەمىس ەگەتىن ديقاندار تەرىلگەن الحورىنى سۇرىپتاۋ ورنىنا جەتكىزۋدە.

ەرىكتى تىلشىلەر حۋا يانميڭ، ما شياۋلان حابارلايدى. قازىر الحورىنىڭ پىساتىن مەزگىلى. 8 ـ ايدىڭ 21 ـ كۇنى شاپشال سىبە اۆتونوميالى اۋدانى جاعىستاي قالاشىعى تومەنگى جاعىستاي قىستاعىنداعى ىلە جينجيۋ اۋىل شارۋاشىلىعىن اشۋ شەكتى سەرىكتەستىگىنىڭ جەمىس ـ جيدەك بازاسىندا نەشە مىڭ مۋ جەرگە ەگىلگەن الحورى پىسىپ ٴۇزىپ الۋ مەزگىلىنە ٴوتتى. ىلە وبلىستىق قوسىننان شەگىنگەن اسكەريلەر ىستەرى مەكەمەسىنەن، وبلىستىق قىزىل كرەست قوعامىنان تومەنگى جاعىستاي قىستاعىنا تۇسكەن قىزمەت اترەتىنىڭ مۇشەلەرى جانە قىستاق كادرلارى مەن جەمىس ەگۋشىلەر الحورىنى تەرۋمەن، سۇرىپتاۋمەن، تاسۋمەن قاربالاس بولىپ، مول ٴونىم الۋدىڭ قاربالاس جاعدايىن قالىپتاستىردى.

حۋناننىڭ چاڭشاسىنداعى شاۋتاڭ جەمىس شارۋاشىلىعى سەرىكتەستىگىنىڭ ۋاكىلى ۋىن تاۋ بىلاي دەدى: ”سەرىكتەستىگىمىز ٴار جىلى شاپشال اۋدانىنان 1000 توننا الحورى ساتىپ الادى، بۇل ارانىڭ كۇن نۇرى جىلۋ بايلىعى جەتكىلىكتى، الحورىنىڭ جەمىسى قالىڭ، ٴدامدى، ونىڭ ۇستىنە الحورىنىڭ قۇرامىندا ازىقتىق تالشىق، مينەرال زاتتار جانە ميكرو ەلەمەنتتەر مەن كوپ ٴتۇرلى قورەكتىك زاتتار بار بولىپ، جەمىستەردىڭ ىشىندەگى ’جاڭا ٴدام‘ تۇرىنە اينالىپ، تۇتىنۋشىلاردىڭ القاۋىنا بولەندى“.

ىلە جينجيۋ اۋىل شارۋاشىلىعىن اشۋ شەكتى سەرىكتەستىگىنىڭ ورىنباسار باس ديرەكتورى باي رۋجيان بىلاي دەپ تانىستىردى: سەرىكتەستىك قازىر 13 مىڭ 400 مۋ جەرگە جەمىس ورمانىن ەكتى، مۇنىڭ ىشىندە 6000 مۋ جەردە الحورى، 3400 مۋ جەردە شياڭفەي تاس الماسى، 1000 مۋدان استام جەردە ٴمولدىر الما جانە ۆيناس حۋاڭجين الماسى سياقتى جەمىس ـ جيدەك تۇرلەرى ەگىلدى، 9000 شارشى مەترلىك جەمىس ـ جيدەك ونىمدەرىن سۇرىپتاۋ، جاس كۇيىندە ساقتاۋ قامباسى سياقتى سايكەستى قۇرىلعىلاردا سالىندى. بيىل سەرىكتەستىك بەيجيڭ، شاڭحاي، گۋاڭدۇڭ سياقتى جەرلەردەگى جەمىس ساۋداگەرلەرىمەن 2000 توننا الحورى ساتۋ توقتامىنا قول قويدى، مەجەمەن بيىل جەمىس - جيدەكتىڭ جالپى ٴونىم مولشەرى 3000 تونناعا جەتىپ، جالپى ٴونىم قۇنى 50 ميلليون يۋاننان اسادى. بۇگىن باقشانى اشقان العاشقى كۇن، ٴبىرىنشى توپتا 500 توننا الحورى تەرىپ سۇرىپتاپ، قوراپتالىپ، قامباعا كىرگىزىلىپ، ىشكى ولكە بازارىنا جونەلتىلدى.

سوڭعى جىلدارى ىلە جينجيۋ اۋىل شارۋاشىلىعىن اشۋ شەكتى سەرىكتەستىگى جەمىس ـ جيدەك كاسىبىن ۇزدىكسىز زورايتىپ، كۇشەيتىپ، توڭىرەكتەگى قىستاق تۇرعىندارىنىڭ جۇمىسقا ورنالاسۋىنا جانە اۋلا جەمىس ـ جيدەك شارۋاشىلىعىن دامىتۋىنا جەتەكشىلىك ەتىپ، قىستاق تۇرعىندارىنىڭ جۇمىس ىستەپ اقشا تابۋىنا، جەمىس ـ جيدەكتى باپتاۋ تەحنيكاسىن ۇيرەنۋىنە، ەسىك الدىندا جۇمىسقا ورنالاسىپ اقشا تابۋىنا مۇمكىندىك جاسادى.

سۋرەتتە: اۋىل شارۋاشىلىعىنا كومەكتەسەتىن ەرىكتى قىزمەت وتەۋشىلەر جەمىس ەگەتىن ديقاندارمەن بىرگە الحورىنى كولىككە تيەۋدە.

سۋرەتتە: جەمىس ەگەتىن ديقاندار الحورى تەرۋدە.       سۋرەتتەردى حۋا يانميڭ تۇسىرگەن