□ انار بۇلت \ شينجياڭ گازەتىنىڭ ءتىلشىسى ءجازيرا نەسىپبەك، ەرىكتى ءتىلشى جاڭ جيانشين
8 - ايدىڭ 15 - كۇنى جىڭ اۋدانى توتو قالاشىعىنداعى بايان ەرەكشە باعىمشىلىق سەلبەستىك كووپەراتيۆىندەگى 100 دەن استام تۇيە ەرەكشە كۇيلى كورىنەدى، كووپەراتيۆ مۇشەلەرى قول تەلەفوندارىمەن تۇيە ءسۇتى ونىمدەرىن تىكە تاراتۋ ارقىلى ساتۋدا.
”كوپشىلىككە سەلبەستىك كووپەراتيۆىمىز وندىرگەن تۇيە ءسۇتىن تانىستىرامىز، جاڭا ساۋىلعان ءارى ءنارلى ءسۇتتى ۇيلەرىڭىزگە جەتكىزىپ بەرەمىز“... كووپەراتيۆ مۇشەسى باقىتگۇل جۇقايدىڭ ايتۋىنشا، ينتەرنەتتە تىكە تاراتۋ ونىڭ قاريدارلارمەن اراسىن جاقىنداتا تۇسكەن.
60 جاستاعى نۇرتاي بايداۋلەت بايان ەرەكشە باعىمشىلىق سەلبەستىك كووپەراتيۆىنىڭ جاۋاپتىسى. ”بالا كەزىمدە ۇيدە بىرنەشە تۇيە بار بولاتىن، نەگىزىنەن جۇك ارتۋعا ىستەتەتىنبىز، قازىر تۇيەنىڭ اتقاراتىن رولى وزگەشە بولىپ وتىر“، - دەدى نۇرتاي.
بىرنەشە جىلدىڭ الدىندا كۇرتى مال شارۋاشىلىق قىستاعىنىڭ ”ەكى كوميتەتىنىڭ“ شابىتتاندىرۋى مەن كومەكتەسۋىندە، نۇرتاي سەلبەستىك كووپەراتيۆىن قۇرىپ، ”سەلبەستىك كووپەراتيۆى + كاسىپ سالاسى بازاسى + باعىمشىلىق وتباسى“ ۇلگىسى ارقىلى ماڭىنداعى قىستاقتاردان 60تان استام ەگىنشى - مالشىنىڭ تۇيەسىن اماناتتاپ باعىپ، ءار جىلى ولارعا پايدا ۇلەستىرىپ وتىردى.
قازىر كووپەراتيۆتە 140 تۇيە بار. تۇيە ءسۇتىنىڭ ءونىم مولشەرى مەن ساپاسىن جوعارىلاتۋ ءۇشىن، نۇرتاي ماشينالاسقان ءسۇت ساۋۋ جابدىعىن ەنگىزدى. ونىمدەردىڭ ساتىلۋ جولىن كەڭەيتۋ ءۇشىن، سەلبەستىك كووپەراتيۆى كاسىپورىندارمەن تۇيە ءسۇتى ونىمدەرىنە تاپسىرىس ارقىلى ساتۋ كەلىسىمىنە قول قويۋمەن بىرگە، ينتەرنەتتە تانىمال كووپەراتيۆ مۇشەلەرىن دە بەلسەنە تاربيەلەدى. وسى كووپەراتيۆ مۇشەلەرى كۋرسقا قاتىناسقاننان كەيىن، قول تەلەفوندارىنان پايدالانىپ تۇيە ءسۇتى ونىمدەرىن تىكە تاراتۋ ارقىلى ساتىپ، كووپەراتيۆتىڭ كىرىسىن ارتتىردى.
3 جىلدىڭ الدىندا كووپەراتيۆ مۇشەسى باقىتگۇل ۇيىندەگى 2 تۇيەسىن سەلبەستىك كووپەراتيۆىنىڭ اماناتتاپ باعىپ - باسقارۋىنا بەرەدى، ءوزى دە كووپەراتيۆكە بارىپ جۇمىس ىستەپ، تىكە تاراتۋ ارقىلى زات ساتادى، ول قازىر جەرگىلىكتى ورىندا تانىمالى ينتەرنەت جۇلدىزىنا اينالدى.
”مەن بۇل ارادا قىزمەت ىستەپ، ايىنا 2000 يۋاننان استام ەڭبەكاقى الامىن، جىل سوڭىندا تاعى 3000 يۋان پايدا ۇلەسىن الامىن. تۇيە ءسۇتى ونىمدەرىن تىكە تاراتۋ ارقىلى ساتۋ وتباسىمىزدىڭ كىرىسىن ارتتىرۋداعى جاڭا تاسىلگە اينالدى“، - دەدى باقىتگۇل قۋانا.
2022 - جىلى سەلبەستىك كووپەراتيۆىنىڭ جىلدىق كىرىسى 400 مىڭ يۋاننان استى. ”سەلبەستىك كووپەراتيۆىنىڭ وسىنداي ناتيجەگە قول جەتكىزەرىن ويلاماپپىن!“، - دەدى نۇرتاي كۇلىپ. قازىر نۇرتاي باستاماشىلدىق رولىن ساۋلەلەندىرىپ، وتباسىلارىن ارالاپ، ءتىپتى دە كوپ قىستاق تۇرعىندارىن تۇيە باعۋعا شابىتتاندىرىپ، تۇيە باعىمشىلىعى تەحنيكاسىن ۇيرەتۋدە. ول بىلاي دەدى: ”ءبىر وتباسىنىڭ بايۋى بايىعاندىق ەمەس، كوپشىلىك بىرگە بايىسا عانا ناعىز بايىعاندىق سول“.