حوشۇت اۋدانى
پارنيكتە زەردەلى جولمەن بالىق باعۋدىڭ جاڭا ٴتاسىلىن اشتى
ەرىكتى ٴتىلشى ياڭ جياجيا، جىڭ ياكۇن 6 ـ ايدىڭ 19 ـ كۇنى حوشۇتتان حابارلايدى. تاياۋدا ٴتىلشى حوشۇت اۋدانى سۋحاتى اۋىلىنىڭ زەردەلى پارنيك جىلىجايىنان سۋ اينالىمى، وتتەگىمەن قامداۋ جانە تەمپەراتۋرانى مەڭگەرۋ جۇيەسى قاتارلى اۆتوماتتى جابدىقتاردىڭ رەتتى جۇمىس جۇرگىزىپ، دوعا ٴپىشىندى بالىق باعۋ شەلەگىن جاساۋ جانە جابدىقتاردى تەڭشەۋ قىزمەتىنىڭ ورىندالىپ بولعانىن، تەحنيكتەردىڭ بالىق ۋىلدىرىعىن جەتىلدىرۋ سەحىندا بالىقتىڭ ٴوسۋ جاعدايىن دەن قويا باقىلاپ تۇرعاندىعىن كوردى.
تاياۋ جىلداردان بەرى حوشۇت اۋدانى سۋحاتى اۋىلى سۋحاتى قىستاعى بايلىق باسىمدىعىن مىقتى ۇستاپ، جىلىجايدا بالىق باعۋ جاڭا ٴتاسىلىن قاراستىرىپ، اۋىل ـ قىستاقتى گۇلدەندىرۋگە ومىرشەڭدىك كۇش ۇستەدى.
سۋحاتى قىستاعىنداعى باعىمشىلىق وتباسى جوۋ شىچۋان بىلاي دەدى: ”بىلتىر ٴبىز پارنيك جىلىجايى جوعارى جيىلىكتەگى باعىمشىلىق الاڭىن قۇردىق، بيىل جاڭادان وتتەگىن كوبەيتۋ، اينالمالى سۋدى ٴبىر جاقتى ەتۋ جانە سايكەستى قۇبىر جەلىسى سياقتى جابدىقتاردى جاڭادان ەنگىزدىك، قازىر بالىق ۋىلدىرىعىن جەتىلدىرۋ سەحىن، تەمپەراتۋرانى اۆتوماتتى مەڭگەرۋ جۇيەسىن سايكەستىردىك، ادام كۇشى وزىندىك قۇنىن ٴونىمدى ۇنەمدەيدى“.
2 جىلدىڭ الدىندا، جوۋ شىچۋان باعىمشىلىق كۋرسى جانە شينجياڭ سىرتىنا بارىپ ۇيرەنۋ، تەكسەرۋ ارقىلى قارجى توپتاپ اۋىلداعى زەردەلى جىلىجاي ىشىندەگى بوس جەردەن پايدالانىپ، 12 ٴىرى تيپتەگى بالىق باعۋ شەلەگىن جانە 3 ۋىلدىرىق جەتىلدىرۋ سەحىن قامتىعان ولشەمدەنگەن وسىزاماندانعان بالىق باعۋ الاڭىن قۇرادى. ۋىلدىرىق جەتىلدىرۋ سەحى قازىر تۇگەلدەي ىسكە قوسىلدى، ٴبىر ايدان كەيىن بالىق ۋىلدىرىعى ۇلكەن شەلەككە اۋىستىرىلىپ باعىلادى، 7 ايدان كەيىن ساتۋعا بولادى، مەجەمەن ٴار شەلەكتەن 4 توننا بالىق شىعادى، جىلدىق كىرىس 800 مىڭ يۋاننان اسادى. ٴداستۇرلى قۇرلىق جەردەگى سۋلى القاپتا باعۋ تاسىلىمەن سالىستىرعاندا، جىلىجايدا بالىق باعۋ جىلىجاي ىشىندەگى قۇرىلعى جابدىقتارىنىڭ ورتانى رەتتەۋ ـ مەڭگەرۋ قابىلەتى ارقىلى اناعۇرلىم جايلى قۇرتشاباق ٴوسۋ ورتاسىن ازىرلەپ، سول ارقىلى جوعارى ٴونىمدى باعىمشىلىقتى جۇزەگە اسىرادى.
”جوعارى جيىلىكتەگى سۋ اينالىمى باعىمشىلىق جۇيەسى كوپ جەر يەلەمەيدى، ورتانى لاستاۋى از، جىلىجاي ىشىندە بالىق باققاندا تەمپەراتۋرانى ساقتاۋ جارعاعى جانە جىلۋمەن قامداۋ قۇبىرى ارقىلى تەمپەراتۋرانى رەتتەپ، قىستاعى ەڭ سۋىق كەزدەردە دە سۋ تەمپەراتۋراسىن 20 سەلتسي گرادۋس اينالاسىندا مەڭگەرۋگە بولادى، بۇل ەرەكشە بالىق باعىمشىلىعىنىڭ تەمپەراتۋرا ماسەلەسىن شەشتى. سونىمەن بىرگە شەلەكتە باعۋ بولمە سىرتىندا باعۋمەن سالىستىرعاندا، ۇقساس كولەمدەگى ٴونىم مولشەرىن 10 ەسەگە جۋىق جوعارىلاتۋعا بولادى“، ـ دەدى جوۋ شىچۋان.