انار بۇلت \ شينجياڭ گازەتىنىڭ ٴتىلشىسى چىن چياڭۋي 7 ـ ايدىڭ 20 ـ كۇنى ۇرىمجىدەن حابارلايدى. مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگىنەن ۇعىسۋىمىزشا، بيىل الدىڭعى جارتى جىلدا شينجياڭ ەلەكتر تورى ساتقان ەلەكتر مولشەرى 104 ميلليارد 202 ميلليون كيلوۆات ساعاتقا جەتىپ، سايكەس مەزگىلدەگىدەن %23.16 ارتىپ، ارتۋ مولشەرى مەملەكەتتىك ەلەكتر تورى شەكتى سەرىكتەستىگىنىڭ 27 ولكە سەرىكتەستىگىندە الدىڭعى ورىندا تۇرعان. بۇل شينجياڭ ەلەكتر تورىنىڭ جارىم جىلدا ساتقان ەلەكتر مولشەرىنىڭ تاريحتا تۇڭعىش رەت 100 ميلليارد كيلوۆات ساعاتتان اسۋى.

ەلەكتر ساتۋ مولشەرى _ جەرگىلىكتى ەكونوميكانىڭ دامۋ جاعدايىن ولشەيتىن ”بارومەتر“. شينجياڭ ەلەكتر تورىنىڭ الدىڭعى جارتى جىلدا ەلەكتر ساتۋ مولشەرىنىڭ كورنەكتى ارتۋى شينجياڭ ەكونوميكاسىنىڭ پارمەندى، باياندى دامۋ بەتالىسىن ايگىلەدى. تۇتاس قوعامدا ساتىلعان ەلەكتر مولشەرىنەن قاراعاندا، شينجياڭنىڭ 2 ـ كاسىپ سالاسىنا ساتىلعان ەلەكتر مولشەرى 68 ميلليارد 252 ميلليون كيلوۆات ساعات بولىپ، سايكەس مەزگىلدەگىدەن 14 ميلليارد 73 ميلليون كيلوۆات ساعات ارتىپ، ارتۋ مولشەرى %25.98 بولىپ، جالپى ساتىلعان ەلەكتر مولشەرىنىڭ %65.5ىن ۇستاپ، شينجياڭ ەلەكتر تورىنىڭ ەلەكتر ساتۋ مولشەرىنىڭ ارتۋىن جەبەيتىن ”پاراۆوزعا“ اينالدى. ناقتى كاسىپ سالالارىنا ساتىلعان ەلەكتر مولشەرىنىڭ ساندى مالىمەتىنەن قاراعاندا، شينجياڭدا ونەركاسىپ، جاتىن ورىن جانە اس ـ سۋ كاسىبى، تولايىم ساتۋ جانە بولشەك ساتۋ كاسىبى، قاتىناس ـ تاسىمال، قامبادا ساقتاۋ جانە پوچتا كاسىبى سىندى 4 ۇلكەن كاسىپ سايكەس مەزگىلدەگىدەن تۇگەلدەي %20تەن استام ارتىپ، جەكە ـ جەكە %26.58، %22.84، %21.08 جانە %20.05كە جەتىپ، دامۋ بەتالىسى ۇزدىكسىز جاقسارعان.

بيىل جىل باسىنان بەرى، كرەمني ماتەريالدارى بازارىنداعى جالپى تۇلعالىق سۇرانىستىڭ كۇشەيۋىنە ىلەسە، شينجياڭنىڭ كرەمني نەگىزدى سالاسىنداعى كاسىپورىنداردىڭ وندىرىسكە پايدالاناتىن ەلەكتر كولەمى قاۋىرت ارتتى. ساناققا نەگىزدەلگەندە، بيىل الدىڭعى جارتى جىلدا مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگىنىڭ ەلەكترمەن قامداۋ وڭىرىندەگى 22 كرەمني نەگىزدى كاسىپورىن جيىنى 16 ميلليارد 512 ميلليون كيلوۆات ساعات ەلەكتر ساتىپ الىپ، سايكەس مەزگىلدەگىدەن 8 ميلليارد 656 ميلليون كيلوۆات ساعات ارتىپ، سايكەس مەزگىلدەگىدەن %110.18 ارتقان.

الدىڭعى جارتى جىلدا شينجياڭ ەلەكتر تورىنىڭ جالپى قىزمەت وتەۋ وبيەكتىسى 2023 ـ جىلدىڭ سوڭىنداعىدان 103 مىڭ 400 كوبەيىپ، جالپى مولشەرى 12 ميلليون 900 مىڭنان استى. مۇنىڭ ىشىندە تۇرعىندار جانە ونەركاسىپ ـ ساۋدامەن شۇعىلداناتىن تۇتىنۋشىلار ٴبىرشاما كوپ بولىپ، جەكە ـ جەكە 65 مىڭ 500 جانە 30 مىڭ 200 تۇتىنۋشى ارتقان.

جىلدام ارتقان ەلەكتردەن پايدالانۋ قاجەتىن قاناعاتتاندىرۋ ٴۇشىن، مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى نازاردى شينجياڭنىڭ كاسىپ سالاسىن شوعىرلاندىرۋ، وڭىرلىك دامۋ، حالىق تۇرمىسىن جاقسارتۋ سياقتى ەكونوميكالىق، قوعامدىق دامۋداعى ٴتۇيىندى سالالارعا شوعىرلاندىرىپ، ەلەكترمەن قامداۋ بويىنشا ەرەن قىزمەت وتەۋ جۇيەسى قۇرىلىسىن ورىستەتتى. الدىڭعى جارتى جىلدا مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى 41 مىڭ 100 وتباسىنداعى تۇرعىنعا جانە شاعىن، ۇساق كاسىپورىن قاريدارلارىنا ”ٴۇش نولدىك“ (نولدىك ەسىك الدىنا بارۋ، نولدىك تەكسەرىپ بەكىتۋ، نولدىك قارجى قوسۋ) قىزمەت وتەپ، ٴىرى، ورتا 3900 كاسىپورىنعا ”ٴۇشتى ۇنەمدەيتىن“ (ۋاقىت ۇنەمدەۋ، كۇش ۇنەمدەۋ، اقشا ۇنەمدەۋ) قىزمەت وتەپ، كاسىپورىنداردىڭ ەلەكتر باسقارۋ وزىندىك قۇنىن 280 ميلليون يۋاننان استام تەجەپ قالدى.