انار بۇلت \ شينجياڭ گازەتىنىڭ ٴتىلشىسى ما ينيڭ 7 ـ ايدىڭ 20 ـ كۇنى ۇرىمجىدەن حابارلايدى. 7 ـ ايدىڭ 18 ـ كۇنى ٴۇرىمجى ديۋوپۋ حالىقارالىق اۋەجايىنىڭ كۇندىك جولاۋشى قابىلداۋ ـ جونەلتۋ مولشەرى تۇڭعىش رەت 100 مىڭ ادامنان (رەت) اسىپ، 101 مىڭ ادامعا (رەت) جەتىپ، قاتىناعاننان بەرگى تاريحتاعى جاڭا دەڭگەيگە جەتكەن.

”بۇل جولعى ساپاردا نەگىزىنەن التاي، ىلە، قاشقار سياقتى جەرلەردەگى ايتۋلى كورىنىس وڭىرلەرىن ساياحاتتايمىز، ەگەر ۋاقىت جار بەرسە، تاعى دا بىرنەشە قالاعا بارىپ، تارتىمدى شينجياڭدى ٴتىپتى دە جاقسى سەزىنگىمىز كەلەدى“. 7 ـ ايدىڭ 19 ـ كۇنى ۇشاقتان جاڭا عانا تۇسكەن بەيجيڭدىق ساياحاتشى ليۋ لۇن وتباسىنداعى 6 ادامنىڭ شينجياڭعا تۇڭعىش رەت ساياحاتتاي كەلگەندىگىن ايتتى.

بيىل جازعى دەمالىس كەزىندە شينجياڭنىڭ ساياحات بازارى بارىنشا گۇلدەنە ٴتۇسىپ، ٴۇرىمجى حالىقارالىق اۋەجايىنىڭ جولاۋشى قابىلداۋ ـ جونەلتۋ مولشەرىندە ۇزدىكسىز جاڭا رەكورد جاراتىلدى. 7 ـ ايدىڭ 1 ـ كۇنى جازعى تاسىمال باستالعاننان بەرى، ٴۇرىمجى حالىقارالىق اۋەجايىنىڭ جولاۋشى قابىلداۋ ـ جونەلتۋ مولشەرى ٴبىر ميلليون 685 مىڭ ادامعا (رەت) جەتىپ، كۇندىك ورتاشا جولاۋشى قابىلداۋ ـ جونەلتۋ مولشەرى 94 مىڭ ادامعا (رەت)، زات، جولداما قابىلداۋ ـ جونەلتۋ مولشەرى 13 مىڭ تونناعا جەتىپ، 10 مىڭ ۇشاق (رەت) ۇشىپ ـ قونىپ، ساياحاتشى قابىلداۋ ـ جونەلتۋ مولشەرى، زات، جولداما قابىلداۋ ـ جونەلتۋ مولشەرى، ۇشىپ ـ قونعان ۇشاقتار سانى (رەت) 2023 ـ جىلعى سول تۇستاعىدان جەكە ـ جەكە %6، %59، %1 ارتتى. مۇنىڭ ىشىندە، ۇشىپ ـ قونعان سيىمدى ۇشاقتار كۇنىنە ورتا ەسەپپەن 120عا (رەت) جەتىپ، كۇنىنە ورتا ەسەپپەن 29 مىڭ جولاۋشى (رەت) جونەلتىپ، جولاۋشىلاردى كۇنىنە ورتا ەسەپپەن قابىلداۋ ـ جونەلتۋ جالپى مولشەرىنىڭ %31ىن يەلەدى.

”قاۋىرت مەزگىلدەگى جولاۋشىلاردىڭ ساپار قاجەتىن قاناعاتتاندىرۋ ٴۇشىن اۋەجاي قىزمەت وتەۋ ساپاسىن جاپپاي جوعارىلاتىپ، ۇشاق ۋاقىت ـ كەزەڭىن جاقسى ورنالاستىرىپ، كەمەلدەندىرىپ، اۋە جەلىسى تورى ورنالاسىمىن جيىلەتتى“. ٴۇرىمجى حالىقارالىق اۋەجايى كاسىپ دامىتۋ ٴبولىمىنىڭ قىزمەتكەرى ۋاڭ تيڭتيڭ بىلاي دەپ تانىستىردى: جازعى تاسىمال كەزىندە ۇرىمجىدەن قاشقارعا، حوتانعا، قۇلجاعا، ت. ب كۇنىنە ورتا ەسەپپەن 15تەن استام ۇشاق (رەت) قاتىنادى؛ بەيجيڭگە، شاڭحايعا، چىڭدۋعا، شي ـ انعا، گۋاڭجوۋعا، ت. ب كۇنىنە ورتا ەسەپپەن 25تەن استام ۇشاق (رەت) قاتىناپ، جولاۋشى سالىستىرماسى ورتا ەسەپپەن %84كە جەتتى، مۇنىڭ ىشىندە، ۇرىمجىدەن چىڭدۋ، جىڭجوۋ، چۇڭچيڭ سياقتى جەرلەرگە قاتىنايتىن ۇشاقتارداعى جولاۋشى سالىستىرماسى %90تەن استامعا جەتتى. حالىقارالىق جاقتا بيىل ۇرىمجىدەن ياجۋاڭ، حۋجاند، باتيا، ماسكەۋ، سامارحان سياقتى 5 حالىقارالىق جولاۋشى تاسىمال اۋە جەلىسىن جاڭادان اشىپ جانە قالپىنا كەلتىرىپ، جولاۋشىلاردىڭ الۋان ٴتۇرلى ساپار قاجەتىن ونان ارى قاناعاتتاندىردى، 7 ـ ايدىڭ 18 ـ كۇنىنە دەيىن جيىنى 263 مىڭ حالىقارالىق جولاۋشى (رەت) قابىلداپ ـ جونەلتىپ، ۇشىپ ـ قونعان ۇشاق 3693كە (رەت) جەتتى.

جولاۋشىلارعا ىستىق ىقىلاستى، جايلى، قولايلى ساپار ورتاسىن ازىرلەۋ ٴۇشىن ٴۇرىمجى حالىقارالىق اۋەجايى ٴبىر قىدىرۋ قىزمەت وتەۋ شارالارىن شىعارىپ، تىڭنان 300 جۇك قول اربا سەپتەپ، جولاۋشىلاردىڭ سول ارادان ـ اق الا سالۋىنا مۇمكىندىك جاسادى؛ جىلجىمالى ەرىكتىلەر قىزمەت وتەۋ تەكشەسى جولاۋشىلارعا ٴار كۇنى تولىق ۋاقىت كەزەڭى بويىنشا قىزمەت وتەدى؛ ەرىكتىلەردى جولاۋشىلاردىڭ ٴجۇرىس ـ تۇرىسىنا جول نۇسقاۋ، ساياحات جونىندە كەڭەس بەرۋ سياقتى قىزمەت وتەۋگە ورنالاستىردى. جولاۋشىلاردىڭ ۇشاققا شىعۋىنا قولايلىلىق جاساۋ ٴۇشىن اۋەجاي T2، T3 اۋەجاي تەرمينالى زالىنداعى ٴىشىنارا جارناما شامدى ساندىعىن كەزەكشى ۇشاق ٴنومىرى، ۇشۋ ـ قونۋ ۋاقىتى، ۇشاققا وتىرۋ اۋزى سياقتى ينفورماتسيالار كورسەتىلەتىن ەكران ەتىپ قايتا جاساپ، جولاۋشىلاردىڭ وزىنە قاجەتتى كەزەكشى ۇشاقتاردىڭ ەڭ جاڭا جاعدايىن بىلۋىنە مۇمكىندىك جاسادى.