انار بۇلت \ شينجياڭ گازەتىنىڭ ٴتىلشىسى لي ياڭ 7 ـ ايدىڭ 23 ـ كۇنى ۇرىمجىدەن حابارلايدى. 7 ـ ايدىڭ 23 ـ كۇنى تۇستەن بۇرىن اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز ۇرىمجىدە شينجياڭعا ەكسكۋرسيالاي، ساپارلاي كەلگەن شىعىس افريكا اعىلشىن ٴتىلى ەلدەرىندەگى ساياسي پارتيالاردىڭ جاس باسشىلار تەكسەرۋ ۇيىرمەسىندەگىلەرمەن كەزدەستى.

ەركىن تۇنياز جۇڭگو كوممۋنيستىك پارتياسى شينجياڭ ۇيعۇر اۆتونوميالى رايوندىق كوميتەتى مەن اۆتونوميالى رايوندىق حالىق ۇكىمەتى اتىنان تەكسەرۋ ۇيىرمەسىندەگىلەردى قىزۋ قارسى الدى.

ول مىنالاردى ٴبىلدىردى: جۇڭگو _ افريكا بارىس ـ كەلىسىنىڭ تاريحى ۇزاق، جۇڭگو _ افريكا دوستىعى سىننان ٴوتىپ، ۋاقىت وتكەن سايىن بەكەمدەلدى. ٴتوراعا شي جينپيڭ مەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، جۇڭگونىڭ شينجياڭى جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، جۇڭحۋا ۇلتى ورتاق تۇلعا تانىمىن بەكەمدەۋ سىندى وسى نەگىزگى جەلىنى مىقتاپ يگەرىپ، حالىقتى وزەك ەتكەن دامۋ يدەياسىن امالياتتا ايگىلەپ، ۇلتتاردىڭ ارالاسۋىن، ىشتەسۋىن، توعىسۋىن جەبەپ، ٴدىننىڭ اقاۋسىز دامۋىنا جەتەكشىلىك ەتىپ، ٴار ۇلت مادەنيەتىنىڭ جۇڭحۋا مادەنيەتى اسىل قازىناسىندا گۇلدەنۋىن، دامۋىن ىلگەرىلەتىپ، جوعارى ساپالى دامۋدى جەدەل ىلگەرىلەتتى، قول جەتكىزگەن تابىستار جۇرتقا ايان. امەريكا سياقتى باتىس ەلدەرىندەگى ٴىشىنارا كۇشتەر ”ۇلتتى“، ”ٴدىندى“، ”ادامدىق ۇقىقتى“ جەلەۋ ەتىپ، شينجياڭعا قيسىنسىز جالا جاپتى، كۇيە جاقتى، مۇنداعى ماقساتى _ ”شينجياڭ ارقىلى جۇڭگونى شاۋجايلاۋ“ قاسكۇنەمدىگىن جۇزەگە اسىرۋ. تەكسەرۋ ۇيىرمەسىنىڭ وسى رەتكى ساپار ارقىلى وبيەكتيۆ، شىنايى شينجياڭدى اناعۇرلىم جاقسى تانيتىندىعىنا سەنەمىن. كوپشىلىكتىڭ كوبىرەك ارالاپ، كوبىرەك كورىپ، شينجياڭدى ىشكەرىلەي ٴتۇسىنۋىن، شينجياڭدى ۇگىتتەۋىن ٴۇمىت ەتەمىن.

تەكسەرۋ ۇيىرمەسىنىڭ باستىعى، ليبەريا ىنتىماق پارتياسىنىڭ مەملەكەتتىك ٴتوراعاسى لۋسەر تاپە مىنانى ٴبىلدىردى: وسى رەتكى جۇڭگو شينجياڭ ساپارىندا تەكسەرۋ ۇيىرمەسىنىڭ ٴاربىر مۇشەسى مول تابىسقا قول جەتكىزدى. گۇلدەنگەن، ورنىقتى، اشىق، سيىسىمدى شينجياڭ تەكسەرۋ ۇيىرمەسىندەگىلەرگە تەرەڭ اسەر قالدىردى. ولار كورگەن ـ بىلگەندەرى مەن ۇيرەنگەن تاجىريبەلەرىن وزدەرىنىڭ ساياسي پارتيالارى مەن مەملەكەتتەرىنە جەتكىزىپ، مەملەكەتتى باسقارۋ مەن ەكونوميكانىڭ دامۋىن جەبەيدى.

جۇڭگو كوممۋنيستىك پارتياسى ورتالىق كوميتەتىنىڭ سىرتپەن بايلانىس جاساۋ بولىمىندەگى قاتىستى جولداستار، اۆتونوميالى رايوننىڭ قاتىستى تاراۋلارىنداعى جاۋاپتى جولداستار كەزدەسۋگە قاتىناستى.