8 ـ ايدىڭ 20 ـ كۇنى شينجياڭ امبەباپ اۆياتسيا شەكتى جاۋاپكەرشىلىك سەرىكتەستىگىنىڭ كەڭىستىك پاتشاسى 350 ۇشاعى كورلا ليچىڭ اۋەجايىنان ۇشىپ، حىجيڭ بايىنبۇلاق اۋەجايىنا كەلىپ قوندى، بۇل حىجيڭ بايىنبۇلاق اۋەجايىندا رەسمي ۇشاق قاتىناعاندىعىن كورسەتەدى.

□ سۋرەتتى ياڭ بين تۇسىرگەن

انار بۇلت \ شينجياڭ گازەتىنىڭ ٴتىلشىسى ما ينيڭ 8 ـ ايدىڭ 20 ـ كۇنى ۇرىمجىدەن حابارلايدى. 8 ـ ايدىڭ 20 ـ كۇنى ساعات 10نان 40 مينۋت وتكەندە، شينجياڭ امبەباپ اۆياتسيا شەكتى جاۋاپكەرشىلىك سەرىكتەستىگىنىڭ كەڭىستىك پاتشاسى 350 ۇشاعى كورلا ليچىڭ اۋەجايىنان ۇشىپ، حىجيڭ بايىنبۇلاق اۋەجايىنا كەلىپ ورنىقتى قوندى، بۇل حىجيڭ بايىنبۇلاق اۋەجايىندا رەسمي ۇشاق قاتىناعاندىعىن كورسەتەدى.

سول كۇنى حىجيڭ بايىنبۇلاق اۋەجايى ”سۋ ەسىكتەن ٴوتۋ“ سالتىن وتكىزىپ، كەزەكشى ۇشاقتىڭ كەلگەنىن قىزۋ قارسى الدى، سونىمەن حىجيڭ اۋدانىندا اۆياتسيا دامۋىنىڭ جاڭا ٴداۋىرى رەسمي باستالدى. وسىعان دەيىن، شينجياڭداعى حالىقتىق اۋەجايلاردىڭ سانى 27گە جەتىپ، بۇكىل ەل بويىنشا حالىقتىق اۋەجاي سانى ەڭ كوپ ورىن بولدى.

شاندۇڭدىق جولاۋشى سۋ يۋە بىلاي دەدى: بۇرىن كورلادان بايىنبۇلاققا دەيىن 6 ساعاتقا جۋىق جول جۇرەتىنبىز، قازىر ۇشاققا وتىرىپ ٴبىر ساعاتتا جەتىپ باراتىن بولدىق، ۋاقىت ۇنەمدەلىپ، كورىكتى شينجياڭنىڭ كوركەم كورىنىسىنەن ٴتىپتى دە جاقسى كوز ايدىن بولۋىمىزعا مۇمكىندىك بولدى.

حىجيڭ بايىنبۇلاق اۋەجايى بايىنعولين موڭعۇل اۆتونوميالى وبلىسى حىجيڭ اۋدانى بايىنبۇلاق مال فەرماسى ۇلانەرگەگە ورنالاسقان، وسى اۋداننىڭ بايىنبۇلاق قالاشىعى ورتالىعىنان ٴتۇزۋ سىزىقتى قاشىقتىعى شامامەن 13.5 كيلومەتر، تاس جولدىڭ ۇزىندىعى شامامەن 16 كيلومەتر، يەلەگەن جەر اۋدانى 174.7 گەكتار. اۋەجايدىڭ تەڭىز دەڭگەيىنەن بيىكتىگى 2506.85 مەتر، جىلدىق ورتاشا اۋا تەمپەراتۋراسى نولدەن تومەن 3.7 سەلتسي گرادۋس، شينجياڭداعى 2 ـ بيىك ٴۇستىرت اۋەجايى. بۇل اۋەجايدىڭ ۇشۋ اۋماعى 4C دارەجەلى A320 جانە B737 قاتارلى ۇقساس تيپتەگى جانە ودان تومەن تيپتەگى ۇشاقتاردىڭ ۇشىپ ـ قونۋىنا بولادى.

حىجيڭ بايىنبۇلاق اۋەجايىنا جالپى 837 ميلليون 610 مىڭ يۋان قارجى قوسىلعان، اۋەجاي تەرمينالىنىڭ اۋدانى 3500 شارشى مەتر، ايروپلان توقتاتۋ ورنىندا التى C تۇردەگى ۇشاق توقتاتۋ ورنى بار، سىرعىما جولدىڭ ۇزىندىعى 3000 مەتر، كەڭدىگى 45 مەتر، جىلىنا 250 مىڭ جولاۋشى (رەت) قابىلداۋ ـ جونەلتۋ، 500 توننا جۇك ـ پوچتا قابىلداۋ ـ جونەلتۋ، 2300 رەت ۇشاق ۇشۋ ـ قونۋ قاجەتىن قاناعاتتاندىرا الادى.

بايىنعولين وبلىسىنداعى ٴتورتىنشى حالىقتىق تاسىمال اۋەجايى رەتىندە، حىجيڭ بايىنبۇلاق اۋەجايىندا رەسمي ۇشاق قاتىناۋى جەرگىلىكتى ورىننىڭ قاتىناس پەن مادەنيەت ـ ساياحاتتى توعىستىرا دامىتۋدى ىلگەرىلەتۋىنە اۋە وتكەلىن سالدى. قازىر حىجيڭ بايىنبۇلاق اۋەجايىندا بايىنبۇلاقتان كورلاعا بارىپ ـ كەلەتىن اۋە جەلىسى اشىلىپ، كۇنىنە ٴبىر كەزەكشى ۇشاق قاتىنايدى. بارعاندا ساعات 9دان 30 مينۋت وتكەندە كورلا ليچىڭ اۋەجايىنان ۇشىپ، ساعات 11دە حىجيڭ بايىنبۇلاق اۋەجايىنا جەتەدى؛ قايتقاندا ساعات 11دەن 30 مينۋت وتكەندە حىجيڭ بايىنبۇلاق اۋەجايىنان ۇشىپ، ساعات 13تە كورلا ليچىڭ اۋەجايىنا جەتەدى. جولاۋشىلار شيەچىڭ، تۇڭچىڭ يلۇڭ، حاڭلۇي زۇڭحىڭ APPى جانە شينجياڭدا قاتىناۋ شاعىن باعدارلاماسى سياقتىلار ارقىلى بەلەت ساتىپ الۋىنا بولادى، جالاڭ بەلەت باعاسى 380 يۋان.

وسىدان كەيىن، حىجيڭ بايىنبۇلاق اۋەجايىندا شاڭحاي، بەيجيڭ سياقتى ەل ىشىندەگى نەگىزگى قالالاردىڭ توراپتىق اۋەجايلارىنىڭ اۋە جەلىسى ىركەس ـ تىركەس اشىلادى.

حىجيڭ بايىنبۇلاق اۋەجايىندا ۇشاق قاتىناۋى حىجيڭ اۋدانىنىڭ ساياحات بايلىعىن اشۋداعى ماڭىزدى تىرەك رەتىندە، حىجيڭ مەن سىرتتىڭ ۋاقىت ـ كەڭىستىك ارالىعىن شىن مانىندە جاقىنداتىپ، حىجيڭنىڭ سىرتپەن قارىم ـ قاتىناس كوپىرىن ورناتتى، بۇل بايىنعولين وبلىسىنىڭ ستەرەولدى قاتىناس ـ تاسىمال جۇيەسىن كەمەلدەندىرىپ، جەرگىلىكتى ورىننىڭ ساياحات كاسىبىنىڭ دارەجەسىن جوعارىلاتۋدى ىلگەرىلەتۋدە ماڭىزدى مانگە يە. اۋەجاي بايىنعولين وبلىستىق ۇكىمەتپەن جانە اۆياتسيا سەرىكتەستىكتەرىمەن بەلسەنە ۇشتاسىپ، قىسقا ارالىقتى تاسىمال، اۆياتسيا مەن ساياحاتتى توعىستىرۋ سياقتى جاقتاردا ىشكەرىلەي سەلبەستىك جاساپ، جەرگىلىكتى ورىننىڭ ەكونوميكالىق، قوعامدىق دامۋىن جەبەيتىن ”اۋە ٴدالىزىن“ قالىپتاستىرادى.