انار بۇلت\شينجياڭ گازەتىنىڭ ٴتىلشىسى ساۋ حۋا 8 ـ ايدىڭ 25 ـ كۇنى ٴپايزاۋاتتان حابارلايدى. ٴپايزاۋات اۋداندىق جاراتىلىستىق بايلىق مەكەمەسىنەن ۇعىسۋىمىزشا، تالاي جىلدىق قۇرىلىس جۇرگىزۋدىڭ ارقاسىندا، شينجياڭ ٴپايزاۋات اۋدانىندا مەملەكەت بويىنشا ەڭ ٴىرى شينمەي ٴوندىرۋ، ساتۋ بازاسىن قۇردى. بيىل ٴپايزاۋات اۋدانىندا شينمەي ەگىلگەن جەر 570 مىڭ مۋعا جەتىپ، ٴونىم مولشەرى 350 مىڭ توننا بولاتىندىعى مەجەلەنىپ، ەگىلۋ كولەمى مەن ٴونىم مولشەرى جەكە ـ جەكە بۇكىل ەلدىڭ %50ىن جانە %70ىن يەلەيدى.

”ٴپايزاۋات اۋدانى ەل ىشىندەگى ەڭ ەرتە شينمەي جەتىلدىرگەن وڭىرلەردىڭ ٴبىرى، بۇل جەردىڭ شينمەيىنىڭ قورەكتىگى مول، مايدا، ٴدامى ٴتىل ۇيىرەدى، تۇتىنۋشىلار ەرەكشە جاقسى كورەدى“. ٴپايزاۋات اۋداندىق جاراتىلىستىق بايلىق مەكەمەسى پارتيا باسشىلىق گرۋپپاسىنىڭ شۋجيى لي ۋانزى تىلشىگە بىلاي دەدى: ٴپايزاۋات اۋدانىنىڭ كۇن نۇرى، جىلۋ بايلىعى مول، ساپالى جەمىس ـ جيدەكتەردى جەتىلدىرەتىن تابيعي ”جىلىجاي“.

سوڭعى جىلدارى شينجياڭ جەمىس ورمانىنىڭ كاسىپ سالاسى ورنالاسىمىن ۇزدىكسىز ساپالىلاندىرىپ، جەرگىلىكتى ەرەكشەلىككە يە، سونداي ـ اق جەرگىلىكتى ورىن جەتىلدىرگەن تاڭداۋلى، جاس جەمىس ورمانى سورتىن بەلسەنە دامىتتى، شينمەي ەگىلگەن جەر اۋدانى مەن ٴونىم مولشەرى ۇزدىكسىز ارتتى. قازىر بۇكىل ەل بويىنشا شامامەن ٴبىر ميلليون مۋ جەرگە شينمەي ەگىلگەن، شينجياڭدا 750 مىڭ مۋ جەردە شينمەي بار، مۇنىڭ ىشىندە ٴپايزاۋات اۋدانىندا 570 مىڭ مۋ بولىپ، بۇكىل ەل بازارىنىڭ تەڭ جارتىسىن يەلەيدى.

ٴپايزاۋات اۋدانى شينمەي كاسىپ سالاسىن دامىتۋدى وراي ەتىپ، شينمەي ٴوندىرۋ، وقىتۋ، زەرتتەۋىن ٴبىر تۇلعالاندىرۋدى، 1 ـ، 2 ـ، 3 ـ كاسىپتەردىڭ توعىسا دامۋىن ۇزدىكسىز ىلگەرىلەتىپ، شينمەي كاسىپ سالاسى تىزبەگىن ۇزدىكسىز زورايتتى. قازىر ٴپايزاۋات اۋدانى گۋاڭدۇڭ _ ٴپايزۋات شينمەي وسى زامانعى كاسىپ سالاسى باقشاسىن قۇرىپ، جيڭدۇڭ، حۇييۋان، گۋاڭدۇڭ بايگويۋان، گۋاڭدۇڭ جۇڭلي، دىحۇي حاۋ ـ ۋ سياقتى ٴبىر توپ ايگىلى كاسىپورىنداردى ەنگىزىپ، جەمىس قاعى، جەمىس قويمالجىڭى، جەمىس شىرىنى، جەمىس شارابى سياقتى 22 ٴتۇرلى جىنتىكتەي مانەرلەنگەن ٴونىمدى زەرتتەپ جاساپ، ٴوندىرىپ، شوعىرلى ەگۋ، ٴۇزۋ، سۇرىپتاۋ، توڭازىتىپ ساقتاۋ، وڭدەۋ، قوراپتاۋ، ساتۋ ٴبىر تۇلعالانعان تۇتاس كاسىپ سالاسى تىزبەگىن العاشقى ادىمدا قالىپتاستىردى. ”اۋداندا 10 مىڭ توننا دارەجەلى، اۋىلدا 1000 توننا دارەجەلى، ورتالىق قىستاقتا 100 توننا دارەجەلى“ جالپى سيىمدىلىعى 300 مىڭ توننالىق سۋىق تىزبەكتى قامبادا ساقتاۋ جۇيەسىن قۇرىپ، شينمەي ساتۋ مەزگىلىن بۇرىنعى 20 كۇندە بازارعا شوعىرلى شىعارۋدان، 6 ايدا توپقا ٴبولىپ بازارعا شىعارۋعا ۇزارتۋ ارقىلى قاۋىرت مەزگىلگە شوعىرلاندىرماي ساتۋعا، ساپاسىنا كەپىلدىك ەتىپ، جاس كۇيىندە ساقتاۋعا مۇمكىندىك جاسادى. بۇدان سىرت، جيڭدۇڭ مەملەكەتتىك 2 ـ زەردەلى قامداۋ تىزبەگى ورتالىعىن قۇرىپ، شينمەي تاسىمالداۋ ارناۋلى ۇشاعىن، سۋىق تىزبەكتى ارناۋلى پويەز جۇرگىزىپ، ”ينتەرنەت جەلىسىندە + جەلىدەن تىسقارى“ ساتۋ سىندى ەكى ساتۋ تورىن تۇلعالادى، بۇكىل ەلدىڭ جەر ـ جەرىندەگى تۇتىنۋشىلار ەڭ تەز بولعاندا 24 ساعاتتا ـ اق جاس كۇيدەگى ٴپايزاۋات شينمەيىن جەي الاتىن بولدى.

لي ۋانزى بىلاي دەپ تانىستىردى: ەگىس كولەمىنىڭ كەڭەيۋىنە بايلانىستى، ٴپايزاۋات شينمەيىنىڭ ٴونىم قۇنى ۇزدىكسىز ارتتى. بيىل ٴپايزاۋات شينمەيىنىڭ 1 ـ كاسىپ ٴونىم قۇنى 6 ميلليارد يۋاننان اسادى، وعان زات جەتكىزۋ، قامبادا ساقتاۋ، مانەرلەۋ سياقتى 2 ـ، 3 ـ كاسىپتەردىڭ ٴونىم قۇنىن قوسقاندا، جالپى ٴونىم قۇنىنىڭ ”10 ميلليارد يۋاندىق“ كولەمگە جەتۋىنەن ٴۇمىت بار.

شينمەي كاسىپ سالاسىنىڭ نەگىزىن اناعۇرلىم بەكەمدەۋ ٴۇشىن، ٴپايزاۋات اۋدانى شينمەيدىڭ ساپاسىنا كۇش سالىپ، ولشەمدەنگەن، جاسىل، ورگانيكالى ەگىمشىلىكتى زور كۇشپەن جالپىلاستىرىپ، 65 ولشەمدەنگەن ۇلگى كورسەتۋ باقشاسىن، 127 شينمەي كاسىپتىك قىستاعىن قۇرىپ، 20 مىڭ مۋ جەردەگى شينمەي ەكسپورت بازاسىن كۋالاندىرىپ، شينمەي ساپاسىن ۇزدىكسىز جوعارىلاتتى.

”ٴپايزاۋات اۋدانى شينمەيدى مەملەكەتتىڭ ٴدارى ـ دارمەك، ازىق ـ تۇلىك ٴبىر تەكتى تىزىمدىگىنە ەنگىزۋگە قۇلشىنىپ، ٴونىم قۇنىنىڭ 10 ميلليارد يۋاندىق ٴىرى وتكەلگە ەرتەرەك جەتۋىن ىلگەرىلەتتى“، ـ دەدى لي ۋانزى.