_ تارباعاتاي ايماعىنىڭ اۋىل شارۋاشىلىعىن جوعارى ساپالى دامىتۋ جاڭا جولىنا نازار

　　□ انار بۇلت \ شينجياڭ گازەتىنىڭ ٴتىلشىسى ٴپاريزات ابدۇل، ٴرايدا

ماقسارى ٴداستۇرلى جۇڭي دارىسىنەن ماقسارى مايىنا، ماقسارى شىرىنىنا، ماقسارى سىركە سۋىنا، ماقسارى بەلوگىنا اينالىپ، جىلىنا شامامەن 500 ميلليون يۋان ٴونىم قۇنىن الا كەلەدى؛

قىزىل بۇرىش ٴبىر شاعىن قالاشىقتى ”100 ميلليون يۋاندىق قالاشىققا“ اينالدىردى ٴارى 1000نان استام شارۋا وتباسىن كاسىپ سالاسىن دامىتۋعا ات سالىسۋعا جەتەكتەدى، شارۋا وتباسى كىرىسىنىڭ تەڭ جارتىسى قىزىل بۇرىشتان كەلدى؛

ٴبىر قوي الىستاعى بەيجيڭ، شاڭحاي، گۋاڭدۇڭ، شاندۇڭعا ساتىلدى ٴارى مالايزيا سياقتى جەرلەرگە ەكسپورت ەتىلدى، جىلدىق ٴونىم قۇنى تۇتاس اۋدان جالپى ٴونىم قۇنىنىڭ %60كە جۋىعىن ۇستادى؛

...

بۇلاردىڭ بارلىعى شينجياڭنىڭ ”استىق قامباسى، ەت قامباسى، ماي كۇبىسى“ دەگەن اتى بار تارباعاتاي ايماعىنان كەلگەن.

سوڭعى جىلدارى تارباعاتاي ايماعى اۆتونوميالى رايوننىڭ ”سەگىز ٴىرى كاسىپ سالاسى شوعىرىنا“ تۋرالانىپ، بايلىق باسىمدىعىن ساۋلەلەندىرىپ، ورىن تۇراقتاندىرۋ بەتالىسىن ٴداپ باسىپ تاۋىپ، سالىستىرمالى باسىمدىعى كورنەكتى، وڭىرلىك ەرەكشەلىگى ايقىن، جەتەكتەۋ قۋاتى كۇشتى اۋىل شارۋاشىلىعىندا ەرەكشە باسىمدىققا يە كاسىپ سالالارىنان ٴبىر توبىن عىلمي ورنالاستىرىپ دامىتتى، ٴبيداي، جۇگەرى، ماقتا، مايلى داقىل، كوكونىس، ەرەكشە جەمىس ورمانى، ەتتى سيىر، ەتتى قوي، ٴسۇت، ٴۇي قۇستارى، ساپالى جەم ـ ٴشوپ، شوشقا، جىلقى سىندى 13 كاسىپ سالاسى تەحنيكا جۇيەسىن ۇيىمداستىرىپ قۇرىپ، اۋىل شارۋاشىلىعىن دامىتۋدىڭ ”ەرەكشە“ ٴارى ”ساپالى“ جاڭا جولىن تاۋىپ شىقتى.

8 ـ ايدىڭ 12 ـ كۇنىنەن 17 ـ كۇنىنە دەيىن، 2024 ـ جىلعى اۆتونوميالى رايوننىڭ جوعارى ساپالى دامۋ جونىندە تەكسەرۋ ـ زەرتتەۋ ساپارى نەگىزگى تاقىرىپتىق تىلشىلىك ۇيىرمەسى تارباعاتايعا بارىپ، اۋىل شارۋاشىلىعىنىڭ ەرەكشە، باسىمدىققا يە كاسىپ سالالارىنىڭ استارىنداعى ”ەرەكشە قۇپيا سيفرىنا“ ٴۇڭىلدى.

　　ورىن تۇراقتاندىرىپ، وڭىرلىك قۇندى اشتى

تارباعاتايدا وتانشىل قايراتكەر باسباي شولاقتىڭ اتىمەن اتالعان باسباي قويىن جۇرتتىڭ ٴبارى بىلەدى.

باسباي قويى _ جەرگىلىكتى اسىل تۇقىمدى قوي مەن بارلىق تاۋىنداعى جابايى ارقاردى بۋدانداستىرۋ ارقىلى جەتىلدىرىلگەن تۇقىم، شىمىر، سۋىققا ٴتوزىمدى، قۇنارسىز شوپكە شىدامدى، ەتى مول شىعادى، ەت ساپاسى جاقسى. 1989 ـ جىلى اۆتونوميالى رايون ”باسباي قويى“ دەپ رەسمي ات قويعاننان قازىرگە دەيىن ”شاعانتوعاي باسباي قويى“ جاعراپيالىق بەلگى كۋالىگى ساۋدا ماركاسىنا يە بولىپ، مەملەكەتتىك ايگىلى، ەرەكشە، ساپالى، جاڭا اۋىل شارۋاشىلىق ونىمدەرى تىزىمدىگىنە ٴساتتى ەنگىزىلدى.

”جۇڭگو باسباي قوي مەكەنى“ اتانعان شاعانتوعاي اۋدانىنا بارعانىمىزدا، شينجياڭ شەليگاي مال شارۋاشىلىق شەكتى جاۋاپكەرشىلىك سەرىكتەستىگىنىڭ ٴوندىرىس سەحىندا قاربالاس جۇمىس ٴجۇرىلىپ جاتقانىن كوردىك: ٴبىر جاعىنان، رەتتى دە تازا كيىنگەن قىزمەتكەرلەر قوي ەتىن بۇزۋمەن قاربالاس بولسا، ەندى ٴبىر جاعىنان، اۋاسىز قوراپتالعان باسباي قويى تارتۋ قورابىنا سالىنىپ، بۇكىل ەلدىڭ جەر ـ جەرىنە جونەلتىلدى.

بيىل 6 ـ ايدا 2 ـ كەزەكتى شينجياڭ باسباي قويى كاسىپ سالاسىن دامىتۋ اڭگىمە ٴماجىلىسى جانە ساۋداعا تاپسىرىس بەرۋ ماجىلىسىندە باسباي قويىنا كەلىسىم جاسالعان جالپى ساۋدا سوماسى 85 ميلليون يۋانعا جەتتى. ”10 كاسىپورىن تاپسىرىس بەرىپ بىزدەن باسباي قويىن ساتىپ الدى، جالپى سوماسى 70 ميلليون يۋاننان استى“، ـ دەدى شينجياڭ شەليگاي مال شارۋاشىلىق شەكتى جاۋاپكەرشىلىك سەرىكتەستىگىنىڭ القا باستىعى داي زوچۋان.

قازىر باسباي قويى كاسىپ سالاسى باعىمشىلىق، ساتىپ الۋ، سويۋ، وڭدەۋ، ساقتاۋ، تاسىمالداۋ جانە ساتۋ شوعىرلى ٴبىر تۇلعالانعان كاسىپ سالاسى تىزبەگىن قالىپتاستىردى. شاعانتوعاي اۋدانىندا باسباي قويى باعىمشىلىعىنان ۇلگى كورسەتەتىن 4 اۋىل ـ قالاشىق، باعىمشىلىقتان ۇلگى كورسەتەتىن 16 قىستاق بار، اۋدان بويىنشا باسباي قويى باعىمشىلىعىمەن شۇعىلداناتىن وتباسى 2462گە جەتتى، باسباي قويىنىڭ ەڭ جوعارى باعىمداعى سانى 700 مىڭنان استى، جىلىنا 340 مىڭنان استام قوي قورادان شىعارىلادى، جىلىنا 80 مىڭعا جۋىق قوي سويىلىپ ساتىلادى، ٴونىم قۇنى 200 ميلليون يۋاننان اسادى، بۇل تۇتاس اۋداننىڭ مال شارۋاشىلىق جالپى ٴونىم قۇنىنىڭ %60كە جۋىعىن ۇستايدى.

باسباي قويى كاسىپ سالاسىنىڭ دامۋى تەك تارباعاتاي ايماعىنىڭ اۋىل شارۋاشىلىعىنىڭ ەرەكشە، باسىمدىققا يە كاسىپ سالاسىن دامىتۋىنىڭ ٴبىر ىقشام كورىنىسى.

”تارباعاتايدىڭ جاعراپيالىق كليمات شارت ـ جاعدايى ۇيلەسىمدى، سۋ، توپىراق، كۇن نۇرى، جىلۋ بايلىعى مول، ونىڭ ۇستىنە جەم ـ ٴشوپ باسىمدىعى بار، ۇيرەك باعۋعا ۇيلەسەدى“. شينجياڭ تارباعاتاي ٴتۇيىندى وركەندەتۋ، ەسىك اشۋ سىناق رايونىنا ورنالاسقان بايفۋشىڭ ەگىن، مال شارۋاشىلىعىن دامىتۋ شەكتى سەرىكتەستىگىندە سەرىكتەستىكتىڭ ورىنباسار باس ديرەكتورى ليۋ لانگۋاڭ ”گاگالاعان“ اسىل تۇقىمدى ۇيرەكتى نۇسقاپ تۇرىپ تىلشىگە بىلاي دەدى: ”قازىر سەرىكتەستىگىمىز 3 اسىل تۇقىمدى ۇيرەك فەرماسىن قۇردى، جيىنى 101 ۇيرەك قوراسى بار، ٴار ۇيرەك قوراسىندا 5000 ۇيرەك باعىلادى، كۇنىنە 330 مىڭ جۇمىرتقا تۋادى. ۇيرەك جۇمىرتقاسى جەرگىلىكتى ورىندا ساتىلۋدان سىرت، شاندۇڭ، سىچۋان سياقتى جەرلەرگە دە ساتىلادى“.

ساۋان قالاسى مول سەلەن بايلىعى باسىمدىعىن تياناق ەتىپ، بۇكىل ەلدەگى ”ٴبىر قىستاقتا ٴبىر ٴونىم بولۋدان“ ۇلگى كورسەتەتىن قىستاق ـ قالاشىق _ ۇلانۇس قالاشىعىندا ەرەكشە كاسىپ سالالارىن جەتىلدىردى، زورايتتى. ”قازىر بۇكىل قالاشىقتا ەگىلگەن جەر اۋدانى 18 مىڭ مۋ بولىپ، 5000 مۋ جەرگە ورگانيكالىق سەلەن قۇرامى مول كۇرىش پەن قارا استىق كۋالاندىرۋىنا يە بولدى“. ۇلانۇس قالاشىعى پارتكومىنىڭ شۋجيى لەي جۇن بىلاي دەدى: ”ەندىگى جەردە ٴبىز سەلەن قۇرامى مول كوكونىس، استىق، جەمىس ـ جيدەك جانە ەرەكشە ەگىمشىلىكتى كۇش سالا دامىتىپ، اۋىل شارۋاشىلىق ونىمدەرىن وڭدەۋدى ٴتۇيىندى تۇردە دامىتىپ، الاۋسىن قالاشىعىنىڭ اۋىل شارۋاشىلىعى سەلەن ارقىلى گۇلدەنۋ، اۋىل ـ قىستاق سەلەن ارقىلى كورىكتەنۋ، شارۋالار سەلەن ارقىلى بايۋ نىساناسىن جۇزەگە اسىرامىز“.

　　باستاماشىلاردى جەتىلدىرىپ، كاسىپ سالاسىنىڭ دارەجەسىن جوعارىلاتۋعا جەتەكشىلىك ەتتى

تارباعاتايدا جۇرتتىڭ ٴبارى بىلەتىن تاعى ماقسارى بار.

شاعانتوعاي اۋدانى مەملەكەت بويىنشا ماقسارى ەگىلەتىن ٴىرى اۋدان، ماقسارى ەگىلگەن جەر اۋدانى 150 مىڭ مۋدان اسادى. سوڭعى جىلدارى شاعانتوعاي اۋدانى ىلگەرىندى ـ كەيىندى 30دان استام ماقسارى جىنتىكتەي وڭدەۋ كاسىپورنىن ەنگىزىپ، 10 نەشە ماقسارى كاسىپ سالاسى سەلبەستىك كووپەراتيۆىن قۇرىپ، ”كاسىپورىن + بازا + سەلبەستىك كووپەراتيۆى + شارۋا وتباسى“ سىندى ماقسارى ەگۋ، وڭدەۋ ٴبىر تۇلعالانعان كاسىپ سالاسىن دامىتۋ ۇلگىسىن قالىپتاستىردى.

ماقسارىنى جىنتىكتەي وڭدەۋمەن شۇعىلدانعانىنا 12 جىل بولعان شينجياڭ تيانديڭ ماقسارى مايى شەكتى سەرىكتەستىگى _ اۆتونوميالى رايوننىڭ اۋىل شارۋاشىلىعىن كاسىپ سالالاندىرۋداعى ٴتۇيىندى باستاماشى كاسىپورنى، سەرىكتەستىك 2016 ـ جىلى ماقسارى ۇرىعىن سۋىتىپ ماي تارتۋ ٴادىسى مەن ماقسارى مايىن سۇرىپتاۋ ادىسىنەن قامال الىپ، ەل ىشىندە وسى سالاداعى اقتاڭداقتى تولتىرىپ، ەرەكشە ماقسارى مايىن سۋىتىپ سىعىپ توڭازىتۋ تىزبەگى تەحنولوگياسىن ٴساتتى زەرتتەپ اشىپ، ”تىكەلەي ىشۋگە“ بولاتىن ماقسارى مايىن ٴوندىرىپ، جوعارى دەڭگەيدەگى ماقسارى مايى ٴوندىرىسىنىڭ جاڭا سالاسىن اشتى.

شينجياڭ جينچىڭ حىڭدا ساۋدا شەكتى سەرىكتەستىگى دە جەرگىلىكتى ورىنداعى ماقسارى ونىمدەرىن وندىرۋمەن شۇعىلداناتىن كاسىپورىن، سىعۋ، سۇرىپتاۋ، توڭازىتۋ تىزبەگى جانە قۇمىراعا قۇيۋ ٴبىر تۇلعالانعان جالپىلىق ٴوندىرىس سەحىن قۇردى. بىلتىر بۇل سەرىكتەستىك ماقسارى سىركە سۋىن جىنتىكتەي وڭدەۋ ٴوندىرىس جەلىسىنىڭ، ماقسارى شىرىنى ٴوندىرىس جەلىسىنىڭ ٴارقايسىسىنان بىردەن جاڭادان قۇردى، بيىل 10 ـ ايدا وندىرىسكە قوسىلعاننان كەيىن، جىلىنا 5000 توننا ماقسارى ۇرىعىن قورىتادى، بۇل تۇتاس اۋدانداعى ماقسارى ۇرىعى ٴونىم مولشەرىنىڭ %35 اينالاسىندا. بيىل 5 ـ ايدا بۇل سەرىكتەستىك شىحىزى داشۋەسىمەن تەرەڭ سەلبەستىك نيەتىنە كەلىپ، اسپيرانتتار قىزمەت پۋنكتىن قۇردى.

”2023 ـ جىلى شاعانتوعاي اۋدانىنىڭ ماقسارى كاسىپ سالاسىنىڭ جالپى ٴونىم قۇنى شامامەن 500 ميلليون يۋان بولدى. ماقسارى كاسىپ سالاسىنىڭ جەبەۋىندە، شاعانتوعاي اۋدانى ماقسارى وسى زامانعى عىلىم ـ تەحنيكا كاسىپ سالاسى باقشاسىن قۇردى، قازىر 10 نەشە كاسىپورىن ىرگە تەپتى، بۇل، ٴسوز جوق، جەرگىلىكتى ماقسارى كاسىپ سالاسىنىڭ دامۋىن تىڭ ساتىعا كوتەرەدى“، ـ دەدى شاعانتوعاي اۋداندىق اۋىل شارۋاشىلىعى، اۋىل ـ قىستاق مەكەمەسىنىڭ باستىعى گۇڭ دىلي.

اۋىل شارۋاشىلىعىنىڭ ەرەكشە باسىمدىققا يە كاسىپ سالاسىن دامىتۋ بارىسىندا باستاماشى كاسىپورىندار _ كاسىپ سالاسىنىڭ ۇلگىسى جانە جەتەكشىسى عانا ەمەس، ونان دا ماڭىزدىسى، كاسىپ سالاسىنىڭ دارەجەسىن جوعارىلاتۋدىڭ ماڭىزدى جەبەۋشىسى.

”ەگۋ، ٴوندىرۋ، ساتۋدى ٴبىر تۇلعالاندىرۋ“ سىندى دامۋ جولىمەن جۇرگەن تولى تيانشان شياۋگى اۋىل شارۋاشىلىق عىلىم ـ تەحنيكا شەكتى سەرىكتەستىگى نوقاتتى، قارا ٴبيدايدى شيكىزات ەتىپ، نوقات سۋسىن ۇنتاعى جەلىلەس ونىمدەرىن، ۇگىلمەلى بۇرشاق جەلىلەس ونىمدەرىن، قارا استىق جەلىلەس ونىمدەرىن، ورگانيكالىق قارا ٴبيداي تولىق ۇنتاعى جەلىلەس ونىمدەرىن، تورت جەلىلەس ونىمدەرىن قامتىعان 40تان استام تۇردەگى ٴونىم ٴوندىرىپ، شينجياڭنىڭ جەرگىلىكتى بازارىنىڭ قىزۋ قارسى الۋىنا يە بولىپ قانا قويماي، الىستاعى بەيجيڭ، لياۋنيڭ سياقتى جەرلەرگە دە ساتتى.

ٴدوربىلجىن اۋدانىنىڭ قاراقات ەگۋ باسىمدىعىنا سۇيەنىپ، شينجياڭ تارباعاتاي ٴتۇيىندى وركەندەتۋ، ەسىك اشۋ سىناق رايونى ٴدوربىلجىن (بيڭتۋان مەن جەرگىلىكتى ورىن، لياۋياڭ) ونەركاسىپ باقشا رايونىنا ورنالاسقان شينجياڭ لۇڭحۇييۋان ٴدارى ـ دارمەك شەكتى سەرىكتەستىگى ساعاتىنا 2 توننادان جوعارى قاراقات جاس جەمىسىن ٴبىر جاقتى ەتەتىن ٴوندىرىس جەلىسىن قۇرىپ، جىلدىق ٴونىم قۇنى 200 ميلليون يۋاننان جوعارى بولدى.

”قازىر تارباعاتاي ايماعىندا اۋىل شارۋاشىلىعىن كاسىپ سالالاندىرۋداعى باستاماشى كاسىپورىندار 316عا جەتتى، باستاماشى كاسىپورىنداردىڭ جەتەكتەۋى، ٴسوز جوق، اۋىل شارۋاشىلىعىنىڭ ەرەكشە، باسىمدىققا يە كاسىپ سالالارىنىڭ دامۋىنا پارمەندى قوزعاۋشى كۇش ۇستەيدى“، ـ دەدى تارباعاتاي ايماقتىق اۋىل شارۋاشىلىعى، اۋىل ـ قىستاق مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى لي جيانجۇن.

　　ايگىلى ماركا جاراتىپ، بازاردىڭ باسەكەلىك قۋاتىن ارتتىردى

8 ـ ايدىڭ 20 ـ كۇنى ”يۇيحۇي تۇڭشيڭ“ دوۋيىن تىكە تاراتۋ بولمەسىندە ”شي ـ انجياۋ“ ماركالى ەرەكشە اشتى لازىجيدىڭ، قىزىل بۇرىش قويمالجىڭىنىڭ ٴبىر ايعا جۋىق ساتىلىم مولشەرى 700 تاپسىرىستان استى.

”شي ـ انجياۋ“ شينجياڭ گۋاڭحايجي اۋىل شارۋاشىلىق عىلىم ـ تەحنيكا دامىتۋ شەكتى سەرىكتەستىگىنىڭ ”جۇڭگو قىزىل بۇرىش مەكەنى“ _ ساۋان قالاسى انجىحاي قالاشىعىنىڭ قىزىل بۇرىشىنا سۇيەنىپ جاراتقان ماركاسى.

”بيىل ساۋان قالاسى 48 مىڭ 300 مۋ جەرگە قىزىل بۇرىش ەكتى، مۇنىڭ ىشىندە انجىحاي قالاشىعى 40 مىڭ مۋ جەرگە قىزىل بۇرىش ەكتى، ۇشكىل بۇرىش، جالپاق قىزىل بۇرىش، كوكونىس قىزىل بۇرىش، تۇمشالامالى بۇرىش سىندى 4 ۇلكەن ٴتۇر بويىنشا 20 نەشە ٴتۇرلى بۇرىش ەكتى، جىلىنا 20 مىڭ توننادان استام قۇرعاق بۇرىش ٴوندىرىپ، %80تەن استامىن شانشي، حۋنان سياقتى ەل ىشىندەگى قىزىل بۇرىش وڭدەۋ، جيناۋ ـ جونەلتۋ ٴىرى ولكەلەرىنە ساتتى، ٴتىپتى، الىستاعى كورەيا، جاپونيا، اۆستراليا سياقتى شەتەل بازارلارىنا دا ساتتى“. انجىحاي قىزىل بۇرىشىن تىلگە العاندا، ساۋان قالالىق اۋىل شارۋاشىلىعى، اۋىل ـ قىستاق مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى لياۋ حايلۇڭنىڭ اۋزى ـ اۋزىنا تيگەن جوق.

لياۋ حايلۇڭ بىلاي دەدى: قىزىل بۇرىش ەگۋگە سۇيەنىپ، انجىحاي قالاشىعى العاشقى وڭدەۋدەن جىنتىكتەي وڭدەۋگە دەيىنگى 7 تيجارات تۇلعاسىن قالىپتاستىردى، شينجياڭ گۋاڭحايجي اۋىل شارۋاشىلىق عىلىم ـ تەحنيكاسىن دامىتۋ شەكتى سەرىكتەستىگى سولاردىڭ ٴبىرى.

”ساپا ارقىلى اۋىل شارۋاشىلىعىن گۇلدەندىرۋ، ماركا ارقىلى اۋىل شارۋاشىلىعىن كۇشەيتۋ“. شينجياڭ گۋاڭحايجي اۋىل شارۋاشىلىق عىلىم ـ تەحنيكاسىن دامىتۋ شەكتى سەرىكتەستىگىنىڭ جاۋاپتىسى شيە گۋاڭجوۋ بىلاي دەپ تانىستىردى: سەرىكتەستىك قۇرىلعان العاشقى مەزگىلدە ايگىلى ماركا قۇرىلىسىن جوسپارلاپ، وسى ارقىلى ٴونىمنىڭ تانىمالدىعى مەن ىقپال كۇشىن جوعارىلاتىپ، بازاردىڭ باسەكەلىك قۋاتىن كۇشەيتتى. قازىر سەرىكتەستىك وندىرگەن ”شي ـ انجياۋ“ ماركالى قىزىل بۇرىش ۇنتاعى، قىزىل بۇرىش قويمالجىڭى، وتتىقتى قازان ماتەريالدارى، ميفىن قويمالجىڭى، قىزىل بۇرىش بولىگى سياقتى ونىمدەر 40 نەشە تۇرگە جەتتى. بيىل قازىرگە دەيىن ساتىلۋ سوماسى 100 ميلليون يۋاننان استى. بۇدان سىرت، سەرىكتەستىك جيىنى 2 ميلليون يۋان زەرتتەۋ ـ اشۋ قاراجاتىن قوسىپ، لازىجي، داپانجي دامدەندىرگىشى، شينجياڭ چاۋميفىنى سياقتى 10 جاڭا ٴونىمدى زەرتتەپ جاسادى.

”شي ـ انجياۋدان“ سىرت، اتى اجەپتاۋىر ايگىلى اۋىل شارۋاشىلىق ونىمدەرى ماركاسىنان تاعى ”تايۇي“، ”چۋلۇي“، ”گۋنياڭجۇي“، ”جانمۋ“، ”جياڭچۇي ازىق ـ تۇلىكتەرى“، ”يمانشۋ جۋاڭيۋان ياڭ پوپو ازىق ـ تۇلىك دۇكەنى“، ”توبالاڭ“، ”گوجياڭحۋ“، ”تيانجۇن“ بار...

شاۋەشەك قالاسىنداعى جاڭ شينشىڭ شەكىلدەۋىك قاربىز ۇرىعىن وڭدەۋ كاسىپتىك سەلبەستىك كووپەراتيۆى 2011 ـ جىلى ”تايۇي“ ساۋدا ماركاسىن تىركەۋگە الدىرىپ، ”سەلبەستىك كووپەراتيۆى + بازا + شارۋا وتباسى + سوڭعى بۋىن ساۋدا ساراي، ەرەن بازار + جەلىدەگى ساۋدا بازارى“ سىندى شارۋاشىلىق جۇرگىزۋ ۇلگىسىن ورناتىپ، جىلىنا جەرگىلىكتى ورىندا قۋىرىلعان شەكىلدەۋىك قاربىز ۇرىعى، شەكىلدەۋىك سياقتى 20 تۇردەن استام ٴونىم ساتتى، جىلدىق ٴونىم قۇنى 30 ميلليون يۋان بولدى.

ايگىلى ماركا مەن ينتەرنەتتىڭ دەمەۋىندە، تارباعاتايدىڭ بۇكىل ەلدەگى ٴىرى قالالارعا ساتىلاتىن، ٴتىپتى، مەملەكەت قاقپاسىنان شىعاتىن ەرەكشە ونىمدەرى بارعان سايىن كوبەيدى.

”بيىل الدىڭعى جارتى جىلدا سەرىكتەستىكتىڭ ەلەكتروندى ساۋدا ساتىلىم سوماسى 3 ميلليون يۋاننان استى، بۇل بىلتىرعى سول تۇستاعىنىڭ 10 ەسەسىنەن كوپ. كەلەسى قادامدا سەرىكتەستىك ساۋان داپانجيىن ينتەرنەت جەلىسىندە ٴتۇيىندى تۇردە ساتىلاتىن ونىمدەر قاتارىنا ەنگىزۋدى جوسپارلاپ وتىر“، ـ دەدى شيە گۋاڭجوۋ.

قازىر شاۋەشەك قالاسى جياڭچۇي ازىق ـ تۇلىك دۇكەنىنىڭ ىرىمشىك دورباسى دا تىكە تاراتىلىمدا زات ساتۋدا ٴوتىمدى ونىمدەردىڭ بىرىنە اينالدى. ”وسى 2 جىلدا ’جياڭچۇي ازىق ـ تۇلىكتەرى‘ سىندى ماركانى تانيتىندار بارعان سايىن كوبەيدى، ينتەرنەتكە سۇيەنىپ قازىر جەلىدەگى تاپسىرىس ساتىلىم جالپى سوماسىنىڭ %30ىن يەلەدى“، ـ دەدى شاۋەشەك قالاسى جياڭچۇي ازىق ـ تۇلىك دۇكەنىنىڭ جاۋاپتىسى ۋاڭ حۇيپىڭ.