انار بۇلت \ شينجياڭ گازەتىنىڭ ٴتىلشىسى گى يوۋجۇن، ەرىكتى ٴتىلشى جۇي جياحۇي

10 ـ ايدىڭ 12 ـ كۇنى جەمسارى اۋدانى دايوۋ قالاشىعى سانجى جيۋلۇڭشان بيو عىلىم ـ تەحنيكا شەكتى سەرىكتەستىگىندەگى قوي قارىن ساڭىراۋقۇلاعى ەگىمشىلىگى جىلىجايىندا بىرنەشە كۇننىڭ الدىندا كوكپەڭبەك بولىپ تۇرعان چيڭساي، يوۋمايساي سياقتى كوكونىستەر جيناپ الىنىپ، ساڭىراۋقۇلاق ەگەتىن ەگىنشىلەر جەر تەگىستەپ، قوي قارىن ساڭىراۋقۇلاعى تۇقىمىن ەگۋمەن قاربالاس بولىپ جاتتى. بۇرىن كىلەڭ قوي قارىن ساڭىراۋقۇلاعى ەگىلەتىن جىلىجايدا ساڭىراۋقۇلاق پەن كوكونىس كەزەكپەن ەگىلدى، بۇل ساڭىراۋقۇلاق ەگەتىن ەگىنشىلەردى اناعۇرلىم كوپ پايداعا كەنەلتتى.

”وسى 2 جىلدا ٴبىز جەمسارى اۋدانىنداعى بۇرىن بار قۇرىلعىلى اۋىل شارۋاشىلىعى جىلىجايىنان پايدالانىپ، قوي قارىن ساڭىراۋقۇلاعى سىندى وسى باعالى ازىقتىق ساڭىراۋقۇلاق تۇقىمىن ەنگىزىپ ەگىپ، اسا تاماشا تابىسقا قول جەتكىزدىك، ايتسە دە جاڭا ماسەلەلەر دە جارىققا شىقتى. ٴدال ماسەلەنى شەشۋ بارىسىندا ٴبىز ساڭىراۋقۇلاق پەن كوكونىستى كەزەكپەن ەگۋ سىندى وسى ٴوندىرىس ۇلگىسىن تاپتىق“، ـ دەدى سانجى جيۋلۇڭشان بيو عىلىم ـ تەحنيكا شەكتى سەرىكتەستىگىنىڭ جاۋاپتىسى سۇڭ شياڭگو.

سۇڭ شياڭگو بىلاي دەپ تانىستىردى: بۇرىن جىلىجايدا كىلەڭ قوي قارىن ساڭىراۋقۇلاعىن ەگۋ ۇلگىسى بويىنشا ٴار جىلى 10 ـ ايدان كەلەر جىلى 4 ـ ايعا دەيىن 2 رەت قوي قارىن ساڭىراۋقۇلاعى ەگىلەدى دە، باسقا كەزدەردە جىلىجاي بەكەر تۇراتىن، جەردەن پايدالانۋ سالىستىرماسى ٴبىرشاما تومەن، سونىمەن بىرگە توپىراقتا زياندى جاندىك، دەرت ـ دەربەز وڭاي جينالاتىن. وسى سەبەپتى سەرىكتەستىك ساڭىراۋقۇلاق پەن كوكونىستى كەزەكپەن ەگۋ سىندى وسى جاڭاشا ەگۋ ۇلگىسىن سىناق ەتۋدى ۇيعاردى. وسى ۇلگى بويىنشا ٴار جىلى 4 ـ ايدان 10 ـ ايعا دەيىن جىلىجايدا چيڭساي، يوۋمايساي، تۇڭحاۋ سياقتى كوكونىستەردى ەگىپ، 9 ـ ايدىڭ سوڭىندا كوكونىستەردى جيناپ بولعاننان كەيىن قوي قارىن ساڭىراۋقۇلاعىن ەگىپ، ٴبىر جىلىجايدان كوپ پايدالانۋدى جۇزەگە اسىردى.

”ساڭىراۋقۇلاق پەن كوكونىستى كەزەكپەن ەگۋ ۇلگىسىن قولدانعاننان كەيىن، كوكونىس ەگىمشىلىگى قوي قارىن ساڭىراۋقۇلاعىنا زياندى باكتەريالاردى ٴونىمدى تەجەپ، قوي قارىن ساڭىراۋقۇلاعى ەگىمشىلىگى توپىراقتىڭ قۇنارلىلىعىن رەتتەپ، ٴبىر جولدا ەكەۋىنە دە پايدالى بولۋدى جۇزەگە اسىردى“. سۇڭ شياڭگو: ”2023 ـ جىلى سەرىكتەستىگىمىزدىڭ ساڭىراۋقۇلاق پەن كوكونىستى كەزەكپەن ەگۋ ۇلگىسى ارقىلى ارتقان كىرىسى شامامەن ٴبىر ميلليون يۋان بولدى“، ـ دەدى.

جەمسارى اۋدانىنىڭ دايوۋ قالاشىعىندا ساڭىراۋقۇلاق پەن كوكونىستى كەزەكپەن ەگۋدى سىناق ەتكەن ەگىمشىلەردەن ٴبىرتالايى بار، دايوۋ قالاشىعى دايوۋ قىستاعىنداعى ساڭىراۋقۇلاق ەگەتىن ەگىنشى چىن يان، انە، سولاردىڭ ٴبىرى.

بىلتىر 10 ـ ايدا چىن يان 2 جىلىجايعا قوي قارىن ساڭىراۋقۇلاعىن ەكتى. بيىل 4 ـ ايدا قوي قارىن ساڭىراۋقۇلاعى جيناپ الىنعاننان كەيىن ول جىلىجايدا چيڭساي جانە اق بايساي سياقتى كوكونىستەردى ەگىپ، ٴار جىلىجايدىڭ كىرىسى 8000 يۋان دا 12 مىڭ يۋان ارتتى.

ساڭىراۋقۇلاق پەن كوكونىستى كەزەكپەن ەگۋ ۇلگىسىنىڭ ٴساتتى ٴجۇرىلۋىن قامتاماسىز ەتۋ ٴۇشىن جەمسارى اۋدانى اۋىل شارۋاشىلىعى تەحنيكتەرىن ٴبىرىنشى شەپتى ارالاپ وندىرىسكە جەتەكشىلىك ەتۋگە جانە تەحنيكالىق قىزمەت وتەۋگە، ەگىنشىلەردىڭ ەگىمشىلىك قۇرىلىمىن جانە ەگىمشىلىك تۇقىمىن ساپالىلاندىرۋعا كومەكتەسۋگە، ەگىمشىلىك بارىسىندا جولىققان تەحنيكالىق قيىن ماسەلەلەرىن دەر كەزىندە شەشۋىنە كومەكتەسۋگە ۇيىمداستىردى.

ۇعىسۋعا قاراعاندا، 2023 ـ جىلدان بەرى فۋجياننىڭ شينجياڭعا كومەكتەسۋ شيامىن بولىمشە قولباسشىلىق شتابى ىلگەرىندى ـ كەيىندى شينجياڭعا كومەكتەسۋ قارجىسىنان 22 ميلليون يۋان شىعارىپ، قوي قارىن ساڭىراۋقۇلاعى كاسىپ سالاسىنىڭ جەرگىلىكتى ورىندا دامۋىن ىلگەرىلەتۋگە جەتەكشىلىك ەتكەن. قازىر جەمسارى اۋدانى پايدالانعان قۇرىلعىلى اۋىل شارۋاشىلىعى جىلىجايىنان مىڭعا جۋىعى بار، مۇنىڭ ىشىندە قوي قارىن ساڭىراۋقۇلاعى سياقتى جوعارى دارەجەلى ازىقتىق ساڭىراۋقۇلاق ەگىلەتىن جىلىجاي 500دەن استامعا جەتتى. شينجياڭعا كومەكتەسۋ قارجىسىنىڭ قولداۋ كورسەتۋىندە، جەمسارى اۋدانىنىڭ دايوۋ قالاشىعىندا 4 قوي قارىن ساڭىراۋقۇلاعى ەگىمشىلىك بازاسى قۇرىلدى، سالىنىپ بىتكەن نەمەسە سالىنىپ جاتقان 653 ەگىمشىلىك جىلىجايى بار ٴارى ازىقتىق ساڭىراۋقۇلاق قورەكتىك بۋماسىن وڭدەۋ، ساڭىراۋقۇلاق جىپشەسىن جەتىلدىرىپ تازارتىپ قوراپتاۋ، جىلىجايدى تامشىلاتىپ سۋارۋ سياقتى نىساندار قۇرىلىسىن سايكەستى سالىپ، قوي قارىن ساڭىراۋقۇلاعى كاسىپ سالاسى دامۋىن پارمەندى جەبەدى ٴارى ساڭىراۋقۇلاق پەن كوكونىستى كەزەكپەن ەگۋ ٴوندىرىس ۇلگىسىن اتقارۋعا ماڭىزدى نەگىزدىك قامتاماسىزدىق ازىرلەدى.

”ساڭىراۋقۇلاق پەن كوكونىستى كەزەكپەن ەگۋ ٴوندىرىس ۇلگىسىنىڭ ٴساتتى قولدانىلۋى جىلىجاي قۇرىلعىسى بايلىعىن ٴونىمدى جانداندىرىپ، جەردىڭ ونىمدىلىك شىعارۋىن جوعارىلاتىپ، اۋىل شارۋاشىلىعىنىڭ ونىمدىلىگىن ارتتىرۋدى جانە ەگىنشىلەردىڭ كىرىستى ارتتىرۋىن جەبەدى. الدا ەگىمشىلىك كولەمىن ۇزدىكسىز كەڭەيتىپ، اناعۇرلىم كوپ ەگىنشىنىڭ بۇدان يگىلىكتەنۋىنە مۇمكىندىك جاسايمىز“، ـ دەدى سۇڭ شياڭگو.