انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ 11 ـ ايدىڭ 4 ـ كۇنى بەيجيڭنەن حابارلايدى. 11 ـ ايدىڭ 3 ـ كۇنى اۆتونوميالى رايوندىق مادەنيەت جانە ساياحات مەڭگەرمەسىنەن، شينجياڭنىڭ مادەنيەت ـ ساياحات كاسىپورىندارىنان جانە شينجياڭ كوركەمونەر تەاترحاناسىنىڭ ارتيستەرىنەن قۇرام تاپقان ساياحاتتى تانىستىرۋ ۇيىرمەسى بەيجيڭنەن اتتانىپ، مالايزياعا، سينگاپۋرعا بارىپ، 2024 ـ جىلعى شينجياڭنىڭ كۇز، قىس ماۋسىمىنداعى ساياحات بايلىعىن شەتەلگە تانىستىرۋ قيمىلىن باستادى. ساياحات بايلىعىن تانىستىرۋ، ادەبيەت ـ كوركەمونەر قويىلىمى جانە جەرگىلىكتى ورىنمەن ساياحات ىستەرى جونىنەن كەلىسسوز وتكىزۋ سياقتى تاسىلدەر ارقىلى شينجياڭنىڭ قار ـ مۇز ساياحاتىن تانىستىردى، سەلبەستىك نىساندارىن تياناقتاندىردى، ٴتىپتى دە كوپ ساياحاتشىلاردى شينجياڭعا كەلىپ ساياحاتتاۋعا شاقىردى.

بيىل الدىڭعى 10 ايدا تۇتاس شينجياڭ بويىنشا شەكارادان كىرگەن 4 ميلليون 196 مىڭ ساياحاتشى (رەت) قابىلدانىپ، سايكەس مەزگىلدەگىدەن %50.38 ارتتى. مالايزيا _ جۇڭگونىڭ شينجياڭىنا شەتەلدەن كىرەتىن ساياحاتشىلار نەگىزگى قاينار ەلى. جۇڭگونىڭ شينجياڭى مەن مالايزيانىڭ، سينگاپۋردىڭ كليمات پارقى زور، كۇز، قىس ماۋسىمىنداعى قار ـ مۇز ساياحاتى ەكى ەل ساياحاتشىلارى جونىنەن اسا زور باۋراۋ قۋاتىنا يە.

وسى رەتكى شەتەلدە تانىستىرۋ قيمىلى 8 كۇنگە جالعاسىپ، مالايزيا مەن سينگاپۋردا 2 رەت قيمىل وتكىزىلەدى. مۇندا شينجياڭنىڭ كۇز، قىس ماۋسىمىنداعى ساياحات بايلىعىن شەتەلگە تانىستىرۋ قيمىلى شينجياڭنىڭ ٴان ـ ٴبي كونسەرتى، بەيزاتتىق مادەنيەت مۇرالارى مادەنيەت جاسامپازدىعى قويىلىمى، فوتوسۋرەت كورمەسى جانە مادەنيەت پەن ساياحات ۇگىت ماتەريالدارىن تاراتۋ سياقتى كوپ ٴتۇرلى تاسىلدەر ارقىلى شينجياڭنىڭ ساپالى ساياحات بايلىعىن، سونداي ـ اق ەرەكشە مادەنيەت بايلىعىن تانىستىرادى. بۇدان سىرت، ەكى ەلدىڭ ساياحات سەرىكتەستىكتەرىمەن جانە كاسىپكەرلەر ۋاكىلدەرىمەن تياناقتاندىرىلاتىن سەلبەستىك ىستەرى جونىندە پىكىرلەسىپ، ٴوزارا ساياحاتشى جىبەرۋدى جەبەيدى.

بيىل جىل باسىنان بەرى، اۆتونوميالى رايوندىق مادەنيەت جانە ساياحات مەڭگەرمەسى مادەنيەت جانە ساياحات مينيسترلىگى جۇڭگو _ شەتەل مادەنيەت اۋىس ـ كۇيىس ورتالىعىمەن بىرلەسىپ، كاتار، اراب بىرىككەن امىرلىگى، كۆەيت، فيجي سياقتى ەلدەردە ساپاردا بولىپ، ادەبيەت ـ كوركەمونەر قويىلىمى، ساياحات تانىستىرۋ، ماي بوياۋلى سۋرەت كورمەسى ارقىلى جۇڭگونىڭ شينجياڭىنداعى ٴار ۇلت حالقىنىڭ سەنىمدى، اشىق، سيىسىمدى، جاراسىمدى تاماشا بەت ـ بەينەسىن ايگىلەدى.