انار بۇلت \ شينجياڭ گازەتىنىڭ ٴتىلشىسى سو رۇڭجى 11 ـ ايدىڭ 11 ـ كۇنى ۇرىمجىدەن حابارلايدى. اۆتونوميالى رايوندىق بازار باقىلاۋ ـ باسقارۋ مەكەمەسىنەن ۇعىسۋىمىزشا، «جەكە ساۋدا ـ ونەركاسىپشىلەردىڭ دامۋىن جەبەۋ ەرەجەسى» اتقارىلعاننان بەرى، قازىرگە دەيىن رايونىمىزدا جالپى 2079 ”جەكە ساۋدا ـ ونەركاسىپشى تيپ جاڭالاپ كاسىپورىن قۇرۋعا ويىسۋ“ راسمياتىن بىتىرگەن.

2022 ـ جىلى 11 ـ ايدىڭ 1 ـ كۇنىنەن باستاپ اتقارىلعان «جەكە ساۋدا ـ ونەركاسىپشىلەردىڭ دامۋىن جەبەۋ ەرەجەسىنىڭ» قاتىستى بەلگىلەمەلەرىنە ساي، جەكە ساۋدا ـ ونەركاسىپشىلەردىڭ ٴوز ەركىمەن تيپ جاڭالاپ كاسىپورىن قۇرۋىنا بولادى. ”جەكە ساۋدا ـ ونەركاسىپشى تيپ جاڭالاپ كاسىپورىن قۇرۋعا ويىسۋ“ _ تيجارات كۋالىگىن بىتىرگەن جەكە ساۋدا ـ ونەركاسىپشىلەردىڭ قولداعى ٴوندىرىس، تيجارات شارت ـ جاعدايىن نەگىز ەتە وتىرىپ، قاتىستى زاڭداردىڭ، زاڭ ـ ەرەجەلەردىڭ بەلگىلەمەسىنە ساي، تيپ جاڭالاپ دەڭگەيىن جوعارىلاتىپ، سەرىكتەستىك تۇزىمىندەگى كاسىپورىن، سەرىكتەسكەن كاسىپورىن، جەكە قارجىلاندىرعان كاسىپورىن قۇرۋى بولىپ تابىلادى.

”جەكە ساۋدا ـ ونەركاسىپشى تيپ جاڭالاپ كاسىپورىن قۇرۋعا ويىسۋ“ تەك اتىن وزگەرتۋ عانا ەمەس، ونان دا ماڭىزدىسى، تيجارات نەگىزگى تۇلعاسىنىڭ ىشكى باسقارۋ قۇرىلىمىن ساپالىلاندىرىپ، دامۋدىڭ ۇلاسپالىلىعى ماسەلەسىن شەشۋىنىڭ بەينەلەنۋى. ”جەكە ساۋدا ـ ونەركاسىپشى تيپ جاڭالاپ كاسىپورىن قۇرۋعا ويىسقاننان“ كەيىن، كوپ قارجىگەرى بولسا قارجىگەرلەردىڭ اراسىندا، ٴسوزسىز، كەمىندە ٴبىر بۇرىنعى جەكە ساۋدا ـ ونەركاسىپ تيجاراتشىسى بولۋ ٴتيىس، بۇل تيجارات نەگىزگى تۇلعاسىنىڭ تيجارات كولەمىن ۇلعايتۋىنا، ىشكى باسقارۋ قۇرىلىمىن ساپالىلاندىرۋىنا، بازارداعى باسەكەلىك قۋاتىن كۇشەيتۋىنە، ٴومىر ٴسۇرۋ جانە دامۋ كەڭىستىگىن كەڭەيتۋىنە ٴتيىمدى.

جەكە ساۋدا ـ ونەركاسىپشىلەردىڭ اقاۋسىز دامۋىن قولداۋ جانە جەتەكتەۋ ٴۇشىن، اۆتونوميالى رايوندىق بازار باقىلاۋ ـ باسقارۋ مەكەمەسى ”جەكە ساۋدا ـ ونەركاسىپشى تيپ جاڭالاپ كاسىپورىن قۇرۋعا ويىسۋ“ راسمياتتارىن بىتىرۋدەگى بوگەتتى تۇيىندەردى ىركىلىسسىزدەندىردى. بيىل 9 ـ ايدا رايونىمىزداعى جەكە ساۋدا ـ ونەركاسىپشىلەر تيپ جاڭالاپ كاسىپورىن قۇرۋعا ويىسقاننان كەيىن بۇرىنعى اتىن ىستەتە بەرۋىنە بولاتىن، بۇرىنعى جەكە ساۋدا ـ ونەركاسىپشىنىڭ ٴبىر تۇتاس قوعامدىق سەنىمدى شارتتى ٴنومىرى مەن قۇرىلعان ۋاقىتىن جالعاستى ىستەتۋىنە بولاتىن بولدى.

اۆتونوميالى رايوندىق بازار باقىلاۋ ـ باسقارۋ مەكەمەسىنىڭ قاتىستى جاۋاپتىسى بىلاي دەپ تانىستىردى: جەكە كاسىپكەرلەردىڭ تيجاراتىمەن سالىستىرعاندا، سەرىكتەستىك سيپاتىنداعى تيجارات كاسىپورىننىڭ تيجارات قاتەرىن تومەندەتۋگە پايدالى، جەكە ساۋدا ـ ونەركاسىپشىلەر قارىز ۇقىعىندا، قارىز مىندەتىندە شەكسىز جاۋاپكەرشىلىك ارقالايدى، ال سەرىكتەستىك سيپاتىنداعى كاسىپورىن قوسقان قارجى سوماسى بويىنشا شەكتى جاۋاپكەرشىلىك ارقالايتىندىقتان، زاڭدىق قاتەرى اناعۇرلىم تومەندەيدى. سونىمەن قاتار قارجىعا قول جەتكىزۋ، بازار جانە دامۋ كەڭىستىگىن كەڭەيتۋ، ماركا تۇلعالاۋ، ماركانىڭ تانىمالدىعىن ارتتىرۋ سياقتى جاقتاردا كاسىپورىن جەكە ساۋدا ـ ونەركاسىپشىلەردەن گورى بازارداعى ورنىن وڭاي تۇراقتاندىرادى، سەنىمدىلىگى ٴتىپتى دە جوعارى بولادى، قوعامدىق بايلىق پەن ساياساتتىق قولداۋعا ٴتىپتى دە وڭاي قول جەتكىزىپ، كاسىپورىننىڭ دامۋ كەڭىستىگىن كەڭەيتە الادى.

”ٴبىز كاسىپورىن قۇرۋعا ويىسقانداردىڭ ساپاسىن جوعارىلاتۋدان كىرىسىپ، ”جەكە ساۋدا ـ ونەركاسىپشى تيپ جاڭالاپ كاسىپورىن قۇرۋعا ويىسقاننان“ كەيىن كاسىپورىننىڭ دامۋىنا كومەكتەسۋدى، سۇيەمەلدەۋدى كۇشەيتىپ، كاسىپورىننىڭ ٴوندىرىس، تيجارات بارىسىندا تۋىلعان ٴىس جۇزىندىك قيىنشىلىقتاردى شەشۋىنە كومەكتەسىپ، جەكە ساۋدا ـ ونەركاسىپشىلەردىڭ كاسىپورىن قۇرعاننان كەيىنگى اناعۇرلىم دامىپ زورايۋىنا شىنايى كەپىلدىك ەتىپ، رايونىمىز ەكونوميكاسىنىڭ جوعارى ساپالى دامۋىن ىلگەرىلەتۋگە دەم بەرەمىز“، ـ دەدى وسى جاۋاپتى.