انار بۇلت \ شينجياڭ گازەتىنىڭ ٴتىلشىسى گى يوۋجۇن 11 ـ ايدىڭ 4 ـ كۇنى كۇنى سانجىدان حابارلايدى. 11 ـ ايدىڭ 4 ـ كۇنى سانجى حۇيزۋ اۆتونوميالى وبلىسىنىڭ ٴتۇيىندى ساياحات قۇرىلىسى نىسانى _ شينجياڭ پاندورا حايۋاناتتار پاتشالىعى نىسانىنىڭ ىرگە تاسى سانجى قالاسى سانگۇڭ قالاشىعىندا قالاندى.

بۇل نىساننىڭ جالپى جوباداعى يەلەگەن جەر اۋدانى 750 مۋ، جالپى 360 ميلليون يۋان قارجى قوسىلادى، قۇرىلىس سانجى قالاسى ليڭشياڭشان ساياحات بەلدەۋىنىڭ باتىس وڭىرىنە ورنالاسقان، سانجى قالا رايونىنا 12 كيلومەتر جەردە، ٴۇرىمجى قالاسىنان 23 كيلومەتر قاشىقتىقتا، G30 ليانيۇنگاڭ _ قورعاس جوعارى قارقىندى تاس جولى مەن ٴۇرىمجى قالا اينالمالى جوعارى قارقىندى تاس جولىنا (باتىس جەلىسى)، سونداي ـ اق سانجى حۇيزۋ اۆتونوميالى وبلىسىنىڭ باتىس بولىگىندەگى نانشان قوسالقى تاس جولىنا جاقىن.

تانىستىرۋعا قاراعاندا، بۇل نىسان ”حايۋاناتتار پاتشالىعى“ نەگىزگى تاقىرىبىن ارقاۋ ەتىپ، دۇنيە ٴجۇزىنىڭ جەر ـ جەرىنەن 100دەن استام سيرەك كەزدەسەتىن باعالى حايۋاناتتى ەنگىزۋدى جوسپارلاعان، بۇل مەملەكەت اسىلى مىسىق ايۋدى ەنگىزىپ، حايۋاناتتاردى تاماشالاۋ، حايۋاناتتاردى قۇتقارۋ جانە وعان كومەكتەسۋ، حايۋاناتتار عىلىمىن جالپىلاستىرۋ، مادەنيەت ساياحاتى، سەيىل ـ سەرۋەن ساۋداسى سياقتى كاسىپ كۇيلەرىن ٴبىر تۇلعالاندىرعان ەرەكشە ساياحات كەشەنىن قۇرۋدى قامتيدى ەكەن. نىسان سانجى وبلىسىنىڭ، اۋەلى، شينجياڭنىڭ ساياحات كاسىپ كۇيىندەگى اقتاڭداقتى تولتىرادى.

تانىستىرۋعا قاراعاندا، بۇل نىساننىڭ جالپى قۇرىلىس مەرزىمى 3 جىل، 2 مەرزىمگە ٴبولىنىپ سالىنىپ، 2027 ـ جىلى تۇگەلدەي سالىنىپ بولىپ، ىسكە قوسىلادى ەكەن. نىسان بۇكىلدەي سالىنىپ بولعاننان كەيىن، 6 ۇلكەن فۋنكتسيالىق بولىك جارىققا شىعادى، ياعني ەرمەك حايۋاناتتار ىقپالداستىق تاقىرىپتىق كورمە اۋماعى، سەيىل ـ سەرۋەن، كوڭىل اشۋ اۋماعى، حالىقتىق تۇسەلحانا، اس ـ سۋ ساۋدا اۋماعى، زەرتتەۋ ـ ۇيرەنۋ، عىلىم جالپىلاستىرۋ تاربيەسى اۋماعى، حايۋاناتتار كونسەرت اۋماعى جانە جالپىلىق قىزمەت وتەۋ اۋماعى شىت جاڭا ساياحات، سەيىل ـ سەرۋەن ورنىن قالىپتاستىرىپ، ساياحاتشىلارعا شىت جاڭا وزگەشە ساياحات كەشىرمەسىن سەزىندىرەدى ەكەن.

”ٴبىز ەرەكشەلىكتى كورنەكتىلەندىرىپ، باقشا رايونىن شينجياڭنىڭ عىلىم جالپىلاستىرۋ تاربيەسىنىڭ جاڭا بوگەنايىنا، سانجى ساياحاتىنىڭ جاڭا تانىسقىسىنا اينالدىرامىز“، ـ دەدى شينجياڭ پاندورا مادەنيەت ـ ساياحاتتى دامىتۋ شەكتى جاۋاپكەرشىلىك سەرىكتەستىگىنىڭ القا باستىعى حۋ جيەبين.