قار ـ مۇز اسقاق سەزىمىن الاۋلاتىپ، ازيا كىندىگى قالاسىندا ارمانعا قۇلاش سەرمەۋ
شينجياڭ 2 ـ كەزەكتى قىسقى سپورت جارىسى ۇرىمجىدە باستالدى
ما شيڭرۇي باستالۋ سالتىنا قاتىناستى ٴارى باستالعاندىعىن جاريالادى
ەركىن تۇنياز ارناۋ ٴسوز سويلەدى، ٴزۇمىرات وبۇل، نۇرلان ٴابىلماجىن، حى جۇڭيوۋ، جاڭ جۋ قاتىناستى
انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 1 ـ ايدىڭ 18 ـ كۇنى ۇرىمجىدەن حابارلايدى. 1 ـ ايدىڭ 18 ـ كۇنى تۇستەن كەيىن ”قار ـ مۇز اسقاق سەزىمىن الاۋلاتىپ، ازيا كىندىگى قالاسىندا ارمانعا قۇلاش سەرمەۋ“ نەگىزگى تاقىرىبىنداعى شينجياڭ ۇيعۇر اۆتونوميالى رايونىنىڭ 2 ـ كەزەكتى قىسقى سپورت جارىسى شينجياڭ قىسقى سپورت جاتتىعۋ ورتالىعىندا باستالدى. اۆتونوميالى رايوندىق پارتكومنىڭ شۋجيى، بيڭتۋان پارتكومىنىڭ ٴبىرىنشى شۋجيى، ٴبىرىنشى جىڭۋي ما شيڭرۇي باستالۋ سالتىنا قاتىناستى ٴارى سپورت جارىسىنىڭ باستالعاندىعىن جاريالادى.
اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى، شينجياڭ 2 ـ كەزەكتى قىسقى سپورت جارىسىن ۇيىمداستىرۋ كوميسسياسىنىڭ مەڭگەرۋشىسى ەركىن تۇنياز باستالۋ ٴسوزىن سويلەدى. اۆتونوميالى رايوندىق حالىق قۇرىلتايى تۇراقتى كوميتەتىنىڭ مەڭگەرۋشىسى ٴزۇمىرات وبۇل، اۆتونوميالى رايوندىق ساياسي كەڭەستىڭ ٴتوراعاسى نۇرلان ٴابىلماجىن، اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى حى جۇڭيوۋ، اۆتونوميالى رايوندىق پارتكومنىڭ ورىنباسار شۋجيى، ٴۇرىمجى قالالىق پارتكومنىڭ شۋجيى جاڭ جۋ باستالۋ سالتىنا قاتىناستى.
شينجياڭ قىسقى سپورت جاتتىعۋ ورتالىعىنىڭ قىسقا ارالىققا تەز سىرعاناۋ سارايى دۋماندى بەينەگە شومدى. ويناقى دا جالىندى مۋزيكاعا ىلەسە، تورەشىلەر قوسىنى مەن اۆتونوميالى رايوننىڭ 14 ايماق، وبلىس، قالاسىنىڭ، بيڭتۋان شىحىزى قالاسىنىڭ دەنە تاربيە ۋاكىلدەر ۇيىرمەسى الاڭعا رەتىمەن كىردى.
الاڭعا كىرۋ سالتى اياقتاعاننان كەيىن، بارلىق ادام ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى.
ساعات 18دەن 30 مينۋت وتكەندە، ما شيڭرۇي شينجياڭ ۇيعۇر اۆتونوميالى رايوندىق 2 ـ كەزەكتى قىسقى سپورت جارىسىنىڭ باستالعاندىعىن جاريالادى. بۇكىل الاڭنان دۋ قول شاپالاق ٴۇنى مەن الاقايلاعان ٴۇن كوتەرىلدى.
ەركىن تۇنياز ارناۋ سوزىندە مىنالاردى ٴبىلدىردى: شينجياڭنىڭ قىسقى سپورت جارىسىن وتكىزۋى _ باس شۋجي شي جينپيڭنىڭ ”300 ميلليون ادامدى قار ـ مۇز سپورتىنا قاتىناسۋعا باستاۋ“ ماڭىزدى نۇسقاۋىنىڭ رۋحىن دايەكتىلەندىرۋدىڭ، تياناقتاندىرۋدىڭ ناقتى شاراسى، جۇڭحۋا دەنە تاربيە رۋحى مەن بەيجيڭ قىسقى وليمپيادا رۋحىن اسقاقتاتۋدىڭ جاندى امالياتى. باس شۋجي شي جينپيڭنىڭ جانە پارتيا ورتالىق كوميتەتىنىڭ پارمەندى باسشىلىعىندا، اۆتونوميالى رايوندىق پارتكوم بۇكىل شينجياڭداعى ٴار ۇلت كادرلارى مەن بۇقاراسىن ىنتىماقتاستىرىپ، باستاپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، وڭىرلىك ورىن، ەنەرگيا، بايلىق سياقتى جاقتارداعى ارتىقشىلىعىن، كومەسكى كۇشىن جەدەل ىسكە قوسىپ، ەكونوميكالىق، قوعامدىق دامۋدى ىلگەرىلەتۋ مەن حالىق تۇرمىسىن جاقسارتۋدا كورنەكتى تابىستارعا قول جەتكىزدى. اسىرەسە، ٴبىز ”مۇزدى القاپ، قارلى دالا دا باعالى بايلىق“ ۇستانىمىن بەرىك ورناتىپ، شينجياڭنىڭ وزگەشە قار ـ مۇز بايلىعى ارتىقشىلىعىن تولىق ساۋلەلەندىرىپ، قار ـ مۇز ساياحاتىن، قار ـ مۇز كاسىپ سالاسىن جانە قار ـ مۇز ەكونوميكاسىن جەدەل دامىتىپ، شينجياڭنىڭ دەنە تاربيە ىستەرى مەن قار ـ مۇز سپورتىنىڭ جوعارى ساپالى دامۋىنىڭ تىڭ ساتىعا كوتەرىلۋىن ىلگەرىلەتتىك. وسى كەزەكتى قىسقى سپورت جارىسىن وراي ەتىپ، قار ـ مۇز سپورتىنىڭ جەتىستىكتەرىن ۇزدىكسىز بەكەمدەپ جانە كەڭەيتىپ، دەنە تاربيەدە قۋاتتى ەل قۇرۋعا شينجياڭ ۇلەسىن قوسۋدى قالايمىز. شينجياڭ ەل ٴىشى ـ سىرتىنداعى قار ـ مۇز سپورتى اۋەسكەرلەرىن قار ـ مۇز كەرەمەتىن ۇزدىكسىز جازىپ، قار ـ مۇز ىنتاسىن قاۋلاتىپ، قار ـ مۇز سالتاناتىنان مەيلىنشە ٴلاززاتتانۋعا ىقىلاسپەن ۇسىنىس ەتەدى.
قىسقى سپورت جارىسىنىڭ اسقاق ٴانى شىرقالدى. وسىدان كەيىن سپورتشىلاردىڭ، جاتتىقتىرۋشىلاردىڭ، تورەشىلەردىڭ ۋاكىلدەرى سەرت بەردى.
باستالۋ سالتىندا مادەنيەت، دەنە تاربيە قىزمەتكەرلەرى تارتىمدى ويىن نومىرلەرىن ورىندادى.
مۇقيات جارمۇقامەت باستالۋ سالتىن باسقاردى. ٴۇرىمجى قالاسىنداعى قاتىستى جاۋاپتى جولداس قارسى الۋ ٴسوزىن سويلەدى.
قادەن كابەن، اۆتونوميالى رايوننىڭ جانە بيڭتۋاننىڭ قاتىستى ورىندارىنداعى جاۋاپتى جولداستار، ٴارقايسى ايماق، وبلىس، قالالارداعى قاتىستى جولداستار جانە ٴار ۇلت بۇقاراسىنىڭ ۋاكىلدەرى باستالۋ سالتىنا قاتىناستى.
وسى كەزەكتى قىسقى سپورت جارىسىن اۆتونوميالى رايوندىق حالىق ۇكىمەتى ۇيىمداستىرىپ، اۆتونوميالى رايوندىق دەنە تاربيە مەكەمەسى مەن ٴۇرىمجى قالالىق حالىق ۇكىمەتى مىندەتكە الىپ وتكىزدى. سپورت جارىسىنداعى جارىستار باسەكە دەنە تاربيە تۇرلەرى جانە بۇقارالىق گرۋپپا قار ـ مۇز جارىسى بولىپ بولىنەدى. باسەكە دەنە تاربيە تۇرلەرىندە مۇزدا سىرعاناۋ، كونكيمەن مانەرلەپ سىرعاناۋ، شاڭعى تەبۋ، مۇز دوپ، شاڭعىمەن تاۋعا شىعۋ، دالالىق دوڭگەلەكتى كونكي، دوڭگەلەكتى كونكي سياقتى 7 ۇلكەن ٴتۇر، 10 تارماق ٴتۇر، 180 شاعىن ٴتۇر بار؛ بۇقارالىق گرۋپپا قار ـ مۇز جارىسى مۇزدا تەز سىرعاناۋ، تاۋ شاڭعى، دالالىق شاڭعى، كونكيمەن مانەرلەپ سىرعاناۋ، قارلى دالا فۋتبولى، قار ۇستىندەگى ات بايگەسى، بايىرعى تەرى شاڭعىمەن سىرعاناۋ، قار ـ مۇز مارافونى سىندى 8 ٴتۇردى جانە ٴبىر قىسقى دەنە تاربيە سالتاناتى قيمىلىن قامتيدى.