انار بۇلت \ شينجياڭ گازەتىنىڭ ٴتىلشىسى ٴابيبا 5 ـ ايدىڭ 18 ـ كۇنى ۇرىمجىدەن حابارلايدى. بيىل 5 ـ ايدىڭ 19 ـ كۇنى — 15 ـ رەتكى جۇڭگو ساياحات كۇنى، بۇكىل شينجياڭنىڭ جەر ـ جەرى جۇزدەن استام مادەنيەت ـ ساياحات، دەنە تاربيە قيمىلىن ۇسىنىپ، ٴدامدى تاعامدار مەرەكەسى، بەيزاتتىق مۇرالار كورمەلىك قويىلىمى، دوڭگەلەكتى كونكيمەن سىرعاناۋ، الاۋ ساۋىق كەشى سياقتى تارتىمدى قيمىلدار ىركەس ـ تىركەس جارىققا شىعادى. جۇڭگو ساياحات كۇنى شينجياڭ نەگىزگى جينالىس ورنى قيمىلى شينجياڭ حالىقارالىق ۇلكەن بازارىندا وتكىزىلدى. قيمىل ”كورىكتى مەكەن، ساۋلەتتى ساپار — اتتانايىق! شينجياڭدى“ نەگىزگى تاقىرىپ ەتكەن، ەرەكشە جارقىن ٴتۇيىندى قيمىلدار مۋزيكا، سۇيكىمدى ەرمەك حايۋان، بەيزاتتىق مۇرالار، ٴوزى اۆتوكولىك جۇرگىزۋ سياقتى كوپ نەگىزدى سەزىنۋدى توعىستىرادى، مۇنان تىس، مادەنيەت ـ ساياحات ارقىلى حالىققا تيىمدىلىك جاساۋ ساياساتىن شىعارادى.

5 ـ ايدىڭ 16 ـ كۇنىنەن 20 ـ كۇنىنە دەيىن، ٴۇرىمجى مادەنيەت باقشاسى ٴار كۇنى ساعات 21دەن 23كە دەيىن ”مۋزيكالى عاجايىپ سايرانباعىنا“ اينالادى. كول جاعاسىنداعى مۋزيكا كەشى، ارتقى كەبەجە بازارى، سىرا جارىسى كەزەك ـ كەزەك وتكىزىلىپ، اعاش بۇتاقتارىنا ٴان ٴماتىنى ٴىلىنىپ، كول بەتىنە ريتىمى كەسكىندەلىپ، ەلىتۋ ۇلگىسىندەگى ”باتىس بولىك ٴان قالاسى“ سەزىنۋىن تۇلعالايدى. 5 ـ ايدىڭ 20 ـ كۇنى تاعى ”سۇيكىمدى حايۋانداردى“ كورسەتۋ — ماستەك ات جانە جانات جۇرتتى تاڭ قالدىرادى، ساياحاتشىلاردىڭ تەگىن، ىقپالداسىپ سۋرەتكە تۇسۋىنە بولادى.

5 ـ ايدىڭ 19 ـ كۇنى — جۇڭگو ساياحات كۇنى شينجياڭ نەگىزگى الاڭىنىڭ مادەنيەت ـ ساياحات بازارى باي مازمۇندى، الۋان ٴتۇرلى، ەرەكشەلىككە يە مادەنيەت ـ ساياحات تاۋارلارىن شوعىرلى كورسەتەدى.

التاي ايماقتىق مادەنيەت، دەنە تاربيە، راديو ـ تەلەۆيزيا جانە ساياحات مەكەمەسى 7 ـ كەزەكتى التاي ايماعى ”مىڭ شاقىرىمدىق سۋرەت ٴدالىزى · ٴجۇز كولىكتى ٴوزى جۇرگىزۋ“ قيمىلىن، ”باتىس سولتۇستىكتى، ۇيەكتىك سولتۇستىكتى ساياحاتتاۋ 10 مىڭ قادامدى بىرگە باسۋ“ جانە ٴجۇرىپ شىنىعۋعا جىگەرلەندىرۋ جارىسى، ”شىڭگىلدە اتقا قامشى باسۋ“ بايگە قيمىلى، كوكتوعاي ساۋىتى جاياۋ ٴجۇرۋ جارىسى، شىڭگىل لاڭشان كورىنىس وڭىرىندەگى ”باتاي مەن ۋىنشيۋدىڭ تويى“ حالىقتىق ادەت ـ عۇرىپ، توي سالتى سياقتى قيمىلداردى ۇسىنىپ، ساياحاتشىلاردىڭ قيمىل بارىسىندا التايدىڭ كوركەم كورىنىسى مەن وزگەشە حالىقتىق سالت ـ ساناسىن سەزىنۋىنە مۇمكىندىك جاسايدى.

جۇڭگو ساياحات كۇنىندە 2025 ـ جىلعى جۇڭگو تاكلاماكاندى اينالۋ حالىقارالىق راللي جارىسى قاشقار جارىس وڭىرىندەگى جالاۋ بەرۋ سالتى قاشقار قالاسى كۇنلۇن جانارى اۋە دوڭعالاعى نەگىزگى تاقىرىپتىق باقشاسىندا وتكىزىلەدى. سول كەزدە ساياحاتشىلاردىڭ جارىسقا قاتىناساتىن اۆتوكولىك اترەتىنە ىلەسىپ يىڭسار اۋدانى، يوپۇرعا اۋدانى، ماكىت اۋدانى سياقتى جەرلەردەگى قۇمدى ٴشول توراڭعىسى، قۇمداعى جاسىل القاپ سياقتى كورىنىستەردى تاماشالاۋىنا بولادى. بۇدان سىرت، تاعى ”شۋانزاڭنىڭ شىعىسقا ورالۋ سارا جولىمەن جاياۋ ساپارلاۋعا“ قاتىناسۋىنا، ياركەن اۋدانىنا بارىپ حالىقتىق سالت ـ سانانى سەزىنۋىنە، پامير ۇستىرتىنە بارىپ رومانتيكالى جۇلدىزدى اسپاندى تاماشالاۋىنا بولادى؛ مارالباسى اۋدانىنا بارىپ ”توراڭعى اسپان جولى ەكولوگيالىق ساياحات ـ دەمالىس وڭىرىنە“ ٴوز اۆتوكولىگىمەن ساياحاتتاۋ قيمىلىنا قاتىناسىپ، يرەلەڭدەگەن ياركەن وزەنى مەن كورىكتى يارداڭ جەر ٴتۇزىلىسىن تاماشالاۋىنا بولادى.

بەيزاتتىق مۇرالارىنىڭ تارتىمدىلىعىن، ٴان ـ ٴبيدىڭ اسەمدىگىن سەزىنەمىن دەسەڭىز، حوتان ايماعىنىڭ ساياحات كۇنى قيمىلدارىنان قاپى قالماڭىز. ساياحاتشىلاردىڭ حوتان قالاسىندا ناقتى كورىنىستىك تەاترلاردى كورۋىنە بولادى، تۇيەلى شارشى توپ، اتلاس ـ تورعىن كيىمدىلەر شارشى توبى، باتىسقا ساياحات شارشى توبى سياقتىلارعا ىلەسىپ كوشەلەردى ارالاۋىنا بولادى؛ قاراقاش اۋدانىنىڭ تۇت قاعاز كاسىپ سالاسى باقشاسىنا، قاراقاش اۋدانى كونە قالاسىنا بارىپ بەيزاتتىق مۇرالاردى سەزىنۋىنە بولادى؛ شەريا اۋدانىنىڭ شينجياڭ كۇنلۇن تاۋى كورىنىس وڭىرىنە بارىپ الاۋ ساۋىق كەشىنە قاتىناسىپ، كونسەرت تاماشالاۋىنا بولادى؛ كەريا اۋدانىندا راۋشان گۇلىمەن جاقىننان جاناسۋ مۇمكىندىگىنە يە بولسا، نيە اۋدانىندا ۇرلەمەلى ـ شەرتپەلى اسپاپتار مۋزيكاسى مەن ۇلتتىق مۋزيكا اسپاپتارىنىڭ شەندەسە توعىسۋىن سەزىنە الادى.

مۇنان سىرت، تاعى نارات كورىنىس وڭىرىندەگى مادەنيەت ـ كوركەمونەر كونسەرتى، مادەنيەت جاسامپازدىعى كورمەسى، ٴدامدى تاعامداردان اۋىز ٴتيۋ قيمىلى، باعراش كولى داحىكوۋ كورىنىس ٴوڭىرى كەمەتۇراعىندا ساۋىردىن ٴبي ويىندارى قيمىلى، ٴدوربىلجىن اۋدانىنداعى ٴوز اۆتوكولىگىمەن ساياحاتتاۋشىلاردى اتتاندىرۋ سالتى، قارامايلى قالاسى مايتاۋ ۇلكەن اڭعارىنداعى قىزعىلىقتى داۋاز ويىنى، اراسان اۋدانىنداعى ات بايگەسى، شاعىن مارافون، بەيزاتتىق مۇرالار بازارى، ٴدامدى تاعامدار جارىسى، قۇتىبي اۋدانىنداعى ”مىڭ بوياۋلى سانجى · جاراسىمدى، كورىكتى اۋىل ـ قىستاق“ حالىقتىق سالت ـ سانانى سەزىنۋ قيمىلى، اقسۋ قالاسى كينو شاعىن قالاشىعىندا وتكىزىلەتىن ”اقسۋ ٴدامى“ ٴدامدى تاعامدار جارىسى سياقتى الۋان ٴتۇرلى، باي مازمۇندى قيمىلدارعا قاتىناسۋعا بولادى.

اۆتونوميالى رايوندىق مادەنيەت جانە ساياحات مەڭگەرمەسى ساياحات جالپىلاستىرۋ جانە سىرتپەن اۋىس ـ كۇيىس جاساۋ باسقارماسىنىڭ باستىعى جاڭ رۇيحۋا تانىستىرىپ بىلاي دەدى: شينجياڭنىڭ جۇڭگو ساياحات كۇنى قيمىلدارى وسى ايدىڭ اياق شەنىنە دەيىن جالعاسادى، ايماق، وبلىس، قالالار ٴبىر ۋاقىتتا فورماسى الۋان ٴتۇرلى، باي مازمۇندى مادەنيەت ـ ساياحات قيمىلدارىن ۇيىمداستىرىپ ٴارى ٴبىرسىپىرا مادەنيەت ـ ساياحات ارقىلى حالىققا تيىمدىلىك جاساۋ شارالارىن جولعا قويىپ، جۇڭگو ساياحات كۇنى قيمىلىن شىن مانىندە حالىق تۇرمىسىنا پايدا جەتكىزۋ، بۇقاراعا تيىمدىلىك جەتكىزۋ قيمىلىنا اينالدىرادى.