□ انار بۇلت \ شينجياڭ گازەتىنىڭ ءتىلشىسى جاڭ تيڭ

”ۋاڭيۋان − التاي ايماعىنداعى اۋىل شارۋاشىلىعى ونىمدەرىن وڭدەيتىن باستاماشى كاسىپورىن، ’شينجياڭدى سەزىنۋ‘ جاقسى ونىمدەردى باعالاۋ قيمىلى ارقىلى ماركا وبرازىن جوعارىلاتۋدى ءۇمىت ەتەمىز“، - دەدى 11 - ايدىڭ 23 - كۇنى شينجياڭ ۋاڭيۋان بيولوگيالىق عىلىم - تەحنيكا توبى شەكتى سەرىكتەستىگى اكىمشىلىك كەڭسەسىنىڭ ديرەكتورى جىڭ جىچياڭ. تاياۋدا اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى «”شينجياڭدى سەزىنۋ“ جاقسى ونىمدەر ماركاسىن سارالاۋ قىزمەتىن ورىستەتۋ جونىندە حابارلاندىرۋ» باسىپ تاراتتى، 11 - ايدىڭ 20 - كۇنىنە دەيىن بۇكىل شينجياڭدا 100دەن استام ماركا تۇلعاسى ءوتىنىش ەتتى.

”شينجياڭدى سەزىنۋ“ جاقسى ونىمدەر ماركاسى شينجياڭ وڭىرىندە وندىرىلگەن، بەلگىلى ءوندىرىس كولەمىنە يە، ساپاسى ىسىلعان، ەرەكشەلىگى ايقىن، جەتەكتەۋ قۋاتى كۇشتى، تانىمالدىعى، داڭقى، تۇتىنۋ ادالدىعى جوعارى، ”جاقسىنىڭ ىشىندە جاقسى، ساپالىنىڭ ىشىندە ساپالى، ەرەكشەنىڭ ىشىندە ەرەكشە“ بولعان اۋىل شارۋاشىلىق ونىمدەرى ماركاسىن مەڭزەيدى.

”التاي ايماعىندا 19 ماركا تۇلعاسى ءوتىنىش بەرۋ ماتەريالىن تاپسىردى“. التاي ايماقتىق اۋىل شارۋاشىلىعى، اۋىل - قىستاق مەكەمەسى كاسىپ سالالاندىرۋ ءبولىمىنىڭ جاۋاپتىسى فان جياشين بىلاي دەپ تانىستىردى: سوڭعى جىلدارى التاي ايماعى ساپا ماركاسى ستراتەگياسىن ىشكەرىلەي اتقارىپ، ماركانى ساتىلى تۇردە جەتىلدىرۋ جوسپارىن تياناقتاندىرىپ، ماركا جەتىلدىرۋگە ىنتالاندىرۋ مەحانيزمىن كەمەلدەندىردى، بۇدان كەيىن ءبىز ءتىپتى دە كوپ كاسىپورىننىڭ ”شينجياڭدى سەزىنۋ“ ماركاسى قاتارىنان ورىن الىپ، ءار دارەجەلى ساپا سيلىعىن الۋ ءۇشىن قۇلشىنۋىنا قولداۋ كورسەتەمىز.

اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنىڭ قاتىستى قىزمەتكەرى بىلاي دەپ تانىستىردى: وسى رەتكى ”شينجياڭدى سەزىنۋ“ جاقسى ونىمدەر ماركاسىن سارالاۋ قىزمەتىن ورىستەتۋدەگى ماقسات − ماركا ارقىلى اۋىل شارۋاشىلىعىن قۇدىرەتتەندىرۋ ستراتەگياسىن ىشكەرىلەي اتقارىپ، بازار ىقپالى بار شينجياڭ ەرەكشەلىگىندەگى ءبىر توپ ”جاقسى ءونىم“ جاراتۋ.

”شينجياڭدى سەزىنۋ“ جاقسى ونىمدەر ماركاسى اۋىل شارۋاشىلىق ونىمدەرىنىڭ وڭىرلىك الەۋمەتتىك ماركاسىن، كاسىپورىن ماركاسىن جانە ءونىم ماركاسىن قامتيدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنىڭ ”شينجياڭدى سەزىنۋ“ جاقسى ءونىم ماركاسىن ءوتىنىش ەتۋ شارتى جونىندەگى تالابىنا ساي، نازار اۆتونوميالى رايوننىڭ ”8 ءىرى كاسىپ سالاسى شوعىرى“ قۇرىلىسىنا شوعىرلاندىرىلىپ، سارالاناتىن تۇرلەر استىق - ماي، مال شارۋاشىلىعى، جەمىس - جيدەك، كوكونىس، ماقتا توقىماشىلىعى، سۋ ونىمدەرى، ەرەكشە اۋىل شارۋاشىلىعى ونىمدەرى جانە ونىڭ وڭدەلگەن ونىمدەرىن قامتيدى، مەملەكەتتىڭ، اۆتونوميالى رايوننىڭ، ايماقتىڭ (وبلىس، قالا) كەلەلى اۋىل شارۋاشىلىق نىساندارىن اتقاراتىن تۇلعالار، اۆتونوميالى رايون دارەجەلى جانە ودان جوعارى اۋىل شارۋاشىلىعىن كاسىپ سالالاندىرۋداعى ءتۇيىندى باستاماشى كاسىپورىندار، شارۋالار كاسىپتىك سەلبەستىك كووپەراتيۆىنەن ۇلگى كورسەتۋ كووپەراتيۆتەرى، وتباسىلىق ەگىس الاڭدارى سياقتى ءوندىرىس، تيجارات تۇلعالارىن سارالاۋ كەرەك.

بيىل جىل باسىنان بەرى شينجياڭنىڭ جەر - جەرى نازاردى استىق - ماي، ماقتا جانە توقىماشىلىق، كيىم - كەشەك، جاسىل ورگانيكالىق جەمىس - جيدەك، كوكونىس، ساپالى مال شارۋاشىلىق ونىمدەرى سياقتى اۋىل شارۋاشىلىعىنا ساياتىن كاسىپ سالاسى شوعىرىنا شوعىرلاندىرىپ، اۋىل شارۋاشىلىعىنىڭ تۇتاس كاسىپ سالاسى تىزبەگىن كۇش سالا جەتىلدىرىپ، دامىتىپ، وسى زامانعى اۋىل شارۋاشىلىعى كاسىپ سالاسى باقشاسىن، اۋىل شارۋاشىلىعى ونىمدەرىن وڭدەۋ باقشا رايونىن، اۋىل شارۋاشىلىعى كاسىپ سالاسىنداعى قۋاتتى قالاشىقتى، ”ءبىر قىستاقتا ءبىر ءونىم بولۋ“ بويىنشا ۇلگى كورسەتەتىن قىستاق - قالاشىق قۇرىلىسىن جەدەل ىلگەرىلەتىپ، ەرەكشە كاسىپ سالاسىنىڭ ساننىڭ ارتۋىنان ساپانى جوعارىلاتۋعا، فاكتور ارقىلى دەم بەرۋدەن جاڭالىق اشۋ ارقىلى دەم بەرۋگە، بىتىراندى ورنالاستىرۋدان شوعىرلى دامۋعا قاراي بۇرىلىس جاساۋىن ىلگەرىلەتتى. جەر - جەر كاسىپ سالاسىنداعى قۋاتتى قالاشىقتاردىڭ ماركا قۇرىلىسىن ورىستەتۋىن بەلسەنە قولداپ، ”اقسۋدىڭ جاقسى جەمىس باعى“، ”كەريا قۇمدى ءشول روزا گۇلى“ سياقتى ءبىر توپ ساپاسى جاقسى، ەرەكشەلىگى ايقىن ءونىم ماركالارىن جەتىلدىرىپ، كاسىپ سالاسىنىڭ كوتەرىمدىلىك قۋاتى مەن قوسىمشا قۇنى ورنىقتى جوعارىلادى.

شاعىن ەسكەرتۋ

”شينجياڭدى سەزىنۋ“ جاقسى ونىمدەر ماركاسىنا تاڭدالعاندار ساياسات جاعىنان قالاي سۇيەمەلدەنەدى؟

(1) اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى ”شينجياڭدى سەزىنۋ“ جاقسى ونىمدەر ماركاسىن قولداۋ سەرپىنىن ارتتىرىپ، تاڭدالعان ماركالارعا كاسىپ سالاسى نىسانى، قارىز اقشانىڭ ءوسىمىن قازىنادان كوتەرۋ سياقتى جاقتاردا الدىمەن قولداۋ كورسەتەدى.

(2) اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى ”شينجياڭدى سەزىنۋ“ جاقسى ونىمدەر ماركاسىنا يە تۇلعالاردىڭ اۋىل شارۋاشىلىق ونىمدەرىن ءوندىرۋ - ساتۋ بىرلەستىگىنە كىرۋىنە ءتۇيىندى قولداۋ كورسەتىپ، شينجياڭعا كومەكتەسۋ مەحانيزمىنەن پايدالانىپ، كورمەگە قويىپ ساتۋ، ۇگىتتەۋ - تانىستىرۋ قيمىلىن ورىستەتىپ، ءار دارەجەلى كورمە - جينالىس، ماركا تانىستىرۋ جانە ءوندىرۋ مەن ساتۋدى ۇشتاستىرۋ سياقتى قيمىلدارعا الدىمەن ۇيىمداستىرىپ قاتىناستىرادى، ءتۇرلى ماركالاردى كۋالاندىرۋ، تاڭداپ كورسەتۋ قيمىلدارىنا الدىمەن كورسەتەدى.

(3) اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى ءارقايسى ايماقتىڭ (وبلىس، قالا) ”شينجياڭدى سەزىنۋ“ جاقسى ونىمدەرىنە ءوتىنىش بەرۋ ەلەكتروندى ساۋدا تىكە تاراتۋ بازاسىن قۇرۋىنا جەتەكشىلىك ەتەدى، تاڭدالعان ماركالاردى ”شينجياڭدى سەزىنۋ“ جاقسى ونىمدەرىن ەلەكتروندى ساۋدادا تىكە تاراتۋ بازاسىندا كورسەتىپ تانىستىرۋعا ءبىر ۋاقىتتا ەنگىزەدى. ”شينجياڭدى سەزىنۋ“ ينتەرنەت جەلىسىندەگى تۇعىرىن قۇرۋعا جەتەكشىلىك ەتىپ، كورمەگە قويىپ ساتۋعا دەم بەرەدى. ينتەرنەتتە تانىمال ەلەكتروندى ساۋدا توپتارىنىڭ تىكە تاراتىلىمدا زات ساتۋىنا بايلانىس جاساۋىنا كومەكتەسىپ، ءوندىرىس، تيجارات تۇلعالارىنىڭ ەلەكتروندى ساۋدا ارناسى قۇرىلىسىنا جەتەكشىلىك ەتەدى.