□انار بۇلت \ شينجياڭ گازەتىنىڭ ٴتىلشىسى ٴپاريزات ابدۇل

”اينالمالى اعاش اتقا وتىرىپ“ سيىر ساۋادى، بۇزاۋلار دارا ”جاتاقتا“ تۇرىپ، ارناۋلى دايىندالعان قورەكتىگى جوعارى ”ٴوزى تاڭدايتىن تاعامدى“ جەيدى... مۇنداي تاڭسىق ىستەردى سانجى قالاسىنىڭ وسى زامانعى مال شارۋاشىلىعى كاسىپ سالاسى باقشاسىنداعى وسى زامانعى مال شارۋاشىلىعى (سانجى) شەكتى سەرىكتەستىگى باعىمشىلىق الاڭىنان كورەسىز.

7 ـ ايدىڭ 16 ـ كۇنى ساعات 8دەن 30 مينۋت وتكەن، سانجى قالاسى اشىلى قازاق اۋىلىنداعى وسى زامانعى مال شارۋاشىلىعى (سانجى) شەكتى سەرىكتەستىگى باعىمشىلىق الاڭى كۇن شۋاعىنا مالىنعان كەزدە قارا الا ساۋىن سيىرلار ”قىزمەتكە شىقتى“. ساۋىن سيىرلار ارناۋلى سالىپ قويعان جولمەن مال ساۋاتىن اينالماعا رەتىمەن كىردى، قىزمەتكەرلەر تازالاۋ، زارارسىزداندىرۋ، كاتەل قويۋ سياقتى جۇمىستاردى اياقتاتقاننان كەيىن، اۆتوماتتى سيىر ساۋۋ باستالىپ كەتتى.

وسى زامانعى مال شارۋاشىلىعى (سانجى) شەكتى سەرىكتەستىگىنىڭ باس ديرەكتورى جاڭ كاي بىزگە ”بۇل ٴىرى اينالمالى ساۋۋ ماشيناسىمەن ٴبىر ۋاقىتتا 80 سيىر ساۋۋعا بولادى“، ـ دەدى.

”سيىردى قولمەن ساۋۋعا نەمەسە كونە ساۋۋ جابدىعىنا قاراعاندا، بۇل قوندىرعى ۋاقىتتى، كۇشتى از جۇمسايدى، ساعاتىنا 550 سيىردى ساۋادى، ونىمدىلىگى ٴبىر ەسەگە جۋىق ارتتى. ەڭ ماڭىزدىسى، ساۋۋ جابدىعى بۇزاۋدىڭ ەڭ اۋەلگى ەمۋ كۇيىنە ەلىكتەپ جاسالعاندىقتان، ساۋۋدىڭ تۇتاس بارىسى جاعىمدى بولادى، ساۋىن سيىر جايلى كۇيدە ساۋىلادى. ساۋۋ ماشيناسىنىڭ جوعارى جاعىنا جەلدەتكىش ورناتىلعان، سيىر ساۋۋ زالىنىڭ تەمپەراتۋراسى ولشەمدى تەمپەراتۋرادان اسىپ كەتسە، جەلدەتكىش تەمپەراتۋرانى تومەندەتۋ ۇلگىسىن اشادى. ساۋىلعان ٴسۇت سىرتپەن جاناسپاي، سۋىتقىش تۇتىكپەن ساقتاۋ بولمەسىنە جەتكىزىلەدى“. ٴىرى اينالمالى ساۋۋ ماشيناسى جونىندە تانىستىرعان جاڭ كايدىڭ جۇزىنەن اسەرلەنگەنى مەن ماقتانىش سەزىمى مەن مۇندالايدى.

ساۋىن سيىرلار ”زەردەلى تۇرمىس“ كەشىرگەندىكتەن اناعۇرلىم كوپ ساپالى ٴسۇت وندىرۋگە بولاتىندىعى تابيعي. ”قازىر سەرىكتەستىمىزدە قولداعى ساۋىن سيىر 3500دەن استام، مۇنىڭ ىشىندە ٴسۇتتى سيىر 1900دەن استام، كۇندىك ٴسۇت ٴونىمى 70 نەشە تونناعا جەتەدى“، ـ دەدى جاڭ كاي.

بۇل ارادا بۇزاۋلار تۋىلعان كەزدەن باستاپ جايلى ”زەردەلى تۇرمىس“ كەشىرەدى.

بۇزاۋلار تۋىلعاننان كەيىن ارنايى سالىنعان بۇزاۋ ارالىنا اپارىلىپ، جەكە ـ جەكە اۋاشا ۇيدە تۇرىپ، ارناۋلى قىزمەتكەر باعادى. مۇنداي وڭاشا باعۋ ٴتاسىلى ارقىلى بۇزاۋلاردىڭ دەنساۋلىق جاعدايىن دەر كەزىندە باقىلاپ ـ تەكسەرۋگە بولادى ٴارى ىندەتتىڭ ايقاسپالى جۇعىمدالۋىن ازايتۋعا، ٴىش ٴوتۋ جانە وكپە قابىنۋ مولشەرىن ازايتۋعا بولادى. مۇنان سىرت، بۇزاۋ تۋعان كۇنى ـ اق قوس قۇلاعىنا ارناۋلى ەلەكتروندى قۇلاق بەلگىسى تاعىلادى. قۇلاق بەلگىسىندە ٴنومىر بار، بۇل ولاردىڭ اتىمەن بىردەي، بۇل باعىمشىلاردىڭ تاۋلىك بويى بۇزاۋلاردىڭ ازىق سالىستىرماسى، دەنساۋلىق جانە ىندەتتەن ساقتانۋ جاعدايى، كەيىنگى ٴسۇت شىعارۋ مولشەرى سياقتى كورسەتكىشتەردى باقىلاۋىنا قولايلى. مۇنان سىرت، ەلەكتروندى قۇلاق بەلگىسىندەگى ينفورماتسيالار ساندى مالىمەتتەر قويماسىنا اۆتوماتتى جەتكىزىلەدى، ساندى مالىمەتتەر قويماسىندا ٴاربىر بۇزاۋدىڭ ەلەكتروندى ينفورماتسيا ارحيۆى بار، ٴار تۇردەگى ينفورماتسيالار ايدان انىق.

ايىرىم بولمەدە 2 ايدان استام ۋاقىت تۇرعاننان كەيىن دەنساۋلىق تەكسەرتۋدە تولىمدى بولعان بۇزاۋلار زەردەلى سيىر قوراعا اپارىلىپ توپتىق تۇرمىس كەشىرەدى.

”توپتىق تۇرمىس تا جايلى“. جاڭ كاي بىلاي دەپ تانىستىردى: قورادا كۇرىش قاۋىزىنان توسەلگەن ”جۇمساق توسەك“، دەنەسىن ۋقالايتىن شوتكى، تەمپەراتۋراسى زەردەلى مەڭگەرىلەتىن جۋىنۋ جۇيەسى سياقتى قۇرىلعىلار ولشەمدى دارەجەدە سەپتەلگەن. مۇنان تىس، سيىر قورادا تەرىس قىسىمدى جەلدەتكىش، اۆتوماتتى جەم ـ ٴشوپ سالۋ ماشيناسى، اۆتوماتتى دايراق تازالاۋ ماشيناسى سياقتى وسىزاماندانعان جابدىقتار بار. وسى جابدىقتاردا زەردەلى مەڭگەرۋ ـ جەتكىزگىش جابدىعى ورناتىلعان، جابدىقتاردىڭ جۇمىس جاعدايىن كۇنى ـ ٴتۇنى ەستەلىككە الىپ وتىرادى، سيىر قورانىڭ تەمپەراتۋراسى ىلعالدىعى، امياك گازى قويۋلىعى سياقتى كورسەتكىشتەردى باقىلاۋ ـ ولشەۋگە بولادى، ەگەر كورسەتكىشتە قالىپسىز جاعداي بايقالسا، قىزمەتكەرلەر قول تەلەفونداعى APP ارقىلى جەلدەتكىش، سۋ مونشا، بۇرىككىش، جارىق سياقتى جابدىقتاردىڭ جۇمىس جۇرگىزۋ پارامەترىن مەڭگەرىپ، سيىرلاردىڭ اناعۇرلىم جايلى”تۇرۋىنا“ مۇمكىندىك جاسايدى.

ساۋىن سيىرلاردىڭ جايلى تۇرمىس كەشىرۋى سانجى قالاسى وسى زامانعى مال شارۋاشىلىعى كاسىپ سالاسى باقشاسىنىڭ ۇلكەن ساندى مالىمەت، زات ينتەرنەتى، جاساندى زەردە سياقتى تەحنيكالارمەن تەرەڭدەي توعىسۋىنىڭ ارقاسى.

سانجى قالاسىنىڭ وسى زامانعى مال شارۋاشىلىعى كاسىپ سالاسى باقشاسى تۇرعان اشىلى قازاق اۋىلى جالپاق جاھان تەگىس تانىعان ”التىن ٴسۇت قاينارى بەلدەۋىندە“. ”قازىر كاسىپ سالاسى باقشاسىندا وسى زامانعى مال شارۋاشىلىعى (سانجى) شەكتى سەرىكتەستىگىن قامتىعان كولەمدەنگەن 48 باعىمشىلىق الاڭى، 9 ماشينالاسقان سيىر ساۋۋ زالى بار، ساۋىن سيىر باعىمشىلىعىنىڭ ماشينالاسۋ سالىستىرماسى %70تەن اسىپ، كۇنىنە 250 توننا ساپالى سيىر ٴسۇتى وندىرىلەدى“، ـ دەدى سانجى قالاسى اۋىل شارۋاشىلىعى قارجى قوسۋ، وركەندەتۋ، شارۋاشىلىق شەكتى جاۋاپكەرشىلىك سەرىكتەستىگىنىڭ باس ديرەكتورى ۋاڭ چۇنگو.

جاڭ كاي بىلاي دەپ تانىستىردى: الدا سەرىكتەستىگىمىز سيىر قورا جانە سيىر ساۋۋ زالى، زەردەلى جەلدەتكىش، زەردەلى بۇرىككىش سياقتى جابدىقتاردى ونان ارى جاڭالاپ، جەم ـ ٴشوپ سالاتىن قۇلتەمىردى ەنگىزىپ، اناعۇرلىم ۇنەمدى، اناعۇرلىم جوعارى ٴونىمدى ٴوندىرىس ٴتاسىلىن جۇزەگە اسىرماقشى. مۇنان سىرت، ٴبىرىنشى مەرزىمدىك 5000 سيىر باعىمشىلىعى نىساناسىن ورىنداپ، كۇنىنە 100 توننادان استام ٴسۇت ٴوندىرىپ، شينجياڭ ساۋىن سيىر زەردەلى باعىمشىلىعىنىڭ ۇلگىسىن تۇلعالاۋعا قۇلشىنباقشى.