شي جينپيڭ شانشي شاڭلو قالاسى جاشۇي اۋدانىنداعى ٴبىر جوعارى جىلدامدىقتى تاس جول كوپىرىنىڭ قۇلاعاندىعى جونىندە ماڭىزدى نۇسقاۋ بەردى

　　بار كۇشپەن قاتەردەن اراشالاپ، قۇتقارىپ ـ كومەكتەسىپ، شارلاپ تەكسەرۋدى، قاتەردى الاستاۋدى كۇشەيتىپ، حالىق بۇقاراسىنىڭ ٴومىرىنىڭ، مال ـ مۇلكىنىڭ حاۋىپسىزدىگىن شىنايى قامتاماسىزداندىرۋدى تالاپ ەتتى

　　لي چياڭ بەكىتۋ جازدى

شينحۋا اگەنتتىگىنىڭ 7 ـ ايدىڭ 20 ـ كۇنى بەيجيڭنەن بەرگەن حابارى. 7 ـ ايدىڭ 19 ـ كۇنى ساعات 20 دان 40 مينۋت مولشەرىندە شانشي شاڭلو قالاسى جاشۇي اۋدانىنداعى ٴبىر جوعارى جىلدامدىقتى تاس جول كوپىرى سەل ٴجۇرۋ سەبەبىنەن قۇلاپ، ٴبىرقانشا اۆتوكولىك وزەنگە ٴتۇسىپ كەتتى. 7 ـ ايدىڭ 20 ـ كۇنى ساعات 10عا دەيىن اپات سەبەبىنەن 11 ادام ٴولدى، مۇنان تىس، 30 نەشە ادام ٴىز ـ دەرەكسىز كەتتى.

اپات تۋىلعاننان كەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ باسا ٴمان بەردى ٴارى بىلاي دەپ ماڭىزدى نۇسقاۋ بەردى: شانشي شاڭلو قالاسى جاشۇي اۋدانىنداعى ٴبىر جوعارى جىلدامدىقتى تاس جول كوپىرى سەل ٴجۇرۋ سەبەبىنەن قۇلاپ، كوپ ادام ٴىز ـ دەرەكسىز كەتتى، كەزەكتەگى شۇعىل مىندەت _ بار كۇشپەن قاتەردەن اراشالاپ، قۇتقارىپ ـ كومەكتەسىپ، ٴىز ـ دەرەكسىز كەتكەندەردى مۇمكىندىگىنشە ىزدەپ ـ قۇتقارىپ، ادامداردىڭ ٴولىم ـ ٴجىتىمىن بارىنشا ازايتۋ ٴارى وتباسىنداعىلارىن جۇباتۋ سياقتى سوڭعى جۇمىستاردى ۇيلەسىمدى ويداعىداي ىستەۋ. عىلمي قۇتقارۋعا ٴمان بەرىپ، توڭىرەكتەگى حاۋىپسىزدىك كومەسكى كىناراتتارىن ىجداعاتتىلىقپەن ٴبىر ـ بىرلەي تەكسەرىپ، قوسالقى اپاتتاردان قاتاڭ ساقتانۋ كەرەك. شي جينپيڭ بىلاي دەپ باسا دارىپتەدى: قازىرگى ۋاقىت ٴدال ”7 ـ ايدىڭ سوڭى مەن 8 ـ ايدىڭ باسىنداعى“ تاسقىننان ساقتانۋدىڭ شەشۋشى مەزگىلىنە تۋرا كەلىپ وتىر، وڭىرلەر جانە قاتىستى تاراۋلار باسا ٴمان بەرىپ، جاۋاپكەرشىلىكتى ناقتىلاندىرىپ، باقىلاۋ ـ تەكسەرۋدى، ساقتاندىرۋدى كۇشەيتىپ، شارلاپ تەكسەرۋدى، قاتەردى الاستاۋدى كۇشەيتىپ، ٴتۇرلى شارالاردى ناقتى تياناقتاندىرىپ، ەگجەي ـ تەگجەيلى تياناقتاندىرىپ، حالىق بۇقاراسىنىڭ ٴومىرىنىڭ، مال ـ مۇلكىنىڭ حاۋىپسىزدىگىن شىنايى قامتاماسىزداندىرۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بىلاي دەپ بەكىتۋ جازدى: بارلىق قۇلشىنىسپەن ٴىز ـ دەرەكسىز كەتكەندەردى ىزدەپ ـ قۇتقارىپ، سەبەبىن تەز ارادا تەكسەرىپ انىقتاپ، سوڭعى جۇمىستاردى ۇيلەسىمدى ويداعىداي ىستەۋ، سونداي ـ اق قاتەرلى جاعدايلاردى ٴبىر ـ بىرلەي تەكسەرۋدى، ٴبىر جاقتى ەتۋدى مىقتى يگەرىپ، قوسالقى اپاتتىڭ تۋىلۋىنان قاتاڭ ساقتانۋ كەرەك. بىرەۋى ارقىلى وزگەسىن تۇسپالداپ، ٴار جاقتىڭ جاۋاپكەرشىلىگىن ونان ارى ناقتىلاندىرىپ، ٴتۇرلى حاۋىپ ـ قاتەردى، كومەسكى كىناراتتاردى جالپى بەتتىك ٴبىر ـ بىرلەي تەكسەرىپ، اپات، شىرعالاڭ سياقتىلاردان ساقتانۋدى ويداعىداي ىستەۋ كەرەك.

شي جينپيڭنىڭ نۇسقاۋىنا جانە لي چياڭنىڭ تالابىنا ساي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى جاڭ گوچيڭ قاتىستى تاراۋلارداعى جاۋاپتى جولداستاردى باستاپ، سول جەرگە بارىپ، قۇتقارۋ ـ كومەكتەسۋ، ٴبىر جاقتى ەتۋ قىزمەتىنە جەتەكشىلىك ەتتى. شانشي ولكەسى، شاڭلو قالاسى كۇش ۇيىمداستىرىپ، قۇتقارۋ ـ كومەكتەسۋ، ٴبىر جاقتى ەتۋ قىزمەتىن ورىستەتتى. قازىر سول جەردە قۇتقارۋ ـ كومەكتەسۋ، سوڭعى جۇمىستاردى ٴبىر جاقتى ەتۋ سياقتى قىزمەتتەر جۇرگىزىلۋدە.