جەرگىلىكتى ۋاقىت 11 - ايدىڭ 16 - كۇنى تۇستەن كەيىن مەملەكەت ءتوراعاسى شي جينپيڭ ليمادا امەريكا زۇڭتۇڭى بايدەنمەن ديدارلاستى.

□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

شينحۋا اگەنتتىگىنىڭ 11 ـ ايدىڭ 16 ـ كۇنى ليمادان بەرگەن حابارى (تىلشىلەر حان مو، ياڭ يجۇن). جەرگىلىكتى ۋاقىت 11 ـ ايدىڭ 16 ـ كۇنى تۇستەن كەيىن مەملەكەت ٴتوراعاسى شي جينپيڭ ليمادا امەريكا زۇڭتۇڭى بايدەنمەن ديدارلاستى.

شي جينپيڭ بىلاي دەپ اتاپ كورسەتتى: وتكەن 4 جىلدا جۇڭگو _ امەريكا قارىم ـ قاتىناسى اۋمالى ـ توكپەلى كەزەڭدەردى باستان كەشىرگەنىمەن، الايدا كەڭەس جانە سەلبەستىك تە ورىستەتىپ، جالپى جاقتان ورنىقتىلىقتى ساقتادى. ٴبىز ەكى جاق ۇجىمدارىنا جەتەكشىلىك ەتىپ كەڭەسۋ ارقىلى جۇڭگو _ امەريكا قارىم ـ قاتىناسىنىڭ كەيبىر جەتەكشى پرينسيپتەرىن تۇراقتاندىردىق، ەكى ەلدىڭ تىلدەسۋى مەن سەلبەستىگىنىڭ دۇرىس ارناعا قايتا ورالۋىن بىرگە ىلگەرىلەتتىك، 20 نەشە بايلانىس جاساۋ مەحانيزمىن قالپىنا كەلتىردىك جانە جاڭادان قۇردىق، ديپلوماتيا، حاۋىپسىزدىك، ەكونوميكا ـ ساۋدا، قازىنا، فينانس، ارميا، ەسىرتكىگە تيىم سالۋ، زاڭ اتقارۋ، اۋىل شارۋاشىلىعى، كليمات وزگەرىسى، گۋمانيتارلىق ىستەر سياقتى سالالاردا بەلسەندى جەتىستىكتەرگە قول جەتكىزدىك.

وتكەن 4 جىلداعى تاجىريبەلەر قورىتىندىلاۋعا تاتيدى، تولعانىستاردى ەستە ساقتاۋعا تۋرا كەلەدى، مەنىڭشە، كەمىندە مىناداي بىرنەشە ٴتۇيىن بار:

ٴبىرىنشى، دۇرىس ستراتەگيالىق تانىم بولۋ كەرەك. ”زۋسيديدەس شىرعاسى“ تاريحتىڭ جازمىشى ەمەس، ”جاڭا قىرعي قاباق سوعىس“ جۇرگىزۋگە بولمايدى، ەشكىم دە جەڭە المايدى، جۇڭگوعا قاراتقان شاۋجايلاۋ پاراساتتىلىق ەمەس، ولاي ىستەۋگە بولمايدى، ٴتىپتى، ىسكە اسپايدى.

ەكىنشى، ايتقانىن ىستەۋ، ىستەگەننەن ناتيجە شىعارۋ كەرەك. ادامدا سەنىمدىلىك بولماسا تابان تىرەپ تۇرا المايدى. جۇڭگو جاق قاشاندا ايتقانىن ىستەيدى، الايدا ەگەر امەريكا جاقتىڭ قاشاندا ايتقانى ٴبىر باسقا، ىستەگەنى ٴبىر باسقا بولسا، وندا امەريكانىڭ وبرازىنا وتە ٴتيىمسىز بولادى، سونداي ـ اق ەكى جاقتىڭ ٴوزارا سەنىمىنە دە زيان جەتكىزەدى.

ٴۇشىنشى، تەپە ـ تەڭ مامىلە جاساۋ كەرەك. جۇڭگو _ امەريكا ەكى ٴىرى ەلدىڭ بارىس ـ كەلىسىندە ٴارقانداي ٴبىر جاقتىڭ ٴوزىنىڭ تالاپ ـ تىلەگى بويىنشا قارسى جاعىن وزگەرتۋىنە بولمايدى، اتالمىش ”ناقتى قۋات ورنىن“ نەگىزگە الىپ قارسى جاعىن شەكتەۋىنە دە بولمايدى، ٴوز ەلىنىڭ وزىق ورنىن ساقتاۋ ٴۇشىن قارسى جاعىن ورىندى دامۋ ۇقىعىنان ماقرۇم ەتۋىنە ٴتىپتى دە بولمايدى.

ٴتورتىنشى، قىزىل سىزىققا، تومەنگى شەككە سايىس جاريالاۋعا بولمايدى. جۇڭگو _ امەريكا ەكى ٴىرى ەل ٴىشىنارا قايشىلىقتار مەن الاۋىزدىقتاردان اۋلاق بولا المايدى، الايدا ٴبىر ـ ٴبىرىنىڭ وزەكتى مۇددەسىنە زيان جەتكىزۋىنە بولمايدى، قاقتىعىسۋعا، قارسىلاسۋعا ٴتىپتى دە بولمايدى. ٴبىر جۇڭگو پرينسيبى جانە جۇڭگو مەن امەريكانىڭ ٴۇش بىرلەسكەن مازمۇنداماسى _ ەكى جاقتى قارىم ـ قاتىناستىڭ ساياسي نەگىزى، ٴسوز جوق، باتىل بويسۇنۋ كەرەك. تايۋان ماسەلەسى، دەموكراتيا، ادامدىق ۇقىق، جول ٴتۇزىمى، دامۋ ۇقىعى _ جۇڭگو جاقتىڭ 4 قىزىل سىزىعى، وعان سايىس جاريالاۋعا جول بەرىلمەيدى. بۇلار جۇڭگو _ امەريكا قارىم ـ قاتىناسىنداعى ەڭ ماڭىزدى قورعانىس قالتقىسى جانە حاۋىپسىزدىك تورى.

بەسىنشى، كوبىرەك تىلدەسۋ جانە سەلبەسۋ كەرەك. قازىرگى جاعدايدا جۇڭگو مەن امەريكا ەكى ەلدىڭ ورتاق مۇددەسى ازايمادى، قايتا ٴتىپتى دە كوبەيدى. مەيلى ەكونوميكا ـ ساۋدا، اۋىل شارۋاشىلىعى، ەسىرتكىگە تيىم سالۋ، زاڭ اتقارۋ، الەۋمەتتىك دەنساۋلىق ساقتاۋ سياقتى سالالاردا بولسىن، الدە كليمات وزگەرىسى، جاساندى زەردە سياقتى الەمدىك سىن ـ سايىستار الدىندا بولسىن، سونداي ـ اق حالىقارالىق قولامتالى ماسەلەلەردە بولسىن، ٴبارى دە جۇڭگو مەن امەريكانىڭ سەلبەسۋىن قاجەت ەتەدى. جۇڭگو _ امەريكا ەكى جاق سەلبەستىك ٴتىزىمىن كەڭەيتىپ جاساپ، سەلبەستىك بالكۇلشەسىن ۇلكەيتىپ جاساپ، سەلبەسىپ تەڭ يگىلىككە كەنەلۋدى جۇزەگە اسىرۋى كەرەك.

التىنشى، حالىقتىڭ تىلەگىنە جاۋاپ قايتارۋ كەرەك. جۇڭگو ـ امەريكا قارىم ـ قاتىناسىن دامىتۋدا باستان ـ اياق ەكى ەل حالقىنىڭ قۇت ـ ىرىسىن كوزدە ۇستاپ، ەكى ەل حالقىنىڭ كۇش ـ قۋاتىن شوعىرلاندىرۋ كەرەك. جۇڭگو _ امەريكا ەكى جاق ەكى ەل ادامدارىنىڭ بارىس ـ كەلىسى مەن گۋمانيتارلىق اۋىس ـ كۇيىسىنە كوپىر سالىپ، جول جاساۋى، سونداي ـ اق بوگەتتەر مەن كەدەرگىلەردى الاستاۋى، ”بەزىلدەك اسەرىن“ قولدان جاساماۋى كەرەك.

جەتىنشى، ٴىرى ەل جاۋاپكەرشىلىگىن ايگىلەۋ كەرەك. جۇڭگو مەن امەريكا ەكى ەل ادامزاتتىڭ بولاشاعى مەن تاعدىرىن قاي ـ قاشان دا ويلاستىرىپ، دۇنيە ٴجۇزىنىڭ بەيبىتشىلىگى ٴۇشىن جاۋاپكەرشىلىك ارقالاۋى، جەر شارىن الەۋمەتتىك ونىمدەرمەن قامداۋى، دۇنيە ٴجۇزىنىڭ ىنتىماعى ٴۇشىن بەلسەندى رول اتقارۋى، مۇندا ٴتيىمدى ىقپالداستىق ورىستەتۋى، ٴبىر ـ ٴبىرىن شىعىنداتپاۋى، باسقا ەلدەردى ٴبىر تاراپتى تاڭداپ سول جاقتا تۇرۋعا زورلاماۋى كەرەك.

شي جينپيڭ مىنالاردى باسا دارىپتەدى: جۇڭگو _ امەريكا قارىم ـ قاتىناسىنىڭ دامۋ بارىسى جۇڭگو مەن امەريكا ديپلوماتيالىق قارىم ـ قاتىناس ورناتقان 45 جىلدان بەرگى تاجىريبەلەر مەن تولعانىستاردى دالەلدەدى. ەگەر ەكى ەل سەرىكتەس بولىپ، پارىقتاردى ساقتاپ، ورتاقتىققا ۇمتىلسا، جۇڭگو _ امەريكا قارىم ـ قاتىناسى باياندى دامۋعا قول جەتكىزە الادى. ەگەر قارسى جاقتى قارسىلاس ساناپ، قاتەرلى باسەكەلەسسە، جۇڭگو _ امەريكا قارىم ـ قاتىناسى ساتسىزدىككە ۇشىرايدى، ٴتىپتى، كەرى كەتەدى. بۇگىنگى دۇنيە ٴجۇزى اۋمالى ـ توكپەلى بولىپ، قاقتىعىس ٴجيى تۋىلىپ، ادامزات بۇرىن بولىپ كورمەگەن سىن ـ سايىسقا ٴدوپ كەلىپ وتىر. ٴىرى ەلدەردىڭ باسەكەسى ٴداۋىردىڭ نەگىزگى بوياۋى بولماۋى كەرەك، ىنتىماقتاسا سەلبەسكەندە عانا، ۋاقىتتىق قيىندىقتى بىرگە جەڭۋگە بولادى. ”بايلانىستى الشاقتاتىپ، تىزبەكتى ٴۇزۋ“ ماسەلەنى شەشۋدىڭ جولى ەمەس، ٴوزارا تيىمدىلىك جەتكىزىپ سەلبەسكەندە عانا بىرگە دامۋعا بولادى. ”شاعىن اۋلاعا بيىك داۋال تۇرعىزۋ“ ٴىرى ەلدىڭ ىستەيتىنى ەمەس، اشىق ۇستاپ بىرگە يگىلىكتەنگەندە عانا ادامزاتقا باقىت جاراتۋعا بولادى. جۇڭگو _ امەريكا قارىم ـ قاتىناسىنىڭ ورنىقتى دامۋى ەكى ەل حالقىنا دا، ادامزاتتىڭ بولاشاعى مەن تاعدىرىنا دا سايادى. جۇڭگو مەن امەريكا ەكى ٴىرى ەلدىڭ دۇرىس وتاسۋ جولىن ۇزدىكسىز قاراستىرىپ، جۇڭگو مەن امەريكا سىندى ەكى ەلدىڭ وسى عالامشاردا ۇزاق ۋاقىت بەيبىت قاتار ٴومىر ٴسۇرۋىن جۇزەگە اسىرىپ، دۇنيە جۇزىنە كوبىرەك ايقىندىق ازىرلەپ، وڭ ەنەرگيا ۇستەۋ كەرەك.

شي جينپيڭ بىلاي دەپ باسا دارىپتەدى: جۇڭگو جاقتىڭ جۇڭگو _ امەريكا قارىم ـ قاتىناسىنىڭ ورنىقتى، اقاۋسىز، باياندى دامۋىنا كۇش سالۋ نىساناسى وزگەرگەن جوق، ٴوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىككە كەنەلۋ بويىنشا جۇڭگو _ امەريكا قارىم ـ قاتىناسىن ٴبىر جايلى ەتۋ پرينسيبى وزگەرگەن جوق، ٴوزىنىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعاۋ تۇرعىسى وزگەرگەن جوق، جۇڭگو مەن امەريكا حالقىنىڭ ٴداستۇرلى دوستىعىن جالعاستىرۋ تىلەگى وزگەرگەن جوق. جۇڭگو جاق امەريكا جاقپەن ۇزدىكسىز تىلدەسۋدى ساقتاپ، سەلبەستىكتى كەڭەيتىپ، الاۋىزدىقتى مەڭگەرىپ، جۇڭگو _ امەريكا قارىم ـ قاتىناسىندا وڭاي ـ وسپاق كەلمەگەن ورنىقتى جاعدايدى جالعاستىرا بەرۋدى قالايدى.

شي جينپيڭ تايۋان، ەكونوميكا ـ ساۋدا، عىلىم ـ تەحنيكا، ينتەرنەت حاۋىپسىزدىگى، نانحاي تەڭىزى، ۋكراينا داعدارىسى جانە چاۋشيان تۇبەگى سياقتى ماسەلەلەر جونىندە جۇڭگو جاقتىڭ تۇرعىسىن بايىمدادى.

شي جينپيڭ بىلاي دەپ باسا دارىپتەدى: ”تايۋاندى دەربەستەندىرۋدى“ كوزدەيتىن بولشەكتەۋ ارەكەتى تايۋان بۇعازىنىڭ بەيبىتشىلىگىمەن، ورنىقتىلىعىمەن مۇلدە وتاسا المايدى. امەريكا جاق تايۋان بۇعازىنىڭ بەيبىتشىلىگىن قورعاماق بولسا، ماڭىزدىسى، لاي چيڭدى مەن مينجيڭداڭ بيلەۋشىلەرىنىڭ ”تايۋاندى دەربەستەندىرۋ“ ناعىز بەينەسىن جىعا تانىپ، تايۋان ماسەلەسىن ەرەكشە بايىپتىلىقپەن ٴبىر جاقتى ەتىپ، ”تايۋاندى دەربەستەندىرۋگە“ ايقىن قارسى تۇرىپ، جۇڭگونىڭ بەيبىت بىرلىككە كەلۋىن قولداۋى كەرەك.

جۇڭگو حالقىنىڭ دامۋ ۇقىعىن تارتىپ الۋعا بولمايدى، ەسكەرۋسىز قالدىرۋعا بولمايدى. ٴار ەلدىڭ مەملەكەت حاۋىپسىزدىگىن قورعاۋ قاجەتى بار، مەملەكەت حاۋىپسىزدىگى ۇعىمىن جالپىلاندىرۋعا بولمايدى، وسىنى جەلەۋ ەتىپ باسقا ەلگە جات نيەتپەن شەك قويىپ، قىسپاققا الۋعا ٴتىپتى دە بولمايدى.

ايتىلمىس جۇڭگو ينتەرنەتتە شابۋىل جاسادى دەگەننىڭ دالەلى دە، قيسىنى دا جوق. جۇڭگو جاقتىڭ ٴوزى حالىقارالىق ينتەرنەت شابۋىلىنىڭ زياندالۋشىسى، ٴارقانداي فورماداعى ينتەرنەتتىك شابۋىلعا باستان ـ اياق قارسى تۇرىپ جانە وعان سوققى بەرىپ كەلەدى.

جۇڭگو جاق نانحاي تەڭىزىنىڭ تەرريتوريا يەلىك ۇقىعى مەن تەڭىز _ مۇحيتتاعى ۇقىق ـ مۇددەسىن باتىل قورعايدى. ىسكە قاتىستى جاقتاردىڭ تىلدەسۋى، كەڭەسۋى _ قاشاندا نانحاي تەڭىزى تالاس ـ تارتىسىن مەڭگەرۋدىڭ ەڭ تاماشا ٴتاسىلى. امەريكا نانشا ارالى مارجان قۇزىنا قاتىستى ەكى جاقتى تالاس ـ تارتىسقا ارالاسپاۋى كەرەك، ارانداتۋشىلىق قىزبالىعىن ىرقىنا جىبەرمەۋى جانە ونى قولداماۋى كەرەك.

جۇڭگو جاقتىڭ ۋكراينا ماسەلەسىندەگى تۇرعىسى مەن ٴىس ـ ارەكەتى باستان ـ اياق اشىق تا ايقىن، اتاپ ايتقاندا، ۇزدىكسىز راقايلاستىرۋعا، تاتۋلاسۋعا ٴناسيحاتتاپ كەلىسسوزدى جەبەپ، بەيبىتشىلىك ٴۇشىن شاپقىلاپ، جاعدايدىڭ باسەڭدەۋىن ىلگەرىلەتۋ جولىندا قۇلشىنىپ كەلەدى. جۇڭگو جاق چاۋشيان تۇبەگىندە سوعىس تۋدىرۋعا، بىلىقپالىق تۋدىرۋعا جول بەرمەيدى، جۇڭگونىڭ ستراتەگيالىق حاۋىپسىزدىگى مەن وزەكتى مۇددەسىنە حاۋىپ توندىرۋگە قاراپ وتىرا المايدى.

بايدەن مىنالاردى ٴبىلدىردى: امەريكا _ جۇڭگو قارىم ـ قاتىناسى دۇنيە جۇزىندەگى ەڭ ماڭىزدى ەكى جاقتى قارىم ـ قاتىناس رەتىندە، ەكى ەل حالقىنا عانا ەمەس، دۇنيە ٴجۇزىنىڭ بولاشاعىنا دا سايادى. امەريكا _ جۇڭگو باسەكەسىنىڭ قاقتىعىسقا اينالماۋىنا شىنايى كەپىلدىك ەتۋ _ امەريكا _ جۇڭگو ەكى ەل ۇكىمەتىنىڭ ەكى ەل حالقى جانە دۇنيە ٴجۇزى الدىندا ارقالاعان جاۋاپكەرشىلىگى. وتكەن 4 جىلدا امەريكا مەن جۇڭگو ەكى جاق بىرگە قۇلشىنىپ، ٴىشىنارا تىلدەسۋ مەن بايلانىس جاساۋ ارناسىن قالپىنا كەلتىردى جانە جاڭادان ورناتتى، بۇل ەكى جاقتىڭ ديپلوماتيا جانە حاۋىپسىزدىك ۇجىمدارىنىڭ ۇنەمىلىك ستراتەگيالىق بايلانىستى ساقتاپ، بۇكپەسىز، ىشكەرىلەي تىلدەسۋ ورىستەتىپ، ەكى جاقتىڭ ٴوزارا ٴتۇسىنىسۋىن نىعايتۋدا ٴتيىمدى رول اتقارۋىن قامتيدى. اسىرەسە، ٴبىز ٴبىر جىلدىڭ الدىندا سان _ فرانسيسكودا ديدارلاسقاننان بەرى، ەكى جاق اسكەري ىستەر، ەسىرتكىگە تيىم سالۋ، زاڭ اتقارۋ، جاساندى زەردە، كليمات وزگەرىسى، گۋمانيتارلىق اۋىس ـ كۇيىس سياقتى جاقتاردا ناقتى جەتىستىكتەرگە قول جەتكىزدىك. امەريكا _ جۇڭگو ەكى جاق ٴبىر ـ ٴبىرىنىڭ 2026 ـ جىلعى ازيا _ تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ٴماجىلىسىن جانە 20 ەل توبى باسشىلار ٴماجىلىسىن ۇيىمداستىرىپ وتكىزۋىن ٴوزارا قولدايدى، بۇل امەريكا _ جۇڭگو سەلبەستىگىنىڭ حالىققا قۇت ـ ىرىس الا كەلەتىندىگىن ايگىلەدى. امەريكا ”جاڭا قىرعي قاباق سوعىس“ جۇرگىزۋدى قاراستىرمايدى، جۇڭگونىڭ ٴتۇزىلىسىن وزگەرتۋدى قاراستىرمايدى، وداقتاستىق قارىم ـ قاتىناستى كۇشەيتۋ ارقىلى جۇڭگوعا قارسى تۇرۋدى قاراستىرمايدى، ”تايۋاندى دەربەستەندىرۋدى“ قولدامايدى، جۇڭگومەن قاقتىعىسۋ نيەتى جوق، تايۋان ماسەلەسىنەن پايدالانىپ جۇڭگومەن باسەكەلەسپەيدى. امەريكا جاق تا ٴبىر جۇڭگو ساياساتىن ۇزدىكسىز اتقارادى. امەريكا جاق وتپەلى كەزەڭدە جۇڭگو جاقپەن بايلانىس جاساۋدى، تىلدەسۋدى كۇشەيتىپ، ٴبىر ـ ٴبىرى جونىندەگى تانىمدى نىعايتىپ، الاۋىزدىقتى جاۋاپكەرشىلىكپەن مەڭگەرۋدى قالايدى.

ەكى ەلدىڭ مەملەكەت باسشىلارى ەكى جاقتىڭ جۇڭگو _ امەريكا قارىم ـ قاتىناسىنىڭ جەتەكشى پرينسيبى جونىندە كەلىسكەن 7 ٴتۇرلى ورتاق تانىمدى، ياعني ٴوزارا قۇرمەت ەتۋدى، بەيبىت قاتار تۇرۋدى، بايلانىستى ساقتاۋدى، قاقتىعىستان ساقتانۋدى، «بىرلەسكەن مەملەكەتتەر ۇيىمىنىڭ ۆستاۋىنا» بويسۇنۋدى، ورتاق مۇددەسى بار سالالاردا سەلبەستىك ورىستەتۋدى، ەكى جاقتىڭ قارىم ـ قاتىناسىنداعى باسەكە فاكتورلارىن جاۋاپكەرشىلىكپەن باسقارۋ ـ مەڭگەرۋدى قايتالاي دارىپتەدى. ەكى جاق وسى پرينسيپتەردى ۇستانىپ، جۇڭگو _ امەريكا قارىم ـ قاتىناسىن ۇزدىكسىز ورنىقتىرىپ، ورنىقتى ٴوتۋدى جۇزەگە اسىرۋدى قالايدى.

ەكى ەلدىڭ مەملەكەت باسشىلارى جۇڭگو مەن امەريكانىڭ ستراتەگيالىق پىكىرلەسۋ، ديپلوماتيا، حاۋىپسىزدىك ۇجىمدارىنىڭ ۇنەمىلىك بارىس ـ كەلىسى، ەكى ەل ارمياسى، ەكونوميكا ـ ساۋدا، فينانس سياقتى سالالارداعى تىلدەسۋ مەحانيزمىنىڭ ماڭىزدى رولىن بەلسەندى باعالاپ، پىكىرلەسۋ جاعدايىن ۇزدىكسىز ساقتاپ، ماكرولىق ەكونوميكا ساياساتىن سايكەستىرۋدى كۇشەيتۋگە قوسىلدى. ەكى ەلدىڭ مەملەكەت باسشىلارى سان _ فرانسيسكو ديدارلاسۋىنان بەرگى ەسىرتكىگە تيىم سالۋ، كليمات وزگەرىسى، جاساندى زەردە، گۋمانيتارلىق اۋىس ـ كۇيىس سياقتى سالالارداعى تىلدەسۋدە، سەلبەستىكتە قول جەتكىزگەن بەلسەندى ىلگەرىلەۋشىلىكتەردى قايىرىلا ەسكە الدى.

ەكى ەلدىڭ مەملەكەت باسشىلارى بىلاي دەپ قارادى: ەكى جاق جاساندى زەردەنى باسقارۋ جونىندە بۇكپەسىز جانە سىندارلى تىلدەسۋ وتكىزىپ، بىرلەسكەن مەملەكەتتەر ۇيىمى جينالىسىندا وزدەرىنىڭ جاساندى زەردە جونىندەگى قارارلارىنا ٴوزارا بىرگە قول قويىپ، حالىقارالىق سەلبەستىكتى كۇشەيتۋدىڭ قاجەتتىلىگىن، جاساندى زەردەنىڭ ىزگىلىككە بەت الۋىن، جالپىعا ٴتيىمدى بولۋىن جەبەۋ كەرەكتىگىن، ادامزاتتىڭ يادرو قارۋىنان پايدالانۋىن تىزگىندەۋ جونىندەگى قاۋلىنى ساقتاۋ كەرەكتىگىن تۇراقتاندىردى.

ەكى ەلدىڭ مەملەكەت باسشىلارى بىردەي وسى رەتكى ديدارلاسۋ بۇكپەسىز، تەرەڭ، سىندارلى بولدى، پىكىرلەسۋدى، بايلانىس جاساۋدى ۇزدىكسىز ساقتاۋدى قالايمىز دەپ قارادى.

ساي چي، ۋاڭ ي قاتارلىلار كەزدەسۋگە قاتىناستى.