شينجياڭنىڭ بۇقارالىق ”ٴۇش ۇلكەن دوپ“ بىرلەسكەن جارىسىنىڭ باسكەتبول شەشۋشى جارىسى اياقتالدى

ىلە وبلىسىنىڭ ۋاكىلدەر كومانداسى ەرلەر گرۋپپاسى بويىنشا اعا جۇلدەگەر بولدى

سۋرەتتە: ىلە وبلىسىنىڭ ۋاكىلدەر كومانداسى ەرلەر گرۋپپاسىنىڭ اعا جۇلدەگەرى بولدى.

سۋرەتپەن ىلە وبلىستىق باسكەتبولشىلار قوعامى قامدادى

ٴتىلشىمىز ليۋ چۇنشيڭ حابارلايدى. قاشقار قالالىق دەنە تاربيە ورتالىعىندا ”شينجياڭ جاقسى جەر . انار ٴدانى ساۋىتى“ 2024 - جىلعى شينجياڭنىڭ بۇقارالىق ”ٴۇش ۇلكەن دوپ“ بىرلەسكەن جارىسىنىڭ باسكەتبول شەشۋشى جارىسى اياقتالدى. قيان - كەسكى باسەكە ارقىلى ىلە وبلىسىنىڭ ۋاكىلدەر كومانداسى حوتان ايماعىنىڭ ۋاكىلدەر كومانداسىن جەڭىپ، ەرلەر گرۋپپاسى بويىنشا اعا جۇلدەگەرى بولدى.

بۇل 10 ـ ايدىڭ 27 ـ كۇنى ىلە وبلىستىق ۋاكىلدەر كومانداسى 2024 ـ جىلعى شينجياڭنىڭ بۇقارالىق ”ٴۇش ۇلكەن دوپ“ بىرلەسكەن جارىسىنىڭ ەرلەر گرۋپپاسى بويىنشا اعا جۇلدەگەر بولعاننان كەيىن تاعى دا ەرلەر باسكەتبول شەشۋشى جارىسى بويىنشا اعا جۇلدەگەر بولىپ، ىلە وبلىسىنىڭ دەنە تاربيە ىستەرىنىڭ دامۋىنا تاعى دا تىڭ ۇلەس قوسقان بولدى.

وسى رەتكى باسكەتبول شەشۋشى جارىسى 11 ـ ايدىڭ 10 ـ كۇنى باستالدى، شينجياڭ بويىنشا 14 كومانداداعى 196 باسكەتبول اۋەسكەرى 3 كۇن بويى كورەرمەندەرگە 31 مايدان تارتىمدى باسەكە سيلادى. ەرلەر گرۋپپاسى جارىسىندا ىلە وبلىسى، قىزىلسۋ قىرعىز اۆتونوميالى وبلىسى، تۇرپان قالاسى، بۇراتالا موڭعۇل اۆتونوميالى وبلىسى سىندى 4 كوماندا ٴبىر گرۋپپاعا ٴبولىندى، ىلە وبلىسىنىڭ ۋاكىلدەر كومانداسى گرۋپپاداعى قارسىلاستارىنىڭ ٴبارىن جەڭىپ، گرۋپپادا ٴبىرىنشى بولىپ جارتىلاي شەشۋشى جارىسقا جولداما الدى. جارتىلاي شەشۋشى جارىستا ىلە وبلىسىنىڭ ۋاكىلدەر كومانداسى 39:43 ەسەبىمەن سانجى وبلىسىنىڭ ۋاكىلدەر كومانداسىن جەڭدى. اعا جۇلدەگەر جانە جۇلدەگەرلەر جارىسىندا ىلە وبلىسىنىڭ ۋاكىلدەر كومانداسى 80:65 ناتيجەمەن حوتان ايماعىنىڭ ۋاكىلدەر كومانداسىن جەڭىپ، باسكەتبول شەشۋشى جارىسىنىڭ اعا جۇلدەگەرى بولدى. وسىدان بۇرىن 10 - ايدىڭ 23 - كۇنى ”شينجياڭ جاقسى جەر“ اتىنداعى 2024 - جىلعى شينجياڭنىڭ بۇقارالىق ”ٴۇش ۇلكەن دوپ“ بىرلەسكەن جارىسىنىڭ سولتۇستىك شينجياڭ اۋماعىنداعى باسكەتبول شەشۋشى جارىسىندا ىلە وبلىسىنىڭ ۋاكىلدەر كومانداسى جۇلدەگەرلىككە يە بولعان - دى.

ىلە وبلىسى ۋاكىلدەر كومانداسىنىڭ جەتەكشىسى ۋي گاڭ بىلاي دەدى: ”وسى رەتكى جارىستا ٴبىز اعا جۇلدەگەر بولدىق، بۇل ٴبىزدىڭ بارلىق سپورتشىلارىمىزدىڭ 2 جارىم كۇن قيان ـ كەسكى سايىستا قول جەتكىزگەن ناتيجەسى، مەن بۇعان ەرەكشە تەبىرەندىم“.

وسى رەتكى باسكەتبول شەشۋشى جارىسىنىڭ ەرلەر گرۋپپاسى جارىسىندا حوتان ايماعىنىڭ ۋاكىلدەر كومانداسى جۇلدەگەر، تۇرپان قالاسىنىڭ ۋاكىلدەر كومانداسى ٴۇشىنشى بولدى؛ ايەلدەر گرۋپپاسى جارىسىندا ٴۇرىمجى قالاسىنىڭ ۋاكىلدەر كومانداسى اعا جۇلدەگەر، قارامايلى قالاسىنىڭ ۋاكىلدەر كومانداسى جۇلدەگەر، بايىنعولين موڭعۇل اۆتونوميالى وبلىسىنىڭ ۋاكىلدەر كومانداسى كىشى جۇلدەگەر بولدى.

وسى رەتكى باسكەتبول شەشۋشى جارىسىندا اعا جۇلدەگەرلىكتەن سىرت، سوڭعى ەكى جىلدان بەرى ىلە وبلىسى ۋاكىلدەر كومانداسىنىڭ بۇكىل شينجياڭداعى كوپتەگەن باسكەتبول جارىستارىندا ناتيجەسى ايتارلىقتاي بولدى. ىلە وبلىستىق باسكەتبول قوعامىنىڭ باس حاتشىسى ەرجان اكىمبەك ۇلى بىلاي دەپ تانىستىردى: 2023 - جىلى 4 - ايدا  شينجياڭ بويىنشا قارامايلى قالاسىندا وتكىزىلگەن باسكەتبول ۇسىنىس جارىسىندا ىلە وبلىسىنىڭ ۋاكىلدەر كومانداسى 3 - بولدى؛ 2024 - جىلى 1 - ايدا سانجى قالاسىندا وتكىزىلگەن اۆتونوميالى رايوننىڭ ”التىن ىسقىرىق ساۋىتى“ باسكەتبول جارىسىندا ىلە وبلىسىنىڭ ۋاكىلدەر كومانداسى 3 - بولدى؛ 2024 - جىلى 8 - ايدا شينجياڭ بيڭتۋان مەن جەرگىلىكتى ورىن توعىسقان كاسىپتەن سىرتقى باسكەتبول بىرلەسكەن جارىسىنىڭ جالپى شەشۋشى جارىسىندا ىلە وبلىسىنىڭ ۋاكىلدەر كومانداسى 2 - بولدى.

سوڭعى جىلداردان بەرى ىلەدە باسكەتبول الاڭى قۇرىلعىلارىنىڭ بارعان سايىن كەمەلدەنۋى، ”قىستاق BA“ سياقتى جارىس ىستەرىنىڭ كوركەيۋى باسكەتبول سپورتىن ىلەنىڭ ٴارقايسى قىستاق - قالاشىقتارىنا دەيىن جەتكىزىپ، بۇقاراعا اناعۇرلىم كوپ باقىت سەزىمى مەن تابىس سەزىمىن سيلادى. ىلە وبلىستىق باسكەتبول قوعامى ٴتۇرلى جارىس جانە تاربيەلەۋ كۋرستارىن وتكىزدى، بۇل الەۋمەتتىك يگىلىك سيپاتتى جاتتىقتىرۋشىلاردى تاربيەلەۋ كۋرسى، الەۋمەتتىك يگىلىك سيپاتتى 2 - دارەجەلى تورەشىلەردى تاربيەلەۋ كۋرسى، تۇڭعىش كەزەكتى 3V3 ەرلەر باسكەتبول ۇسىنىس جارىسى، تۇڭعىش كەزەكتى ”باسكەتبول قوعامى ساۋىتى“ شاعىن باسكەتبول جارىسى سياقتىلاردى قامتيدى، سونداي - اق شاپشال سىبە اۆتونوميالى اۋدانىنىڭ ”قىستاق BA“ باسكەتبول جارىسىن، قورعاس اۋدانىنىڭ  ”قىستاق BA“ جارىسىن سەلبەسىپ وتكىزدى؛ بيىل 7 ـ ايدا قۇلجا قالاسىمەن سەلبەسىپ، ”ٴتورت ەل“ جاستارىنىڭ باسكەتبول ۇسىنىس  جارىسى مەن سولتۇستىك شينجياڭداعى ”ٴتورت قالانىڭ“ باسكەتبول جۇلدەگەرلىگىنە تالاسۋ جارىسىن وتكىزىپ، كورەرمەندەرگە تارتىمدى حالىقارالىق باسكەتبول سالتاناتىن سيلادى.

 ىلە وبلىسى باي مازمۇندى باسكەتبول جارىسىن ورىستەتۋ ارقىلى دەنە شىنىقتىرۋدى جالپىلاستىرۋ نەگىزىندە، باسكەتبول سپورتىنىڭ جالپى تۇلعالىق دەڭگەيىن، باسەكەلىك دەڭگەيىن جوعارىلاتىپ، وسى رەت 2024 - جىلعى شينجياڭنىڭ بۇقارالىق ”ٴۇش ۇلكەن دوپ“ بىرلەسكەن جارىسىنىڭ باسكەتبول شەشۋشى جارىسىندا اعا جۇلدەگەر بولدى. سونىمەن بىرگە، ىلە وبلىسى دا اناعۇرلىم كوپ باسكەتبول زاپاس كۇشتەرىن بەلسەنە جەتىلدىردى، سوڭعى جىلداردان بەرى ٴبىر توپ جالىندى جاس باسكەتبولشىلار كوزگە ٴتۇستى، مىسالى، 2023 ـ جىلى 1 - ايدىڭ 18 - كۇنى جۇڭگو باسكەتبول قوعامى جاريالاعان ەڭ جاڭا 1 ـ كەزەكتى ايەلدەر باسكەتبول U19 مەملەكەتتىك جاستار كومانداسىنىڭ شوعىرلى جاتتىعۋ تىزىمدىگىنە 17 جاستاعى ىلەلىك بويجەتكەن، شينجياڭ ايەلدەر باسكەتبول جاستار كومانداسىنىڭ مۇشەسى رايسۇلا ابدىكەرىم ەندى، بۇل 2018 ـ جىلى كوماندا قايتا قۇرىلعاننان كەيىن مەملەكەتتىك جاستار كومانداسىنا تاڭدالعان تۇڭعىش باسكەتبولشى، قازىر ول شينجياڭ تيانشان ايەلدەر باسكەتبول كلۋبىندا ونەر كورسەتۋدە؛ 20 جاستاعى ٴۇمىت سەيداقتىڭ بويىنىڭ بيىكتىگى 1.96 مەتر، قورعاۋشى، جارتىلاي شابۋىلداۋشى، قازىر CBA گۋاڭجوۋ لۇڭشى باسكەتبول كلۋبىندا ونەر كورسەتەدى، بيىل مەملەكەتتىك U19 جاستار باسكەتبول بىرلەسكەن جارىسىنىڭ ٴبىرىنشى كەزەڭدىك جارىسىنا قاتىناسىپ، ۇزدىك باسكەتبولشىلار قاتارىنا تاڭدالىپ، ٴار مايدان سايىن ورتا ەسەپپەن 22 ٴنومىر الىپ، ”ۇزدىك ۇپاي الۋشى“ بولىپ باعالاندى.