شينحۋا اگەنتتىگىنىڭ 1 ـ ايدىڭ 22 ـ كۇنى بەيجيڭنەن بەرگەن حابارى. تاياۋدا جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس «اۋىل ـ قىستاقتى جاپپاي گۇلدەندىرۋ جوباسىن (2024 _ 2027 ـ جىل)» باسىپ تاراتتى ٴارى حابارلاندىرۋ شىعارىپ، جەر ـ جەردەن، تاراۋلاردان ٴىس جۇزىندىكپەن ۇشتاستىرىپ مۇقيات دايەكتىلەندىرۋدى، تياناقتاندىرۋدى تالاپ ەتتى.

«جوبادا» مىنالار اتاپ كورسەتىلدى: اۋىل ـ قىستاقتى گۇلدەندىرۋ ستراتەگياسىن اتقارۋ — شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارتيا مەن مەملەكەت ىستەرى جالپى جاعدايىن كوزدە ۇستاپ جاساعان كەلەلى شەشىمى، جاڭا داۋىردەگى جاڭا جورىقتاعى اۋىل شارۋاشىلىعى، اۋىل ـ قىستاق، شارۋالار قىزمەتىنىڭ باس تۇتقاسى.

شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، اۋىل شارۋاشىلىعىندا قۋاتتى ەل قۇرۋ نىساناسىن كوزدەپ، ”مىڭ قىستاق ۇلگى كورسەتۋ، 10 مىڭ قىستاقتى رەتتەۋ ـ وڭاۋ ينجەنەرياسى“ تاجىريبەسىن ۇيرەنىپ، قولدانىپ، اۋىل ـ قىستاقتى جاپپاي گۇلدەندىرۋدى ىلگەرىلەتۋدىڭ ۇزاق ٴونىمدى مەحانيزمىن اقاۋسىزداندىرىپ، مەملەكەتتىڭ استىق حاۋىپسىزدىگىنە شىنايى كەپىلدىك ەتۋدى، اۋىل ـ قىستاق حالقىندا كولەمدى قايتا كەدەيلەسۋ، كەدەيلەسۋ تۋىلماۋىنا شىنايى كەپىلدىك ەتۋدى تومەنگى شەك ەتىپ، كەدەيلىكتەن ارىلتۋدان قامال الۋ جەتىستىگىن بەكەمدەپ، كەڭەيتىپ، اۋىل ـ قىستاق كاسىپ سالاسىنىڭ دامۋ دەڭگەيىن جوعارىلاتۋدى، اۋىل ـ قىستاق قۇرىلىسى دەڭگەيىن جوعارىلاتۋدى، اۋىل ـ قىستاقتى باسقارۋ دەڭگەيىن جوعارىلاتۋدى ماڭىزدى ٴتۇيىن ەتىپ، عىلىم ـ تەحنولوگيا جانە رەفورما سىندى قوس تەگەرشىك ارقىلى دەم بەرۋدى كۇشەيتىپ، شارۋالاردىڭ كىرىسىن ارتتىرۋ شارالارىن كۇشەيتىپ، اۋىل ـ قىستاقتاعى كاسىپ سالاسى، دارىندى، مادەنيەت، ەكولوگيا، ۇيىم سىندى ”بەستى گۇلدەندىرۋدى“ تىڭعىلىقتى ىلگەرىلەتىپ، اۋىل شارۋاشىلىعىن، اۋىل ـ قىستاقتى وسىزامانداندىرۋدى جەدەلدەتىپ، اۋىل شارۋاشىلىعىنىڭ دارەجەسىن جاپپاي جوعارىلاتۋدى، اۋىل ـ قىستاقتى جاپپاي العا باستىرۋدى، شارۋالاردى جاپپاي دامىتۋدى ىلگەرىلەتىپ، جاپپاي سوتسياليستىك وسىزاماندانعان مەملەكەت قۇرۋعا پارمەندى تىرەك ازىرلەۋ كەرەك.

باستى نىسانا: 2027 ـ جىلعا بارعاندا اۋىل ـ قىستاقتى جاپپاي گۇلدەندىرۋدە ناقتى ىلگەرىلەۋشىلىككە قول جەتكىزىلىپ، اۋىل شارۋاشىلىعىن، اۋىل ـ قىستاقتى وسىزامانداندىرۋ تىڭ ساتىعا كوتەرىلەدى. مەملەكەتتىڭ استىق حاۋىپسىزدىگى نەگىزى ونان ارى بەكەمدەلىپ، اۋىل شارۋاشىلىعىنىڭ جالپىلىق ٴوندىرىس قۋاتى ورنىقتى جوعارىلاپ، جۇڭگولىقتاردىڭ اس كەسەسىن ٴوز قولىندا مىقتى ۇستاۋىنا شىنايى كەپىلدىك ەتىلەدى؛ اۋىل ـ قىستاق كاسىپ سالاسى اناعۇرلىم گۇلدەنىپ، اۋىل ـ قىستاق كاسىپ سالاسى تۇتاس تىزبەگىنىڭ دارەجەسىن جوعارىلاتۋ جۇزەگە اسىرىلادى؛ اۋىل ـ قىستاق ەكولوگياسى قونىستانۋعا اناعۇرلىم جايلى بولىپ، قونىستانۋ ورتاسى كورنەكتى جاقسارىپ، اۋىل ـ قىستاق نەگىزدىك قۇرىلعىلارى اناعۇرلىم كەمەلدەنىپ، قالا، اۋىل نەگىزگى الەۋمەتتىك قىزمەت وتەۋدىڭ بىركەلكىلەنۋ دەڭگەيى ۇزدىكسىز جوعارىلاتىلادى؛ اۋىل سالتى وركەنيەتى دەڭگەيى ۇزدىكسىز جوعارىلاپ، جۇڭحۋانىڭ تاڭداۋلى ٴداستۇرلى مادەنيەتى تولىق جالعاستىرىلىپ، دامىتىلىپ، شارۋالاردىڭ جالپىلىق ساپاسى جاپپاي جوعارىلاتىلادى؛ اۋىل ـ قىستاقتى باسقارۋ اناعۇرلىم ٴونىمدى بولىپ، اۋىل ـ قىستاقتى باسقارۋ جۇيەسى مەن باسقارۋ قابىلەتىن وسىزامانداندىرۋ دەڭگەيى كورنەكتى جوعارىلاتىلادى؛ شارۋالاردىڭ تۇرمىسى اناعۇرلىم تاماشا بولىپ، كىرىس دەڭگەيى ۇزدىكسىز جوعارىلاپ، اۋىل ـ قىستاقتاعى تومەن كىرىستى حالىقتى جانە دامۋدا كەنجە قالعان وڭىرلەردى ساتىعا، تۇرگە ايىرىپ كومەكتەسۋ ـ سۇيەمەلدەۋ ٴتۇزىمى نەگىزىنەن ورناتىلادى. شىعىس بولىكتەگى دامىعان وڭىرلەردەگى، ورتا، باتىس بولىكتەگى شارت ـ جاعداي ازىرلەگەن ٴىرى، ورتاشا قالالاردىڭ قالا ماڭى رايوندارىنداعى اۋىل ـ قىستاقتاردا اۋىل شارۋاشىلىعى مەن اۋىل ـ قىستاقتاردىڭ وسىزاماندانۋى الدىمەن نەگىزىنەن جۇزەگە اسىرىلادى. 2035 ـ جىلعا بارعاندا اۋىل ـ قىستاقتى جاپپاي گۇلدەندىرۋدە شەشۋشى سيپاتتى ىلگەرىلەۋشىلىككە قول جەتىپ، اۋىل شارۋاشىلىعىن وسىزامانداندىرۋ نەگىزىنەن جۇزەگە اسىپ، اۋىل ـ قىستاق وسى زامانعى تۇرمىس شارت ـ جاعدايىن نەگىزىنەن ازىرلەيدى.

«جوبادا» تاعى قالا مەن اۋىلدىڭ دامۋ جاعدايىن ساپالىلاندىرىپ، اۋىل ـ قىستاقتى جاپپاي گۇلدەندىرۋدى تۇرگە ٴبولىپ، ٴتارتىپتى ىلگەرىلەتۋ؛ وسى زامانعى اۋىل شارۋاشىلىعى قۇرىلىسىن جەدەلدەتىپ، استىق حاۋىپسىزدىگىنىڭ نەگىزىن جان ـ جاقتى بەكەمدەۋ؛ اۋىل ـ قىستاق كاسىپ سالاسىنىڭ جوعارى ساپالى دامۋىن ىلگەرىلەتۋ، شارۋالار كىرىسىنىڭ ارتۋىن جەبەۋ؛ اۋىل ـ قىستاق دارىندىلارىن كۇش سالا باۋلۋ، ٴتۇرلى دارىندىلاردى اۋىل ـ قىستاقتى جاپپاي گۇلدەندىرۋگە ات سالىسۋعا باۋراۋ؛ اۋىل ـ قىستاق مادەنيەتىن گۇلدەندىرىپ، جاڭا داۋىردەگى وركەنيەتتى اۋىل سالتىن جەتىلدىرۋ؛ اۋىل ـ قىستاق ەكولوگيالىق وركەنيەت قۇرىلىسىن ىشكەرىلەي ىلگەرىلەتىپ، دامۋ تاسىلىندە جاسىل تيپ جاڭالاۋدى جەدەلدەتۋ؛ قونىسقا جايلى، كاسىپكە ىڭعايلى، جاراسىمدى، كورىكتى اۋىل ـ قىستاق قۇرىپ، شارۋالاردىڭ ىرىس ـ قۇتىن ارتتىرۋ؛ اۋىل شارۋاشىلىعى، اۋىل ـ قىستاق رەفورماسىن تەرەڭدەتىپ، اۋىل ـ قىستاقتىڭ دامۋ ومىرشەڭ كۇشىن قاۋلاتۋ؛ اۋىل ـ قىستاق نەگىزگى ساتى ۇيىمدىق قۇرىلىسىن كۇشەيتۋ، اۋىل ـ قىستاقتى باسقارۋدى وسىزامانداندىرۋدى ىلگەرىلەتۋ سياقتىلار جونىندە تالاپتار ورتاعا قويىلدى.