قار - مۇز ساياحاتىنىڭ ”ورلەۋى“ تەبىندى بولدى

ىلە وبلىسىنىڭ مادەنيەت، ساياحات تۇتىنۋىندا ۇزدىكسىز جاڭا ومىرشەڭدىك كۇش جارىققا شىقتى

تىلشىلەرىمىز لي يافىڭ، چىن تيانجين، ەرىكتى ٴتىلشى مايرا

سوڭعى جىلداردان بەرى ىلە وبلىسى وزگەشە قار - مۇز بايلىعىن ارقاۋ ەتىپ، قار - مۇز ەلەمەنتتەرىن ۇزدىكسىز اشىپ، قار - مۇز ونىمدەرىن مولايتقاندىقتان ەل ٴىشى - سىرتىنان كەلگەن ساياحاتشىلاردىڭ قاتارى مولايىپ، قار - مۇز ساياحاتى ۇزدىكسىز جانداندى.

ىلە وزەنىنىڭ سولتۇستىك جاعالاۋىنداعى قۇلجا اۋدانى اققۋ كولى كورىنىس رايونى كوكتەم مەرەكەسى كەزىندە كۇنىنە ورتا ەسەپپەن 6 مىڭ ساياحاتشى (رەت) قابىلدادى، دوۋيىن تەكشەسىندە ٴسوز قالدىرۋ مولشەرى 135 ميلليونعا جەتتى.

2 - ايدىڭ 14 - كۇنى ٴتىلشى قۇلجا اۋدانى اققۋ كولى كورىنىس رايونىندا كۇن شىڭىلتىر بولعانىمەن، ساياحاتشىلاردىڭ قىزعىندىلىعىنىڭ باسەڭدەمەگەندىگىن كوردى. ساياحاتشى قابىلداۋ ورتالىعى دىر - دۋمانعا بولەنىپ، بەلەت ساتىپ الۋشىلاردىڭ، اقىل - كەڭەس سۇراۋشىلاردىڭ قاتارى مول بولدى. كول جاعاسىنداعى شارباق جولدا ساياحاتشىلار سەيىل - سەرۋەن اۆتوموبيلىمەن نەمەسە جاياۋ اققۋلاردى تاماشالادى. تاڭدانا قاراپ، سۇيىنە القاپ جاتقانداردى بىردەن كورەسىز. فوتو سۋرەت اۋەسكەرلەرى ٴتىپتى دە تاعاتسىزدانىپ، فوتو اپپاراتتارىن ازىرلەپ، اققۋ مەن كولدىڭ جاراسىم تاپقان تاماشا ساتتەرىن قالت جىبەرمەي سۋرەتكە ٴتۇسىرىپ جاتتى.

ساياحاتشىلارعا ٴتىپتى دە كوپ ساياحات كەشىرمەلەرىن سەزىندىرۋ ٴۇشىن، قۇلجا اۋدانى اققۋ كولى كورىنىس رايونى اۆتوكولىك توقتاتۋ الاڭىن كەڭەيتىپ سالۋ، ساياحات اۆتوكولىگىنىڭ قىزمەت وتەۋ ساپاسىن جوعارىلاتۋمەن بىرگە، شاڭعى تەبۋ، قارلى دالادا اتقا ٴمىنۋ سياقتى ساياحات نىساندارىن العا قويىپ، ساياحاتشىلاردىڭ قىسقى كۇننىڭ قىزىعىنا شومۋىنا مۇمكىندىك جاسادى.

گۋاڭدۇڭنان كەلگەن ساياحاتشى ساي چۋجياننىڭ ايتۋىنشا، بۇل ونىڭ شينجياڭعا 3 - رەت، اققۋ كولى كورىنىس رايونىنا تۇڭعىش رەت كەلۋى ەكەن، بۇل ارانىڭ كوزايىم بولار كوركەمدىگى، سۋرەتكە الۋ ونىمدىلىگىنىڭ كەرەمەتتىگى ۇناعان ەكەن.

قۇلجا اۋدانى تۋراسۋ كورىنىس ساياحات رايونىن باسقارۋ كوميتەتىنىڭ مەڭگەرۋشىسى ليۋ يانجۇن بىلاي دەپ تانىستىردى: بيىل 450 ميلليون يۋان قارجى قوسىپ، ”مادەنيەت - ساياحات+“ دامۋ ۇلگىسى جونىندە ىشكەرىلەي ىزدەنىس جاساپ، وزگەشە مادەنيەت - ساياحات نىساندارىن جانە ونىمدەرىن قالىپتاستىرىپ، اۋىل - قىستاقتى كوركەيتۋگە تىڭ قوزعاۋشى كۇش قوسامىز. مەجەمەن جىل سوڭىنا دەيىن قۇلجا اۋدانى ەل ىشىنەن 7 ميلليون ادام (رەت) ساياحاتشى قابىلداپ، ساياحات كىرىسىن ٴبىر ميلليارد 726 ميلليون يۋانعا جەتكىزىپ، بىلتىرعى سايكەس مەزگىلدەگىدەن %25 ارتتىرادى.

قۇلجا اۋدانى اققۋ كولى كورىنىس رايونىنىڭ دۋمانعا بولەنۋى ـــ ىلە وبلىستىق مادەنيەت - ساياحات كاسىبىنىڭ جوعارى ساپالى دامۋىنىڭ ىقشام كورىنىسى. جۋىق جىلداردان بەرى ىلە وبلىسى پارتيا ورتالىق كوميتەتىنىڭ، مەملەكەتتىك كەڭەستىڭ شينجياڭدى ساياحات ارقىلى گۇلدەندىرۋ ستراتەگياسىن مۇقيات دايەكتىلەندىرىپ، تياناقتاندىرىپ، نازاردى اۆتونوميالى رايوندىق پارتكومنىڭ ”دۇنيە ٴجۇزى دەڭگەيىندەگى ساياحات نىسانالى جەرىن تۇلعالاپ، 100 ميلليارد يۋان دارەجەلى كاسىپ سالاسىن جۇزەگە اسىرۋ، ىلە ساياحات كاسىبىنىڭ جاسىل، ەكولوگيالىق، باياندى دامۋىن ىلگەرىلەتۋ“ نىساناسىنا شوعىرلاندىرىپ، ىلە ەرەكشەلىگىنە يە ”10+ 1 كاسىپ سالاسى شوعىرى“ مەن ”‪1+10+X+N‬“ وسىزاماندانعان كاسىپ جۇيەسىن جەدەل قۇرىپ، ساياحات بايلىعىنداعى ٴىرى وبلىستان ساياحات ەكونوميكاسىنداعى مىعىم وبلىسقا قاراي بۇرىلىس جاساۋدى ۇزدىكسىز ىلگەرىلەتتى. ىلە وبلىستىق مادەنيەت، راديو، تەلەۆيزيا جانە ساياحات مەكەمەسىنىڭ ساناعىنا قاراعاندا، 2025 - جىلعى كوكتەم مەرەكەسى دەمالىسىندا (2025 - جىلى 1 - ايدىڭ 28 - كۇنىنەن 2 - ايدىڭ 4 - كۇنىنە دەيىن) ىلە ەل ىشىنەن ٴبىر ميلليون 727 مىڭ 200 ادام - رەت ساياحاتشى قابىلداعان، بۇل وتكەن جىلدىڭ سايكەس مەزگىلىندەگىدەن %14.5 ارتقان، ساياحاتشىلاردىڭ تۇتىنۋ قاراجاتى ٴبىر ميلليارد 253 ميلليون يۋان بولىپ، بۇل وتكەن جىلدىڭ سايكەس مەزگىلىندەگىدەن % 18.18 ارتىپ، ىلەنىڭ قار - مۇز ساياحاتى جونىندە قالدىرعان لەبىزدەرى ٴارقايسى ٴىرى جاڭا مەديا تەكشەلەرىنىڭ دۋمانىن اسىرعان.

سول كۇنى توعىزتاراۋ اۋدانى ىلگىداي حالىقارالىق قار شاڭعى الاڭىنا بارعانىمىزدا قار شاڭعى جابدىقتارى زالىنداعى ٴتۇرلى جابدىقتار كوزدىڭ جاۋىن الىپ، ساياحاتشىلار شاڭعى تەبۋدەن سىرت، دەمالىس رايونىندا ٴتۇرلى سۋسىندىقتار مەن جەرگىلىكتى ورىننىڭ ەرەكشە تاعامدارىنان ٴدام تاتىپ جاتقانىن كوردىك. توعىزتاراۋ اۋدانىنىڭ ىلگىداي حالىقارالىق قار شاڭعى الاڭى ٴوزىنىڭ ساپالى قۇرىلعىلارى، باي مازمۇندى قيمىلدارى، سونداي - اق جان - جاقتى قىزمەت وتەۋىنىڭ ارقاسىندا، قىسقى ساياحاتتىڭ دۋماندى ورنىنا اينالىپ، كوپتەگەن ساياحاتشىنى قار - مۇزدىڭ تارتىمدىلىعىن سەزىنۋگە باۋراعان.

وسى قار شاڭعى الاڭىنىڭ قىزمەتكەرى ىرىسگۇل سەرقازى قىزى بىلاي دەپ تانىستىردى: كوكتەم مەرەكەسى كەزىندە ساياحاتشىلار كۇن سايىن مولايىپ، ساياحاتشىلارعا حاۋىپسىز جانە قولايلى  بولۋ ٴۇشىن، قار شاڭعى الاڭىنا كاسىپتىك جاتتىقتىرۋشىلار توبى ورنالاستىرىلىپ، قار شاڭعى اۋەسكەرلەرىنە كاسىپتىك جاقتان جەتەكشىلىك ەتىلىپ، كومەك بەرىلدى.

سوڭعى جىلدارى توعىزتاراۋ اۋدانى وزىندىك باسىمدىعىن ىشكەرىلەي ساۋلەلەندىرىپ، نەگىزدىك قۇرىلعىلاردى ۇزدىكسىز كەمەلدەندىرۋ، ساياحات كاسىبىنىڭ كۇيىن ۇزدىكسىز بايىتۋ، قىزمەت وتەۋ ساپاسىن زور كۇشپەن جوعارىلاتۋ ارقىلى ”سۋىق بايلىقتى“ ”قوزعاۋشى كۇشكە” اينالدىرۋعا قۇلشىندى. ساناققا قاراعاندا،  1 - ايدىڭ 28 - كۇنىنەن 2 - ايدىڭ 4 - كۇنىنە دەيىن توعىزتاراۋ اۋدانى ەل ىشىنەن 145 مىڭ 700 ادام - رەت ساياحاتشى قابىلداعان، بۇل بىلتىرعى سايكەس مەزگىلدەگىدەن %17.01 ارتقان، ساياحاتشىلاردىڭ تۇتىنۋ قاراجاتى 65 ميلليون يۋان بولىپ، بۇل بىلتىرعى سايكەس مەزگىلدەگىدەن %18.02 ارتقان.

2025 - جىل − ”14 - بەسجىلدىق“ جوبا اياقتالاتىن، سونداي - اق ”15 - بەسجىلدىق“ جوبا جاسالىپ، ورنالاستىرىلاتىن جىل. ٴتىلشىنىڭ ۇعىسۋىنشا، بيىل ىلە وبلىسى دۇنيە جۇزىلىك دارەجەلى ساياحاتتىڭ نىسانالى جەرى مەن 100 ميلليارد يۋان دارەجەلى مادەنيەت - ساياحات كاسىپ سالاسى شوعىرىن قۇرۋ نىساناسىن كوزدەپ، مادەنيەت - ساياحات كاسىپ سالاسىن جوعارى ساپالى دامىتۋدىڭ 5 جىلدىق جوباسىن ىشكەرىلەي اتقارىپ، ”ٴۇش جەر، توعىز جاق“ ساياحاتتى دامىتۋ بىرىلەسپە سەلبەستىگىن ۇزدىكسىز تەرەڭدەتەدى «تيانشان الەمدىك جاراتىلىستىق مۇرا ٴدالىزى ۇعىمى جوباسى مەن ساياحات ونىمدەرىن جوسپارلاۋ»، «ىلە وبلىسىنىڭ دۇنيە جۇزىلىك دارەجەلى ساياحاتتىڭ نىسانالى جەرى جالپى جوباسىن» جاساۋدى جەدەل ىلگەرىلەتىپ، «ىلە وبلىسى مادەنيەت - ساياحاتىنىڭ <15 - بەسجىلدىق> دامۋ جوباسىن» جاسايدى جانە ىسكە قوسادى. ”كوكتەمدە ساپاسىن جوعارىلاتۋ، جازدا سيىمدىلىعىن ارتتىرۋ، كۇزدە جالپىلاستىرۋ، قىستا مولشەرىن ارتتىرۋ“ وي جەلىسى بويىنشا، ”جالپى ٴوڭىر + تۇتاس ماۋسىم + جالپى ۋاقىت + تۇتاس جاس شاماسى + تۇتاس كاسىپ سالاسى“ سىندى ساياحات جۇلگەسىن بەلسەنە تۇلعالاپ، ەستە قالاتىن، اتى الىسقا تانىلاتىن، كەڭ تاراتاتىن ٴبىر توپ سارا ”ساياحات IP“ ىن تۇلعالاپ، ”تيانشان  اڭعارى . كورىكتى ىلە“ سىندى شىت جاڭا ماركانى ايگىلەيدى.

قار - مۇزدى كورىكتى القاپ . باۋرامدى ىلە