انار بۇلت \ شينجياڭ گازەتىنىڭ ٴتىلشىسى سو رۇڭجى 3 ـ ايدىڭ 15 ـ كۇنى ۇرىمجىدەن حابارلايدى. اۆتونوميالى رايوندىق بازار باقىلاۋ ـ باسقارۋ مەكەمەسىنەن ۇعىسۋىمىزشا، بيىل رايونىمىز اۆتونوميالى رايوننىڭ تۇتىنۋشىلاردىڭ ۇقىق ـ مۇددەسىن قورعاۋ قىزمەتى بويىنشا مەڭگەرمەلەر ارا بىرلەسكەن ٴماجىلىسىنىڭ رولىن تولىق ساۋلەلەندىرىپ، مۇشە ورىندارمەن بىرلەسىپ، تۇتىنۋ ورتاسىن ساپالىلاندىرۋدىڭ 3 جىلدىق ارەكەتىن باستايدى ەكەن.

2025 ـ جىلدان 2027 ـ جىلعا دەيىن رايونىمىز 3 جىل ۋاقىت جۇمساپ، تۇتىنۋمەن قامداۋ ساپاسىن جوعارىلاتۋ، تۇتىنۋ ٴتارتىبىن ساپالىلاندىرۋ، تۇتىنۋ ۇقىعىن قورعاۋ ونىمدىلىگىن جوعارىلاتۋ، تۇتىنۋ ورتاسىن بىرگە جونگە سالۋ، تۇتىنۋ ورتاسىنا جەتەكشىلىك ەتۋ سىندى 5 ۇلكەن ارەكەتتى جەتەكشى ەتىپ، ساپا ولشەمى، سەنىمدىلىك تەجەمى، كەشەندى جونگە سالۋ، تۇتىنۋ ۇقىعىن قورعاۋ سياقتى تۇزىمدەردى ونان ارى كەمەلدەندىرىپ، ”تۇتىنۋ ورتاسىن ساپالىلاندىرۋ — تۇتىنۋ سەنىمىن سەرپىلتۋ — تۇتىنۋ قاجەتىن كەڭەيتۋ“ سىندى تاماشا اينالىم ورناتىپ، الاڭسىز تۇتىنۋ ورتاسىن جاپپاي قالىپتاستىرادى.

اۆتونوميالى رايوندىق بازار باقىلاۋ ـ باسقارۋ مەكەمەسى ينتەرنەت باقىلاۋ ـ باسقارۋ باسقارماسىنىڭ باستىعى ياڭ جۇن بىلاي دەپ تانىستىردى: رايونىمىز ”شينجياڭدا الاڭسىز تۇتىنۋ“ ايگىلى ماركاسىن تۇلعالاپ، حاۋىپسىز، الاڭسىز تۇتىنۋ ورتاسىن قالىپتاستىرىپ، رازى بولاتىن تۇتىنۋدى بىرگە سومدايدى. ناقتى شارالاردا ازىق ـ تۇلىك، ٴدارى ـ دارمەك، ەرەكشە جابدىقتار، ٴونىم ساپاسى حاۋىپسىزدىگىن باقىلاۋ ـ باسقارۋدى مىقتى يگەرەدى؛ ”تۇتىنۋدى قورعاۋ“ تەگەۋرىندى ارەكەتىن ۇزدىكسىز ىشكەرىلەي ورىستەتەدى؛ تۇتىنۋ ۇقىعىن قورعاۋعا قىزمەت وتەۋ پۋنكتى قۇرىلىسىن كۇشەيتىپ، الاڭسىز تۇتىنۋدى جانە جەلىدەن تىس زات ساتىپ العاندا زاتتى سەبەپسىز قايتارۋ ۋادەسىن تەرەڭدەتىپ، كاسىپورىنداردىڭ تۇلعالىق جاۋاپكەرشىلىگىن ٴونىمدى كۇشەيتىپ، ۇقىقتى قورعاۋ قىزمەتىنىڭ ونىمدىلىگىن بار كۇشپەن جوعارىلاتادى؛ تۇتىنۋ ارىز ـ شاعىمىن اشىق جاريالاۋدىڭ ينتەرنەت جەلىسىنەن تىسقارىعا قاراي كەڭەيۋىن ىلگەرىلەتىپ، تۇتىنۋ سالاسىنداعى ينفورماتسيا سايكەسپەۋشىلىگىن ازايتىپ، تۇتىنۋشىلاردىڭ جاعدايدان حاباردار بولۋ ۇقىعى مەن تاڭداۋ ۇقىعىن اناعۇرلىم ويداعىداي قامتاماسىز ەتەدى؛ ۇگىتتەۋدى، تاربيەلەۋدى، جەتەكشىلىك ەتۋدى، زاڭ جالپىلاستىرۋ ۇگىتىن كۇشەيتىپ، قوعامدىق رايدى بەلسەنە قالىپتاستىرادى؛ سونىمەن قاتار ارىز ـ شاعىمدى، اشكەرەلەۋدى ٴبىر جاقتى ەتۋ قىزمەتىن ونان ارى ارناعا ٴتۇسىرىپ، بازار باقىلاۋ ـ باسقارۋ سالاسىنداعى كاسىپتىك تولەم الۋ، ارىز ـ شاعىم، اشكەرەلەۋ ارەكەتتەرىن زاڭ بويىنشا ٴبىر جاقتى ەتەدى؛ تۇتىنۋ ۇقىعىن قورعاۋ كۇشىن كۇشەيتىپ، نەگىزگى ساتى تۇتىنۋشىلار قوعامىنىڭ ۇيىمدىق قۇرىلىسىن كۇشەيتەدى.