ىلە وبلىسى جالعان، جارامسىز تاۋارلاردى ٴبىر جاقتى ەتتى

دەلوعا ساياتىن  تاۋار قۇنى ٴبىر ميلليون 380 مىڭ يۋاننان استى

تىلشىلەرىمىز ياڭ جيڭ - ي، رىن جيالي حابارلايدى. ”15 - ناۋرىز“ حالىقارالىق تۇتىنۋشىلاردىڭ ۇقىق - مۇددەسىن قورعاۋ كۇنى قارساڭىندا، ىلە وبلىستىق بازاردى باقىلاۋ - باسقارۋ مەكەمەسى 3 - ايدىڭ 12 - كۇنى زور كولەمدى جالعان، جارامسىز تاۋارلاردى ورتەۋ قيمىلىن ورىستەتىپ، زاڭسىز دامدەندىرگىش قوسىلعان ازىق - تۇلىك، اتكەزشىلىكپەن ەنگىزىلگەن تەمەكى سياقتى 7 ۇلكەن تۇردەگى 105 توننا جالعان، جارامسىز تاۋاردى شوعىرلى ورتەدى، دەلوعا ساياتىن تاۋاردىڭ جالپى قۇنى ٴبىر ميلليون 387 مىڭ 700 يۋانعا جەتتى.

وسى رەتكى جالعان، جارامسىز تاۋارلاردى ورتەۋ ارەكەتىندە زالالسىزداندىرىپ ٴبىر جاقتى ەتۋ ٴتاسىلى قولدانىلىپ، بۇلار ازىق - تۇلىك، كۇندەلىكتى تۇتىنۋ بۇيىمدار، قۇرىلىس ماتەريالدارى سياقتى كوپتەگەن حالىق تۇرمىسى سالاسىنا سايادى. ورتەلىپ ٴبىرجاقتى ەتىلگەن تاۋارلار زاڭسىز دامدەندىرگىش قوسىلعان ازىق - تۇلىك، اتكەزشىلىكپەن ەنگىزىلگەن تەمەكى،  كۇندەلىكتى تۇتىنۋ بۇيىمدارى جاعىندا ۇقىققا قول سۇعۋ سياقتى حاۋىپ - قاتەرى جوعارى تاۋارلاردى قامتىپ، جالعان، جارامسىز تاۋارلاردىڭ ەكىنشى رەتكى اينالىم ارناسىن ٴتۇپ قاينارىنان ٴۇزىپ تاستادى. ۇعىسۋعا قاراعاندا، ىلە وبلىسىنىڭ 12315 ارىز ـ شاعىم، اشكەرەلەۋ ورتالىعى 2024 ـ جىلى تۇتىنۋعا قاتىستى ارىز ـ شاعىمنان 13 مىڭ 500 ىن قابىلداپ، ٴبىر جاقتى ەتۋ مولشەرىن %99.2 كە جەتكىزىپ، تۇتىنۋشىلاردىڭ 4 ميلليون 485 مىڭ 300 يۋان زيانىن تولىقتاپ بەرگەن. وبلىستىق بازاردى باقىلاۋ - باسقارۋ جۇيەسى زاڭعا قايشى 4 مىڭ 41 دەلونى تەكسەرىپ ٴبىر جاقتى ەتىپ، ايىپ سالعان، تاركىلەگەن تاۋارلارىنىڭ جالپى سوماسى 11 ميلليون 336 مىڭ يۋان بولىپ، 45 دەلونى ٴادىليا ورگاندارىنا وتكىزىپ بەرىپ، پارمەندى سەس كورسەتىلگەن.

”ٴبىز ’تۇتاس ٴوڭىر بويىنشا بىرلەسىپ قيمىلداۋ + زەردەلى باقىلاۋ ـ باسقارۋ‘ سىندى جاڭاشا جونگە سالۋ جۇيەسىن قۇرۋدامىز“ دەدى ىلە وبلىستىق بازاردى باقىلاۋ - باسقارۋ مەكەمەسى پارتيا باسشىلىق گرۋپپاسىنىڭ شۋجيى ۋاڭ لۇڭ. ول تاعى بىلاي دەدى: 2025 - جىلى تۇتىنۋ ۇقىعىن قورعاۋ قىزمەتىنە ۇزدىكسىز كۇش سالىپ، ٴوڭىر، تاراۋ اتتاعان بىرلەسكەن ٴماجىلىس ٴتۇزىمىن ورناتۋدى ىلگەرىلەتىپ، تاراۋلاردىڭ سەلبەستىگىن كۇشەيتىپ، زاڭعا قايشى قىلمىستارعا سوققى بەرۋدىڭ كۇشتى بىرىككەن كۇشىن قالىپتاستىرامىز. ەندى ٴبىر جاعىنان، سيفرلى تەحنولوگيادان تولىق پايدالانىپ، باقىلاۋ ـ باسقارۋدىڭ ”ينتەرنەت + باقىلاۋ ـ باسقارۋ“ ۇلگىسىنە سۇيەنىپ، باقىلاۋ ـ باسقارۋدىڭ زەردەلىلەنۋ دەڭگەيىن جوعارىلاتىپ، زاڭعا، بەلگىلەمەگە قايشى ارەكەتتەرگە تاسالاناتىن جەر قالدىرمايمىز. مۇنان سىرت، بازاردى باقىلاۋ - باسقارۋ مەكەمەسى نازاردى حالىق تۇرمىسىنا كوڭىل بولۋگە شوعىرلاندىرىپ، مەكتەپ اسحاناسى، ينتەرنەتتە ساتىلاتىن ازىق - تۇلىك، اۋىل - قىستاق بازارى، سونداي - اق ”قارتتار مەن بالالار “ سياقتى ٴتۇيىندى سالالارعا جاپپاي تەكسەرۋ جۇرگىزىپ، تۇتىنۋشىلاردىڭ الاڭسىز ساتىپ الۋىنا، الاڭسىز تۇتىنۋىنا، الاڭسىز تاماقتانۋىنا مۇمكىندىك جاسايمىز.