مەملەكەتتىك دالالىق قار شاڭعى اعا جۇلدەگەرلىك جارىسى اياقتالدى

ىلە سپورتشىلارى ٴۇش التىن مەدال، ٴبىر كۇمىس مەدال الدى

ٴتىلشىمىز ليۋ چۇنشيڭ حابارلايدى. ىلەنىڭ سپورت ساڭلاقتارى جارىستا قايسارلىق كورسەتىپ، مەملەكەتتىك جارىستا تاعى دا تاماشا ناتيجەگە قول جەتكىزدى.

3 - ايدىڭ 2 - كۇنى  2024 - 2025 - جىلعى جارىس ماۋسىمىندا مەملەكەتتىك دالالىق قار شاڭعى اعا جۇلدەگەرلىك جارىسى شينجياڭنىڭ التاي قالاسىندا اياقتاپ، شينجياڭ كومانداسى اتىنان جارىسقا قاتىناسقان ىلە سپورتشىسى ەرنار ٴابدىلقان ۇلى، دينار تالداۋبەك قىزى 3 التىن مەدال، ٴبىر كۇمىس مەدال الىپ، ىلە سپورتشىلارى وسى جارىسقا قاتىناسقاننان بەرگى ەڭ جاقسى ناتيجەگە قول جەتكىزدى.

بۇل رەتكى جارىس 2 - ايدىڭ  24 - كۇنى التاي قالاسىنىڭ سارقوبى دالالىق قار شاڭعى الاڭىندا باستالدى، بۇكىل ەلىمىزدەن كەلگەن 18 ۋاكىلدەر كومانداسىنداعى، 360 تان استام سپورتشى 7 كۇندىك قار - مۇز جارىسىنا قاتىناستى. بۇل رەتكى جارىس جيىنى 12 ٴتۇر بويىنشا وتكىزىلدى، مۇندا ەرلەر مەن ايەلدەردىڭ ەكى ادامدىق قۋالاي سىرعاناۋ (10 كيلومەترلىك ٴداستۇرلى تەحنيكا + 10 كيلومەترلىك ەركىن تەحنيكا)، ەرلەر مەن ايەلدەردىڭ جەكە قىسقا ارالىققا سىرعاناۋ (ەركىن تەحنيكا)، ەرلەر مەن ايەلدەردىڭ 10 كيلومەترلىك ارالىق تاستاپ سىرعاناۋ (ٴداستۇرلى تەحنيكا)، ەرلەر مەن ايەلدەر توپتىق قىسقا ارالىقتا سىرعاناۋ (ٴداستۇرلى تەحنيكا)، ەرلەر مەن ايەلدەردىڭ 50 كيلومەترلىك ارالىقتا كوللەكتيۆ سىرعاناۋ (ەركىن تەحنيكا)، ەرلەر مەن ايەلدەردىڭ 7.5×4 كيلومەتر ارالىقتا كۇش جالعاپ سىرعاناۋ (2 ادامدىق ٴداستۇرلى تەحنيكا + 2 ادامدىق ەركىن تەحنيكا) جارىسى قامتىلدى.

ەرنار ەرلەر جارىسىنىڭ 6 تۇرىنە تولىق قاتىناستى، ٴبىر كۇندە ٴبىر جارىسقا قاتىناسىپ، ەرلەردىڭ جەكە قىسقا ارالىقتا (ەركىن تەحنيكا)، ەرلەردىڭ توپتىق قىسقا ارالىقتا (ٴداستۇرلى تەحنيكا) سىرعاناۋى سىندى ەكى تۇردەن اعا جۇلدەگەر بولدى. بۇدان سىرت، ول تاعى ەرلەردىڭ 50 كيلومەتر ارالىقتا توپتىق سىرعاناۋ جارىسىنىڭ (ەركىن تەحنيكا) جۇلدەگەرلىگىن الدى. باسقا تۇرلەردە ول تاعى ەكى رەت ٴتورتىنشى بولدى.

”جالپى جاقتان العاندا قالىپتى ونەر كورسەتىپ، ٴبىر جارىس تۇرىندە جىعىلىپ قالعاندىقتان ون سەگىزىنشى بولدى “. ەرنار: ”ٴالى دە تەحنيكامدى جوعارىلاتۋىم، جالعاستى جاتتىعۋىم قاجەت ەكەن“ دەدى.

دينار ايەلدەردىڭ 6 ٴتۇرىنىڭ ىشىندە 5 جارىس تۇرىنە قاتىناسىپ، ەڭ سوڭعى كۇنى ايەلدەردىڭ 50 كيلومەترلىك كوللەكتيۆ سىرعاناۋ جارىسىندا (ەركىن تەحنيكا) اعا جۇلدەگەر بولدى. باسقا تۇرلەر بويىنشا ٴبىر رەت ٴتورتىنشى، ەكى رەت بەسىنشى، ٴبىر رەت ٴبىرىنشى بولدى. ايەلدەردىڭ 50 كيلومەترلىك ۇزاق ارالىققا توپتىق سىرعاناۋ (ەركىن تەحنيكا) جارىسىندا، ساپتاستارىنىڭ جىگەرلەندىرۋىندە ەڭ الدىمەن كومبەگە جەتىپ، قايسارلىعى مەن توزىمدىلىگىنىڭ ناتيجەسىندە التىن مەدالعا يە بولدى.

3 ـ ايدىڭ 3 ـ كۇنى تۇستەن بۇرىن ۇرىمجىگە قايتىپ كەلگەن دينار تىلشىگە: ”ەرەكشە شارشادىم، كەشە جارىس اياقتاعاننان قازىرگە دەيىن ونە بويىمدى الا الماي قالدىم“ دەدى.

بيىل 24 جاستاعى ەرنار كۇنەس اۋدانى نارات قالاشىعى تاياسۋ قىستاعىنان كەلگەن، جۇڭگو دالالىق قار شاڭعى سپورتشىسى رەتىندە حالىقارالىق قار شاڭعى بىرلەستىگىنىڭ دالالىق قار شاڭعى ٴنومىر جيناۋ جەلىلەس جارىسىنا، مەملەكەتتىك دالالىق قار شاڭعى جۇلدەسىنە تالاسۋ جارىسىنا، مەملەكەتتىك دالالىق قار شاڭعى اعا جۇلدەگەرلىك جارىسىنا كوپ رەت قاتىناسقان. مۇنىڭ ىشىندە  2021 - 2022 - جىلعى حالىقارالىق قار شاڭعى بىرلەستىگىنىڭ دالالىق قار شاڭعى FIS ٴنومىر جيناۋ جەلىلەس جارىسىندا (التاي بەكەتى)، ەرلەردىڭ 15 كيلومەترلىك سىرعاناۋ (ەركىن تەحنيكا) جارىسىنىڭ اعا جۇلدەگەرى بولعان. جاقىندا چاڭبايشان ۇستىرتىندەگى قار مۇزعا جاتتىعۋ بازاسىندا وتكىزىلگەن 2024 - 2025 - جىلعى جارىس ماۋسىمى مەملەكەتتىك دالالىق قار شاڭعى لوڭقاسىنا تالاسۋ جارىسىندا، ول ٴبىر دوسىمەن بىرگە ەرەسەك ەرلەر گرۋپپاسىنىڭ قىسقا ارالىقتا سىرعاناۋ جارىسىندا (ەركىن تەحنيكا) چەمپيونى بولىپ، كوماندالاسىمەن بىرگە ەرەسەكتەر گرۋپپاسى بويىنشا ەرلەردىڭ 7.5× 4 كيلومەترلىك كۇش جالعاپ سىرعاناۋ جارىسىنىڭ جۇلدەگەرى بولدى ٴارى ەرەسەكتەر گرۋپپاسىندا ەرلەردىڭ 10 كيلومەترلىك (ەركىن تەحنيكا) جارىسىندا جۇلدەگەر، ەرەسەكتەر گرۋپپاسىندا ەرلەردىڭ 50 كيلومەترلىك جارىسىندا (ٴداستۇرلى تەحنيكا) توپتىق سىرعاناۋدا جۇلدەگەر بولدى.

بيىل 24 جاستاعى دينار موڭعۇلكۇرە اۋدانى سارقوبى قالاشىعى سۋىقتوعاي قىستاعىنان كەلگەن، جۇڭگو دالالىق قار شاڭعى سپورتشىسى رەتىندە ول ساپتاستارىمەن بىرگە 2023 - 2024 - جىلعى جارىس ماۋسىمىنداعى مەملەكەتتىك دالالىق قار شاڭعى جۇلدەگە تالاسۋ جارىسىنىڭ اشىق گرۋپپاسى ايەلدەردىڭ 45 كيلومەترلىك كۇش جالعاپ سىرعاناۋ جارىسىندا ٴبىرىنشى، 2023 - 2024 - جىلعى جارىس ماۋسىمىنداعى مەملەكەتتىك دالالىق قار شاڭعى اعا جۇلدەگەرلىك جارىسىندا ايەلدەردىڭ 7.5× 4 كيلومەتر ارالىقتا كۇش جالعاپ سىرعاناۋ جارىسىندا ٴبىرىنشى بولۋداي جاقسى ناتيجەگە قول جەتكىزگەن. تاياۋدا چاڭبايشان ۇستىرتىندەگى قار - مۇزعا جاتتىعۋ بازاسىندا وتكىزىلگەن 2024 - 2025 - جىلعى جارىس ماۋسىمىنداعى مەملەكەتتىك دالالىق قار شاڭعى جۇلدەگە تالاسۋ جارىسىندا ول ەرەسەكتەر گرۋپپاسىنداعى ايەلدەردىڭ 10 كيلومەترلىك (ەركىن تەحنيكا) جارىسىندا اعا جۇلدەگەر بولىپ، ٴبىر ساپتاسىمەن بىرگە ەرەسەكتەر گرۋپپاسىنداعى ايەلدەردىڭ قىسقا ارالىقتا (ەركىن تەحنيكا) سىرعاناۋدان جۇلدەگەر بولدى.

ەرنار كومبەدە. (ەرنارٴوزى بەرگەن سۋرەت)

دينار سيلىق كۋالىگى مەن التىن مەدالىن كورسەتۋدە. (دينار ٴوزى بەرگەن سۋرەت)

 اعا جۇلدەگەر ەرنار (ورتاداعى قىزىل كيىمدى) سيلىق مىنبەسىندە. (ەرنار ٴوزى بەرگەن سۋرەت)